ivanliresearch

[美股過兩關]點解通脹回落又低過預期，聯儲局又放慢加息，但美股不升仲要跌？ (Patreon)

Published:

2022-12-15 19:03:43

Imported:

2023-04

Content

美股過兩關：通脹又低過預期，加息又放慢

又再話你知，金融市場唔係咁直線邏輯嘅

點解通脹低過預期，放慢加息，美股都仲唔大跌？

點解唔升？10月咪升咗咯！你估真係等「確認」？

聯儲局「放鷹」？即係點先得架？唔好跌市就話「放鷹」

首先同你睇返，議息前嘅市場預期

出完CPI數字後，市場估加息加到幾多？加到幾時？又幾時減息？

聯儲局話要加到5.1厘，咁同市場原本期望有幾大分別？

不過，聯儲局幾時先停加息？又另一個問題喎

同你睇睇聯儲局經濟預測，同埋點陣圖

咁其實，都係加多三次息頂盡啫

順手睇埋，通脹見頂後，聯儲局幾耐停加息？

局方輕微調高咗對失業率嘅預測。但往績如何？

真係望嘅，望下美債債息，同美匯指數

1. 寫文時星期四晚，已回到香港。回顧返，星期二晚出CPI，之前快寫咗（嚟緊會詳細寫），星期三晚議息，講咗唔會即時寫，因為出得嚟都日本時間三四點。所以而家先寫。

2. 今篇先寫議息，應該呢兩日詳細寫返個CPI，然後就完埋個金句系列。之後可以寫返啲回顧展望呀，或者多啲個股，或平時啲值得睇嘅嘢咁。近排好似寫宏觀嘢寫得太多（但因為真係去到轉角位，你見有一排我係完全唔寫呢啲嘢的）

美股過兩關：通脹又低過預期，加息又放慢

3. 好啦，美股過兩關，理論上係兩關都過到，「但輸錢收場」。即係點？即係正路地大家最想見到嘅，就係「通脹低過預期」「聯儲局放慢加息」。咁，結果兩樣都中晒啦，係咪？但你見美股港股，表現唔太好，去到星期四晚美股仲要大瀉。

又再話你知，金融市場唔係咁直線邏輯嘅

4. 我諗呢個又係一個好好嘅教材：唔好以為金融市場嘅短期走勢，有乜咁必然。有時你「解得通」，只係可能好彩。講咗無數次，唔係好似自然科學，或者你考試讀經濟歷史咁，一個個步驟咁。股市唔係咁運作，因為始終係人嘅遊戲。

點解通脹低過預期，放慢加息，美股都仲唔大跌？

5. 答咗最簡單嘅問題先：點解過晒兩關，通脹低過預期，加息又放慢咗，擺明好似係最好嘅結果，但美股唔升，仲要有一定跌幅？

6. 短答案，唔係好清楚，短期市況嘅嘢，邊有得解。好少少嘅答案：因為美股估值貴。比較好嘅答案：上個月咪升咗咯！咁快唔記得？上個月在歐洲嗰幾篇文咪寫過，11月嘅CPI數字一出，美股單日就彈1200點。正係因為大家估通脹見頂，放慢減息　—其實10月已經開始炒呢樣嘢。

點解唔升？10月咪升咗咯！你估真係等「確認」？

7. 又係一個好好嘅教材，畀你見到，梗係炒預期。你要「確認」先肯買嘅，就會見到呢兩日咁（何況，根本都未「確認」）。

8. 所以，點解用咁多時間同你講理念講金句？因為你見好多人個理解完全係錯嘅。記住，炒預期。

聯儲局「放鷹」？即係點先得架？唔好跌市就話「放鷹」

9. 大約好快講下，議息發生乜事。一如市場期望，就係加0.5（都話聯儲局好少做啲意外嘢，如果真係要做點都盡量早幾日放風），呢點全無意外。

10. 咁點解議息後美股都唔升，你睇大路嘅解釋，當然係因為聯儲局主席「放鷹」。但大佬，點先叫「放鷹」？有時根本任你講，跌市咪話「放鷹」，雖然今次我認同大路講法，的確係比市場預期比較「鷹」一點。

首先同你睇返，議息前嘅市場預期

11. 咁所以，首先你要知道市場預期。唔係講12月呢次會，而係成個預期。甚至唔係講下次（2月）加幾多，係再遠期啲嘅嘢。

12. 呢排都成日講一樣嘢：利率峰值，Terminal rate．即係「加到幾多會夠皮」。同呢個相關嘅，當然仲有「加到幾時停」（時間，唔係利率水平），以及「幾時減息」之類。嚟緊呢大半年都會不停講。

13. 話說出完星期二嗰個好靚仔嘅CPI數字後，市場當然就估好快停加息，甚至減息。咁你睇圖，順手自己睇下啲友估幾時減息（目測係2023下半年）。再講一次，呢個係星期二出完CPI數字後嘅情況（所以個1 Day Ago係出CPI之前）

14. 另一方面，個Terminal Rate，見到出完CPI數字後，市場係估未加到5厘就收檔，估4.85。再講一次，呢個係出完CPI後，議息之前。

出完CPI數字後，市場估加息加到幾多？加到幾時？又幾時減息？

15. 好啦，計返，議息之前，係3.75 -4厘，平均即係3.875厘。而因為剛剛呢次加0.5厘都係盡在市場預計，加完之後（即係而家呢刻）係4.25-4.5厘，平均即係4.4厘。上面話，原本估加到4.85就收工，即係下年加多0.5厘，當然一般理解係兩次0.25厘。

16. 此乃前事。

聯儲局話要加到5.1厘，咁同市場原本期望有幾大分別？

17. 咁到聯儲局議息，其中一個最大嘅headline，就係「會加到5.1厘」！咁同市場之前（一日之前！）期望（加到4.85厘），都爭咗大約0.25厘。

18. 咁所以，你見到有啲市場震蘯，都係幾合理嘅。

19. 不過解到呢度，可能你都會問：喂，爭嗰0.25厘，真係咁大分別？我就認為照計唔會好大分別，所以，我就估都係一個小震蘯啫。

不過，聯儲局幾時先停加息？又另一個問題喎

20. 之但係，另一方面又要睇，幾時停加息，甚至幾時減息。其實聯儲局似乎都冇講到好明，但，亦似乎比市場原本預期可能要再遲啲。我個人估計，2023停加息就應該幾肯定。但幾時先減就比較難估。不過，估得嚟差不多架啦。下一節我會同你睇聯儲局自己出嘅預測，大約可以睇到。

21. 所以2023年，你就會見啲友不停估幾時停，同埋幾時減。順手講埋，「驚通脹」會開始消除（近日已經冇乜人講），就會更多人講「驚衰退」。

同你睇睇聯儲局經濟預測，同埋點陣圖

22. 好啦，之前提過，12月呢次，係一年四次大會之一。有啲經濟數字同點陣圖，略為講下。好學嘅，可以去睇原文。其實睇兩個大表（經濟數據同點陣圖）都好夠了。

23. 首先，呢個點陣圖，有人整理埋，呢個圖夠好。我解埋你知。藍色嗰堆圖就係官方點陣圖，一粒豆代表一個官，當然人人意見不同，所以睇個中位數，「共識意見」，就係粉紅色呢條線。而黑色係乜？黑色係市場估嘅嘢（正係由CME Fed Watch之類睇出嚟）。咁你明顯見到，聯儲局心中嘅利息路線，就略為高過市場所預期啦。

24. 呢個大約解釋到美股嘅弱勢，但正如上面所講，我唔相信呢個係個大問題。因為，通脹放慢，加息放慢，呢啲大方向都幾明顯了，你加多一次先停，或者加高少少先停，分別真係不大。

25. 睇返聯儲局自己嘅經濟預測，最緊要係同返佢地自己9月估嘅嘢相比—咁我都不一一細講。但你見到，局方大幅調低咗下年嘅經濟增長預測（所以，更多人會講衰退，亦都真係有相當嘅可能）。

26. 最重要嘅，睇利率水平。就係上面講嘅嘢。留意表入面嘅數字，應該係指年尾（例如今年，而家咪就係去到4.4%，記住4.25-4.5即係4.375，即係4.4）。原本局方估下年年尾係去到4.6%（即係4.5-4.75），而家局方指引去到5.1%（5-5.25）

咁其實，都係加多三次息頂盡啫

27. 好啦，計下數。首先，如果terminal rate又係5.1%，下年年尾又係5.1%—就似乎真係得出「下年唔會減息」嘅結論。雖然留意，大家話「局方預terminal rate 5.1%」，其實都係睇呢份嘢。理論上好似存在個可能，係加到更高，然後下半年減。不過我估大路地，就真係加到5-5.25．然後停手。

28. 計下數，而家4.25-4.5，加到5-5.25，其實即係加多0.75。咁既然已經放慢咗加息，照計正路嘅可能性得兩個。一係一次0.5，一次0.25。一係就三次0.25。總唔會下次一嘢0.75，或者先0.25再0.5

29. 你問我會似開邊瓣？似係加三次0.25。你睇CME Fed Watch，即使呢場議息之後，大家都係估2月加0.25機會大。再放慢了。但可能2月之後仲會有兩次，你甚至可以大膽估係每季一次，去到冬天唔再加。

順手睇埋，通脹見頂後，聯儲局幾耐停加息？

30. 呢度仲有一個幾有趣嘅研究：歷嚟聯儲局幾時停加息？答案係，大約在CPI見頂後5個月。而你可以睇下，美國CPI應該見頂已經5個月，但明顯仲會加息。有乜啟示？啟示就當然係：歷史平均嘅嘢，就真係平均啫。今次明顯見到停加息嘅時間遲過以前，但亦要留意到一樣嘢：聯儲局今次亦係好遲先開始加息！同你回顧下，其實只係大半年前！3月先開始加，9個月就加咗4厘息

局方輕微調高咗對失業率嘅預測。但往績如何？