［我堆日本股回顧］跑贏日經，贏錢添呀！扣埋匯水就輸，但依然跑贏晒港股美股。另外，有乜啟示？ (Patreon)

昨日寫咗日本經濟，日本債息，「但其實同你投資冇乜大關係」

反而講開日圓呢排強勢，就再睇返我買嘅日本股。都買咗唔少的

我嘅7隻日本股，都係啲極出名嘅公司，出名到唔使介紹做乜

當然不等於我好了解間公司。但，其實咩叫「了解」？入面做嗰個最識？

七隻日本股，平均回報4%。「扣埋匯水就輸錢」。但都肯定跑贏港股美股喎！

仲有一大堆提過，但冇買嘅，都冇乜邊隻表現特好。除咗……Sanrio！

仲有在Facebook Page提過嘅一堆百貨公司股，呢啲先係真開關受惠股

咁有乜啟示？「首先，我堆嘢升4%，日經指數跌10%」，滿意未？

日本經濟好好咩？但我堆日本股跑出喎

分散。如果我買晒樂天，就仆街了。「咁如果買晒Sanrio呢？」

「如何管理匯率風險」嘅老問題

對你嚟講，就係「日圓大跌」。但對Donki盤數嚟講，係「外幣升值收益」

況且，你買蘋果買Microsoft，日圓大跌一樣影響你的。唔好自欺欺人

昨日寫咗日本經濟，日本債息，「但其實同你投資冇乜大關係」

1. 好啦，昨日嗰篇講日本，就梗係多人鍾意。不過日本經濟云云，我既唔係專家，況且，亦其實同投資冇乜關係。

2. 至於日本債息升會唔會拖冧環球股市，你就直接睇美國債息吧，暫時見到唔似好大影響（但可能要過一排先見），美債債息都回返，而環球股市唔見得好大反應。

反而講開日圓呢排強勢，就再睇返我買嘅日本股。都買咗唔少的

3. 日圓嘛，都講咗，似乎係易升難跌。於是帶動去我今日想講嘅話題：日本股。

4. 新讀者可能唔知，實情我有一排寫過唔少日本股，亦買咗唔少，好似都佔我組合有10%。咁但後來日圓狂跌，就唔係好敢寫。加上，亦都冇乜錢再買個股。

5. 但，我都係全部冇沽的。

6. 好啦，去到年尾，回顧下啲表現。順手睇下有乜啟示。

我嘅7隻日本股，都係啲極出名嘅公司，出名到唔使介紹做乜

7. 我而家持有7日本股，都係相當知名嘅公司，知名到一個唔使點解你知佢地做乜。但，不等於我好理解公司，亦不等於你好理解公司。我成日都講，好多fanboy嘅「knowledge」，同你投資要識嘅嘢，係兩回事。你幫人整電話就會識買蘋果發達？定砌機嘅識買Microsoft？

當然不等於我好了解間公司。但，其實咩叫「了解」？入面做嗰個最識？

8. 我買嘅全部係日本上市嘅公司，以前寫過有少數有ADR，但多數真係太少成交。睇ADR嘅唯一原因，就係因為日本股好似仲要100股咁買，咁有啲股票一手要幾十萬的（任天堂後來先肯拆股）

9. 不厭其煩提多次，除非你在日本。否則在香港或英國美國之類，想買日本股嘅，除咗開個IB（Interactive Brokers）戶口外，都冇乜其他更好方法。事實之前都寫過，介面係有啲複雜，但用耐咗就慣。另外，交易費用低，而孖展息都平，最重要係你可以買到好多古靈精怪嘢。

10. 請用我嘅開戶link，你入錢後佢地會回贈返佢地自己嘅股票畀你，你可以沽晒佢。

七隻日本股，平均回報4%。「扣埋匯水就輸錢」。但都肯定跑贏港股美股喎！

11. 講返，第一隻，日清食品，2897（當然係東京上市編號，下同）。今年升咗24%。賣乜？咪合杯道杯麵，出前一丁，公仔麵．福麵（係，統一咗江湖了）。絶對係下流消費股，早前加價，但用家硬食啦。大陸業務都做得幾好。另外，香港都有間上市嘅日清，係日本呢間嘅子公司。香港嗰間 1475 HK，今年都升8%，計埋匯率，表現其實同日本嗰間差不多，但唔係同一間，係母子。

12. 第二間，全日空，9202，唔使解啦下話？日本開關嘛。今年升16%，又未必有你想像中咁勁。

13. 第三間，日航，9201，一樣唔使解，同上。今年升22%

14. 第四間就勁咯，本人嘅係股東，又係顧客，仲做埋VIP嘅 泛太平洋國際 Pan Pacific，7532．即係乜？即係Donki．留意海外同日本業務都在公司入面。今年升咗39%。

15. 第五間，都應該好多人識，Mizuno美津濃，波鞋。我使唔使跑馬拉松先可以買？今年升23%。當時買嘅原因得一個，夠晒殘。你睇而家都只係700億市值，yen喎！即係40億港紙多啲咋下。嗰時同時有留意另一隻，ASICS，但冇咁殘，結果今年表現都係Mizuno好啲

16. 好啦，剩返兩隻都輸錢嘅。輸大錢添。

17. 第六隻係，燈燈燈燈，樂天，當然係日本樂天 4755 Rakuten，唔係韓國LOTTE．今年跌一半。講到網購點巴閉，點日本Amazon，哦。估值呢？

18. 第七隻，Z Corporation，4689。乜東西？其實係Yahoo Japan，一樣，今年跌一半。

19. 埋單，七隻加埋，今年仲有得贏錢，平均贏4%。

20. 不過你話，老細，蝕匯價蝕到趴呢。一半半，固然今年日圓對港紙跌，但其實近排低位都彈返十幾巴仙。你計年初至今，對港紙大約跌13%。咁扣返匯水，當然輸錢。但你知嘛，肯定跑贏港股同美股呀！！！

21. 問你服未。

仲有一大堆提過，但冇買嘅，都冇乜邊隻表現特好。除咗……Sanrio！

22. 最後補充少少，仲有一大堆我以前提過但冇買嘅日本股（名單在個Excel有，但啲數字唔update的）。咁其實，入面都冇乜邊隻表現真係太好。比較突出，居然係Sanrio（冇錯係Hello Kitty同蛋黃哥），8136，今年升73%。而隻嘢先200億港紙市值（你可以比較下啲香港公司）

23. 另外就係川崎重工，7012，今年升45%

仲有在Facebook Page提過嘅一堆百貨公司股，呢啲先係真開關受惠股

24. 仲有，我在Facebook Page提過嘅一堆百貨公司股，先係最大嘅開關受惠股。三越伊勢丹 3099 今年升咗55%，高島屋 8233 亦係差不多

25. 好啦，回顧寫到呢度。最重要係，有乜啟示你學到？你可以諗下先。

咁有乜啟示？「首先，我堆嘢升4%，日經指數跌10%」，滿意未？

26. 首先，「我啲揀股都還不錯」，都話在個list上而我冇揀嗰堆，都冇乜邊隻真係表現好。最初係咩準則？都好難答你，但一般嚟講，你見我並唔太在乎公司講到點巴閉，對我嚟講，「殘」反而係個賣點。你見同好多人相比，我真係比較重視估值。

27. 另外，都話我堆嘢平均加埋升4%，而今年日經指數跌10%。所以，都真係啲揀股唔錯的。

日本經濟好好咩？但我堆日本股跑出喎

28. 好啦，帶到第三點。講真，同日本經濟有乜關係？日本經濟係「好」定「差」，根本任Q你講。但我相信冇乜人會話2022年日本經濟「好好」。但，同啲股票有乜關係？真係冇乜關係。係架，你夾硬解，可以話經濟差啲人食杯麵，啲人要買Donki，咁但，航空公司呢？好多人嘅直線思維，就係「經濟好，所以乜乜受惠，所以股價會升」。但再一次畀你見到，股市唔係咁運作的。

分散。如果我買晒樂天，就仆街了。「咁如果買晒Sanrio呢？」

29. 第四點，分散。唔使多講啦？如果我all in 買晒樂天，而家就唔方唔樂天了。我兩隻股票都輸一半，但埋單都仲有得升（未計匯水），因為升嘅夠冚。咁你事後講，最好全副身家買晒Sanrio添，但邊有咁易？而我幾肯定，你買晒樂天輸一半嘅痛苦，大過你買晒Sanrio升七成帶嚟嘅快感，呢個係人性

30. 第五點，特別針對男讀者。呢度嘅都好啲，Facebook 一大堆Toxic Masculinity 嘅毒L。佢地會話你知，女人唔識渣車（事實女人開車安全過男人），女人唔識股票（事實女人投資好過男人）。埃汾你唔識Tech—好多人就對呢啲fancy嘢，有啲異常嘅迷戀，呢啲係好多男人由細到大嘅成長。機械嘢，電腦嘢，科技嘢。但你見，最仆街嘅，咪所謂最高科技嗰兩隻。舊經濟啲人就以為無增長，係咩？你見Sanrio賣公仔，日清賣杯麵，Donki賣企鵝，股價好過晒你啲乜鬼科技股幾條街。因為，估值呀小朋友。何況，唔少科技公司，根本錢都賺唔到，有幾巴閉？咁巴閉點解賺唔到錢？

「如何管理匯率風險」嘅老問題

31. 最後，「我真係唔care匯率風險」。如果有人同你講，日圓會跌三成，然後有人仲叫你買日本股，咁你又鬧佢仆街死財演了。但結果如何？結果扣埋啲匯水，我堆日本股都跑贏港股美股。當然冇可能事前知，但至少你事後睇到，冇人話隻外幣跌，我扣埋就一定差過買「冇匯率風險」嘅嘢。

32. 況且寫過多次，匯率呢啲嘢，zero sum game啫，好難長期一路向上。但股票可以長升長有。

對你嚟講，就係「日圓大跌」。但對Donki盤數嚟講，係「外幣升值收益」

33. 最後，其實你見到，我揀嘅公司，特別係非科技嗰五間，亦即係做得較好嗰五間，唔多唔少都有啲外國業務。咁Donki就最明顯，你諗下，在佢盤數入面，所謂嘅「日圓大跌」，對佢嚟講，根本係「外幣升值」，所以係有賺的。亦即係話，根本咪又一條數。講到尾，係睇你啲生意在邊。

34. 你睇迅銷（Fast Retail，Uniqlo同GU嘅母公司）情況一樣（冇買，今年股價幾好），固然你話日圓跌，你啲股票冇咁值錢。但同時間，佢啲海外收入，又有「外幣升值」啫。

35. 所以，你見我真係唔會理咩「匯率風險」。管理？點管理？真係偽命題嚟的。當然，例如我買咗20萬港紙嘅日本股，你怕日圓跌，「你咪自己場外賭日圓跌」，但你最後發現把托啫。係呀日圓跌你賭外匯嗰邊會幫補返，「但如果升呢？」

況且，你買蘋果買Microsoft，日圓大跌一樣影響你的。唔好自欺欺人

36. 固然，呢啲匯率波動，係會令你損失。但兩樣嘢：首先，根本你買乜股都有呢啲問題架啦！你買美股又如何？日圓跌，咪又影響微軟影響蘋果收入，人地咁大間公司都係「硬食」呢啲「風險」。第二，地域上分散帶嚟嘅好處，都仲係令你值得去冒呢啲風險嘅

37. 點管理？睇少啲。日圓跌到30%嗰時，你日日去睇，可能又走去「止蝕」了

38. 但再講一次，匯率真係zero sum game，cyclical 嘢。我發現寫咗好多次，啲人都係唔理的。再講一次，之前講到美匯點強，「20年高位」—你唔覺得好笑？而家先返返20年前嘅位？咁之前20年係乜？但你睇下，美股20年嚟升咗幾多？我隻股賺到幾倍嘅，我會唔會care你日圓係100 定130？