港股開局同開關股。估值例子：LVMH，愛馬士，微軟，Netflix (Patreon)

港股有個好開始，即市低位彈返900點

人民幣彈返，可以睇內房，我都有買，唔好以為樓市差股價就差

澳門股嘅嘢

開關股又唔係全部見光死，邊啲死，邊啲唔死？

跟進返，之前都未解，同LVMH比，點解愛馬士跌得多又升得多

兩者生意，其實唔係好大分別，當然要分都分到

愛馬士就真係好貴，唔止講啲袋。不過亦有人話貴得有理，唔止講啲袋

幾多倍先叫貴幾多倍先叫平？

當然，唔係叫你平嗰時瞓身，貴嗰時一股不買

仲有留意一樣嘢：估下而家LV同愛馬士，純利同疫情前比如何？

LVMH同愛馬士，拎住支搶指住我，只可以買一隻，會點揀？

再舉多個例子：微軟同Netflix

微軟同Netflix差不多市盈率，咁又拎住支槍二選一，揀邊間？

不過可以話你知，美股近十幾廿年，可能得幾個月叫做平

港股有個好開始，即市低位彈返900點

1. 寫文時星期二晚，唔知係咪我錯覺，以往好多時新年第一日，報紙都會講下開唔開紅盤（其實股市係升多過跌嘅），又或者睇下年頭第一日好係咪全年都好。不過今年好似唔多覺有人講

2. 如果信呢個效應，今年港股至少有個好開始。一度跌近500點，最後升返近400點收市

3. 你睇啲升嘅嘢，都真係各樣都有啲，冇乜真係好特別嘅主題。真係要講嘅，見到科技股強啲，但向來都係升得多跌得多。現在呢啲位，你話買騰訊700阿里巴巴9988都應該OK嘅。騰訊低位彈返七成了，再一次畀你見到，人人覺得唔應該買嗰時，就係最應該買。至少事後見到係咁。

人民幣彈返，可以睇內房，我都有買，唔好以為樓市差股價就差

4. 另外，人民幣反彈當然都係近日嘅主題，但匯率嘅嘢，冇乜可能估到全年會點（雖然我傾向估美金已經見晒頂）。人民幣穩定嘅，睇返啲大內房股，中海外688華潤置地1109吧。兩隻舊年都有得升，跑贏晒美股港股，唔好以為樓市唔掂（事實）佢地股價就唔掂（又係金句講嘅嘢）

澳門股嘅嘢

5. 星期二比較突出嘅，仲有澳門股。留意係舊年表現極好嘅板塊，原理同香港啲商場股一樣。而家當然都近52星期高位，但你話同之前高位比，仲有啲水位嘅。

開關股又唔係全部見光死，邊啲死，邊啲唔死？

6. 至於一大堆開關股，又唔係全部見光死晒。普遍見到地產股仲係幾好，信和83港鐵66九倉1997太古地產1972新世界19（呢隻之前冇講）都仲有得升。但非地產嘅，國泰293大家樂341呢啲都回了。

7. 之前仲有讀者問領展823，都係OK嘅，當然就唔係真係開關股，比較關鍵係美債債息（近期強返，所以領展都麻麻地），呢隻我都有，亦係每個月買嘅。

8. 寫文時美股未收市，似乎都係麻麻地，今年我都係比較睇好美股以外嘅嘢—但冇叫你清倉美股或者唔好買，只係買少啲咁解，遲下再講。

跟進返，之前都未解，同LVMH比，點解愛馬士跌得多又升得多

9. 早兩日篇文嘅分段我提出咗個問題，原來自己都唔記得答！點解你見到舊年跌浪中，愛馬士跌得多過LVMH，但之後又反彈得多啲？

10. LVMH同愛馬士做嘅，係差不多嘅生意。固然真係要分仲分得到，LVMH好多品牌，中高低檔都有，味將軍咁。愛馬士就貴，但賣得少，單品牌。拉勻晒，當然LVMH大啲，但市值只係兩倍多啲（3400億同1500億歐元），冇你想像中差咁多。

兩者生意，其實唔係好大分別，當然要分都分到

11. 留意一樣嘢，就係兩間公司嘅估值，兩間都貴，冇平過。但都可以比較下。平時你見我用Macrotrends，好使好用，但呢兩間歐洲公司佢就冇。如果你自己有整個Excel就很好（我有個LVMH的Excel，但未update，遲下先搞，你有興趣拎去自己玩，attachment 有）

12. 簡單嘅，上網一搵Yahoo Finance都有（Financial Times仲詳盡，但訂戶先用到，雖然我係），照舊用TTM（Trailing 12 months）純利，記住係歐元。LVMH純利133億，市值3400億，你當26倍市盈率咁。愛馬士呢，純利30億左右，市值1500億，50倍市盈率

愛馬士就真係好貴，唔止講啲袋。不過亦有人話貴得有理，唔止講啲袋

13. 好啦，幾個重點。首先，應該好多讀者知道，就不能話低市盈率嘅一定好，總係有原因。點解愛馬士咁貴？我估唔多唔少係有收購溢價，其實LVMH嘅老細一路想買起佢，以前寫過（LVMH嘅老細都唔係LV嗰家人了，都係收購返嚟的，而家佢係世界首富）。但只係我估。當然亦可能因為啲產品嘅「奢侈度」真係最高，名牌中嘅名牌。

14. 然後讀者會問，咁我點知幾多倍先算貴，幾多倍先算平？答案係，真係好難有標準答案。又係哲學問題，如果個個都覺得10倍就超平，咁根本就唔會去到10倍啦，個個10.1倍已經買。

15. 特別係個股，就肯定唔同行業不能比較，甚至同一行業都未必可以直接比較（例如LV同愛馬士己經係）。何況，仲要受其他因素影響，最簡單就係債息，實影響估值

幾多倍先叫貴幾多倍先叫平？

16. 不過，好籠統咁講，你去到單位數嘅，點都唔似係貴（雖然，往往係平可以更平，而如果講美股，往往係你間公司好大問題先會去到單位數市盈率）。同樣地，你見到有啲公司，百倍市盈率咁嘅，就肯定係貴　—　冇話唔可以再升，但真係好危險的。相信大家都中過伏。

17. 仲有一個方法，當然係比較返公司自己以往嘅市盈率，但一來有啲難度，數字難搵。二來你間公司可能之前高增長嘛，而家低增長。例如你睇Facebook。三來亦都受宏觀環境影響

18. 咁即係點？即係都好難估。但，去到指數，就真係往往大約會有個譜了。可以嘅話，太貴時，真係唔好搏老命買。同樣地，太平嗰時，點都買啲　—　唔係非黑即白咁平就瞓身貴就一股不買，而係你大約嘅注碼。反面教材係：你見好多人，貴一貴嗰時，借盡錢買。平嗰時，寧願放在銀行都唔肯買，係咪先？

當然，唔係叫你平嗰時瞓身，貴嗰時一股不買

19. 仲有，太貴嗰時買，就真係容易出事的。台積電又好，Netflix又好，乜都好。所以，如果拎支槍指住我，只能兩隻揀一隻，而家二選一，我會買LVMH而唔係愛馬士。但實際上呢個係偽命題，你真係可以做嘅，可能係買多啲LVMH，買少少愛馬士咁。

20. 呢個方法其實亦適用於你買唔同市場。講咗十萬幾千次，分散，唔好因為平，或「好消息」，全部瞓晒去一個市場。

仲有留意一樣嘢：估下而家LV同愛馬士，純利同疫情前比如何？

21. 最後留意一樣嘢。LVMH TTM純利133億，愛馬士純利30億。留意嘅係：2019年，佢地純利只係72億同埋15億　—　講緊疫情前喎。足以比你見到，點解呢啲公司長期都咁貴。

22. 實際上，如果錢唔多嘅，你鍾意買奢侈品ETF都仲得，雖然我唔係好肯定係咪一個好idea，有機會再解。另外，你買法蘭西ETF，就實會有呢兩間嘢，甚至啲歐洲ETF都會有，但當然送埋一大堆其他你唔想嘅嘢。就睇你想買多啲個股，定係ETF

LVMH同愛馬士，拎住支搶指住我，只可以買一隻，會點揀？

23. 最後順帶一講，以前都寫過，過去十幾年（大約2010開始），係「增長股」當道嘅，個個都係Cathie Wood。但再早十幾年（你當2000-2010），其實係講「價值」先王道，人人都話自己係畢菲特，好似係一個周期咁，亦可能同利息高低有關。

24. 講咁多，無非想講：而家呢啲位你叫我買愛馬士，我係有啲保留嘅。當然我可能錯。

再舉多個例子：微軟同Netflix

25. 最最最後，舉一反三，補番之前尾巴。估值很重要。其實微軟同Netflix，兩者都唔算好平。我好難答到你點先算平，但又即管體會下。

26. 微軟嘅，巨無霸啦喎，但上年照跌三成，差過標普指數，好過納指少少。咁你好大約睇，過去四季，700億純利，市值18000億。26倍市盈率。貴定平？真係好蝦人，但應該點都唔算平。

27. 又，一個rule of thumb，你可以睇下，26倍市盈率，咁係咪有26%利潤增長？好似係冇嘅。

28. Netflix呢？舊年跌一半（留意低位已經升返一倍！）。好大約睇，過去四季，50億純利 ，1300億市值，又係26倍市盈率咁。

微軟同Netflix差不多市盈率，咁又拎住支槍二選一，揀邊間？

29. 好啦，幾個重點。首先，你問我，兩隻都好似「貴」，我認知嘅股票好似應該係十幾廿倍市盈率。你話你好高增長年年純利一個開都仲話，但，微軟就巨無霸，Netflix已經2億訂戶，仲有幾多增長？

30. 不過好tricky嘅係，你發現用好多傳統計法，「美股根本過去幾十年都冇乜點平過」。真嘅，如果咩Benjamin Graham之類，要「雪茄屁股」嘅，根本你可能十幾廿年都買唔落股票（可能除咗金融海嘯嗰幾個月，同埋肺炎爆疫嗰一兩個月）。

31. 股票整體嘅估值，同大半世紀前比，係貴咗好多嘅。原因好多，可能又係同尼克遜有關（冇咗金本位法幣任印），可能同聯儲局有關，另文再講。

不過可以話你知，美股近十幾廿年，可能得幾個月叫做平

32. 你見畢菲特就己經冇Benjamin Graham咁執著，但明顯佢好多時間都覺得啲股票貴到無倫，買唔落手，所以寧願自己做回購。

33. 於是你見到個惡搞嘅地方：不停等平貨，真係等到死都未買到。太貴買，又中伏。所以我就叫你不如唔好不停等了。

34. 不過，仲有一個好重要嘅啟示：估值都真係好重要

35. 你諗下，而家Netflix我都仲話貴。咁，其實700蚊嗰時，真係貴到癲，係咪？而亦因為咁，你見到佢嘅跌幅，明顯多過其他股票（一度係標普指數500隻包尾）。你睇微軟，相對地好，但都要跌三成，亦係因為估值。

36. 二選一？又係偽命題，而且呢兩間公司相當唔同。但拎支槍指住我嘅，當然係微軟。雖然兩隻我都有，微軟仲賺緊唔少（五六年前買落，見到冇？長期持有），Netflix當然就輸一大截（見到冇？高位追就真係會出事）