[聖誕反思]今年一路有買，太古19 創52星期新高，有乜啟示？ (Patreon)

趁聖誕，轉小小形式，睇故事學道理

投資核心信念：多數人都係錯嘅。同埋，估值好重要

10月大跌時大家講乜？二十大外資撤離喎。咁所以11月又唔撤離了

除咗估值，仲有乜可以解釋今年港股跑贏美股？（更唔好講啲Tech股）

唔講大市嘅，講個股，太古19已經52星期新高，點解釋？好彩我有買

太古喎，商場又仆街寫字樓又仆街0+3國泰又玩完，做乜52星期新高？

太古今年升咗52%，仲派咗四五厘息，請問你手上邊隻嘢有咁回報？

係喎，而家你又會話炒通關炒經濟重啟嘛！

如果係趺嘅話，你就會話「通關無望拖低股價」

即係，根本「好消息」同「壞消息」，係同一樣嘢

仲可以留意多樣嘢：國泰293同太古地產1972，就冇創新高的。即係點？

太古今年升60%，國泰35%，太古地產仲要倒跌

計高位，國泰得返四成，太古地產有六成，但太古有七成。即係點？

折讓收窄嘛，但點解折讓收窄？

新經濟is overrated。我都有買，但唔係全部買晒落去，亦唔係最貴時買

冇人話過高增長股價回報就一定高啲，何況，你個高增長係咪一定發生？

BTW，唔好嚟問我「咁而家買唔買得太古」—我一定回「年頭你又唔買？」

唔係我惡我串，係為你好，等你思考下。否則永遠唔會進步

其實大家樂都52星期新高，不過冇乜人有興趣，就唔寫住

節目預告：傳Microsoft買Netflix，搞乜？

趁聖誕，轉小小形式，睇故事學道理

1. 實在好似講得太多宏觀嘢心法嘢金句嘢，我都仲會完成埋個金句系列，但不如趁聖誕放假轉少少口味。睇下呢個形式大家又鍾唔鍾意（其實以前嘅文係呢種形式多）

2. 通過好多呢啲例子或實戰，你會見到，好多時啲人「以為」會發生嘅嘢，都係錯晒嘅。金句系列成日都有講，但我唔知讀者係冇睇，定根本唔同意，定不停咁犯錯。永遠仲係有好多人覺得，經濟點點點，所以股市就會點點點。你睇下每日發生嘅事，真係咁架咩？

投資核心信念：多數人都係錯嘅。同埋，估值好重要

3. 如果你叫我真係好簡單咁講我嘅核心信念，應該就係：啲人多數都係錯嘅。同埋，估值好重要。

4. 好，先講港股。一個好值得你諗嘅現象。3月時表現好差啦，10月時表現仲差，係咪？記唔記得嗰時啲人點講？你又點講？疫情經濟差呀，外資撤尼呀，移民潮呀，搞死經濟呀，冇人買港股呀，政治風險呀，二十大呀，大陸鎖國呀，打仗呀，blah blah blah。「平可以更平」，「無險可守」，「跌到1000點都唔奇」

5. Really？有冇諗過，自己其實可能乜都唔識？但你見啲友一樣振振有辭，講到好似實會發生咁。咁你點解釋，今年港股跑贏美股？

10月大跌時大家講乜？二十大外資撤離喎。咁所以11月又唔撤離了

6. 今年港股跌咗16%，跑贏美股。當然恒指對標普指數，應該公平。更唔好講好多讀者鍾意買嘅納指（甚至TQQQ）

除咗估值，仲有乜可以解釋今年港股跑贏美股？（更唔好講啲Tech股）

7. 請問，你點解釋呢個現象？除咗「估值」，應該冇乜嘢可以解釋，但你發現，即使我講完又講，都係冇乜人信服嘅。

唔講大市嘅，講個股，太古19已經52星期新高，點解釋？好彩我有買

8. 以上都好似重覆得太多。咁不如講個股，就講放假前，有隻香港股已經創咗52星期新高。就係太古19。我都有買，年頭開始個個月買啲，可惜唔多。但好值得你去思考。

太古喎，商場又仆街寫字樓又仆街0+3國泰又玩完，做乜52星期新高？

9. 你估下，香港經濟又仆街，國泰又玩完，寫字樓又租唔出，金融中心地位又不保，零售又唔掂之下，太古今年表現點？答案係，升咗52%。好似仲有四五厘息派咗。

太古今年升咗52%，仲派咗四五厘息，請問你手上邊隻嘢有咁回報？

10. 借問聲，你今年買邊隻股有咁嘅回報？

11. 我就唔知啲人用乜narrative 解釋了。咁正路都係話，經濟重啟，通關有望，最壞時間已過之類，係咪？

係喎，而家你又會話炒通關炒經濟重啟嘛！

如果係趺嘅話，你就會話「通關無望」—即係，根本「好消息」同「壞消息」，係同一樣嘢

12. 咁你見到未？根本，所謂嘅「壞消息」同「好消息」，係同一樣嘢，頂多只係唔同階段，今年升嘅，你咪話通關在即，今年跌嘅，你咪話封關好大影響。

13. 拿，幫你重溫金句啦，你睇網上啲narrative，絶大多數都係垃圾。係咪？

仲可以留意多樣嘢：國泰293同太古地產1972，就冇創新高的。即係點？

14. 你仲可以留意多樣嘢：太古下面嘅兩大子公司，國泰293同埋太古地產1972，都係未創52星期新高嘅。

太古今年升60%，國泰35%，太古地產仲要倒跌

15. 固然你可以話，國泰之前已經見過52星期新高，都係。但可以比較兩樣嘢。第一，國泰今年升35%，太古地產今年仲要跌3%，完全係跑輸阿媽。

計高位，國泰得返四成，太古地產有六成，但太古有七成。即係點？

16. 即使你計歷史高位，國泰而家係高位四成左右，太古地產大約係高位六成。而太古，大約係高位七成。

17. 你諗真啲，點解？

18. 一個可行嘅解釋，係太古除咗國泰同太古地產外嘅業務做得好好。但其實，除咗呢兩味外，其他業務都唔大。

19. 我比較相信嘅解釋，好簡單，就係個「折讓」收窄咗。

折讓收窄嘛，但點解折讓收窄？

20. 好簡單，太古渣住82%太古地產，同埋45%國泰。太古地產而家1150億市值，國泰550億市值，咁太古拎住嘅股票，已經值1200億。而太古自己嘅市值，600億

21. 好多初投資嘅，就會諗，「嘩即係剩返嗰啲業務負數，免費送畀你，好抵」。Yes and No，問題係呢類Holding Company Discount，古今中外都有。

22. 不過，例如話有啲人會去計，呢個折讓，同歷史平均相比係高定低。

23. 咁睇返上面我講嘅數字，好明顯，個折讓今年係收窄咗，所以你先見到阿媽嘅股價強過兩個仔咁多。

24. 問題係，點解折讓收窄咗？兩個原因，其實係同一個原因。首先，因為公司有做回購，但另外，就係因為夠殘（亦因為夠殘，所以做回購）。

25. 見到冇？估值好重要，而唔係好多人諗嘅咩「零售不景　航空中轉地位玩完　太古兩瓣業務香晒　一定冇運行」。計埋派息，升60%呀！然後你望下你嗰啲講到點巴閉嘅科技股？

26. 見到冇？估值好重要。我知好多人話，「唔知用乜睇」，係好難睇的。但你一定要明白，「估值好重要」。咁你下次高追啲貴到離奇嘅嘢時，會多兩分戒心，可能會買少啲。正如到你下次在災難中買嘢時，會多兩分勇氣，可能放心買多少少。

27. 咁就已經好夠。

新經濟is overrated，當然我都有買，但唔係全部買晒落去，亦唔係最貴時買

28. 仲有，「新經濟」is overrated．當然唔敢包之後唔會翻生，好可能會，但真係唔好以為「新經濟」就實掂。

冇人話過高增長股價回報就一定高啲，何況，你個高增長係咪一定發生？

29. 邊個話你啲咩科技股，高增長，股價就一定跑贏舊經濟？高增長都不等於股價一定跑出（以前寫過，阿里巴巴增長高過Google，但股價表現爭好遠。點解？咪因為估值！）

30. 更何況，啲高增長，係咪真係一定發生？

BTW，唔好嚟問我「咁而家買唔買得太古」—我一定回「年頭你又唔買？」

31. By the way，警告定你，「唔好嚟問我而家仲買唔買得太古」—因為我嘅答案一定係：年頭叫你買又唔買？

32. 唔係我惡，「而係為你好」，真的，你係唔應該問呢種問題。點解升晒先嚟問？我過去12個月，一路都買，你又有冇跟？（雖然我唔係買好多）。唔係中咗一隻自吹自擂嘅問題，而係：點解硬係啲股票升晒你先會有興趣？之前平，好似冇乜人買？

唔係我惡我串，係為你好，等你思考下。否則永遠唔會進步

33. 一日克服唔到呢種心態同想法，你一日投資都唔會好。正如篇文最初嘅例子，你要撈到10月個港股底，近乎不可能。但如果你係定期或者一有錢就買嘅，要照買落去，應該做到（至少我都做到）。

34. 而最後當然都係嗰句：你唔敢買，都唔好走去嗰啲位沽。

35. 一次又一次畀你見到，最應該買股票，就係全世界都覺得你唔應該買，甚至你自己都覺得唔應該買嗰時（咪又係「別人恐懼時我貪婪」）—但克服個心理，唔係咁易，所以點解投資唔係咁易，點解我日講夜講

其實大家樂都52星期新高，不過冇乜人有興趣，就唔寫住

36. 其實仲有一隻我有留意嘅股票52周新高，係大家樂341，不過照計冇乜人有買或有興趣買。不過呢隻同高位比，只係得返一半。難請人，最低工資實在係死症。

37. 雖然開關，復常，放寬社交距離等等，當然對公司有利。「所以咪升到52星期新高」，幾時都話係炒定先，唔會到「確認」先升。

節目預告：傳Microsoft買Netflix，搞乜？

38. 寫到太長，聽日先講另一單：路透社估2023年Microsoft 會買Netflix，你又可以思考下。諗乜？諗乜都得。包括買唔買得起，買嚟做乜，會唔會想賣盤，點解而家買，任你。之後我就會寫