加密幣ETF嘅嘢 (Patreon)

加密幣ETF嘅嘢

仲應唔應該買加密幣？你問我當然答你唔應該，但，可能我錯呢

「之前都跌過八成後來升返」—又唔「過去不代表將來」了？

不過，而家嘅金融情況，又點同2020年？況且，今年仲爆咁多鑊

平台爆，就只係平台問題。隻幣爆，就只係個別問題，「一早有跡可尋」

銀行爆煲，但都冇影響法幣嘅成功—咁你過去一百年長渣美金，輸錢定贏錢？

一個盲點：嗰樣嘢「成功」，同你可以渣住升好多，係兩回事

十四年嚟，加密貨幣，除咗用嚟呃人同炒，仲有乜普及功用？唔覺喎

99.9%嘅讀者，都冇用過任何加密貨幣。但生活有乜影響？十四年喎

話政府濫發貨幣，人人唔信法幣。結果通脹下，美金20年新高

「幣圈」才俊，咪又係搞間公司上市圈美金，或者偷客啲錢買樓買遊艇

拎嚟做支付媒介，更加搞笑。係呀施永青係廢老，但你今日食咗雲吞麵未？

加密幣嘅所謂潮，係因為升啫！跌嗰時仲潮唔潮？而家同人講你買ARKK丫

計Money weighted，明顯地係輸錢嘅多。

串流都好有用，改變世界，十分普及。但我點樣買「串流」賺錢？

我甚至大膽覺得，「有用」嘅貨幣，一定係跌　—否則邊有人用？

真正嘅未來，當然係CBDC，Big Brother，咪諗住逃稅洗黑錢

不過，冇人話「冇用」就冇價值。黃金呢？加密貨幣取代嘅，其實係黃金

廢老買黃金，潮青買加密幣，「有人買咪升」，「供求定律」

不過，黃金得一種，加密貨幣有好多種。聽日出一隻新嘅，你點算？

最後都係人性：你見個個都係打住烏托邦招牌，然後拎美金去做第啲嘢

加密幣ETF嘅嘢

1. 居然有讀者問香港嘅加密貨幣ETF，咁我擺明唔係專家，求其一個中學生在啲細節嘢上都會識得多過我（但，呢啲係咪叫「知識」？巴膠鐵膠識背晒啲站名又如何？）。但既然讀者都照問，即係都想聽一個「唔識」嘅人嘅意見。

2. 另外，應該申報下嘅係，我之前都有買咗少量嘅比特幣ETF，加拿大上市，當然已輸一大截。

3. 讀者嘅問題，「應唔應該買香港呢兩隻加密貨幣ETF」。其實可以分為兩部份。問題一，應唔應該買加密貨幣（在香港嘅兩隻係比特幣 同以太幣）？然後問題二,咁如果問題一嘅答案係肯定嘅，咁，係咪應該買香港呢兩隻？

4. 我對兩個問題嘅答案，都係否定嘅。不過第二個問題易答啲，即係話，即使你覺得應該買加密貨幣都好，都唔應該買香港呢兩隻ETF。

5. 原因都幾簡單，管理費貴，同埋流動性未必夠。雖然我估你買十萬八萬港紙，又未必好大分別。但，外國都一早有加密幣ETF。美國冇啫（好似未合法），加拿大一早有。BTCC嘛，Purpose Bitcoin ETF，有加紙版，或美金版。我都買咗，你可以慢慢研究。

6. 順帶一提，買加拿大股當然要用IB，所以唔好怪我成日都賣廣告。因為有時有啲讀者，問我邊度買日本股，咁答佢IB，佢又話未開。咁講真開戶都唔煩，多個工具在手，點都好嘅（請用我嘅開戶link）

7. Purpose Bitcoin ETF就渣住Bitcoin，香港嗰隻就渣CME芝商所嘅期貨，照計呢個分別就不大嘅。不過睇管理費，BTCC 收1.5%，香港嗰隻收2%，照計就冇乜理由買香港，仲要流動性應該差過加拿大嗰隻。唯一嘅理由，就係你想在香港交易時間買，但真係咁重要？反正你夜晚臨瞓前，加拿大都開咗市。同埋留意返，加密貨幣本身，一般係24小時交易嘅

仲應唔應該買加密幣？你問我當然答你唔應該，但，可能我錯呢

8. 不過返返去第一個問題，我就唔認為仲應該買加密貨幣。雖然往往讀者自己心目中都有答案，咁OK嘅，況且，可能我錯呢？咁但，即使你真係要買，都只能買些少。我都只係買咗好少，組合5%都好似冇。

9. 咁你買，就當然係認為佢會升，係咪？但我唔係好睇得到，點解佢仲可以大升。

「之前都跌過八成後來升返」—又唔「過去不代表將來」了？

10. 首先我聽過最常見嘅講法，會話你知，之前都試過高位跌八成，然後都彈返上嚟。的確如此，但呢個似乎唔係真係一個好嘅理由，否則你拎去買任何股票都得。仲有，去到呢啲位，又冇人再同我講「過去不代表將來」

11. 現實就係，而家嘅金融情況，又點同2021年加息之前？

不過，而家嘅金融情況，又點同2020年？況且，今年仲爆咁多鑊

12. 況且，今年加密幣相關嘅東西，爆煲連連。FTX爆煲就不用講，咁有人會話，係間公司本身嘅問題，你可以唔用平台。但亦都唔止一隻幣爆過煲。對，專家話，只係個別問題，只係呢隻嘢問題，「一早有跡可尋」—事後咪咁講。咁事前買嗰啲，又係咪咁諗？接連呢啲事件，借問聲，點信呢個制度？（而我從來都唔信）

平台爆，就只係平台問題。隻幣爆，就只係個別問題，「一早有跡可尋」

13. 當然會有人話，都有銀行爆煲，但冇影響傳統貨幣嘅地位。係喎，咁但呢個真係另一盲點：「傳統貨幣」好成功，之但係，過去一百幾十年，你渣住美金，係賺錢定蝕錢？當然係蝕晒畀通脹。

夠有銀行爆煲，但都冇影響法幣嘅成功—咁你過去一百年長渣美金，輸錢定贏錢？

一個盲點：嗰樣嘢「成功」，同你可以渣住升好多，係兩回事

14. 好多人唔明白，嗰樣嘢「有用」，同你渣住可以升好多，完全係兩回事。

15. 實情，加密貨幣，都十幾年歷史。但其實，除咗用嚟昆水，同埋炒（呢個可以係一個功能，陣間解），有乜用途？有乜貢獻？近乎係……冇。你可以諗下互聯絡，智能手機，甚至係飛機，電力，串流，對人類嘅衝擊，爭幾咁遠？過去十幾年，我相信99.9%嘅讀者，從來冇用過任何加密貨幣，但一樣生活得好好。掉轉講，你用過嘅，對你生活有乜幫助？（拎去炒係另一回事）。

十四年嚟，加密貨幣，除咗用嚟呃人同炒，仲有乜普及功用？唔覺喎

16. 事實上，最初啲狂熱份子講嘅宏願，差不多全部都冇發生過。

99.9%嘅讀者，都冇用過任何加密貨幣。但生活有乜影響？十四年喎

17. 你話咩政府濫發貨幣，人人唔信傳統貨幣，簡直係大笑話一個。早排美金先升到20年新高。係，高通脹，但高通脹之下，啲人信乜？信美金定加密幣？你話呢？你下個月出糧想出乜？

話政府濫發貨幣，人人唔信法幣。結果通脹下，美金20年新高

18. 而你見，拎住呢啲招牌搵食嘅，咪又係拎晒啲錢去買樓買股票轉咗美金洗！搞上市嘅，都係圈美金之嘛。

「幣圈」才俊，咪又係搞間公司上市圈美金，或者偷客啲錢買樓買遊艇

19. 至於話拎嚟做支付媒介，更加係搞笑。固然個個恥笑施永青唔識，但，結果你有冇落去食雲吞麵用加密幣？邊位試過？

拎嚟做支付媒介，更加搞笑。係呀施永青係廢老，但你今日食咗雲吞麵未？

20. 我見到好多人，特別係男性，好鍾意呢啲fancy 科技嘢。但唔好意思，fancy同賺到錢，係兩回事。咪話Sanrio跑贏樂天幾條街。

加密幣嘅所謂潮，係因為升啫！跌嗰時仲潮唔潮？而家同人講你買ARKK丫

21. 況且，加密幣（同好多嘢都係）嘅所謂「潮」（而我唔知做乜投資要潮），係因為升啫！跌到趴街時仲潮唔潮？所以你發現，根本只係因為升，啲人咪覺得好勁。跌嗰時，狗也不理。你而家買Tesla股票仲係咪有型？而家仲當契媽係偶像仲型唔型？「你同我講你年頭買咗Sanrio就型啦」（BTW，最後，都係拎返做美金計價）

22. 當然好多人對加密貨幣嘅迷戀，亦因為真係有啲人一夜發達。都話個個都只係想暴發，扮乜丫。但，我就唔認為呢啲叫做投資。

計Money weighted，明顯地係輸錢嘅多。

23. 最重要係，當然係有人贏錢，但，計money weighted，幾明顯見到買加密幣嘅,係輸錢多，亦即係，好大程度，只係一個財富轉移。某啲人將你地嘅錢轉咗去自己度。Money weighted計，多數錢都係輸嘅，咁人頭計更加唔使講，但其實股市計人頭都可能係輸多贏少，但money weighed就係贏錢嘅多

串流都好有用，改變世界，十分普及。但我點樣買「串流」賺錢？

24. 仲有一個問題，背後嘅科技好有用，同你應該買加密貨幣，好似係兩回事。電力好有用，但你可唔可以「買電」致富？好似冇咁嘅事。互聯網好有用，但我可唔可以買起個互聯網致富？好似冇咁嘅事。固然，電力，鐵路，航空，互聯網，智能手機興起，全部都有啲股票升咗唔少—但，事前你就真係未必估到。

我甚至大膽覺得，「有用」嘅貨幣，一定係跌　—否則邊有人用？

25. 而你講貨幣嘅，我甚至覺得，剛好係掉轉。一隻「有用」嘅貨幣，就係唔會升，只係跌。呢個係個幾大膽嘅想法，但你諗真啲，美金咁多年，升定跌？梗係跌啦，越印越多，通脹嘛。你隻貨幣不停升嘅，咁邊會有人拎嚟用？呢個論述，本質係矛盾嘅。

真正嘅未來，當然係CBDC，Big Brother，咪諗住逃稅洗黑錢

26. 最後，你話隻技術好有用嘅，其實最後係會拎去做央行數碼貨幣CBDC。我相信呢啲就係未來。你話咩交易便利呀，不可刪改呀，有晒紀錄呀，將來就會全部係咁，數碼美元數碼人民幣，Big Brother，唔使諗住逃稅，唔好諗住洗黑錢，全部有紀錄。但一樣，你係唔會可以買呢啲央行數碼貨幣而發達嘅

27. 好啦，我相信，玩咗14年，絶大多數人都根本冇用過加密貨幣，應該足以證明，係真係冇乜用嘅。既唔會取代到法幣，亦唔會成為交易媒介—即使進化到會，都會係政府拎嚟用。

不過，冇人話「冇用」就冇價值。黃金呢？加密貨幣取代嘅，其實係黃金

28. 所以在呢個層面，其實加密貨幣，係似黃金！你諗真啲，兩隻相信相似。一樣背後冇任何政府支持，又好似冇乜用，所以真係只係講個信字，有人買就會升，「供求定律」

29. 我在信報月刊嘅文，都寫過黃金，亦有簡略講過加密貨幣。Attachment 有

30. 要知道，其實絶大多數嘅投資，最後都會帶嚟現金流，或者至少係claim on一啲實則資產。你買咗Tesla嘅股票，公司嘅派息（如有），盈利，資產，你全部有份。你買咗債券，就有息收。你買層樓，可以收租，或者自己住入去慳租。

31. 但有少量嘅資產，係似乎不能生產任何現金流嘅。黃金固然係，加密貨幣亦係。但仲有紅酒，名畫，名牌手袋，勞力士。呢啲東西都唔產生任何現金流，但難度全無價值？又唔係。

32. 但在呢個層面，名畫有「你睇住就好開心」嘅滿足，亦係身份象徵。但，你拎住啲黃金或加密貨幣，照計好難有呢回事。黃金還好，加密貨幣嘅「型」，上面都講過，係升嗰時先型。你拎住堆爆咗煲嘅LUNA幣，好唔好意思同人講？

33. 所以，一路都講，加密貨幣係最近似黃金。甚至你可以話，廢老就買黃金，潮青就買加密幣（但，十四年啦喎）

廢老買黃金，潮青買加密幣，「有人買咪升」，「供求定律」

34. 兩者真係好相似，真係「有人買咪升」。咁正如我信報文章所講，後生仔，會唔會仲有人買金？反而似乎係買加密貨幣嘅友，一路都有。難聽啲講句，就係一路有新血嚟接火捧，呢個亦係「幣圈」對新一代嘅教育，嘻嘻。

35. 咁聽落去，即係，加密貨幣，等於新黃金啦，即係，都應該有啲前途？

36. 答案：Yes and No

37. 加密貨幣呢個「棚」（if not「局」），繼續玩多幾年，甚至十年，我唔會意外—而家都仲讀者問啦。

不過，黃金得一種，加密貨幣有好多種。聽日出一隻新嘅，你點算？

38. 但問題係，黃金就得一種，XAY，GLDM。但加密貨幣，有好多種。你點知你嗰隻會跑出？呢個亦係最初我質疑嘅原因。

39. 市面上，一百幾廿隻加密貨幣，近乎人人可以搞一隻。問題就嚟啦，聽日我搞一隻，叻過你舊嗰隻，咁舊嗰隻仲有冇人買？呢啲係好現實嘅問題。例如一路講比特幣浪費電源，如果出到隻新啲嘅，自然解決問題，咁但舊嗰隻，會點？同樣地，技術日新月異，五花八門。一隻爆煲，另一隻又出。但你可以買邊隻？

40. 亦即係話，咩「供應有限」，根本就係呃人。法幣先真係供應有限：冇錯可以任印，但美國就只印一種美金，你唔可以印第二種。加密幣嘅，今日有狗狗幣，聽日可以熊仔幣，勞蘇幣，你可以話係技術進步，但舊嗰隻點？

最後都係人性：你見個個都係打住烏托邦招牌，然後拎美金去做第啲嘢

41. 最後，當然仲有我睇得最負面嘅：人性。你見加密幣背後嘅「理念」，係十分烏托邦，無政府，去中央化。但事實呢？可能真係有人信。但聰明嘅，梗係打著紅旗反紅旗。咪話，你見個個一係搞上市圈美金，一係虧空啲錢買樓買遊艇，有幾創新？

42. 成日講code is law，但我認為同講「共產」一樣，只係昆人嘅把戲。可能有人真心信，但最後都係敵不過人性嘅貪念。當啲權力同知識掌握在一小撮嘅人手上，你點可以相信佢地唔會出你古惑—事實上你見佢地已經不停出古惑。

43. 所以，我相信「用途」，係冇乜嘅。加密貨幣作為個投機嘅asset class，可能會存在一段幾長嘅日子。但不等於你應該去買。你真係要買嘅，就只能買少少。