［有關一股不沽］咁如果要用錢，要買樓，點算好？個人經驗分享（下） (Patreon)

上回提要：冇現錢，咁我要做手術，幾十萬。邊度變錢出嚟？

咁，幾時先沽貨？答案係：至少等你差不多退休先

我2008，2015，2018（仲有好似2013）都沽過股票，每次都後悔莫及

2008年嗰次，「後悔度」最高，但其實根本冇得揀，算唔算「後悔」？

2013年嗰次，係買樓，但我唔肯定有冇沽股票。「唔沽咁錢從何來？」

2015年同2018年，就真係完全可以避免。特別係2018

2018呢次，可以點避免？（其實2015都避免到，不過真係再難啲）

不過，都唔係萬能嘅，仲有幾個問題

最後答返：忽然要用錢，咁點算？

咁但，如果要舊錢移民，如果要舊錢結婚，如果要舊錢做首期，點算？

結論：其實拎股票錢去做首期，都係比較危險嘅。除非你可以等

上回提要：冇現錢，咁我要做手術，幾十萬。邊度變錢出嚟？

1. 話說讀者問，既然你100% invested，唔留現水。咁，幾時先沽？真係要用錢，咁點算？要買樓，又點算？

2. 上篇大約講咗我2018年後真係做到一股不沽。至於幾時先沽？我覺得真係不必要的，有好多開支，根本唔係咁突發，你可以預先預到。你年尾要全家去日本嘅，或者過幾年你個仔入大學嘅，呢啲錢，本身你就唔應該拎去買股票。

3. 你真係問我幾先先沽，咁至少係去到你冇收入嗰時。在一般人嘅情況，就係你退休嗰時。亦即係，你碌到舊錢夠大，準備4% rule食到死嗰時

咁，幾時先沽貨？答案係：至少等你差不多退休先

4. 留意4% rule唔係剩收息的，呢個世界上冇穩穩陣陣4厘息！而係連埋息同埋你個老本都可以拎少少出嚟，計數應該你一年拎4%，都仲長玩長有，仲可以跟到通脹。因為你啲嘢會升值，舊文寫過（關鍵字搵「FIRE」吧），有機會再講。但幾肯定你，係唔好諗住可以一年收到4%息。唔好忘記仲有通脹喎。

5. 上篇亦講咗，你到退休前，應該大約開始慢慢減低股票比重，否則如果忽然股災，都係幾麻煩—但，唔係股票變到零。

6. 咁你見上篇亦講到，2018年我真係只買不沽，亦冇留現水。當中我甚至畀人炒埋。咁但當然我一路有收入。但2022年（即係今年）我都做咗三次手術，搞埋都五十萬銀。咁錢何來？所以話你知，首先真係要買保險。

7. 二來，部份我係拎股票戶口嘅錢，有貨自然有錢。你計息口唔算太低（當時OK，因為未加息），但因為我要用嘅時間唔係太長（等保險賠返就得），咁你計方便，就相當方便。正路地可能拎層樓去按更好，但唔好忘記我係冇糧單的。同埋點都審批需時，唔似股票戶口咁真係即時拎到

8. 最近嘅講完，講遠少少

其實我2008，2015，2018（仲有好似2013）都沽過股票，每次都後悔莫及

9. 回帶講遠少少，全無保留，好多人都知，其實我之前都沽過幾次股票。好肯定嘅有三次，2008，2015，2018。唔係好肯定但照計都有嘅，係2013（意思係當時我唔記得自己有沽，但如果冇沽到照計解釋唔到我點解有舊錢，陣間解）。都可能比你想像中密，但，真係近幾年都冇啦

10. 而基本上，每一次沽股票，事後我都十分後悔。亦因為每一次之後啲股票都升，亦見到我眼光都不錯！

11. 事實上，我懷疑呢幾次我冇沽啲股票，我而家已經十分幸福地退休。所以你話，係咪應該股不沽先！而大家應該相信，我係有定力可以一路坐的。

2008年嗰次，好似「後悔度」最高，但其實根本冇得揀，算唔算「後悔」？

12. 2008年嗰次，「後悔度」最高，你估都估到啦，金融海嘯下沽貨，當然係低位打靶。但，其實亦冇得揀，所以我懷疑係咪可以叫「後悔」（根本都冇得唔沽）—話後悔，應該根本係最初啲決定都係錯嘅—我指係買股票嘅決定—而唔係沽嘅決定。

13. 即係講乜？好多人都聽過，我本書都有寫，我當時做槓杆嘛。一個金融海嘯打埋嚟，話咁快差不多輸晒成副身家，成100萬（我2002年開始做嘢，2004年開始做銀行，但真係2006年做證券分析員先儲到錢）．所以，記住唔好做槓杆！一做咗，你低位打靶根本冇得揀。而二度傷害當然係之後啲嘢係咁升。

2013年嗰次，係買樓，但我唔肯定有冇沽股票。「唔沽咁錢從何來？」

14. 至於2013年嗰次，我到而家都唔係好記得有冇沽股票，諗真啲又好似冇。但嗰次係咩事？就係我買樓。你心諗，喂，你平時都冇錢剩在戶口（當年已經係咁），你又唔係父幹母幹（老豆冇錢，老母就有但唔會畀我），咁你唔沽股票，何來有首期？

15. 答案係：花紅。請噓。

16. 當年好似真係出花紅都夠畀首期。當然要話返你知，當年我畀首期，都唔使30萬港紙，咁成件事就冇咁誇張啦。所以理論上好似真係出花紅都夠，但我真係唔係好肯定當年有冇沽過股票。是但。

17. 陣間會再講呢個「首期」嘅問題。

2015年同2018年，就真係完全可以避免。特別係2018

18. 之但係，去到2015同埋2018，就真係兩次都可以避開。

19. 2015年嗰次，因為搞台灣移民，要150萬港紙，咁大舊錢，當然要沽股票。當然後悔。雖然又係事後諗，其實應該厚著面皮同我老母借（當時未反面的）

20. 厚面皮都係好重要的。咁但至於係咪應該「問親友」，呢個係咪叫一個option，就好睇個人了。

21. 2018年嗰次，就真係最不能原諒（所以唔好以為我冇犯錯，到2018年都仲犯大錯，四年前咋喎）。嗰次因為我離開咗星展，自己辭職的。咁首先當然係放返個長假，周遊列國（大家唔好學），另外亦因為冇收入，要供樓，要養老婆（嗰時佢好似冇返工）。嚴格嚟講我好快搵到工，在朋友間start up玩咗一輪，但人工得返一半咁，都去到2019年4月我先搵返份同之前人工差不多嘅工。

22. 呢一次，就最笨。

2018呢次，可以點避免？（其實2015都避免到，不過真係再難啲）

23. 好啦，你會問，咁你平時又冇現金，咁你辭咗職，但又要供樓要食飯，唔沽股票點得？

24. 答案係：當然係得的。因為，可以加按層樓嘛！

25. 我唔知我嘅讀者有幾多係業主，但，我發現好多未買樓嘅人，係忽視咗呢樣嘢。唔計咩安全感，唔計迫你儲錢，唔計升值，唔計唔使幫人供樓之類。一層樓，仲有一個好重要嘅功能：就係提供一個大額，而低息嘅融資！

26. 我冇實數，但當其時，加按層樓，應該唔使3厘息。即使我層屯門樓（當時好似值4百萬），你點都套到四五十萬出嚟，一定夠我嗰堆開支。

27. 所以，短答案，如何應付呢啲開支？你可以加按你層樓。

不過，都唔係萬能嘅，仲有幾個問題

28. 不過，都唔係萬能嘅，有幾個問題。

29. 首先，你都估到嘅問題，「大佬，咁我要有層樓先得架！咁我咪問你最初首期係咪要沽股票」。陣間解。但，有層樓係幾好的東西。

30. 第二個問題，你可能都會問：咁點解你做手術又唔去加按層樓？上面都解咗，答案有兩個。首先，保險會賠嘛，所以真係太短期，就唔搞咁多嘢。第二：我係失業人士喎，冇糧單，就難啲（你話：在星展起身嗰時呢？咁當然係可以有糧單時就按咗先啦！實情大公司嘅嘢，起得身都要幾個月啦）

31. 第三個問題，2015年嗰次，可能都係避免唔到。點解？當時我都買咗樓，但供咗冇耐之嘛，亦都本身借盡九成，又不見得升值好多，唔會套到幾多錢—亦即係，唔會夠冚嗰150萬港紙。雖然可能幫補到幾十萬嘅。又或者，剛剛都有講，「可能應該厚住面皮問老母借」。所以記住，唔好學我咁不孝（其實嗰時未反枱的）

32. 最後補多句：台灣嗰150萬，係會返嚟嘅，搞掂移民就拎得返（我亦拎咗），所以肯定有得還畀債主的。唔同你拎咗去買樓咁

最後答返：忽然要用錢，咁點算？

33. 所以真係可以答你，「忽然要用錢」，點算？

34. 你係應該將呢種可能，減到最低。首先，有啲真係唔係「忽然」要用，唔好話我知你忽然想去日本食米芝蓮三星，或者忽然想炒價睇演唱會要沽股票，你嘅投資應該係減走咗呢啲錢的。

35. 第二，涉及啲健康問題嘅，當然係應該買保險。

36. 咁但，總有啲其他例外嘅情況，咁所以，「最好你就有層樓」。噓完嘅，咁畀個實際啲嘅方法你：咁其實你有一大舊股票，都可以拎到錢嘅，雖然而家息口未必好抵，但真係解決到問題。

咁但，如果要舊錢移民，如果要舊錢結婚，如果要舊錢做首期，點算？

37. 不過都仲係解決唔到最開頭嘅問題：如果我要買樓，咁點算？如果我要移民，咁點算？如果我要結婚，咁點算？

38. 三個問題，性質唔多同。但你問我，「結婚係唔使用好多錢嘅」，信不信由你，當然要你搞大佢，就係你嘅選擇了。至於你擺酒嗰啲，有人情收返嘛，本筫上同保險賠差不多。

39. 但買樓同移民嘅問題，就真係比較深。

40. 先講移民，你見我耐唔耐都會寫，有啲友仔嚟問我，「諗住幾年內，十萬炒上一百萬，然後移民」。呢啲真係得啖笑，即使你個「諗住」嘅回報唔係咁高都好，我當你諗住一年賺10%都好，都係大忌　—　因為你有個年期限制，而實情嘅情況點會咁理想？咁啱嗰時股災，咁你點？

41. 如果你話「我可以等」—拿，咁就解決到問題啦。即係你個時間係flexible嘅，就易搞。

42. 呢個等於之前講退休。不經不覺我都44歲，都有啲讀者五十幾歲。咁你見我都有提，50歲以下嘅，你咪100%股票。但超過50歲嘅，應該開始慢慢減低股票嘅比重（記住，係慢慢！）。原因亦係頭先講嘅嘢：咁啱我退休諗住「拎舊錢」然後4% rule 食過世嗰時，忽然嗰年就股災，我咪跳樓？而呢樣嘢係會發生的。

43. 你諗下，同樣嘅三個人，收入差不多，買嘅嘢差不多。一個2007年退休，一個2008年退休，一個2009年退休，舊錢係咪爭好遠？

44. 一係，你就講句「我可以等」，2008年唔退住（或者，唔郁啲錢住）。否則，就只能之前幾年開始慢慢減低股票比重。

結論：其實拎股票錢去做首期，都係比較危險嘅。除非你可以等

45. 以上呢個玩法，對於「移民」同「買樓」有冇用？我都唔係好肯定，因為我唔知啲讀者儲幾耐錢移民或者買樓（所以都話，只能case by case）

46. 不過我直覺覺得，似乎大家係唔會儲廿年首期嘅—一係你更早儲到，一係你放棄咗呢個念頭，所以上面講嘅東西，未必識用。

47. 所以，除非你可以出花紅夠做首期，否則，照計你都只能沽股票。

48. 不過有一樣嘢可以講：如果你真係「可以等」嘅，可能都仲還好。講得白啲，你原本想沽股票畀首期，但嗰年股災嘅，咁可能真係等多一年。又或者，原本你都係想買樓嘅，嗰年股票升得好好，可能就快手沽咁啲股票去做首期了。

49. 最忌就當然係被迫低位沽咗啲股票，雖然照計，冇人會係「被迫」邊年要買樓架下話？

50. 但我估我可以講：除咗買樓做首期，就真係唔好沽股票了。之但係，你又見到，買咗層樓，你往往可以加按嚟應付開支。所以結論都係，似乎都係早買樓好。而要早買樓，亦都真係要早儲錢，無論你係儲舊現金，定係用股票儲

51. 所以，盡早開始投資，就真係冇乜點錯的。

52. 另外，唔知有冇人會覺得廢。但，如果真係打算買樓嘅，就一定係早買好啲。有咗層樓，可以解決你唔少融資問題。而且，亦都係迫你儲錢嘅。

53. 可能讀者都覺得答案未夠圓滿，可以再message我，睇下有冇follow up嘅問題。但，我真係諗唔到有乜方法，可以保證你儲首期舊錢，唔會忽然股災。

54. 除非你真係可以儲兩舊錢，一舊股票，另一舊純for 首期（咁你呢舊就肯定股票比重要好低了）