外國開關股嘅嘢（韓國，日本，歐洲） (Patreon)

固然大家都要有個位去回顧，但唔好只執著於「一年」—不如睇「半年」？

2022年好慘烈，而我懷疑你地未必個個真係明白

咁係咪即係分散投資都冇用？

港股下半年跌，但要贏錢未必不可能。美股下半年直頭升添。

過兩日先寫回顧展望，今日寫咗開關股先

日本開關嘅，之前就寫咗日航 全日空啦。仲有百貨公司

大陸開關，當然睇外國股。Facebook貼咗隻 韓國樂天旅遊，咁仲有乜？

留意埋另一重點：呢堆嘢，幾時見底的？有乜啟示？

同場加映：估下韓圜2022年跌咗幾多？

仲有一隻之前冇講嘅日本股

咁當然，仲有LV同埋愛馬士。

點解愛馬士跌得多過LV，又彈得多過LV？

點解日本韓國開關股就10月見底，LV愛馬士就9月見底？

留意LV 愛馬士呢兩間公司，從來冇平過，而家股價係高位八九成

匯率風險嘅嘢，睇少啲咪少啲風險

固然大家都要有個位去回顧，但唔好只執著於「一年」—不如睇「半年」？

1. 新一年，都希望大家有個好開始。其實差不多所有東西（包括投資），用一年年去分，係十分隨意嘅。但叫做有個參考咯，總要有個位畀你做啲回顧展望。但，真係唔好過份執著於「一年」呢樣嘢。

2022年好慘烈，而我懷疑你地未必個個真係明白

2. 即係講乜？即係，2022年係相當慘烈嘅，而我懷疑你地未必個個明白到有幾慘烈。港股跌15%，差，但對我嚟講未去到災難級。同樣地，美股跌20%，金融海嘯後最差，但我覺得未到災難級。

3. 真正災難嘅，當然係因為呢兩件事一齊發生！

4. 唔止，其實絶大多數股市都跌。唔止，仲要債市都跌—OK，香港人多數冇感覺。但樓市都跌（仲要其實環球樓市都跌）。

咁係咪即係分散投資都冇用？

5. 亦即係搞到，好似「分散投資」都冇乜用咁。但，邊個話你知，只係睇一年？況且，分散亦包括埋時機

6. 呢啲東西，之後我會再寫。但想講嘅係：你拎半年嚟睇，件事就好唔同了。

港股下半年跌，但要贏錢未必不可能。美股下半年直頭升添。

7. 港股就差嘅，下半年都仲要跌10%，但如果每個月分段買，加上揀股能力好啲，收埋息，唔使輸錢唔係天方夜譚（順帶一提，我位好朋友，即係錄音嗰位，舊年港股係贏錢嘅，如果有興趣分享佢買乜嘅，話我知）

8. 美股呢？仲簡單，其實下半年係升嘅。升一點都係升！

過兩日先寫回顧展望，今日寫咗開關股先

9. 放假幾日，睇返多啲嘢，諗返多啲嘢，又再有好多寫作題目。遲下我會寫好多好多關於回顧展望嘅文（仲有堆投資金句都未埋尾），但今日呢篇可能講啲近少少嘅嘢圥。

10. 有咩比較近？通關！

日本開關嘅，之前就寫咗日航 全日空啦。仲有百貨公司

11. 通關有好多含義，早少少嘅可能你會諗外國開返畀香港。然後就香港開始咩0+3 廢除黃碼之類，算係「開畀外國」。當然仲有早排，你見內地開始放寬各樣嘢。最後，就當然係講中港通關。

12. 例如日本開返關，咁你見之前都寫過日航9201同全日空9202，買埋添。甚至有寫過高島屋8233，三越伊勢丹3099之類（呢兩隻升到笑，全年升七成，扣埋匯價都賺到笑，可惜冇買）

13. 好啦，咁但，而家嘅重點，當然係大陸放返人出去，以及中港通關啦。留意，係兩樣唔同嘅嘢嚟，雖然有少少重叠。

大陸開關，當然睇外國股。Facebook貼咗隻 韓國樂天旅遊，咁仲有乜？

14. 先講大陸通關，正路就唔係諗東航南航國航之類，因為國內一路都有飛，國際線應該唔會佔到好多（國航可能多啲）。

15. 況且一路都講，中資股當然有中資股嘅問題，唔係大陸經濟得唔得，或者政治嘅問題，而係好早講過，而家嘅中國，對商家係相當唔友善嘅，你睇之前打啲科技股就知，絶對唔止針對外資，「一視同仁」（不過近幾個月好似又轉風向咁）

16. 正路地，梗係睇外國股。

17. 我在Facebook Page，貼咗一隻，樂天旅遊，韓國公司。好嘢就梗係留返Patreon講。

18. 首先，都係韓仔嘢。愛苿莉太平洋，AmorePacific，化妝品嘢。我使唔使自己用過買過先識（雖然我連北韓化妝品都買過！）？不過話說回頭，如果你聽都冇聽過嘅，就都要留意下身邊嘅事物了。

19. 講返呢隻嘢，當然好多銷售都嚟自大陸客，股價高位跌咗七成的，好誇張，未計匯價喎！今年都仲要跌20%，未計匯價喎！但重點係，低位都升返50%。

留意埋另一重點：呢堆嘢，幾時見底的？

20. 但留意埋另一個重點，股價幾時見底的？正係10月尾！同港股一樣。又喚醒你嘅記憶，嗰時二十大後嘛，個個又話經濟玩完唔會開關外資唔買中資股之類。唔知係咪因為咁影響埋呢隻嘢股價啦。

同場加映：估下韓圜2022年跌咗幾多？

21. 順手講埋，頭先話啲跌幅未計匯水。但，計埋呢？你估下韓圜2022年跌咗幾多？我都估唔到

22. 原來係6%。咁少？係，真係咁少，低位升返十幾個%。陣間我會解。

23. 好，韓國股票，極之難買，所以只係畀你熱下身（好似輝立買得到，你有興趣可以問下）

24. 咁但，日本股就易買好多了。

25. 照計好易估，韓國有AmorePacific，日本當然係有Shiseido 資生堂．

仲有一隻之前冇講嘅日本股

26. 差不多嘅故事。你見今年股價平手（但日圓跌咗12%），低位就彈返30%咁。照計冇AmorePacific咁倚賴大陸嘅，所以你見高位冇跌得咁多，但低位又冇彈得咁勁咁咯。

27. 仲有，股價幾時反彈？一樣係10月尾。

28. 好啦，推而廣之，好多讀者都估到，甚至己經有人問我。除咗買化妝品，仲有買乜？當然就係，名牌！

咁當然，仲有LV同埋愛馬士。

29. 冇錯，就係睇兩隻，LVMH同埋愛馬士。當然唔係只係呢兩隻，但我有買呢兩隻嘛。

30. 好啦，先睇LVMH。今年埋單，跌13%。留意我呢隻已經美金計嘅ADR，咁你鍾意買歐洲股都得，照計就差不多一樣嘅。留意，歐洲嗰隻LVMG，就跌7%咯，但你會蝕匯水嘛，拉返勻就係差不多。舊年歐元對美金，大約就跌咗6%。

31. 所以唔好以為買美國嗰隻就「冇匯率風險」，計埋在入面啦。即係你買匯控渣打，在香港買同英國買，係冇乜分別嘅。

32. 不過你見到，一樣都係低位彈返兩成幾。

點解愛馬士跌得多過LV，又彈得多過LV？

33. 愛馬士嘅情況，差不多一樣，今年跌11%。不過跌得仲急過LVMH，反彈力度亦大啲，低位彈返四成咁滯。

點解日本韓國開關股就10月見底，LV愛馬士就9月見底？

34. 好啦，留意一樣嘢。上面講Amore Pacific同Shiseido，都係10月尾反彈的。但LVMH同愛馬士，就係9月尾反彈嘅。有冇原因？估下點解？

35. 我好懷疑係因為：歐元，都係9月尾見底！留意上面都有講，2022年歐元跌幾多？估下？原來係6%。係咪同你估計好唔同？跌咁少咋咩？係，因為年尾反彈好多的（亦見到美金強勢不再）。你見第四季，歐元升返11%。

36. 好啦，順手講一講呢兩間公司。你留意，高位都跌咗三四成，呢啲近乎係地球上最強嘅品牌，加價能力極高。所以你要明白，股票真係可以冇乜特別原因都跌三四成。可能就只係因為大市，或者因為估值。

留意呢兩間公司，從來冇平過，而家股價係高位八九成

37. 唔好忘記，呢兩隻嘢嘅估值都幾貴，甚至真係從來都冇點平過。最簡單你咪去計市盈率，但我呢度都懶計。你可以去搵過去四季嘅純利加埋。不過二三十倍市盈率，點都走唔甩。

38. 但同時間，你又見到而家嘅股價，係高位嘅八九成。點解咁強？無非都係頭先講嘅嘢，加價能力，品牌，呢啲就叫「護城河」啦。

39. 當然你捉到個低位嘅就叻，都話低位都彈兩三成啦，但照舊，永遠嗰啲位，你就見好似世界末日咁的。

匯率風險嘅嘢，睇少啲咪少啲風險

40. 好啦，最後，你可以諗下，由上面呢堆例子，又有乜啟示？今次我唔在呢度寫，「因為聽日寫香港開關股，我又會重覆多次」，所以你可以諗定。

41. 不過，有一個啟示，就係呢堆嘢特有。所以我會呢度講。

42. 記唔記得寫過，我一路都唔會太在意匯率風險呢回事？因為根本亦都冇得避免。而且更重要嘅係，匯率嘅嘢，zero sum game，長期鐘擺嘛。

43. 今次你真係見到的，原來埋單，韓圜2022年只係跌咗6%？真係估唔到喎。原來歐元第四季升返11%？你又未必知。當然，我呢篇冇講，但之前風聲鶴唳嘅英鎊，都係咁上下。

44. 問題係，你就真係要坐得夠耐，先會睇到呢啲均值回歸（reversion to mean）了

45. 可能你都仲係有啲唔明，但真係搞清楚，股市就可以長線向上，但匯率好難可以單邊升幾十年的。

46. 仲有香港開關股，聽日寫。但簡單答你，要升嘅都升咗唔少，想睇就睇啲未點升嘅。之前叫你買又唔買？

47. 另外，原本寫微軟同Netflix仲有條尾未寫，都要等下篇，或再下篇。