BBBY破產，渣打賣盤不成仲有得升，美股好消息就跌，港股升到6個月高位 (Patreon)

LVMH同愛馬士差不多新高—即係，過去任何位買你都贏錢。幾美妙

BBBY破產。唔知係乜？咁就恭喜你。唔知好過知

過去30年，任何位買，坐到而家都要輸錢。

投資同投機有乜分別？你話呢？

實情，同仙股，細價股，微信女有乜分別？不過講英文就型啲

「經驗」對投資都係重要嘅。

渣打賣盤不成，點解仲升7%？

舊年新興市場死晒，貨幣又大跌。估下渣打股價點？

不過，10年前，渣打200蚊。而家呢？當中發生咩事？

但點解我啲渣打有得贏錢？

港股強，美股弱。但兩樣買晒，點都好過兩樣都唔買

資源分享：睇環球股市表現，邊度睇好？想買唔同國家ETF，又睇邊度？

資訊爆炸—想睇唔同國家股市市值，又邊度睇？

美股呢，就擺明係「經濟好消息」，但股市跌。

但點解美股特別差？

港股呢，6個月高位了，知唔知代表乜？

預告：Tesla，日圓，黃金

LVMH同愛馬士差不多新高—即係，過去任何位買你都贏錢。幾美妙

1. 之前講咗LVMH同愛馬士，差不多新高了。亦即係，你任何位買都唔會輸錢，呢個實在係相當美麗嘅事。

2. 至於點解會咁？無非都係因為啲盈利早已經高過疫情之前。有盈利支持，股價自然穩步上升—但如果太貴都會有問題，同埋，你又未必事先咁肯定佢地啲盈利話咁快克服晒通脹，疫情，封關。

3. 當然不代表之後唔會跌（邊有得保證？），但經歷相當差嘅2022年（其實2021下半年都麻麻地），居然仲有股票差不多歷史高位，都係幾難得。

4. 順手講埋，半廣告，有啲話唔知可以邊度買嘅。開個IB（Interactive Brokers）戶口。你鍾意直接買歐洲股又得，買ADR亦得。日本股都係呢度買。用我個開戶link吧，入錢trade後佢會送IB自己嘅股票畀你，你可以沽走佢，我都有回贈。事實IB介面雖然難用，但佣金平，買到嘅嘢多，孖展息口都算低。

5. 另外，昨日篇文，公開咗啲持股。有讀者見到啲冧把同股票名好似唔啱位，應該係我在Excel貼錯咗，但公司就係嗰堆無誤了

6. 除咗「大師冇點你」外，Facebook 出兩個金融post，不過唔算好多嘢補充同跟進。但之前話過會貼埋過嚟，等你唔會miss．

BBBY破產。唔知係乜？咁就恭喜你。唔知好過知

7. 首先第一壇係BBBY破產，股價跌30%，得返億幾美金市值。唔知呢四個字母代表乜？好事。唔知好過知。基本上，過去30年，任何位買，去到而家你都係輸錢。5年都跌咗9成（可以比較下：Tesla 5 年都仲升咗5倍！）。

過去30年，任何位買，坐到而家都要輸錢。

投資同投機有乜分別？你話呢？

8. 呢啲所謂嘅meme股（網紅股），完全就係垃圾，只係之前利息太低錢太多嘅副產品，亦都好可能背後有人操控。大家避之則吉。雖然我都好似買過一啲最後差不多total loss嘅股票，但我真係買得好細。記住，控制唔到你嘅賭癮（好正常，人人都有，大同細嘅分別），就控制下你嘅注碼

9. 過去30年任何位買，去到而家都輸錢—呢個同上面講LVMH 愛馬士，過去任何位買都贏錢，就真係相映成趣。有人成日唔明投資同投機有乜分別，我諗呢個例子就見到。

實情，同仙股，細價股，微信女有乜分別？不過講英文就型啲

10. 實情，呢啲東西，同香港炒啲仙股，微信女股差不多，亦同十幾廿年前香港啲細價股差不多。只係你發現，由啲美國連登仔講，用英文，就好似型啲。實情真係歷史不停咁重複。

「經驗」對投資都係重要嘅。

11. 所以我認為，「經驗」對投資都係重要嘅。唔係老嘢識嘅嘢你唔識，但你冇親身體會過，係真係唔會明嘅。

12. 後生嘅，投資成績多數都麻麻地，我後生時都係。但正常嘅，要「交學費」，而好處係後生時你錢唔多，輸晒都有個譜。況且大把青春，仲有得追，time is your friend。所以投資幾時都係早開始好：即使你可能會total loss，但你已經經歷咗呢個階段—總好過你40歲先開始買股票然後45歲total loss

13. 明明話咗唔補充太多，又講咗一大輪。

渣打賣盤不成，點解仲升7%？

14. 另一單有趣啲，係渣打。在英國一度升兩成，收市都仲升7%。因乜？因為併購傳聞。但明明中東佬話已經放棄咗。點解明明告吹都仲有得升？好多原因。其中一個原因，就係啲友又再開始「發現」呢間公司係有機會賣嘅。

15. 渣打賣盤云云，講咗好多年，不重覆，而上次講大新都提過，等等等，你有幾多年等？你不能只係旨意佢賣盤而買，好危險的。

16. 不過渣打係一隻相當有趣嘅股票。首先，慎防有人唔知，雖然總部在英國，但英國業務少之又少，即使你睇財報見到嘅英國業務，都係一啲「順手」book去英國嘅嘢。主要業務，就在新興市場。香港，新加坡，印度，韓國，中東，非洲。

舊年新興市場死晒，貨幣又大跌。估下渣打股價點？

17. 咁你估下，舊年新興市場死晒，貨幣又大跌。估下渣打股價點？你估到了，當然股價係非常好的。好似升近兩成，已經扣埋英鎊嘅影響。

18. 不過，你拉長少少，情況完全唔同。5年，就仲要輸三成。但呢度都唔係最精彩。你睇十年前，係差不多200蚊的！而家？得返60蚊（低位見過40蚊）。

19. 當中發生咩事？就真係說來話長。但首先，當然睇盈利先。咁你大約見到，10年前大約賺緊50億美金，近年（即使唔計疫情）都係十幾廿億，得返一半都冇。

不過，10年前，渣打200蚊。而家呢？當中發生咩事？

20. 不過另一個有趣嘅課題係：真係十年河東十年河西。記唔記以前寫過美股「迷失十年」？好粗略咁講，2000-2010年，美股得個桔，新興市場當道。但到2010-2020年呢，就完全兩個世界。

但點解我啲渣打有得贏錢？

21. 最正係，你睇到，渣打嘅股價都係咁上下的。最初十年幾好，之後十年死晒。而家係咪又開始轉？有咁嘅可能，但當然事後先知。

22. 不過更重要嘅係，應該大家都睇到，我係有渣打嘅。但我嘅渣打係贏錢的，近20%。原因？我一路每個月買。我就唔記得幾時開始，但點都開始咗幾年。先可以在之前嘅低位不停儲。

23. 結果講到咁長，我開始懷疑，係咪應該在呢度跟進啲Facebook Post．遲下再研究。

港股強，美股弱。但兩樣買晒，點都好過兩樣都唔買

24. 市況就未必講太多，你見都係港股強，美股弱，同我之前預計差不多。但幾日走勢當然唔代表全年，所以我當然係兩邊都買（其實仲有買埋其他）。

25. 順手可以分享嘅係：雖然美股差，港股強，但你兩樣買晒，今年都肯定係贏錢嘅（雖然只係幾日），總好過你十五十六兩邊都唔買。

資源分享：睇環球股市表現，邊度睇好？想買唔同國家ETF，又睇邊度？

26. 另外，資源共享，我以往睇啲不同股市表現，多數用呢個網站。好多古靈精怪指數都有，美中不足係你見得啲指數名，即係FTSEMIB你未必知係意大利（雖然mouse over會見到國家名）。

27. 又或者，睇barchart.com都得，仲有埋啲ETF嘅名。問題係，以前寫環球ETF都寫過，呢啲ETF track嘅指數，同平時新聞見嗰啲「傳統指數」（日經指數，倫敦富時100，新加坡海峽時報指數之類），未必一樣。邊款指數「好啲」就難答，但例如年尾計表現，大家都係興用返傳統指數嘅

28. 不過，用ETF相比有一個好處：就係反映埋匯率，亦即係你在barchart.com見到嗰啲，全部都係計埋匯率嘅表現。就唔使睇完越南股市表現幾多，然後又要去搵多次越南盾表現點（BTW，越南指數舊年跌到趴，係個好有趣嘅課題，遲下寫）

29. 講市場夠多，介面又靚仔嘅，可以睇Trading economics。

資訊爆炸—想睇唔同國家股市市值，又邊度睇？

30. 最後，搵開順便畀埋你，呢度就有比較不同國家股市嘅市值大細，幾好用。好多人唔知深圳嘅股市大得咁緊要。

31. 同大家分享，亦都慎防我自己有時都搵唔返。你見呢個年代，大家嘅問題唔係搵唔到資訊，你上Google一打world stock index之類，大把嘢。問題係，會有一大堆係廣告贊助，然後後面一大堆你都未知邊度好。我就幫你慳呢啲時間。

32. 正如新聞或分析都係，你要搵新聞好容易，你要搵任何觀點都可以搵到，問題係你唔知邊啲可信，邊啲係垃圾。我嘅作用亦係幫你去分。

美股呢，就擺明係「經濟好消息」，但股市跌。但點解美股特別差？

33. 扯遠咗少少，講返市況。美股呢，好典型嘅「好消息」反而跌。至少你見到係經濟嘅好消息。首領失業救濟人數又少過預期，ADP職位空缺又強過預期。

34. 係喎，呢啲反而「壞消息」。你都識講啦，就業勁，即係仲會加息嘛。咁似乎市場真係咁演繹。你見CME Fed Watch，2月加0.25嘅機會跌咗，原本七成，而家六成都冇（但我估都仲係0.25嘅，唔會加0.5），債息又彈返啲，美匯又升返啲（唔貼圖了）

35. 再加上之前聯儲局出嘅議息紀錄，似乎都真係比較鷹嘅。都係話你知，要見到更多證據先信通脹回落，高息會維持一段時間（係咪好似天文台講風球呢）

36. 但其實，講到尾，都係同美股估值有關。否則你好難解釋，點解其他市場明顯跑贏。

港股呢，6個月高位了，知唔知代表乜？

37. 港股呢，當然係另一個世界了，亦可以留意成交都幾大。恒指4日升咗1300點，升到6個月高位。主要當然係因為人民幣強勢。

38. 雖然見到即市高位回吐咗啲升幅，另外都見到，升得多嘅，都係啲比較落後嘅嘢。係咪開始抖一抖？可能係，但唔好過份解讀。

39. 實情又要講多次，港股由10月低位升咗超過40%，超過6000點。如果講國企指數或科指更驚人。我知，冇可能咁事後望轉頭嘅，點會捉到個底？咁但都重覆多次，至少你可以做到唔好嗰啲位低位打靶。同埋，如果10月反正想買嘅（例如忽然間多咗舊錢），唔使因為市況唔好而唔買。

40. 仲有一點：6個月高位，即係乜？即係，過去6個月，任何位買你都贏錢。10月時你話唔敢買啫，但過去6個月，都冇一日敢買？機會係大把嘅。

預告：Tesla，日圓，黃金

41. 寫得太長，聽日先再寫Tesla嘅啟示（都要寫得幾長下），仲有會寫日圓（近期反彈得幾好），同埋黃金（6個月高位）。仲要回顧展望（其實拖到2月都冇話唔得），仲要將個金句系列埋尾（呢樣最唔趕）

42. 見到冇？市況好返就好多嘢寫的。所以之前靜嗰時就寫啲心法嘢金句嘢，畀你平時做好準備。而家先慢慢去調整心態，就太遲了。都話，港股低位升咗6000點。