［有關一股不沽］咁如果要用錢，要買樓，點算好？個人經驗分享（上） (Patreon)

一股不沽，又100%股票，咁要用現金時點算？

首先解返，點解唔沽股票？

沽股票多數後悔。「咁如果沽完跌呢？

「我高位沽咗低位買返得唔得？」—你可以試下

況且，你買得幾大？

另外，就唔係唔沽等於冇賺，正如唔係唔沽就冇蝕錢嘛！

首先，其實係咪咁多情況，係「忽然」要用錢？

首先講，2020年以嚟，我真係全無沽過一股股票

2022年我做咗幾次手術，都五十萬，咁錢從何來？

你當然可以自己投資，但如果你要用錢時忽然股災，咁點算？

咁但，保險都係事後先賠嘛，你最初點拎舊錢出嚟？

一股不沽，又100%股票，咁要用現金時點算？

1. 原本想寫埋篇美國通脹，但因為太多圖，搞嘅時間多。所以臨場決定改topic。上下集，兩篇寫完，下集今晚出。

2. 有讀者私下問，你老哥既然話「一股不沽」（事實亦說到做到丫），咁但，如果真係要用錢時咁點算？如果要買樓呢？你平時又話100%股票（事實亦係）

3. 呢個真係一個極好又貼身嘅問題，就今篇講。盡量答，雖然唔肯定係咪讀者想要嘅嘢。但我亦相信每個人都或多或少值得睇下

4. 順帶一提：好多人都低估咗我寫一篇嘢嘅時間，實情只係打幾千字梗係快，但搞圖搞link搞format先最難。亦所以，其實之前啲金句系列多字少圖，就唔會用極多時間整篇文，適合我在日本時寫（但要時間諗，「我多數浸住大浴場諗」）。仲有，如果有讀者認為拍片好啲，我都覺得可以，雖然我覺得效果完全唔好。

5. 再次多次讀者提供一個好嘅課題畀我，十分有建設性，有乜想寫都可以話我知，雖然我未必一定會寫。但有用的。

首先解返，點解唔沽股票？

6. 照計睇得有返咁上下時間嘅讀者，都知道我呢個「一股不沽」嘅哲學。所以未必會分好多時間解，但其實主要都真係：沽咗多數都後悔。至少我差不多每次都係。因為，啲嘢沽完，多數都係會升嘅！甚至升到你唔信！

7. OK，話埋你知，我沽過300蚊嘅Tesla—係未拆股之前喎！（應該拆咗兩次）。你自己計下，幾多倍。

沽股票多數後悔。「咁如果沽完跌呢？

8. 有人會反駁，唔係喎，咁如果你沽完啲嘢跌咗，就著數咗。理論上係，但實驗上我都話你知，「多數啲嘢沽完都係升」。

9. 點解有咁嘅現象？原因都好簡單，一路都講咗，「股票係升多過跌嘅」，至少美股係。掉轉講，如果你啲股票唔係咁嘅，咁你揀股或者揀市場嘅能力，都仲要改善下。

10. 好簡單，你買美股嘅，過去幾十年（除咗最近一兩年），差不多任何買買你都贏錢，係咪？換個講法，你任何位沽，都係沽早咗嘅！

「我高位沽咗低位買返得唔得？」—你可以試下

11. 至於有人話，高位沽咗低位買返。我可以話你知，十個都冇一個做得到（甚至一百個都冇一個）。你真係做到而唔係靠好彩嘅，照計一早發咗達，因為美股一年高低波幅點都三四成，你捉到嘅，一年四成回報，仲有畢菲特？

況且，你買得幾大？

12. 況且，亦只有一股不沽，先可以買得大。講緊幾百萬甚至上千萬港紙咁買落去。你幾十萬出出入入嘅，畀你贏一個開，其實都係冇乜用。

13. 實情我嘅做法，就係每個月啲錢，買晒落去，就係咁簡單。你見我完全唔會睇嗰時升定跌，更唔會理「好消息」「壞消息」。你可以話咁樣未必捉到個好好嘅時機，你話你捉時間未必完美但可以好過我，我都信　—　但你買唔買到咁大？舊文都寫過，回報高一倍，不如投入多一倍，有數計到的。唔好只係睇「回報率」。我100萬買落去，一年賺10%，好過你100萬但拎10萬買然後賺四五成—仲要肯定我瞓得好過你

14. 我見更多嘅情況，即使好彩高位沽咗。但如果之後再升呢？當然唔敢再買，咁可能隻嘢升多幾倍，然後先回兩成，咁同你買嗰時相比，仲係升咗好多。亦有啲係沽完，個市就跌，咁好啦，開心啦　—　但，幾時先買返？往往等好多年。升咗又唔敢買，跌更加唔敢買—卒之到升到癲晒，身邊自己睇唔起嘅人都合埋眼贏錢，自己先瞓身落去—然後再摸頂。

15. 以上種種，以前講過，不再重覆太多。唔明嘅，睇多啲文，遲早我又會再講。明但唔同意嘅，咁都冇計，可以再討論，或者提供你嘅觀點嚟反駁我。

另外，就唔係唔沽等於冇賺，正如唔係唔沽就冇蝕錢嘛！

16. 但我相信，有更加多人係明，又同意，但都仲係要問：喂，咁但真係要用錢點算呢？又或者問，「咁你啲嘢唔沽，幾時先算獲利」？

17. 其實第二個問題就唔係問題，冇人話要沽咗先係利潤。正如你隻嘢跌咗九成，唔係你唔沽就「冇輸到」（不過，你唔沽就的確理論上仲有機會，當然亦可能跌多九成）。

18. 但，「要用錢咁點算」？呢個真係好問題。

19. 況且，好多人都聽過，我係長期冇「現錢」嘅。事實亦係咁，近四五年都係咁，我戶口多嘅有幾萬蚊，少嘅多數係幾千。而我其實唔明做乜會忽然「要用錢」。

20. 我覺得，最好嘅開始，就梗係由我個人情況開始講！

首先，其實係咪咁多情況，係「忽然」要用錢？

21. 首先，我唔係好明，點解會「忽然要用錢」。應該搞清楚，有啲開支係可預見嘅，有啲就難啲。咁你話嗰啲咩「年尾去旅行」「年尾要交稅」，所以要沽股票嘅，當然係成件事錯晒　—　呢啲東西你明顯早早已經知，你買股票嘅錢，應該係扣除呢啲嘢之後嘅錢。亦即係，「閒錢」

22. 咁但，都真係有啲「突發開支」（病咗呀，屋企人有事呀）。又或者，有啲係「唔突發但好大舊」嘅開支，例如買樓，結婚　—咁其實買樓結婚，可能都早早預到，但又未必有個好肯定嘅日期。咁讀者問嘅應該係呢種—我舊首期點嚟？既然你話你買晒股票，咁你老哥就唔係儲銀行戶口儲首期架啦。咁，你買樓時，點都要沽股票啩？唔係咩？

23. 好，就講下我嘅情況。

首先講，2020年以嚟，我真係全無沽過一股股票

24. 先用倒敍法：開咗呢個Patreon後，亦即係2020年8月到而家，我都真係完全冇沽過股票！

25. 其間我畀人炒咗啦，甚至我老婆都好長時間冇嘢做。咁你當然知道，「你有Patreon收入嘛」（多謝各位讀者先）—所以保持你嘅收入真係好重要。

2022年我做咗幾次手術，都五十萬，咁錢從何來？

26. 咁但，讀者都知道，2022年我做咗三次手術嘛。咁，雖然大家十分支持我，但都肯定唔夠畀醫生手術費。好似夾埋成五十萬。

27. 於是有人會話：扯，有保險嘛。

28. 冇錯，第一樣嘢，你應該買保險。唔係呃你，咁你就解決咗部份嘅「突發開支」（雖然唔係全部），保險就係咁用（但，唔係幫你投資！）

29. 唔買保險嘅人，我當你本身高收入都好，但難聽講句，你忽然要洗五十萬手術費時，點算？固然你可以話，平時我每個月唔使交保險費，啲錢咪慳咗，「拎去投資分分鐘好過靠保險公司」—理論上做到的，問題係，你唔知你幾時做手術　—你咁啱做手術時，就係股災，咁你點算？你可唔可以拖幾年，等個市好返先做手術？或者叫醫生收順啲？

你當然可以自己投資，但如果你要用錢時忽然股災，咁點算？

30. 咁你話，靠平時儲現錢，咁又變咗一定跑輸通脹喎。所以，聽話啦，買保險。冷血但又實際咁講句，最好嗰啲有機會要你埋單嘅人，你都幫佢買埋（亦即係，我都幫我老婆買，而係我供的—總好過第時佢忽然有事，而我要筆大錢，而當時係股災！）

31. 保險公司，其中一個功能（但唔止呢種！），就係幫你食咗呢種「咁啱要用錢時股災」嘅頭痕情況—只要你做手術，即使當時係金融海嘯，保險公司都係照畀咁多錢你。你靠自己，就冇咁爽。

咁但，保險都係事後先賠嘛，你最初點拎舊錢出嚟？

32. 但聰明嘅你，睇到第二個問題：咁保險都係事後先賠畀你，你都要自己畀咗先。況且，總有啲部份你要自己畀。事實亦係咁，我做手術固然保險都包咗大半，但都唔係全部。況且，大家都知，覆診，藥錢等等一般唔包。所以都仲係有啲錢要用。固然醫院醫生都收信用卡（好東西，賺唔少里數的）。但，你都係拖多個幾月啫。在我個情況，就真係搞幾個月先拎返保險賠嘅。

33. 好啦，但我依然都係一股都冇沽嘅。嗰幾個月啲錢點嚟？答案就係：股票戶口融資！亦即係孖展戶口。當時嘅息唔太貴（有機會遲下整理），唔好忘記我做手術係年頭，「聯儲局係3月先開始加息，大半年就加咗4厘」。

34. 遲下我會整理埋，當時嘅息口。如果冇記錯，就真係IB平過富途好多。話埋你知，你用日圓融資嘅，仲平（但當然匯率風險可以輸死你，所以不建議）。未開嘅，開返個都好，有備無患。順手你可以用我嘅開戶link

35. 冇錯，我叫人唔好借錢買股票的，但我呢個只係突發嘅權宜之計，況且我唔係拎嚟買股票，我亦好快填返條數。咁計落，都係好過沽咗啲股票嘅。但當然係因為我一路都有收入。

36. 於是乎你又見到，買股票買得大嘅好處。我當你啲股票按七成，咁你要拎到50萬出嚟，你點都要有返大約100萬貨（唔好預到太炆水，否則一個股災你又補孖展）

下集已寫好，今晚會出埋。