香港開關股，冧把數個，兼小版務幾個 (Patreon)

—有讀者話唔好講咁多耶穌，畀多啲冧把，都係可以嘅

另外，每日一圖同Good Read應該可以重出江湖

最後，Facebook嘅金融文，會貼埋去Patreon，兼且會有follow up

冧把嘅嘢：香港開關股，仲有乜好買？

10月叫你買又唔買？你見而家好多都見光死。係咁架喎

大陸客嚟唔到香港，股市又跌，債市又跌—估下舊年友邦跌幾多？

專做大陸客嘅九倉舊年又跌幾多？

仲可以留意下，幾時見底？使唔使止蝕？

新鴻基差不多52星期高位添呀，講呢啲。舊年跑贏晒你啲美股啦

好啦，講咗兩日開關股，有乜啟示？咪又係以前講過嘅嘢

跌咗唔買，唔通升晒先買？升咗五六成先仆入去，呢啲先係風險呀！

而家買友邦得唔得？梗得架，但笨咗50%咯。唔好話我知你10月一個仙都冇呀

但即使錯過晒都好，睇咗呢堆嘢，都仲係學到啲嘢嘅

不過放心，都仲有啲股票可以買嘅。

話你知應該揀啲乜公司，畀埋名你

另外畀啲反面教材你，有乜股唔好買？冇「護城河」嘅股

膽大包天嘅，畀隻好嘢你：美聯1200

有讀者話唔好講咁多耶穌，畀多啲冧把，都係可以嘅

另外，每日一圖同Good Read應該可以重出江湖

最後，Facebook嘅金融文，會貼埋去Patreon，兼且會有follow up

1. 都聽聞有啲讀者覺得唔好成日講心法，畀啲冧把實際啲。都係可以嘅，反正嚟緊展望都會講，今篇就就先講啲開關嘅冧把。

2. 另外，好多讀者以往鍾意嘅每日一圖，或者Good Read，都有機會重出江湖。可能每個星期出一次吧。實情我做完手術後呢，睇嘢係吃力過以前好多嘅。

3. 仲有，有讀者話，想我將啲Facebook文貼埋去呢度，就係唔太可行。雖然有人覺得Facebook 啲文好好睇，想在呢度都睇到。奈何肯定呢度有唔少讀者，係冇興趣睇我寫「香港人真係好有錢」，或者啲風化案評論，或者寫世界盃寫電影寫沙嗲王。

4. 咁你話，齋貼金融文得唔得？會好少少。問題有時啲金融文會扯咗去第啲嘢。同埋，最重要係，有時啲金融文又粗口橫飛，亦都有時係得幾句。咁就唔係幾好。

5. 所以呢，真係冇你想像中咁易。可以做到嘅，就係試下可以將在Facebook 出過，而又有啲意思嘅金融文，放條link度在呢度，然後再跟進下，講多少少咁。或者真係冇補充嘅，都話你知出過啲咁嘅文（其實，以前咪有Facebook Post summary咁咯）

6. 好似昨日講日本韓國開關股，都係咁玩法

冧巴嘅嘢：香港開關股，仲有乜好買？

7. 上一篇寫咗外國開關股，星期一朝早出，我以為香港已經開市，原來仲放緊假。咁仲好，即係呢篇出街時（星期二早朝），先剛開市，雖然好多時我唔認為需要跟得咁貼。

8. 今篇，就講返香港嘅開關股。不過，真係值得買嘅唔多。好掃興但真心嘅答案係：升晒啦，10月你又唔買（如圖）？好殘酷，但真係咁的。若果自問10月叫你買都唔敢買嘅（好正常，唔使怕醜），咁不如長期定額算，或者想買就買，唔好睇個市，唔好睇新聞，係有用的，避開情緒嘛，金句咪講過

10月叫你買又唔買？你見而家好多都見光死。係咁架喎

9. 首先你可以睇下，同大陸通關消息一出，即係舊年年尾—其實堆開關股己經回晒。唔該你認真留意下呢個現象，諗下點解，雖然最尾我都會解一次。

大陸客嚟唔到香港，股市又跌，債市又跌—估下舊年友邦跌幾多？

10. 先睇一個個股例子，友邦1299。你估下舊年股價點？升咗10%！根本完全跑贏晒大市，有乜驚？呢隻亦係我好早有買，而家都仲個個月買嘅股票。但你諗下，疫情封關對佢真係好大打擊，啲大陸客全部嚟唔到香港，幾咁大件事！甚至都未計投資損失嗰啲嘢。但，又如何？充滿「壞消息」，一樣升10%，可見咩「壞消息」根本係廢話。

11. 叫畀冧把嘅，一早貼過呢隻啦，但你又係咪有買先？定中途嚇走咗？不過有一輪你真係驚喎，高位跌咗三成幾。但，之後彈返五成喎（順帶一提：如果你「止蝕」，咁會點？咪低位沽咗）（順手你可以留意，股價幾時見底？）

專做大陸客嘅九倉舊年又跌幾多？

12. 當然友邦仲涉及佢本身投資嘅嘢，所以睇多隻，九倉1997，就真係「純自由行股」咁滯。但根本，走勢都係差不多，不再重覆。留意下，見底嘅時間都係于一樣　—　個個講到最差嗰時，就係見底之時，都真係好似次次都係咁。

13. 順帶一提，舊年九倉升咗17%！

仲可以留意下，幾時見底？使唔使止蝕？

14. 仲有類似嘅我就不再講，新鴻基16舊年升13%，而家近52星期高位。根本好多數租股，第四季已經升咗五成起碼。但，嗰時你又有冇買？做乜總係啲消息確認咗先買？

新鴻基差不多52星期高位添呀，講呢啲。舊年跑贏晒你啲美股啦

15. 之前一篇講外國開關股，啲啟示我特登冇講，因為反正今篇講嘅都一樣。見唔見到？香港又好，外國又好，完美示範咗「炒預期」。真係唔會等「確認」先升。你見呢啲股票，全部係九月十月嗰時升晒。係咪人地有內幕知道大陸年尾會講開關？唔知，我估唔係。但殘到一個位，自然值搏（雖然你睇市盈率嘅，愛馬士LVMH好似從來都冇平過）

好啦，講咗兩日開關股，有乜啟示？咪又係以前講過嘅嘢

16. 到而家講開關？就開始沒戲唱啦。未必之後繼續跌，但你話而家買落去？咁可能真係又會捱一排。

17. 其實諗下都知，隻嘢升咗五成你先買落去，當然係風險大好多！呢啲先係風險呀，但你發現好少人會睇呢啲「估值」嘅風險。事實係極難睇，但至少你要知道呢樣嘢。

跌咗唔買，唔通升晒先買？升咗五六成先仆入去，呢啲先係風險呀！

18. 仲有，當然係老金句：一切都係narrative：如果一切發展不變，九倉友邦新地舊年大跌，好多人嘅講法就係「封晒關零售唔掂商場食屎」，但而家升，就變咗係「憧憬開關最壞時刻已過」—　根本就係同一樣嘢。唔係未通，邊有得憧憬？所謂好消息同壞消息，係同一樣嘢。

19. 又或者再諗下，2022年頭，有人話你知開唔到關，第N波疫情，零售死晒，美股港股大跌—咁你會唔會信新地九倉友邦有得升？但結果就係咁。

20. 當然仲有更老土嘅，咩stay invested呀，別人恐懼時我貪婪呀，跌咗唔買，唔通升晒先買？我就不一一重覆了。

而家買友邦得唔得？梗得架，但笨咗50%咯。唔好話我知你10月一個仙都冇呀

21. 所以，就唔好走嚟問我，而家買友邦得唔得。梗得架，但升咗五成先買，你咪笨好多咯。之前又唔買？唔好話畀我知你10月時一個仙都冇而家忽然發咗達喎。

但即使錯過晒都好，睇咗呢堆嘢，都仲係學到啲嘢嘅

22. 同埋，正面啲，即使錯過晒以上嘅嘢，咁你睇咗呢堆文字，都唔係全無價值嘅。第一，你學會教訓。第二，認真嘅，你更加清楚呢啲公司。即係話，唔知會唔會三年後又爆多次疫呀，或者大陸爆得太勁日本歐洲忽然唔畀大陸人去咁—咁到時，你就知道要買LVMH Shiseido之類了

23. 仲有，經歷多幾個周期，你自然知道投資世界就係咁，跌嗰時講到世界末日啲公司會死晒，升嗰時講到啲公司點無敵。真相就係兩者之間，所以要contrarian

24. 好啦，我又再洗咗你一輪腦，如果你都仲未拍枱走，咁有禮物畀你嘅

不過放心，都仲有啲股票可以買嘅。

25. 咁，真係而家想買嘅，仲可以買乜？都仲有嘅，畀啲冧把你。

26. 首先，除非你真係可以睇返長啲（我指係一兩年，但好多人兩個星期耐性都冇），否則，以上升晒嗰啲，就未必應該高追了。

27. 咁即係，似乎揀啲落後啲嘅嘢。冇錯，落後梗係有原因。但，拉勻嚟講，似乎都係未升晒嗰堆嘢值搏啲，況且都話，好多人買完要跌10%即時就驚，你買啲升晒嘅嘢，係真係會咁的

話你知應該揀啲乜公司，畀埋名你

28. 仲有，最好係一啲你真係可以長期持有嘅公司。再直接啲講，唔止係因為通關你先買。因為通關呢個因素可能都反映咗八八九九—萬一忽然間彈弓手唔通，咪出事？

29. 有邊啲公司相對地落後，而又比較正常？都有啲嘅，長實1113啦，舊年要跌少少，雖然好過市，但落後新地九倉太古。點解長實落後咁多？好多原因，其中一個可能係因為冇新地咁多商場（同九倉太古更加唔使比），況且仲有英國嘢。而家買長實，我覺得放心嘅，我都有每個月買

30. 之後仲會講下大家咁關心嘅李嘉誠，買返地啦喎，又唔撤資了？

31. 仲有？信和83啦，舊年表現唔差的，仲有得升，但同高位仲有啲距離，向來都大上大落。你見高位其實跌得唔多的，插一半都冇，以一間主要做商場同酒店嘅地產商，真係跌得少，可能因為一路有人估會私有化。正因為咁，你見低位反彈都唔多。而家買，我覺得都算放心嘅，亦有讀者一早買咗。

32. 仲有？當然係地鐵。車務又好，商場又好，全部都會改善返。但其實股價好硬淨，而家離高位都不遠。呢隻亦係每個月有買嘅嘢。

33. 當然，呢啲只係同開關有關嘅嘢，其他值得買嘅港股，之後再講。但樓上呢三隻，即使冇開關，我都係好放心咁買。甚至忽然玩嘢話唔開（咁成堆嘢股價一定大跌），我都好放心買或者持有。事實長實地鐵我都有，信和就冇。

另外畀啲反面教材你，有乜股唔好買？冇「護城河」嘅股

34. 好啦，畀啲反面教材你。有邊啲我唔會買嘅東西？好簡單，呢個圖（貼多次）嗰堆股，差不多全部我都唔會買。

35. 共通點？首先，升晒啦，大家樂早排都52星期新高。更重要嘅係，呢啲其實都係一啲冇乜護城河嘅行業。相對地大家樂已經叫做好啲（管理層亦都好，你估易做？）。問題係，非常之咁難請人，一定要出高人工，點都對公司有影響。仲要升到52星期高位，當然唔會諗。

36. 其他咩珠寶，金舖，錶，化妝品嗰啲，擺明周期嘢。係低位升好多的，因為原本真係會死人（相對地，你諗下新地嗰啲點會死？最多收租大跌，但唔會死的）。咁如果開關放得夠多人，啲生意真係會復活，可以升好多的，但股價而家都升一大截，我就麻麻地。況且唔好忘記，到生意好，自然就會加租　—　見到冇？邊個先有「護城河」？

37. 有人話，喂，咁你又話買Shiseido 同AmorePacific？首先，而家買呢兩隻都太遲。但仲有：做品牌，又點同你做零售？護城河呀小朋友

膽大包天嘅，畀隻好嘢你：美聯1200

38. 你真係膽大包天嘅，輸死冇所謂嘅，不如去買美聯1200 —我知生意好差，梗係差。我知出盈警蝕錢，我知樓價跌，我知成交少，但，得你一個知咩？但你睇得返幾億市值，真係隨時私有化或賣盤都仲得。如果唔死嘅，股價升一個開未必天方夜譚。

39. 仲有有趣嘅係，生意唔好還生意唔好，但發唔發現，原來「地產經紀」，都真係冇乜點畀時代淘汰？至少香港冇。呢個亦係有趣嘅地方（固然，啲佣金比率低咗好多了）。個行業比你想像中堅挺，舊年股價只係跌14%，（亦其實頹咗好多年，2008年高位，隻嘢13蚊！）。講明，你當賭馬好了，絶對不能長渣的。但中咗你可以周圍講，「搞到我都想買返幾手」

40. 好啦，希望冇乜突發嘢，聽日補埋　愛馬士同LVMH嘅小小尾巴（都未講點解愛馬士跌得多又升得多），仲有Netflix同微軟嘅小小尾巴。然後搞埋回顧展望，以及幫個金句系列埋尾。幾咁多嘢寫。