阿里巴巴今年已升三成，愛馬士ADR歷史新高。法國股市大過英國。美股可能一段時間跑輸？全球100大公司 (Patreon)

阿里巴巴開年6日已經升30%。滿意未？

最好就「壞消息」買，做唔到就「冇消息」時買，都做唔到就唔好睇消息買

升7000點你先飛入去，買貴4成，呢啲先係風險。但亦唔係叫你不停等

最好就10月前買，第二好就而家

美匯跌債息跌，但美股繼續跑輸。不過科技股值得睇

愛馬士 ADR都新高了，滿意未？

法國股市今年好強。已經大過英國

今年都係比較睇好美股以外嘅嘢

但唔好自作聰明沽晒啲美股

2000-2010係新興市場，2010-2020係美股，而家係咪又執位？

留意2008嘅轉折位係金融海嘯，2020嘅轉折位係疫情同加息

100大公司，美國60間，中國13。法國英國呢？日本韓仔呢？

法國股市大過英國，本身冇乜特別。你估真係有common law先金融中心？

英股跑輸多年，唔通倫敦就唔係金融中心？美股迷失十年，唔通紐約就玩完？

1. 寫文時星期二日頭。市況方面，就不重複太多。你見都係嗰幾味。

2. 港股嘅，繼續強勢（星期二回返少少），阿里巴巴9988開年六日已升咗三成，之前都寫咗，大落後，Risk on，監管放鬆。

3. 港股強好主要亦係人民幣強（亦即係美金弱），但你見內房係回返啲，sell on fact十分常見（但未必次次係）。

最好就「壞消息」買，做唔到就「冇消息」，都做唔到就唔好睇消息

4. 總之，啲嘢未郁之前就買，唔好見到有「好消息」先衝入去。根本就係「壞消息」時先應該買，做唔到嘅就「冇消息」時買，或者唔理「好消息」「壞消息」定「冇消息」，想買就買。

升7000點你先飛入去，買貴4成，呢啲先係風險。但亦唔係叫你不停等

5. 呢啲都係之前講金句時常講，點解我不厭其煩係咁講，因為你見真係有用。而家升咗7000點（四成！）你先飛入去，風險當然大好多，你買貴四成喎。但，亦唔係叫你而家就乜都唔做。

最好就10月前買，第二好就而家

6. 總之：最好就你10月買，第二好就而家。唔好又玩「等回下先」，因為十個有九個到回返4000點，必定又話世界末日。4000點喎！兩成喎！熊市喎！

美匯跌債息跌，但美股繼續跑輸。不過科技股值得睇

7. 值得講多啲嘅係美股，星期五升得一日，星期一又係冇乜力，暫時我都係估美股今年會跑輸（下面詳細講）。不過你留意有啲其他發展就幾正面嘅，債息繼續落，美金繼續落，呢啲都會利好股票　—　只係未必美股最受惠（估值嘛）。而另一方面你見到啲科技股開始跑返贏（可能因為債息落），我覺得可以睇返啲大型公司，有錢賺嗰啲。蘋果，微軟，甚至Nvidia，台積電，ASML之類。

愛馬士 ADR都新高了，滿意未？

8. 好啦，Facebook 都有貼，LVMH同愛馬士在歐洲都創咗歷史新高。有啲人話唔係喎，取巧喎，你買ADR喎，在美國都未創新高—好心啦，爭嗰幾個巴仙，執著於呢啲嘢對你有何益處？話口未完，愛馬士ADR都歷史新高了，滿意未？

9. 點解咁強？講咗啦，生意好，純利一早高過疫情前。但只係咁簡單？留意，啲估值都幾貴。愛馬士真係唔係好買得落手。

法國股市今年好強。今年都係比較睇好美股以外嘅嘢

10. 於是我想帶到另一樣嘢：兩間都法國公司喎。你見到，法國股市今年表現好好，遠遠好過美股（邊度睇？上次講咗架下，呢度，呢度，呢度。記得要成日睇文）。

但唔好自作聰明沽晒啲美股

11. 我嘅睇法一路都係，短期（三五七個月啦，或者一年）美股應該跑輸，因為估值。但除咗港股，仲有好多市場可以睇。不過，我亦唔係叫你沽晒啲美股。長線（十年八年）依然係睇好美股多啲，而投資當然係要靠長線，我自己都一股冇沽過。幾時都話在配置上調整，或者只係用新錢去調整，好怕啲讀者自作聰明，「喂你話今年美股跑輸喎咁即係叫我沽晒佢啦點解唔係」，然後可能年尾又嚟鬧我。首先，跑輸不等於會跌。第二，投資睇長線。而最後，「如果我錯呢？」。你鍾意年尾鬧我幾句，你爽就好，但唔會令你多錢咗，亦唔會令你進步。

2000-2010係新興市場，2010-2020係美股，而家係咪又執位？

12. 我有個諗法，就係美股可能真係未來一段長時間都跑輸。你見好似真係有個周期咁，2000-2010係新興市場，價值股。2010-2020就係美股，增長股。而家係咪又到轉折位？唔知，但照計咁寫會幾吸引。順手留意，2010嘅轉折位，好可能就係2008年後嘅印錢低息。而2020嘅轉折位，亦可能係疫情後嘅加息。

留意2008嘅轉折位係金融海嘯，2020嘅轉折位係疫情同加息

13. 有機會詳細寫，但呢個真係我嘅一個大長期信念，好啱公海啲友睇。Narrative嘛

14. 但唔該，唔係叫你沽晒美股，睇多次12段。

100大公司，美國60間，中國13。法國英國呢？日本韓仔呢？

15. 仲有可能留意嘅係，早前法國股市，市值已經超過英國。唔好忘記，法國經濟規模仲要細過英國，而巴黎係極少外國公司上市嘅。

16. 上次資源共享咗啲網站，唔少讀者讚好。好事，多讚賞，少批評。咁再嚟多個，呢個網站亦係我常用，你會見到全世界，不同行業，不同國家嘅公司，按市值排名。仲可以download個Excel嚟玩（我幫你download 埋，attachment 有，但日日會變），非常適合你了解多啲個世界

17. 你會見到，頭100大之中，美國佔咗60間，當然係資本主義樂園。

18. 中國呢？13間（另外，香港同台灣各一，台灣就你懂的，但香港你未必估到係邊間），中國又冇你想像中咁少，但當然國情不同，以前就都係資本主義樂園，甚至樂過美國，而家唔係。英國5間，但普遍都排得較後，而且唔好忘記，Uniliver, Shell, Linde呢啲係咪叫「英國公司」都可以拗返幾萬字。

19. 但重點係，歐洲。歐洲大陸嘅公司，都有13間，同中國平起平坐，仲有啲貨賣。留意同該國GDP冇乜關係，最多嘅正係法國，5間。LV愛馬士，仲有Dior同L’ Oreal，同埋一間能源公司。瑞士3間（雀巢，同埋兩間藥廠），荷蘭2間（ASML，同埋騰訊個friend Prosus）。德國得1間（你未必估到邊間），丹麥又有1間（Health Care嘢），愛爾蘭1間（你可能都未必估到係愛爾蘭公司）

20. 亞洲其他？印度兩間，Reliance Industries 同Tata consultancy（印度冒起中，之後應該更多），韓國一間（仲有邊間？），日本都係得一間，Toyota

21. 其他呢？澳洲加拿大各一，你未必估到係邊間。沙地阿拉伯一間，當然係沙特阿美。阿聯酋（即係杜拜同阿布扎比嗰樹）都有間，間嘢叫International Holding Company，你可以慢慢研究下係做乜的

法國股市大過英國，本身冇乜特別。你估真係有common law先金融中心？

22. 法國股市大過英國，本身冇乜特別，只係話你知，唔好信啲政治KOL講乜鬼「有common law先做到金融中心」。況且，金融中心亦唔係睇你市值幾大，睇股票升幾多（超，深圳股市一早係倫敦一個開）。而英國股票跑輸多年，但唔通倫敦地位就不保？美股之前都迷失十年，唔通紐約嗰時就地位不保？

23. 金句話齋，你網上睇嘅，好多都係垃圾，而多數人都係錯嘅。又一例證。

24. 講到尾，投資機遇多的是。唔好以為一定係港股美股。當然買個股就過癮兼學到嘢，但真係抵得悶嘅，可能都係ETF算。邊隻？以前寫過啦，早幾日公開持倉都有，遲下再詳細講。