港股美股持倉全公開！港股升到5個月高位。美債開局22年最勁．買咗Tesla，點算好? (Patreon)

今天應該很高興：港股又升，美股又升，除非你低位打咗靶

未得閒畀冧把，但至少公開我港股同美股持倉。日本歐洲？之前咪公開過！

之前太多個股，美股新錢我差不多全部買ETF，公開埋買乜

港股嘅，簡簡單單，主要每月定額買

港股5個月高位，3日升1100點，上返「牛熊分界線」

其實港股低位彈返6000點，升咗40%。咁都唔係「牛市」，點先算牛市？

大師冇點你：人民幣繼續強，中海外688 升6%，3個月新高

大師冇點你：澳門股52星期新高了，阿里巴巴都3個月高位

大師冇點你：留意埋歐洲，LVMH同愛馬士差不多歷史新高！

只要你冇打靶，港股持倉點都升返三成幾

短線睇好港股（同歐洲日本新興市場），長線都係美股

美債開局22年最勁，當然利好股市

順手教你睇埋美債ETF

Tesla：點解交付量歷史新高，一年增長四成，股價都大跌？

股價跌又話低過預期，好夾硬喎。係真唔係？

你啲分析員夾硬整到個目標咁高，公司好無辜喎。係真唔係？

買咗Tesla，點算好？未買嘅，買唔買得？

今天應該很高興：港股又升，美股又升，除非你低位打咗靶

1. 好啦，美股升，港股升，大家應該幾開心。除非你低位打咗靶而冇買返，咁我就幫你唔到，但你見真係好多人係咁。小則錯失晒個升浪（騰訊低位升返七八成都有），大則低位打靶後一路都唔敢買唔想買，最後又係升晒嗰時先忍唔住飛入去。如果呢個係你寫照，記得檢討下。

2. 又，因為近排市況好返，我又好返，比較多嘢寫。你見日日出文都好，啲回顧展望都未搞掂。雖然我一路都話你知，心態同思想重要過你買乜。買乜？買乜都好，是但啦。諗唔到就買指數ETF。

3. 但的確我見有啲讀者，都只係不停等，等我講買乜。好似未聽到我畀冧把前，就唔敢做嘢。

未得閒畀冧把，但至少公開我港股同美股持倉。日本歐洲？之前咪公開過！

4. 咁為咗大家唔好無了期等，呢度快手公開下，我而家持有乜。不代表今年我嘅推介，但既然我可以買得，都應該有個譜

5. 其實舊讀者一早見過呢堆嘢，而過去大半年我都冇乜買個股（剛醒起就係我有買Ally Financials（ALLY）同埋香港電訊6823），所以同之前分別不大。不過，名單都係嗰啲，但銀碼我一路有加注。

之前太多個股，美股新錢我差不多全部買ETF，公開埋買乜

6. 講明先，美股而家我真係買ETF多，差不多一有錢就買。因為之前真係太多個股。在個表你都會見到。咪VOO QQQM IDEV EMXC VB IWD，應該冇漏。舊讀者實聽過，新讀者嘅，我遲下解。

7. 另外，你會見到有啲美股好似消失咗。主要係啲而家已經佔好少嘅嘢（可以係買得細，或者買得大然後跌八九成），我冇放入去，費事誤導。

港股嘅，簡簡單單，每月定額買

8. 港股嘅，就簡單啲。呢堆嘢我全部都每個月仲買緊嘅。你見真係香港公司多。

港股5個月高位，3日升1100點，上返「牛熊分界線」

9. 講返大市。港股，就梗係開心，3日升1100點，升到5個月高位。另外，叫做上返250天平均線，所謂嘅「牛熊分界線」，雖然我係唔信呢啲東西

其實港股低位彈返6000點，升咗40%。咁都唔係「牛市」，點先算牛市？

10. 我甚至連傳統嘅咩「牛市」「熊市」都唔會理。因為擺明係熊市先應該買。而恒指低位返咗6000點，升咗四成。咁都唔算牛市，我都唔知咩先叫牛市。實情呢啲narrative 九成係浪費時間。

大師冇點你：人民幣繼續強，中海外688 升6%，3個月新高

11. 而真係大師冇點你，你見到，人民幣係繼續強嘅，雖然唔好以為一路不停升，並冇乜嘢係必然嘅，特別係匯率。咁昨日篇文已經同你講，睇內房股。你見中海外688升6%，升到3個月新高了。

12. 另外，亦係昨日有講嘅騰訊，直頭6個月高。但彈得更多嘅係阿里巴巴9988，因為之前比起騰訊係落後嘅。

大師冇點你：澳門股52星期新高了，阿里巴巴都3個月高位

13. 仲有提過堆澳門股，亦都繼續好。銀河27同美高梅2282都去到52星期新高。仲有啲其他公司都係，包括聯通762，携程9961（呢隻之前有講過）

大師冇點你：留意埋歐洲，LVMH同愛馬士差不多歷史新高！

14. 當然亦都加埋，你見LVMH同愛馬士都做得相當好。兩隻都差不多歷史新高！咁肯定就唔平，但幾時都係，平嗰時又唔見你買？你發現真係升晒啲人先想走去買。呢個係人嘅先天心理弱點，一定要克服，克服唔到嘅，就買嗰時唔好睇股價，唔好睇市。再唔係嘅，咪定期買，想買咪買。

只要你冇打靶，港股持倉點都升返三成幾

15. 總之，就係相當好嘅。你只要唔係舊年10月低位打靶就OK。10月你忍得住冇沽走嘅，而家港股持倉，價值點都多返三成幾。

16. 不過應該補一句，我好似由舊年下半年都開始講。短線，就睇好港股。但長線，都係美股。

短線睇好港股（同歐洲日本新興市場），長線都係美股

17. 而家可以補充多啲，我嘅短線，指幾個月，甚至全年。所以今年都係睇好港股多過美股。但長線，係講十年八年。其實真係冇你想像中咁長，我買啲美股好多都有七八年了。

18. 留意美股近期有個幾好嘅因素，就係債息跌。記住，債息同債價係反向關係，所以你見到報導講「美債開局好，22年最勁」，亦即係債息跌得勁，一度由3.9厘跌15點子（100點子係一厘）去到3.75厘。

美債開局22年最勁，當然利好股市

19. 順手同你講埋，如果想睇債價，當然都有好多方法。但亦可以睇ETF。甚至你鍾意買都得（咪話講股債配置）。呢隻IEF就係中長期嘅債，7-10年，似乎最多人睇。留意見到舊年一樣都好慘烈，好似跌近兩成。但10月開始已經反彈4%

順手教你睇埋美債ETF

20. 債息跌，就當然會對股市好。唔止美股，係全世界嘅股票。當然你見美股好似明顯落後其他，就好可能因為估值。

21. 呢個亦呼應返，短期睇好港股，或者應該話美國以外嘅嘢。原因主要係估值。但長期嘅，以前都寫過，美國始終對企業最友善，仲係資本主義嘅樂土。固然你可以話近年向左轉，可能未來幾年都係，但，相對於其他地方，都仲係樂園。

Tesla：點解交付量歷史新高，一年增長四成，股價都大跌？

22. 最後我想講嘅係：Tesla，之前都唔記得寫。話說之前出咗個交付量數據，好似好勁，新高，第一次突破一季40萬架，按年升四成。但你見股價星期三晚就大瀉12%（呢期都係食咗瀉藥咁）。點解？

股價跌又話低過預期，好夾硬喎。係真唔係？

23. 當然，媒體正路嘅講法，就係話個數勁，但仲係低過預期。都係。咁低唔低過預期呢啲，可以驗證，正如你睇業績一樣，街邊估幾多，就真係有數的，就唔係話跌咗先咁講（但當然有時啲數差過預期又可以升，好過越期都可以跌，但有統計到的，就真係好過預期嘅普遍升幅高啲）

你啲分析員夾硬整到個目標咁高，公司好無辜喎。係真唔係？

24. 然後另一個問題你會諗：喂，咁好無辜啫，你啲分析員估到咁高。升四成都仲話唔及預期。係有呢個問題，但，你之前啲股價勁，亦係因為大家信呢啲預期嘛。你個股價price in 咁大期望，就好危險的。一做唔到，就會大跌，你睇之前Netflix就知

買咗Tesla，點算好？未買嘅，買唔買得？

25. 好啦，之前有讀者問我，「Tesla點睇？」。其實我好怕讀者咁問問題。問個股當然係OK的，但一句「點睇」？其實係問乜？正如你問我，「有人話大陸今年會打台灣，你點睇？」。咁我應該點答？

26. 咁我只能發揮我嘅想像力，大約估計，讀者不外乎係想問，會升定跌。又或者係，買咗唔知點好。又或者係，未買想買。不外乎呢幾味啦。

27. 呢度就可以分享下，咪又係嗰個道理，估值！

28. Tesla 之前超貴，照計根本唔使計都知，係咪？呢度亦答到讀者之前問，到底估值點先叫平點先叫貴。冇乜絶對標準，但你大約都會知嘅。

29. 不過你問我啦喎，Tesla而家，其實就似乎唔係「痴線地貴」。有數計到啦，3500億市值。過去四季純利呢？112億。拉勻，30倍多啲，開始似乎接近返正常。

30. 簡單嘅結論？買咗嘅，而家沽都太遲，有耐性嘅慢慢坐。至少公司啲生意都仲正常，又賺緊錢。不過未買嘅，就免了。

31. 對於Tesla嚟講，仲有一個好特別嘅問題：間公司已經極之咁大。而家跌成咁，都仲有3500億市值。咁就當佢之後識飛都好，你估可以升幾多倍？一兩倍，我都信。但10倍？史上都冇一間公司見過35000市值（蘋果見過30000億）。當然你隨住通脹，同埋啲企業一路做大，咁肯定之後呢啲紀錄會破，但就肯定要一斷比較長嘅時間了。

32. 關於Tesla，聽日仲可以講多啲。但，其實之前已經好多人講係泡沫，貴到發神經。只不過，你估有幾多人會聽？你同人講佢串你唔識車添。