［你今日去咗日本未？］日本央行的聖誕驚喜，兼講日圓日債日股日本經齊前世今生。仲有......「東張西望」 (Patreon)

正題之前，介紹返，篇「東張西望」在最底

日本央行的Christmas Surprise：變相加息，雖然官方否認

實情不停拗「係咪加息」「係咪衰退」，有乜意思？有分別咩？

短息維持負0.1，長息目標維持零。但郁咗個浮動區間。「咪即係加息」

官方講法：唔係加息，唔係退出YCC，唔係停止寬鬆

「明明你又話央行唔會畀驚喜市場？」。日本又點同美國呢？

原本係估下年4月先嚟料嘅。點解？

日圓單日升5%，長債債息單日升值20年最高，日經指數插水

目標零，但原本正負0.25。咪0.25。咁你目標零，正負0.5，咪變0.5！

咁但如果我唔去日本，唔買日股唔買日債，咁關我乜事？都關事的

然後就講歷史：到底點解要零息，點解而家又想退出

日圓跌唔好咩？「明明有人話有利出口」「仲可以幫到旅遊業」

日本近年都貿易赤字，貶值點幫出口？

日本嘅通脹，已經40年新高，雖然官方數字好似仲唔係好高

日本請外勞，「但人工仲低過韓國」，邊有人去？

之後會點？應該唔太難估

至於日本經濟點？就係……唔知

正題之前，介紹返，篇「東張西望」在最底

1. 寫咗好多日通脹見頂減慢加息，又寫咗好多日投資金句，卒之有啲有趣啲嘅嘢可以寫下。Facebook Page都寫咗少少，但當然呢度詳寫。

2. By the way，Facebook Page被下架嗰篇「東張西望」，原汁原味版，在呢篇文Attachment有，但同金融完全無關的，十分粗鄙低俗，會敏感嘅唔好開。

日本央行的Christmas Surprise：退出寬鬆，雖然官方否認

3. 講返今日嘅主題，可能要寫兩篇，就係日本央行意外嘅聖誕禮物：變相加息。係唔係真係加息？都仲有排拗，睇你點定義。況且，根本拗嚟冇乜意思。可以睇我另一Facebook Post。

實情不停拗「係咪加息」「係咪衰退」，有乜意思？有分別咩？

4. 未來就係不可知，你想知道啲嘢會唔會發生，好合理。但切忌去到鑽牛角尖。即係點？即係例如你不停咁花時間諗或拗，下年美國會唔會衰退。

5. 講真，有乜意思？會又點？會係咪股市一定跌？又好似唔係。跌你係咪瞓身沽空？又好似唔會，同樣地，如果唔衰退，軟著陸又點？係咪股市實升？又唔係。你信股市實升都好，係咪瞓身買？又好似唔係。況且，佢一個僅僅0.1%嘅衰退，同埋一個僅僅0.1%嘅增長避過衰退，對股市或對你，到底有乜分別？你諗真啲，你日常好多諗嘅嘢，都係差不多。香港會唔會玩完？請定義「玩完」。有啲人心目中根本1997後就玩完咗。況且，未玩完之前，你見好多人嘅人生又係一鑊泡，所以有乜分別？

係冇加息，短息維持負0.1，長息目標維持零。但郁咗個浮動區間。「咪即係加息」

6. 講返正題，先講啲事實嘢。星期二日本央行到底發生乜事？其實真係冇「加息」。不過，佢將10年日本國債債息嘅浮動區間，由原本嘅0.25厘，變到最近嘅0.5厘（即係央行一路有入市干預，但而家容許佢郁多啲。陣間詳解）。

7. 再講一次，事實真係冇「加息」。短期官方利率（你當類似美國嘅聯邦基金利率，成日議息嗰個），一樣係負0.1厘（記住係負數！）。至於長息，10年長債目標債息依然係0（但郁咗個浮動區間，唔太明唔緊要，陣間解）

8. 仲有，將個每月買債規模由7.3萬億日圓，加到9萬億日圓

官方講法：唔係加息，唔係退出YCC，唔係停止寬鬆

9. 根據官方講法，今次唔係加息（上面睇到啦，真係唔係加息，兩個目標利率都冇郁），亦唔代表放棄所謂嘅YCC（Yield curve control，陣間解），亦唔係代表停止寬鬆政策

10. 但，市場一樣好少理。市場唔係傻的，唔會只係聽你講乜，會睇埋實際影響係乜。

「明明你又話央行唔會畀驚喜市場？」。日本又點同美國呢？

11. 順手講兩樣好快嘅嘢。第一，日本央行係好鍾意忽然畀啲驚嚇投資者嘅（例如睇呢度）。你話，唔係喎，你唔係平時話聯儲局唔會嚇親市場咩？咁就國情不同啦，美國同日本嘅做法唔同，唔好聽一半唔聽一半。

原本係估下年4月先嚟料嘅。點解？

12. 第二，實情呢個「退出寬鬆」，唔係今日先有人估，留意之前日圓由低位都彈咗10%，不過一般係估下年4月先嚟。點解係4月？一來係日本嘅財政年度，二來現任央行行長黑田東彥任期滿，大條道理。事實就今次會議前，共同社都有爆料，話會改通脹目標，退出寬鬆。但官方昨日前都仲否認—但又唔可以話講大話喎，又真係冇郁通脹目標，又真係冇退出寬鬆（至少官方講法冇）。（所以，你話執著於有冇講大話，有乜意思？）

13. 不過同時間，如果你睇返呢個議息前嘅報導，其實都有踢爆，但當然事後先知。

14. 好啦，唔講咁多虛嘢之前，即時睇市場反應。

日圓單日升5%，長債債息單日升值20年最高，日經指數插水

15. 咁首先你見到嘅，日圓即時大升，對美金一度升近5%，都咪話唔驚。對港紙差不多上到6算。

16. 順手一提，之前篇文咪講我借過日圓融資？叫咗你唔好亂試，因為日圓一升你就措手不及。而家你見到，你慳返嘅息，係可以一日內倒輸返晒出嚟嘅。日圓一日升5%，即係你還錢還多5%。所以唔好諗呢啲嘢，因為你等於變相賭外匯。

17. 股市呢？日本股市尾段大跌，日經一度跌800點。但其實對其他股市影響唔係太大，你見美股星期二晚都升，港股星期三都OK。所以你話係咪令市場好震蕩，又未必。

18. 不過，仲要睇埋債市。咁你見到了，一出呢壇嘢，日本10年國債債息，即時抽升。呢個幅度，係20年以嚟最大單日升幅，咁你話震唔震憾（順手提你：債息升，即係債價大跌）

目標零，但原本正負0.25。咪0.25。咁你目標零，正負0.5，咪變0.5！

19. 個故事好簡單，官方嘅「10年債息目標」係0厘。你心諗，點實行？好簡單，即係一偏離咗，就直接入市買，同美國做QE差不多。

20. 咁但之前嘅做法，係目標零厘，但浮動0.25，即係正負0.25（債券可以做到負息嘅）。咁但你見實際上，就係一路貼近0.25厘啦。去到0.25厘，央行就出嚟壓。

21. 好啦，咁你明顯見到，個壓力係在high end（即係債息要升，央行要壓）。咁當你放鬆咗，好啦浮動0.50啦。咁會點？雖然你個「目標」仲係零，但，正負0.5厘，就當然會飛到去近0.5厘呢邊

咁但如果我唔去日本，唔買日股唔買日債，咁關我乜事？都關事的

22. 講咗咁多，唔講對日圓，同日本經濟，日本股市債市，咁仲有特別？即係話，如果我唔買日本股唔買日本債唔去日本，咁有乜影響？

23. 有個講法，話因為日本係最大嘅債權國，所以呢個動作之後，啲錢就會班師回朝咁話。亦即係話，日本投資者（或者買咗日本國債嘅人），會沽走手上嘅其他債券—例如美債。咁就會令美債債息升。

24. 另一個講法，亦係話「最後一個平錢來源」都冇埋，會推高債息，不利股市。

25. 結果點？其實都未知。但見到嘅，真係見到美債債息抽咗上去，呢個肯定對股市就唔係太好嘅消息。不過正如上面講，環球股市又冇乜好震。

然後就講歷史：到底點解要零息，點解而家又想退出

26. 然後可以講返歷史背景了。我假設大家都知道，日本因為人口老化，經濟不景，通脹，同埋之前泡沫經濟爆破（30年前！），所以好長期都維持零息。咁呢個零息，一般係指短息，即係次次央行都唔會加息。

27. 但以前都寫過，央行開會，控制短息啫。長息，例如10年債息，係市場機制嚟的。美國聯儲局開會加息減息，理論上唔會直接影響10年債息嘛。

28. 除非點？除非，央行直接入市啦，直接買債咪得。亦即係日本咁多年做嘅嘢，就係所謂嘅YCC，Yield curve control，冇錯就係同聯儲局「買債」QE差不多。你債息一升嘅，央行咪入市買，不停有人買，債價自然升，債息就低返。

29. 點解要咁做？都同上面講嘅原因差不多。總之係認為日本經濟好差，企業負債高，啲債息一升，會死人的。係咪真？唔知，「可能之後就會知」。但呢個係央行嘅講法。

日圓跌唔好咩？「明明有人話有利出口」「仲可以幫到旅遊業」

30. 咁但，當然任何嘅政策都唔會完美，實有代價。大家都知之前日圓係咁跌，今年一度跌咗三成。原因好簡單：人人都加息，你唔加。咁市場力量會令你隻貨幣係咁跌。

31. 日圓跌又點？唔好咩？你會聽到有啲傻仔話，「貶值幫出口」，「幫到旅遊業」。唔係好事？

32. 就梗係唔係咁簡單。

33. 貶值幫到旅遊業，就怕且係嘅。但幫出口，就唔多覺。首先，你貶人地都貶。另外，同好多人想像中嘅「出口大國」唔同，日本近年，係貿易赤字嘅，即係出口唔夠冚入口。

日本近年都貿易赤字，貶值點幫出口？

34. 點解會咁？三樣嘢。首先因為你貶人地（主要係韓國）都貶，幫唔到幾多出口。另外，你要入口原材料嘛。但最重要嘅係：日本要入口大量石油。咁你啲日圓係咁跌，拎去買石油，當然貴咗好多好多（近排油價回落就好返好多）

35. 於是你見到個副作用了：日圓咁弱，梗係會輸入通脹。呢個同英國歐洲嘅情況差不多，但因為日圓跌得特別勁，能源依賴度更高，所以呢個效應更大。

日本嘅通脹，已經40年新高，雖然官方數字好似仲唔係好高

36. 你去日本就會睇到，遲下我會在Facebook 寫。三年冇去，啲嘢可能貴咗一兩成—咁你遊客去梗係冇所謂，匯水都唔止跌咗兩成。但當地人呢？而人工，當然冇加咁多啦！

37. 事實上，日本嘅通脹，已經去到40年新高。雖然你睇官方數字就唔係好高。

38. 咁同時間，仲話加軍費喎。請問錢從何來？（可以參考之前英國嘅例子，睇下係咪可以無中生有變啲錢出嚟）。

日本請外勞，「但人工仲低過韓國」，邊有人去？

39. 另一方面，應該好多人都知，日本（其實絶大多數地方都係）面臨人口收縮。咁原本唔係一個極大問題，因為可以吸移民，唔一定要畀護照先係移民，居留證又得，外勞又得。你去便利店同餐廳，都見到好多南亞人或大陸留學生啦。

40. 之但係，日圓貶值，又令到呢啲人嚟打工嘅誘因低咗好多。之前你見報導講，日本人工仲低過韓國（固然好難直接相比），AV女優都要去香港搵食呀！

41. 咁所以，日圓係咁跌，當然係令日本好頭痕嘅。所以大家都估幾時佢頂唔住，不過原本估4月，就估唔到而家忽然退出寬鬆。

之後會點？應該唔太難估

42. 好啦，之後會點？

43. 實情你唔使聽官方嗰啲日本人式嘅廢話，十分明顯，就梗係退出寬鬆啦。係呀，話國債目標利率仲係零嘛，但你上下浮0.5，咪即係去到0.5咯！市場亦即時反應。下次你鍾意話目標係零，但上下浮1厘都得的。

44. 下一步當然係加息，同埋慢慢退出呢個Yield curve control，但未知幾時。

45. 但你見到，其實日本央行做得好小心，正常嘅，就係驚啲公司或金融體系頂唔住。都真係唔敢直接加息，甚至唔敢退出yield curve control，就只係放鬆個區間少少

46. 另外留意埋，上面都有講，見唔見佢同時將個買債規模擴大？都係兩手準備，萬一情況開始失控，都仲可以繼續買債，壓住個債息。

47. 所以好簡單，就係退出寬鬆，但Baby steps咁嚟。

48. 後續嘅發展，照計唔太難估。一年就太多，但睇幾個月嘅，照計日圓就易升難跌。唔好忘記仲要美國開始放慢加息，但日本而家先開始收緊，此消彼長嘛。

49. 至於日本債息，就當然會升。不過係咪一路會拖累其他國家債息，我就有啲保留，一路觀察住咯。

50. 順帶一提，你見日本股市雖然大跌（但星期三已冇乜嘢），但唯獨係金融股升！點解？好簡單，債息升，當然有助金融股。我就冇買嘅，但你可以留意下，雖然我覺得幾難玩。

至於日本經濟點？就係……唔知

51. 至於你話日本經濟點？就真係好難估。理論上啦喎，之前日圓弱做成咁多問題（但，能源價已開始跌喎），日圓可以反彈，對日本經濟應該好。不過，啲債息抽咗上去，有乜影響，就仲要觀察下。

52. 不過，其實從來都冇話要睇經濟好唔好（上面咪講咗唔好鑽牛角尖）。今年日本經濟好好咩？但今年日本股表現相當唔錯。下篇文會講！