續講Netflix「可能賣」，扑中都唔好咁開心。睇大新銀行2356同Amazon嘅例子 (Patreon)

續講Microsoft 買NetFlix，今次講投資方面嘅啟示

有機會畀人買，只係bonus咋，你不能旨意晒佢

係呀個個都知大新銀行會賣，但，你有冇耐性玩十幾廿年？

我以前都見到有人有咁耐性，但越嚟越少。點解？

就當你有耐性，等得到食糊。又係咪賺到錢？青春少女都變的士大媽啦。

公司可以永續，但你再等15年火星撞地球咩？

記住，你不能「倚靠一個事件」發唔發生，去做投資。

不過，咩叫「事件」？「事件」同「趨勢」唔多同。我會畀例子

下年有可能台海打仗喎，有可能金融危機喎。咁點？年年沽空？

畀你一早估到疫情，又估唔估到標普指數創新高？

畀你知打仗，但估唔估到盧布不停升？油價不停跌？

第二點：你間公司畀人收購，都唔好太開心，可能就係割禾青

高位買咗嘅，長期持有，最多等佢畀人收購啫？有買貴冇買錯　—　真？

一般買貴，即係買錯

不過Amazon，5蚊跌到3毫，而家80蚊

5蚊跌到3毫，原本可以升到80蚊，但1蚊畀人收購咗。呢啲悲刻，點避免？

續講Microsoft 買NetFlix，今次講投資方面嘅啟示

1. 續講Microsoft 傳話會買Netflix，上次嗰篇中間講多咗少少「世界觀」，講媒體。有啲讀者話好正，有啲話離題，唔好講咁多呢啲，講買乜實際啲。一半半，嚟緊我都係會兩樣都做下，咁大家亦可以食到唔同嘅嘢。

有機會畀人買，只係bonus咋，你不能旨意晒佢

2. 今篇嘅後續，就講返金融方面嘅嘢。重點當然唔係話你而家應該買NetFlix（我覺得還可以）。記住，能夠成為收購對象，只係一種bonus，你好難靠呢樣嘢投資。特別係個個都冇耐性。

3. 一個例子當然係啲香港銀行，以前嘅永隆，廖創興，永亨之類。最後全部賣晒，股東多數都贏錢。咁大家都知，大新銀行2356之類，都係遲早賣　—　但，呢樣嘢由我做分析員講到而家，2007 – 2022，等了又等。

係呀個個都知大新銀行會賣，但，你有冇耐性玩十幾廿年？

4. 首先你要有無比耐性，收購或私有化之類，多數都係吽你幾年郁都唔郁甚至一路跌，最後忽然停牌，然後溢價一大截（不過近年啲溢價越嚟越低）話會賣或私有化。咁第二日開返就升到去嗰個價。即係話，你根本冇得捉，只能坐住等。錯失咗一日，就前功盡廢，可能十幾廿年就係等一日。

5. 睇我文夠耐嘅，會聽過我講，我恩師兼師傅，老馮Edward個師傅霍生，就專做呢啲嘢，扑中好多私有化。問題係，佢本身已經好有錢。況且，佢有無比嘅耐性（亦因為佢有錢就有耐性，所以財不入急門，富者越富。窮人買嘢想一注獨贏一朝發達，結果更窮。有機會再講）

我以前都見到有人有咁耐性，但越嚟越少。點解？

6. 以前識有啲基金經理真係有咁嘅耐性，不過越嚟越少。近十年都係「增長」當道，個個講科技。但而家會唔會係「價值」回歸？呢個課題好長，有機會再講，但你睇呢兩年就似乎係。

況且，就當你有耐性，等得到食糊。又係咪賺到錢？青春少女都變大媽啦。

7. 但講返，就當你咁有耐性都好，等到修成正果食糊，又係咪贏錢？答案係，都未必！你睇劇就浪漫，等足廿年，個初戀變咗開的士大媽都仲好浪漫，股票就冇咁浪漫了。

8. 唔需要去到好多細節，用你嘅常識估下。而家大新6蚊有找。若果賣盤，或者私有化，你估幾錢？再講一次，分析員呃字數呃出糧（我以前做嘅嘢），當然可以寫幾千字。但你大約用常識，都估到。

9. Facebook Page寫職場都成日講，老細嘅嘢，9000蚊請到嘅人，點解要畀10000？係好簡單的。收購私有化一樣，10蚊買到，點解比11蚊？

10. 當然你會話，太低嘅，小股東會反對，一拍兩散。但在大新呢個情況下，我估開10蚊，多數小股東都投降啦。等到N咁多年先食糊喎，再否決，真係火星撞地球又等多15年咩。

公司可以永續，但你再等15年火星撞地球咩？

11. 而你可以望下，即係話，十幾年前買嗰啲，好可能都仲係要輸錢。畀你估中晒又點？

12. 更加唔好講，「機會成本」。如果你拎咗去買美股？甚至你拎去做定期存款都仲有啲息

13. （一般買美股都唔多睇派息，甚至唔派更好，因為稅。我亦寫過，貪高息（例如匯控）係會出事嘅。但話說回頭，大新就年年有派下息，都幫補到啲。你睇啲價值股，殘股，呢啲嘢就重要的。例如年頭講咩中移動，8號仔，地鐵都咁上下。甚至你買盈富基金都係，你每年有幾厘息收嘅，拉長嚟講，又未必要點輸。所以真係唔好懶醒，不能全部一概而論。）

14. 你見，好多時我都係用啲實例去講返啲大原則。乜大原則？咪嗰幾味，但我發現即使用11月情況去講投資金句，好似啲讀者都係唔多明，或者冇興趣，或者睇完但仲係會犯同樣錯誤。唔緊要，講到你明為止。

記住，你不能「倚靠一個事件」發唔發生，去做投資。

15. 於是帶到去兩樣嘢。第一，好多時，你不能「倚靠一個事件」發唔發生，去做投資。

16. 具體少少，我會講咩叫「事件」。例如話iPhone面世時你估到佢一定往後咁多年都大賣，所以你買股票，還好。你覺得LV啲嘢長賣長有，點加價啲人都買（其實唔存在幾貴都買，但即係我當你意思係「每年加一兩成啲人都照買」），所以你買股票，還好。

不過，咩叫「事件」？「事件」同「趨勢」唔多同。我會畀例子

17. 當然以上呢啲唔係無敵（金句：估值很重要！）（但又另一金句：拉得長就冇咁重要），但以上呢啲，唔係「事件」，係「趨勢」。兩者未必clear cut（正如fact vs opinion，都話環環相扣，唔好咁懶）。但，真係有啲唔同

18. 好，再舉例，乜嘢係你「倚靠一個事件」去買股票？好簡單，「我估佢會私有化」。咁，如果你錯呢？

下年有可能台海打仗喎，有可能金融危機喎。咁點？年年沽空？

19. 同樣地，好多時讀者問嘅嘢，都係咁上下性質。「下年台海可能會打仗」，咁，如果唔打呢？年年都係有咁可能，我不能話你知冇可能，甚至唔係好似外星人襲地球咁冇可能，而根本大家都好難估有幾大可能。但，唔通我年年沽空？同樣地，「下年可能爆金融危機」，係喎（不過，請定義「金融危機」，有人覺得恒指跌兩成係「金融危機」）．「下年可能衰退」，呢個機會更大添，你問我，係相當有可能衰退。咁但點？我年年去沽空？

20. 你會見到個問題。首先，呢啲事件發唔發生，幾時發生，冇人知。但你不能每年都去買佢發生或唔發生，否則未到發生你已輸死。另外，即使畀你估中咗，亦唔等於市場會照你估咁反應，呢個先係重點。

畀你一早估到疫情，又估唔估到標普指數創新高？

21. 2019年秋天，如果有人同你講，「2020年可能爆世紀疫情」（你睇返對經濟同民生嘅打擊，肯定係百年一遇），首先，你可能當佢傻。二來，「埃汾都話，年年都有咁可能，唔通年年沽空？」

22. 但最重要嘅係：我當嗰個係未來人，而你又真係知佢係未來人，你真係知會爆疫。咁點？我由年頭沽空到年尾？結果2020年標普指數創歷史新高

23. 見到沒有？投資金句系列都寫過，「個世界唔係咁運作」，我應該寫過幾千字。唔係自然科學，或者中學讀歷史。第一步咁，然後就會咁，之後就會咁。你發現唔係咁的。

我畀你知打仗，但估唔估到盧布不停升？油價不停跌？

24. 俄烏戰爭固然估唔到，但即使你知道打仗，你估唔估到俄羅斯盧布係咁升？正如嗰時人人話油價有排升，結果係跌到仲低過開戰前嘅水平。

25. 亦即係話，你不能靠呢啲「事件」去做投資。順手講埋，有讀者點唱，問我「Elon Musk同Cathie Wood話會爆金融危機，你點睇」（Well，佢兩位，特別係後者嘅眼光……）。以上都係初步嘅答案，但我之後會詳細寫。不過，我嘅短答案：金融危機？Maybe, maybe not．但會又點？唔會又點？點解要知？知咗又點？金融危機，唔係更加應該買？定你想爆「完」先買？但永遠係你覺得世界末日時先應該買的。

第二點：你間公司畀人收購，都唔好太開心，可能就係割禾青

26. 然後去到第二點，上次預告我提嘅嘢：咁例如NetFlix（或者Zoom）呢啲公司，其實運作正常（同意），又一路有客（同意），仲要係有錢賺（冇錯），冇存亡危機。

27. 咁我高位買咗嘅，長期持有，最多等佢畀人收購啫？有買貴冇買錯。

高位買咗嘅，長期持有，最多等佢畀人收購啫？有買貴冇買錯　—　真？

28. 好啦，三個點，逐個講。首先，「有買貴冇買錯」，好含混，視乎你買貴少少，定買貴好多啦。但一般買貴，即係買錯，金句話齋，估值好緊要。順帶一提，買貴即係買錯。唔會講志在必得，係李澤鉅嘅哲學，我認為佢先得李嘉誠真傳（話時話，在香港買地喎，過兩日寫）

一般買貴，即係買錯

29. 第二個，長期持有，咁我相信大約啱嘅。如果間公司，真係一路仲成長，咁你真係可能捱到回家。例子，上面個圖，Amazon，跌咗九成幾可以回家再升N倍（不過，呢個就係「鄧小平」—好個別嘅例子。有人做煙鏟一樣好長命，不等於食煙延年益壽，你發現咁簡單嘅道理，都好多人唔會理的）

不過Amazon，5蚊跌到3毫，而家80蚊

30. 另外留意，個圖係1997 – 2003，因為後來升得太多，你睇圖睇唔到當年有幾波動。我而家放大。你好明顯見到，5蚊跌到3毫！而家？80蚊。順手講埋，全部計及拆股嘅影響，就係5蚊跌到3毫升到80蚊。

31. 但第三點先有趣。係剛好相反，分分鐘，畀人收購先大鑊！

32. 點解？其實我講大新嘅例子，你大約都明明地。我當你高位（我都有份！）買咗Netflix，而家潛咗水，咁但生意正常嘛（其實股價低位升返一個開！）。好啦，我當你600蚊買，之前插到160蚊，而家估值修復，上返近300蚊。

33. 如果呢個時間微軟嚟買，正如路透篇猜想咁講，溢價三成。即係出400蚊買。咁你會點？

34. 你會冇仇報呀！

35. 啲網民成日講咩割韭菜，十居其九都用錯。但呢啲情況，就真係似割韭菜，或者廣東人打麻雀講割禾青。割禾青即係點？大約係你講好打十六圈，去到第七圈，你輸緊大錢，對面贏緊大錢，忽然間話趕住返屋企煮飯，打埋呢舖算。

36. 咁，你咪冇仇報。亦即係，你隻Netflix畀人買咗咯。因為，你會覺得，原本可能佢會好似Amazon咁，之後再升嘛。當然呢個唔係必然，但一日未畀人買起，一日仲有希望。

37. 所以，你間公司畀人買起，都未必應該太沾沾自喜。正如Amazon如果當年我幾蚊買，跌到幾毫，然後1蚊畀人收購—你以為好開心，但其實畀人割咗禾青了。之後嘅80蚊，就冇你份（但當然私有咗嘅Amazon或賣咗盤後，仲係咪可以後來咁叻，就歷史沒有如果了）

5蚊跌到3毫，原本可以升到80蚊，但1蚊畀人收購咗。呢啲悲刻，點避免？

38. 好啦，5蚊跌到3毫，原本命中註定可以升上幾十蚊，但點知1蚊畀人私有化，割咗禾青。相信上面嘅例子話到畀你知啦，但，呢啲悲劇，如何避免？（特別係，你係5蚊買嘅）

39. 長期讀者應該估到答案。短答案係，冇得避免。好少少嘅答案：咁你唯有避免太貴嗰時買股票（估值好重要）。但仲有一個答案：所以，真係唔好全部買晒個股，更加唔好一注獨贏。一隻畀人割禾青，唔會隻隻都割啩，唔會成個指數割嘛。

下回預告：而家嘅Netflix，平定貴？Microsoft呢？

40. 又係寫得太長，唯有補返下一篇講。預告定：你可以諗下，而家嘅Netflix，算貴定算平。微軟呢？　呢個問題冇一個絶對答案，咁都講過，有人買有人賣，即係有覺得平有人覺得貴。但，冇絶對答案，又唔等於絶對冇答案。況且，過程重要過結果，你覺得貴又好，平又好，點解？你用乜去睇？下篇會解。

41. 不過提示，Netflix今年跌咗一半（一度跌咗八成）