Microsoft 買Netflix，流定堅？兼同你講傳媒生態。係咪成日唔知睇乜好，信邊個好？呢篇解你知 (Patreon)

Microsoft 買Netflix，有乜implication？

論盡Big Tech成功收購．微軟又買過乜好嘢？

但，單料有幾堅？咁望下邊個爆料先

主流傳媒，一般都可信。不過，人地有話呢個係新聞咩？睇真啲？

Facts vs Opinion，固然「不存在完全持平」，但不等於「完全不存在持平」

Comment is free, but facts are sacred

Facts are free, opinion is sacred

你畀錢睇我寫文，係睇Facts咩？

華媒寫「路透：微軟明年可能購Netflix　」—　你點理解？

識睇，當然睇原文。「係個記者自己覺得咋」。「我覺得下年恒指會10萬點添」

但，係咪就得啖笑？又唔係。只係你要分清楚

市旺固然有收購，但市差都有　—　不過只有少數公司有實力做買家

Windows Office 之類，現金牛，慣性收視，定期科水

1間微軟等於14間NetFlix

微軟有乜理由買？NetFlix又有乜理由賣？

邊個係Netflix大股東？

咁係咪即係話，我買貴咗都唔怕，好公司跌咗都會有人收購，唔驚？

1. 另一單想講嘅，係傳微軟 2023年會收購NetFlix．相當有趣，但唔係叫你而家買Netflix

Microsoft 買Netflix，有乜implication？

2. 商業上嘅implication，我可能會在Facebook Page寫多啲，今篇暫時唔講太多。（BTW，以後可能盡量Facebook 寫「商業」「企管」多啲嘅嘢，呢度寫「金融」「投資」，但兩樣嘢當然係缺一不可，況且未必真係分得開，可能我呢個實驗最後會失敗）

論盡Big Tech成功收購

3. 比較長期嘅讀者，應該睇過之前有一排我寫科技股收購。Big Tech當然做唔少收購，當中最成功應該係Facebook買Instagram同WhatsApp（前者係世紀好Deal），以及Google買YouTube，或者Amazon 買Twitch

微軟又買過乜好嘢？

4. 微軟 方面，收購並唔算極之成功。你會諗起乜？Hotmail（後生讀者未必知係乜）？定LinkedIn（賺唔到錢）？GitHub？定Skype？可能比較成功會係Activation Blizzard（正係早兩年我話會賣盤！在呢度寫的！），問題係分分鐘過唔到反壟斷。

但，單料有幾堅？咁望下邊個爆料先

5. 呢單傳聞有幾堅？好啦，又係實戰學習，你地成日問，唔同嘅分析，唔同嘅講法，唔同嘅媒體，信啲乜？睇啲乜？呢度就答你

6. 第一樣嘢，當然睇source係乜，睇往績。隔離台體嘢（SportsYeah）都會有講，嗰啲「傳邊個邊個轉會邊度」，你睇係乜水講，有啲人公信力高啲，有啲就只係個球員或經理人自己放料跳草裙舞，有啲就完全係閉門造車無中生有。見到冇？足球又好，金融又好，原理係一樣的

7. 而主流財經傳媒一般都算可信，因為人地有機制（例如要問幾個獨立source），錯咗亦大大個招牌喺度，唔係啲無名網友作故事，查無此事就換個account

8. 不過，又再小心啲。

主流傳媒，一般都可信。不過，人地有話呢個係新聞咩？睇真啲？

9. 留意傳媒嘅朋友，應該聽過comment is free, but facts are sacred。正如我年代寫文做閱讀理解，老師都教你要分邊啲係facts 邊啲係opinion—雖然實際上，兩者未必咁clear cut．「香港失業率XXX」應該係一個fact，但「香港經濟好差」係咪一個fact？就睇你點睇。數字再差，你一樣可以話背靠祖國有希望。正如數字再靚，有啲人覺得「GDP唔代表乜」，股樓皆升但貧富懸殊，「冇民主再有錢都只係窮得只剩下錢」，咁就沒完沒了。「即係李嘉誠都好窮」

10. 同樣地，同一單fact，「香港失業率XXX」，我可以包裝做「通關首月　香港失業率高位回落 復蘇明顯」，或者「通關後　香港失業率　依然高企」—見到冇？narrative 之嘛。

Facts vs Opinion，固然不存在「完全持平」，但不等於「完全不存在持平」

11. 但無論如何，在傳統新聞做法，兩者都真係分開。當然聰明嘅編輯同記者會用好多方法去「引導」你，邊啲新聞報，邊啲放最頭邊啲放最尾，用乜字眼，配乜圖，訪問「路人」「學者」搵邊個，全部可以操弄。

12. 但，都真係仲係分開的。有人話「不存在絶對持平」，係，但呢啲就係混吉邏輯。「不存在絶對持平」，不等於「完全不存在持平」。即係靚唔靚仔，不存在絶對標準，不等於絶對不存在標準，明冇？（冇錯，股票估值都係）

Comment is free, but facts are sacred

13. 你拎份報紙上手，固然各有「立場」，但始終報頭條新聞，都仲係「報新聞」，你最多用頭先講嘅方法去tune，但總不能將佢變成記者編輯或老細自己發表高見嘅地方（除非你做到張生咁突兀）。

14. 即係話，一般你報新聞，不能寫「經濟玩完　通關事不宜遲」（不過聰明嘅做法就係：「香港失業率xxxx 學者：唯有通關能夠」，然後去訪問啲文妓學者）。正式嚟講，你嘅「經濟玩完　通關事不宜遲」，應該係放在社論，社論咪Opinion。又或者，長期有幾件自己友，在「論壇」，甚至副刊專欄度寫飽佢。

Facts are free, opinion is sacred

15. 之但係，呢啲都係十分古代嘅嘢。眾所周知，傳媒難做，「人人係記者」。近年有個半諷刺嘅講法，話Facts are free, opinion is sacred（你可以留意下，都係Guardian！原版亦係Guardian嘅傳奇人物講，我揀文係有心思嘅）

你畀錢睇我寫文，係睇Facts咩？

16. 的確，呢個年代，Fact唔值錢。恒指幾多點，香港失業率幾多，日本落雪，有乜價值？呢個年代，值錢嘅係Opinion—你而家睇緊嘅嘢。而唔係每日我話畀你知恒指升幾多，十大升幅係邊幾隻，係咪？（而我話你知「下年升邊隻」，就係Opinion）

17. 於是乎，近十幾年，其實傳媒已經搵其他出路。咁好多玩法嘅，可以係做「Advertorial」—唔係完全鱔稿，但背後有人贊助啦（發唔發現好多XX專訪？邊個邊個唔做乜乜走去乜乜，啲故事點嚟？點解冇人嚟問我做乜唔做金融去寫Patreon？）。另外，亦可以做「調查報導」，或者收料踢爆，老人院虐老，公司有人以權謀私之類（其實同東張西望差多）。

18. 仲有一種玩法，就係將Fact 同 Opinion混埋一齊，你見鬼媒，特別係財經媒體成日做。新聞都照做，但只係其次，最搵錢同最吸引人畀錢訂，係Opinion

19. （最後插播一句：點解我知呢啲嘢？首先因為我成日睇唔同媒體。另外，因為我以前女朋友做記者的。「所以睇多啲唔同嘅嘢，識多啲唔同嘅人」）

華媒寫「路透：微軟明年可能購Netflix　」—　你點理解？

20. 點解忽然講咁遠？因為，你真係好小心。不如睇下中文報導先。明報標題，係咁寫：路透：微軟明年可能購Netflix

21. 你會點演繹？正常人（包括我），就係路透有獨家料，有內幕，知道微軟內部傾緊，係咪？而路透嘅料往績幾堅，好少作故仔。當然「內部有傾」同真係會發生，中間可以發生好多事。最簡單可能見光死，結果收購對象升得太多，或者搵到更好嘅嘢，或者內部傾傾下冇共識，或者提出嗰條友之後走咗，畀人炒咗，死咗—或者最後會畀反壟斷阻止（近年嘅政治大環境對Big Tech唔太友善）

識睇，當然睇原文。「係個記者自己覺得咋」。「我覺得下年恒指會10萬點添」

22. 不過，識睇，當然睇原文。你可以快睇幾句，就知故事唔係「知道微軟內部傾緊」。甚至你一睇個題都知，係Breaking Views Prediction．即係乜？「即係個作者自己估」

23. 咁都得？係，咁都得。其實有乜唔得？你問我，覺得下年升定跌，都只係「我覺得」。不過搞清楚，呢啲係views，唔係facts，同話「知道微軟內部傾緊」，完全係兩回事。

但，係咪就得啖笑？又唔係。只係你要分清楚

24. 咁但，係咪就得啖笑？就唔係。咪講過咯，Opinion先值錢！係，只係個記者認為，正如你問我下年個市點，都只係我認為，但，理據係乜？呢個先重要。

25. 況且，如果真係「知道微軟內部傾緊」，可能股價就抽咗上去啦，沒戲唱。就梗係未有風聲，先有機會（如果真係成事）。

市旺固然有收購，但市差都有　—　不過只有少數公司有實力做買家

26. 講咗半篇傳媒生態，講返呢單「大預言」。之前講市旺，固然會多數購，因為錢比較易拎，而且投資者往往會「獎勵」呢啲做收購嘅公司，「有買貴冇買錯」。

27. 但到市差，一樣係會有收購活動，只係金額當然細好多（啲嘢都跌晒），同埋，只會係最有實力嘅公司出手。就係靠呢啲時間，可以用合理價甚至賤價，買到好嘅公司。記得投資金句系列寫過好多次，估值好重要。

28. 仲有，因為有實力嘅買家少咗，「供求定律」，所以成交嘅估值一般都低啲

29. 咁微軟，股價今年當然都麻麻，跌三成，但就真係主要因為估值，同埋跟大市跌。業務冇乜咩問題，頂多你話放慢，但唔係嗰啲會有生存問題嘅公司。對不？然後大家都知，Windows Office 之類，現金牛，慣性收視，定期科水。呢啲生意，就硬淨過Facebook 或Google嘅廣告收入

Windows Office 之類，現金牛，慣性收視，定期科水

30. Netflix呢？冇好細咁睇啲數，負債係高嘅，但真係「最惡頂嘅時間已過」，嚟緊你話未減息都好，加息空間都好有限啦？最重要係，雖然串流業務仲係「割喉競爭」，但至少NetFlix係賺錢嘅！好重要！

1間微軟等於14間NetFlix

31. 再講一次，估值一回事，估值貴嘅，股價高位跌六七成有乜奇。但至少啲業務仲係正常，至少係賺緊錢。你一路蝕錢嘅公司，就十分危險。

微軟有乜理由買？NetFlix又有乜理由賣？

32. 微軟買起Netflix嘅理由，講得通，因為微軟呢啲大公司，玩到咁嘅規模，要一路增長，多數都係要繼續不停收購。上面亦講過，公司財政幾好，能力應該不成問題。另外留意下，而家微軟嘅市值，係Netflix 14倍。大約你有個概念，要買起佢，唔係太難嘅事。

邊個係Netflix大股東？

33. 至於Netflix會唔會賣？就唔知。不過可以留意嘅係：邊個係NetFlix大股東？實情創辦人兼靈魂人物Reed Hastings，只係渣住好少（1 至2%）。大股東？主要就係啲ETF

34. 咁即係易唔易買？一半半，好處就係唔會大股東死攬住唔放，ETF都係睇錢做人，甚至最後畀返啲散戶決定。壞處就當然係你冇一個大股東，就要一次過出價同晒所有人買。

35. 對NetFlix嚟講，賣盤嘅最大好處，當然係搵個靠山。至少暫時嚟講，都見到串流仲係大家不停割喉，對手（Amazon，迪士尼，蘋果）都係大公司，比較多錢燒，幸好NetFlix係先行者，所以仲有錢賺。咁搵個大靠山當然更好。

36. 而且NetFlix同微軟來往甚密，Netflix做廣告，亦係搵微軟做Partner

37. 至於微軟方面，除咗係要收購嚟增長，亦都係睇中Netflix嘅客戶群同平台，順手希望擴張遊戲業務　—　冇錯，其實買Netflix，係如果買唔成Activation Blizzard嘅後備Plan．

咁係咪即係話，我買貴咗都唔怕，好公司跌咗都會有人收購，唔驚？

38. 又寫得太長，最後想大家諗一個問題：咁係咪即係話，我高位買科技股都唔怕，因為間公司只要唔死，只要生意仲正正常常，跌咗咪會畀人收購，畀人收購咪會升返。

39. 答案當然係，一半半，Yes and No，主要係No．高位買都係會出問題嘅。點解？下篇文講（但唔會成篇講微軟 Netflix了，半篇吧）