［要用錢點算好］股票融資真實紀錄。用邊間好？借美金定港紙好？ (Patreon)

「股票融資」：點解富者越富

「股票融資」就真係方便，但唔好慣咗手勢。

夠晒方便，但我唔係鼓勵你去做，我亦冇錢分，冇任何誘因

認貨不認人，唔理你乜收入，唔理你有冇工返，近乎唔使申請

當然仲有，係斷日計，還咗就即時唔計，唔使罰息。幾日到手。

「做好你嘅風險管理」，即係點？即係，唔好100萬line借100萬，會死的

搞到追孖展畀人慘倉，係好大鑊的，千萬唔好畀自己試

美股可以一個月跌三成，咁你去偷去搶去賣身都要時間啦。

真人紀錄，畀你睇晒用咗幾錢利息

借邊間好？借港紙定美金好？

「其實我仲有日圓孖展，但你唔好學」

你心諗，「咁我全部借晒日圓咪最so」—就唔好自作聰明啦

結論：對我嚟講，股票融資，結果都係相當有用嘅

1. 好啦，上兩篇文講過「一股不沽」（呢度，同呢度），同埋大約答咗讀者「要用錢點算」。煩氣重覆多次：首先好多開支，真係唔係咁「突發」。第二，請你買保險。第三，有層樓就簡單啲。

2. 不過結果2022年我做手術，用嘅，都係「股票融資」，所以買股票都係好東西，有層樓都係好東西。

「股票融資」：點解富者越富

3. 順帶一提，呢個亦係點解富者越富嘅原因。你諗下，失業嘅窮人，借財仔，幾咁貴息，十厘廿厘起碼。但有層樓嘅，借錢三四厘。有股票嘅，四五厘。呢啲融資成本嘅分別，都係令到點解錢滾錢容易。而呢啲東西你讀書真係冇人教你的。當然唔係叫你去借盡佢買大佢，而係話你知，有難關時，窮人就好頭痕。至於有資產嘅人，唔過度槓杆嘅，係易渡過好多的。

4. 股票融資息口唔係最低，低唔過你按層樓。大家知道債主最鍾意磚頭，股票就次之，至於閣下嘅咩「信用」「才華」「學歷」近乎一文不值，除非你係醫生/公務員。況且你諗下，券商嘅錢都係銀行借畀佢，佢再借畀你，咁實在好難平過你拎層樓問銀行借。

「股票融資」就真係方便，但唔好慣咗手勢。

5. 不過，「股票融資」嘅好處就真係方便—但小心，方便就會導致你身痕，所以再講一次，唔好借錢買股票。真係突發開支先好用，甚至唔好慣咗手勢。下個月想去日本又拎幾皮嘢，再下個月女神生日又拎兩皮嘢。

6. 雖然我都知，忽然拎舊錢出嚟，又唔使限期內還，係好爽。正係因為咁爽，更加要控制自己。邊有咁著數嘅嘢？

夠晒方便，但我唔係鼓勵你去做，我亦冇錢分，冇任何誘因

7. 有幾方便？近乎係唔使申請，我用嘅係富途同IB，陣間兩間都會講。基本上你申請時都好似自動幫你做孖展戶口（除非你嚴辭拒絶，咁不能迫你開嘅）。唔使任何申請，唔理你幾多收入，話知你係咪失業，總之認貨不認人，你有貨就借畀你。

8. 至於拎到幾錢？當然睇你放嘅係乜貨，垃圾股咪少啲，你放匯控放Apple咪成數高啲，而我又目測好似IB一般按得多過富途。詳情你可以去佢地網頁慢慢搵個margin list（但我好懷疑有冇人咁得閒，多數都係你有堆貨，然後睇佢畀咗幾錢你咪得，而當然唔好拎到盡啦，陣間忽然間下星期跌兩成你點？要抬錢喎）

9. 當然，方便亦都在現金到手，相當快，基本上同你由券商就咁拎錢差不多。兩三日點都搞掂（唔好星期一要用錢然後星期五晚去拎啦下）。咁照計你按樓或借私人貨款，好難有咁快（預先批咗line畀你例外）

認貨不認人，唔理你乜收入，唔理你有冇工返，近乎唔使申請

10. 當然仲有，股票融資，性質似循環貸款。按樓嘅，你要每個月供返嘛，私人貸款都多數係，但股票融資一般冇呢個問題（除非你啲嘢狂跌要補孖展，所以，唔好去到咁盡）。你捱到息嘅，一路拖住好長時間唔還都得（但其實拖得太耐，「畀息都多過個本啦」）。

當然仲有，係斷日計，還咗就即時唔計，唔使罰息。幾日到手。

11. 況且，逐日計錢，還咗錢就即時唔計，幾均真。你按樓或私人貸款嘅，早還應該要罰息。

12. 講到好似好美好，但我真係再三強調，絶對唔好借錢買股票。真係應急先好，亦唔好慣咗手勢。

13. 順手披露埋，同富途同IB我都有做合作開戶，你有獎賞我都有。但，就只係開戶啫，你借幾多錢我都唔會得益，所以我亦唔會有誘因叫你借。唔使估。

「做好你嘅風險管理」，即係點？即係，唔好100萬line借100萬，會死的

14. 仲有最後一樣，「做好你嘅風險管理」。呢句聽落好smart，但冇嘢跟尾嘅，等同廢話。即係點？我講白啲，就係唔好借咁盡。再具體啲？就真係睇一個個人情況。但例如話，佢畀100萬你，你就真係借….二三十萬好了。

搞到追孖展畀人慘倉，係好大鑊的，千萬唔好畀自己試

15. 因為我要講，你一定一定唔好畀人搞到要補孖展。好煩的，你唔會想試（2008年我咪試過）。你點幾日內搵到舊錢？「你搵到嘅，開頭就唔使做股票融資啦」。而你補唔到嘅，應該幾日內，你就畀人forced liquidation，強制斬倉幫你沽出街，補返你爭佢舊錢，包你冇仇報。

美股可以一個月跌三成，咁你去偷去搶去賣身都要時間啦。

16. 記住，千萬唔好畀自己走到呢步。實際上點做？即係，你個margin of safety要夠大。大到點？唔好咁極端話下星期核戰先，但，2020年，美股都可以一個月跌三成，係咪？咁你地好多人渣埋啲嘢，就跌得多過指數。所以，一個十分粗略嘅計法，你應該預你啲嘢一個月可以跌五成，而你都未使補孖展。你去搶去偷去賣身都要時間啦。

17. 了解晒後，如果未開IB嘅，用我嘅開戶link，存錢後有IB嘅股票送返畀你（你可以沽出街）。富途嘅，用我個開戶碼：9M85BY4D。

真人紀錄，畀你睇晒用咗幾錢利息

18. 告誡過後，「之後有乜問題唔關我事啦」。以上呢啲，真人紀錄，隻Excel在Attachment有，你可以睇埋點計

19. 因為年代有啲久遠（7月），我懶去搵返富途或IB啲圖出嚟，但信我，我冇咁得閒自己作啲數字出嚟昆你（而呢隻Excel就真係7月時整嘅，當時未有機會寫啫）。

20. 點解係7月？好簡單，因為8月我就拎返晒啲保險錢，找晒啲孖展。記住，盡量唔好先洗未來錢，我都真係「有信心」保險賠到先去做融資。

借邊間好？借港紙定美金好？

21. 好啦，睇大數。其實我大約拎咗廿幾萬，咁同我拎住嘅股票比，都係相當細嘅數目，可以放心。我富途IB應該夾埋百幾兩百萬港紙嘅股票（主要係美股）

22. 爭嘅錢，有美金有港紙有日圓，幫你列晒。咁無論你用邊間都好，借港紙咪收你港紙息，借美金咪收你美金息，但我個表亦有轉晒做港紙。

23. 最重要嘅係最右邊一欄。個利息水平，我係迫返出嚟的。小學數學，利息＝本金 X 年利率X31/365（因為7月有31日），咁你可以迫返個年利率出嚟。

24. 呢個係好重要的，就係睇下我拎咗幾多錢，畀咗幾多利息（銀碼），迫返個年利率出嚟，睇下有冇伏嘛。佢列幾多，你就信晒咩，梗係要實證。

25. 大數，咪23.2萬，一個月畀760蚊息。即係3.9厘，Blended，全部計晒。

26. 然後睇細數，結論幾個。首先，「係冇搵你笨嘅」，你見富途啲利息，我迫得返個好靚嘅齊頭數出嚟的。至於點解IB唔得？唔知，好可能因為IB按層收費，即係頭1萬貴啲，之後平啲。

27. 但又留意一樣最重要嘅嘢：如有懷疑，一般請你借美金。因為多數情況下，美金息都係平過港紙。「咁你又借港紙？」。咪就係笨咗，所以你唔好學我。真的，同一間計，多數都係美金平過港紙。

28. 實務上，就算你只係得港股，你一樣可以用美金融資。以我所知，富途同IB都用「統一購買力」，你有幾多貨，佢同你計晒，亦計晒個總融資額畀你，你鍾意拎港紙美金都得。即係你拎咗7萬8港紙出嚟，你戶口係負7萬8港紙，但你應該可以在戶口將佢轉做負1萬美金的。但我唔100%肯定，反正我有港股有美股，冇呢啲問題

29. 但再講一次，無論你要用嘅係乜錢都好，正路係借美金，唔係借港紙。除非你堅持覺得會脫勾啦下，不在本文討論範圍。

30. 好啦。仲有留意，見到IB嘅美金息，係平過富途嘅。至少我當時做嗰陣係。你睇個美金息，都平一截。所以呢，真係開定兩個戶口冇死，貨比兩家嘛。

31. 不過最新又係咪咁？又好似唔一樣，你可以睇返最新嘅息口，都尚算幾透明。最新見到嘅，富途呢度，IB呢度。

32. 最新見到，港紙息，富途6.8%，IB 5.15%（IB 78萬以上去到4.6%。78萬以上？唔好咁爛賭啦），美金息呢？富途 4.8%，IB 5.8%（IB 10萬美金以上去到5.3%）

33. 好啦，心水清嘅，見到兩樣嘢。首先，富途個息，7月到而家，都冇加過，但明明美國加咗幾次息，可能佢地搶市場份額吧。反而IB個息，就係加咗嘅。所以你見而家美金息，反而富途平過IB，港紙就掉轉，有啲複雜。

34. 不過，大結論一樣，我當你睇晒兩間，借到最平嘅，應該都係借美金會平過港紙嘅。正路地之後都會係咁。

「其實我仲有日圓孖展，但你唔好學」

35. 最後仲有一個小小問題：你見到，喂，做乜有日圓？係，係有的。

36. 首先，富途就冇呢回事。得美金港紙，好似有人民幣，但我冇用過，況且息仲貴。得IB先有啲其他股票，亦有其他貨幣融資。

37. 咁另外，你見到，借日圓平過港紙美金一大截，梗係啦，日本一路都零息咁滯，梗平。

你心諗，「咁我全部借晒日圓咪最so」—就唔好自作聰明啦

38. 之但係，你心諗，「咁我全部借晒日圓咪最so」—呢度又可以投資金句啦：唔好咁自大，以為得你一個諗到咩，玩咗幾十年啦，yen carry trade嘛，日圓套息交易。

39. 理論上（唔該，唔好試），你住英國住美國嘅，借yen然後轉咗英鎊轉咗美金買樓都仲得添呀。但，梗係唔好試，因為，如果啲yen忽然間升，你咪跳樓？呢啲就匯率風險啦

40. 當然在我個情況，「我兩邊賺添」，因為我借完啲yen，之後yen仲要跌，即係以港紙計還少咗錢添。但，咁啱啫，唔好試。

41. 咁你會問：咁你最初又做乜借yen？好問題。其實，只係因為我買咗日本股，而嗰時咁啱冇錢找數。係喎，真係買完第二日就話要做手術。咁咪有個缺口。就只係咁。

42. 亦因為我根本買咗日本股，所以你話真係日圓大升我要還多啲錢咩？我啲日本股又照升值啫。但你走去齋借日圓，就等於賭匯率了，唔好試。

結論：對我嚟講，股票融資，結果都係相當有用嘅

43. 結論：其實呢，點你都應該係借美金。當然你好怕死，覺得港紙爆煲你要還多啲錢嘅，咪借港紙，隨你。

44. 大約個操作係咁。唔係業主，又唔想厚面皮問親朋戚友借錢嘅，實情有個孖展戶口，都係幫到你唔少嘅。

45. 再講白啲，我玩到咁大，都係一個月畀760蚊息。我1月尾做手術，2月尾找數（簽卡嘛），真係用咗呢個股票融資嘅，4個月（3-7月，頭尾計晒），夾埋3000蚊息。還好啦。當然你夠厚面皮問親朋戚友借（「唔係收息下話」），就慳返。

46. 但實務上，我呢個情況，按層樓，都應該未必work。都話冇糧單，同埋提早還又要罰，仲有都要定時還，係比較煩的。

47. 所以，賣廣告都係咁話，開返個 IB戶口吧。如果未開富途嘅都可以開（富途要填我個開戶碼：9M85BY4D）