央行狂買金。日圓易升難跌。Tesla點算好。人仔強勢，放鬆三度紅線，買乜內房？馬雲失去了一切，好事定壞事？美股因乜升700？如何分辧信邊個？ (Patreon)

速講：黃金6個月新高，新牛市？央行係咁買，係咪法幣爆煲？

速講：日圓6算，應該易升難跌。但係咪利好日本股？邊啲股較好？

速講：Tesla：買咗使唔使斬？未買想買好唔好？

港股就4日升1200點，6%，24最勁。「咁經濟係咪24年最好景丫」

放寛「三道紅線」，人民幣又強勢，咁買乜內房好？

即係，政府又被騎劫了。一收就死，一死就放，一放就亂，一亂就收

美股：好消息定壞消息？理得佢。

就業放慢，通脹回落，加息完場—我講咗半年啦老細。之前唔見你買？

商品跌晒，供應鏈正常，航運價回落　—就只係爭人工　—都放慢了

通脹總係會回落，息總有一日加完，但你冇可能「等」到佢出現

馬雲失去了一切：好消息定壞消息？你話呢？

螞蟻係咪上得返市？幾時？

Facebook 文跟進　—　股市係好公平嘅。咩叫「好消息」？

如何分辨假先知：教你點樣決定聽乜人講嘅嘢，三個標準

我亦都自抽，我都唔係三個標準完全做到

我嘅對象唔係一窮二白然後想兩個星期賺幾倍嘅人

1. Phew，市場太多嘢寫，所以前話寫Tesla，黃金，日圓，應該都係一拖再拖。反正唔係最迫切。但廢事有人鬧又走數，畀定啲快結論你。但當然，只睇結論係冇意思嘅，日日你在街都見到有人講今年升定跌架啦。

速講：黃金6個月新高，新牛市？央行係咁買，係咪法幣爆煲？

2. 黃金六個月新高，央行係咁買。但你只能買好少好少，你組合5%（可能都太多）。唔好信埋啲法幣崩潰，央行做好準備嘅「貨幣戰爭」式narrative，都話你網上睇嘅好多係垃圾，而多數人都係錯嘅。你可以留意下，不停買嘅央行，係邊啲央行？肯定唔係美國英國

速講：日圓6算，應該易升難跌。但係咪利好日本股？邊啲股較好？

3. 日圓，就應該係易升難跌。我講三五七個月啦下，一兩星期嘅無謂花時間討論，幾年亦都冇人知。原因首先係美金見晒頂，另外之前都寫咗日本央行聖誕節嘅震憾彈，相當肯定係轉政策轉向嘅前奏。而家一路有人估日本會正式退出寛鬆政策了。但係咪一定利好日本股？當然唔係咁簡單。往往股價同匯率有一定負相關。遲下可以睇下有乜股票利好（我會估：日本交易所8697，但舊年表現好差的）

速講：Tesla：買咗使唔使斬？未買想買好唔好？

4. 至於Tesla？仲長篇。但一句：有嘅可以坐下，冇嘅唔使買。現價己經唔算太離地。你話升一倍都仲得（但當然要時間），但走去瞓身做槓杆以為短期會升幾倍嘅，就千萬唔好（記得舊年有啲讀者話買TQQQ，仲話借錢買，我有勸止，希望佢有聽）

5. 拿，速講咗啦，但唔好太過自作聰明（例如以為日圓升就買日本股）。不過你要我詳細講，咪又會有人鬧做乜唔講市況。但真係話你知，你要嘅係心態同思想，唔係冧把。

港股就4日升1200點，6%，24最勁。「咁經濟係咪24年最好景丫」

6. 好啦，點解多嘢寫？你都估到，當然因為升市。港股就不太多講，雖然星期五回返啲，但留意新年4日升咗1200點，6%，已經24年最勁嘅開局。

放寛「三道紅線」，人民幣又強勢，咁買乜內房好？

7. 特別留意人民幣繼續強勢。另一方面，都傳咗幾日，但似乎真係會放寛內房嘅「三道紅線」，唔知係乜嘅，可以睇文，或睇圖。

8. 有啲tricky嘅係：其實我覺得唔係一個好主意，之前就係唔想啲公司舉債擴張，但明顯後來發現搞唔掂，要放鬆返。亦可以話，政府再一次被騎劫咗。

9. 而呢個消息，其實係益咗啲二三線內房。甚至你可以話對中海外688華潤置地1109之類不利。呢兩隻之前咁強，唔多唔少係因為肯定唔會死，甚至可以大食細。但而家放鬆晒，就應該睇啲細型公司。

即係，政府又被騎劫了。一收就死，一死就放，一放就亂，一亂就收

10. 問題係，一來已經升咗唔少，你見星期五都係佢地升得最多。二來你啲大陸嘅嘢，過一頭半個月，又收緊返又唔奇。理論上當然你買最細最垂危嘅，就反彈得越勁。但我係比較保守嘅，所以可能都只係睇呢兩間後面嘅幾間。例如？例如你睇恒指成份股入面嘅，龍湖960，碧桂園2007。

11. 又，大陸嘅嘢，幾廿年嚟，好多嘢話變就變（你睇啲防疫政策？）。但不變嘅真係一句：一收就死，一死就放，一放就亂，一亂就收。慢慢嗒真啲。

美股：好消息定壞消息？理得佢。

12. 美股方面，亦都一洗之前三日頹勢，卒之有個似樣嘅一日。留意背後嘅「原因」。首先係歐元區嘅通脹低過預期，冇錯仲係9%以上，最緊要係個走勢，同埋遠低於預期。咁已經開始又再燃起「通脹回落」嘅希望（其實我呢度講咗半年）

13. 更重要嘅係，美國嗰邊出嘅就業數據。其實真係「好壞參半」。你見個非農數字係強過預期，就業市場強勁，對股市未必好事。當然亦可以演繹做職位增長已經放緩（narrative啫，任你講）。

就業放慢，通脹回落，加息完場—我講咗半年啦老細。之前唔見你買？

14. 但最重要嘅係，人工增長，就真係明顯放慢，又低過預期。呢個就大件事了，因為之前都有講，商品價格已經跌晒，而供應鏈問題又舒緩晒，航運價亦跌晒。唯一令人擔心通脹前景嘅，就係就業市場太強勁，有人工加（不過留意，啲人工加幅係跑輸通脹的，所以唔投資就必然向下流）—就真係分分鐘最後一道障礙都掃走埋

商品跌晒，供應鏈正常，航運價回落　—　就只係爭人工　—都放慢了

15. 市場嘅反應，好明顯。2年債息急跌（因為同聯邦基金利率關係大），10年嘅都係。美金跌（亦即係人民幣升）。

16. 個劇本，當然就係通脹見頂，加息差唔多搞掂。見到冇？絶對唔使等到真係減息先升。金句系列不停講，一日你唔學會呢啲嘢，只會不停犯錯。

17. 仲有，2月頭嘅加息預期，亦都急回。原本加0.25嘅機會一度落得得5成多啲，就業數字一出，就升到去七成幾。除非之後出嘅通脹數字有好大意外，否則，之前講嘅放慢加息（11月0.75，12月0.5，2月0.25）劇本，就會上演。

18. 美股當然升得好，雖然我估今年表現可能不及其他市場。但當然都係可以買，不過記得分散，分段。同埋自問心血少嘅，就買多啲ETF，少啲個股

通脹總係會回落，息總有一日加完，但你冇可能「等」到佢出現

19. 見到冇？通脹總係會回落，息總有一日加完，但你冇可能「等」到佢出現先買。況且到你等到，又會擔心其他嘢，根本日日都有風險。有啲你以為合埋眼都贏，只係你唔知風險，嗰啲位先最大風險。而過去半年真係任你買，特別係港股。

馬雲失去了一切：好消息定壞消息？你話呢？

20. 同時間，都有人留意到，「馬雲失去了一切」。簡單嚟講，讓出咗螞蟻嘅控制權。你可以話係破財保平安，或者留下買路錢。肯定嘅係，錢事少，但在中國嘅國情，就冇可能畀你隻手遮天主宰晒金融系統了。亦有人話因為影響既得利益者（內銀），所以畀人篤。真相冇人知，但怕且以上嘅原因全部都有。

21. 咁但，對股價，係好消息定壞消息？你見Facebook都有人討論。我十分粗略講，就係短線係好消息，長線係壞消息。但有邊位睇長線？係冇乜嘅。況且，唔好太執著於咩好消息壞消息（你睇美股就往往「好消息」跌，「壞消息」升）。

螞蟻係咪上得返市？幾時？

22. 另外你仲可以留意：呢單傳聞，都講咗好耐，你可能今日先知，但好多人一早知，我之前都貼過。不過留意返，單新聞星期六先爆出嚟，即係阿里巴巴美股嘅股價未反映，不能作準（而美股股價係高過星期五港股收市嘅）

23. 點解短期係好消息？無非係破財破平安，只係要佢讓出控制權，即係萬事有得傾。而且，好可能即係可以重啟上市。但，再講一次，之前都傳到周圍都知，唔見得係全新嘅事。同埋都留意，咁嘅控制權變動後，又要等一年先可以上市。

24. 亦肯定嘅係，上得返市，估值都大不如此。但冇關係，因為之前係因為成間嘢會消失。大陸政府要嘅，有乜唔得？既然仲有得上返市，當然係好事。

25. 長線點解唔好？都係老問題。咁嘅環境下，當然係對企業，對資本家，對於創意係不利嘅。你有頭腦肯搏肯冒險搞大檔嘢，最後就使橫手搞你嘅，你係創業家都冇癮，或者會選擇去外國。亦係呢個原因，我一路都係信美股長線會跑贏。

Facebook 文跟進

26. 之前話過，Facebook 金融文呢度會跟進，不過過去幾日貼嘅多數都係垃圾（Facebook 當然貼垃圾），同埋「大師冇點你」。

27. 但你估唔到，最值得睇嘅，係講市況呢一篇。都係粗口橫飛的（不過以我標準好似都算少），有人以為係冇組織咁亂鬧，但我十分認真，入面有大道理。你自己睇完思考下。幾時都話，你嘅思考，重要過你問我幾時買，買乜　—　你有跟我思考嘅，一早之前一路有買啦，點會而家升咗咁多先追？

28. 呢個post真係寫得好，特別係有關「好消息」嗰部份，同埋「股市好公平」嘅一部份。

如何分辨假先知：教你點樣決定聽乜人講嘅嘢，三個標準：

29. 以前都提過，一街都係專家，好多讀者問唔知聽乜人講好。我嘅標準，三個。第一，佢係咪OK成功？第二，佢成功係靠乜？第三，佢係咪同你講真話？缺一不可。

30. 點解？冇第一樣嘅，自己一鑊泡嘅，好可能能力有問題，同你講真話教你心得，你跟住嘅分分鐘死得仲快。冇第二樣嘅，即係佢可能有啲地方叻，又真心教你，但，佢賣電動車發達嘅，你問佢經濟點睇，有乜用？（而我唔係止Elon Musk—Elon Musk根本都冇講真話，名人冇可能講真話）。一大堆金融工都冇打過嘅友，同你講國際金融講聯繫匯率，你唔覺得好笑？第三樣更明顯，就算佢真係有料到，但唔會同你講真話嘅，咁更加冇用。公眾人物，或者有份工返嘅，根本冇可能有真話。而真係有好嘢嘅，點解要免費益你？我在Facebook 都寫垃圾啦。

31. 順帶一提，應該冇讀者會懷疑我冇第三樣。咁但，你心目中都可能諗：扯，你最多識寫文，但投資都唔係好叻，有冇第二樣先？正是如此，我嘅錢主要都係靠打工同寫文，我從冇話自己投資好叻　—但，其實你唔使好叻嘅，OK叻已經夠，比平均好少已經夠。我嘅對象唔係一窮二白然後想兩個星期賺幾倍嘅人，而係有OK收入，但要改善生活水平嘅人。而我又真係見唔少本身在自己領域都幾叻嘅人（即係：高人工），但投資方面出問題。我就希望大家唔好做下一個。