美國通脹大幅回落，滿意未？咁你一早買晒未？香港取消黃碼，滿意未？咁你一早買晒股票未？兼講投資金句系列（五） (Patreon)

美國通脹大幅回落，跌連五個月，跌幅遠超預期，滿意未？

而事實係，即使物價繼續升，通脹都可以回落得好快。睇唔明？睇多次。

但美股唔係升好多，搞乜？又話驚衰退喎？

聯儲局可能調低經濟預測

嚟緊半年，你會聽到啲講「驚通脹」嘅友收聲，改為講「驚衰退

經濟好驚加息，經濟差驚衰退，幾時先唔驚？跌市唔買，唔通升晒先買？

黃碼都取消埋，點解港股升得嗰少少？你話呢？

金句七：投資就係孤獨，贏錢就係少數人，所以一定唔好咁易畀人影響

美股過去十幾年，合理眼都贏幾倍，但你係咪見個個脫貧？點解唔係？

我從來都唔認為資訊越多越好，亦唔認為你需要同好多人討論你嘅投資

明明而家人人可以買股票，但點解個個社會都係貧富懸殊？

唯一解釋係：多數人都係錯嘅。咁你隨機聽啲人嘅意見，有乜後果？

股市大跌，正常人會點？當然係驚。咁自然就會傳染你。你有幾多定力？

睇少啲股票，自然多啲機會見到正回報，心情靚啲，做錯決定都少啲。

10月時，一大班人將啲強積金轉晒去保本。結果就錯過11月26%回報

喂，如果唔睇住，咪跌晒都唔知。都可能係，但，知咗又點？

金句一：在股市，大多數人都係錯嘅。否則人人發達啦，但你有冇見過？

金句二：別人恐懼時我貪婪。老套，又廢廢地，但依然值得講

金句三：睇少啲垃圾。點分垃圾？其實唔難

金句四：人就係短視，睇未來係，睇過往都係。呢個係人性，但要自覺

金句五：股市大跌後，多數係會大升嘅。就係咁簡單

金句六：估值好重要，好重要，好重要，甚至比一切重要

美國通脹大幅回落，跌連五個月，跌幅遠超預期，滿意未？

1. 好啦，美股過兩關，先過頭關，滿意啦？結果都係無驚無險，出嚟嘅通脹數字，遠低過預期，點睇都係靚。計按月嘅，CPI按月升0.1%，上次係0.4%，街估係0.3%，即係回落得比預期更快。睇核心CPI嘅，按月升0.2%，街估係0.3%，一樣低過預期。

2. 如果呢個按月升0.1%嘅勢頭一路持續，你見到嘅Headline 通脹（計按年嗰個）會回落得好快，甚至都唔使等啲物價按月跌。原因？之前講咗，基數效應

而事實係，即使物價繼續升，通脹都可以回落得好快。睇唔明？睇多次。

3. 睇返按年嘅，Headline CPI，結果係按年升7.1%，上次係7.7%，街估7.3%。見到回落得好快，仲要明顯低過預期，連續回落五個月了，

4. 睇核心CPI嘅，結果係按年升6%，上次係按年升6.3%，街估6.1%。一樣，都係回落，仲要得比預期快。

但美股唔係升好多，搞乜？又話驚衰退喎？

5. 咁呢個數據，應該皆大歡喜啦，但留意美股並唔係升好多。開市道指升700點，之後大幅收窄。原因？唔肯定（一日嘅走勢鬼知咩），但個通脹數字咁靚都唔大升，係有少少意外。可能真係同估值有關。

6. 不過最重要嘅係，首先，睇CME Fed Watch，一如所料，開最大機會嘅情況，就係通脹數據靚仔，咁下次（即係星期三晚！）加0.5，全無懸念。你話會唔會聯儲局見通脹數字好，但都出其不意加0.75？相信呢個可能極低。

聯儲局可能調低經濟預測

7. 但留意一樣嘢，下次議息（即係星期三晚！）同時，咪話會出埋啲經濟預測數據？而家都有人估，可能聯儲局會大幅調低個經濟增長預測，咁呢個到時可以係股市跌嘅「理由」，甚至係今日出完靚仔通脹數字都未有狂升嘅「理由」。

8. 但順手講埋，星期四日頭我返香港，星期三出完議息後就未必即時有文了（唔使瞓？），可能要去到星期四晚，自己小心。

嚟緊半年，你會聽到啲講「驚通脹」嘅友收聲，改為講「驚衰退」

9. 可以幾肯定嘅係，嚟緊半年，你開始唔會再聽到啲人講「驚通脹」—呢班幾時都驚，幾時都話唔應該買股票嘅人，會開始講「驚衰退」。我相當肯定會係咁。

10. 至於通脹數字，亦係星期四或五有多啲詳情先再詳寫，但，都回落得好明顯啦下話？

經濟好驚加息，經濟差驚衰退，幾時先唔驚？跌市唔買，唔通升晒先買？

11. 仲有，你見到10年債息，跌到去3.5%樓下了，呢個對環球股市當然係好事。

黃碼都取消埋，點解港股升得嗰少少？你話呢？

12. 最後快講埋，黃碼就取消，通關就可能就快（一年內都叫就快！）有機。你見港股升勢唔大—大佬，之前升咗成30%啦！幾時都話炒預期，未放鬆之前炒定先。咁其實，照計啲收租股都仲有得玩，太古地產1972九倉1997之類，雖然有啲都升到52星期新高—之前叫你買又唔買？冇計架喎。咁自問冇咁大膽嘅，咪個個月定期買嘢算。最唔要得就係搞到升晒先買，你避開到呢樣嘢，投資表現已經唔會太差。

金句七：投資就係孤獨，贏錢就係少數人，所以一定唔好咁易畀人影響

13. 好啦，仲有啲篇幅，等我補埋個投資金句系列先。第零篇（前言），第一篇（金句一二），第二篇（金句三四），第三篇（金句五六）。另外，啲舊金句我已經放埋在呢度，方便你同我refer返

14. 去到第七點：唔好咁易比人地影響到你。你睇返金句一至四，應該會明。短期嚟講，啲人往往錯到七彩（其實長期都係，只係錯法唔同）。而投資要成功，差不多一定係孤獨，仲好大機會係contrarian。

15. 因為，股市賺到大錢嘅，一般係少數人。成班失敗者圍爐梗係爽，而你見呢啲人一定係多數。

美股過去十幾年，合理眼都贏幾倍，但你係咪見個個脫貧？點解唔係？

16. 呢個同乜鬼「割韭菜」無關，唔該戒咗呢啲思想（唔好咁易畀人影響！），股市多數人賺唔到錢，當然係自己問題。股市明顯係創富嘅地方，過去十幾廿年買美股，合埋眼都幾倍回報，係咪？但點解你好少見到咁嘅人？甚至咁升法，都唔少人話輸錢？

17. 首先，當然因為人係冇耐性，短視。但亦因為，太易畀人影響。

18. 呢個同金句三有關，網媒評論比紙媒垃圾，華媒又比鬼媒垃圾，網上KOL更加多垃圾—因為佢地要吸收視（包括我在Facebook 寫嘅嘢），一定有咁煽情得咁煽情，一定偏頗，一定講到世界末日，或者刀仔鋸大樹。你睇得越多，越易受影響。實情普通媒體評論都唔係太好，因為必定係narrative。除非你有信心唔受影響，否則，未必需要睇咁多。

我從來都唔認為資訊越多越好，亦唔認為你需要同好多人討論你嘅投資

19. 而我一路都話你知，資訊唔係越多越好。你睇100個評論，未必好過你睇1個—如果你睇啲嘢質素太低的話，睇得越多肯定越差

20. 仲有，你身邊嘅朋友，同事，多數人係普通人。咁金句講過，必定短視，亦往往錯，係咪？你唔信嘅，睇下佢地嘅往績，睇下你自己嘅往績（遲下金句會講：trade log）

明明而家人人可以買股票，但點解個個社會都係貧富懸殊？

21. 十分殘酷嘅一樣嘢：發唔發現，差不多所有社會，都係貧富懸殊？再民主嘅國家都係咁，唔好忘記唔少已經係收重稅，做收入再分配，否則後果更重要。

22. 但而家唔係秦始皇唔係法國大革命唔係文革年代，人人可以買股投資。你講咩企業家剝削地產霸權仆街嘅，根本你自己都可以買埋一份。但唔好話投資致富，你見脫貧嘅人，都係極少。

唯一解釋係：多數人都係錯嘅。咁所以，你隨機聽啲人嘅意見，有乜後果？

23. 點解？唯一解釋，當然係多數人嘅投資係錯的。既然係咁，咁你去聽啲人嘅意見，多數都會係錯嘅。

24. 個情況好似你去到個鎮上面，十個有八個都係傻人，你去問路，有乜後果？仲有留意，「問多幾個，仲大鑊」

25. 即使你唔問人意見都好，其實同人討論，都真係未必需要。唔係我自賣自誇，但你PM我嘅，我好少畀啲好情緒化嘅意見你，係咪？（甚至有啲人覺得答得廢）。但，其他人呢？

股市大跌，正常人會點？當然係驚。咁自然就會傳染你。你有幾多定力？

26. 我就當你朋友唔係太廢嘅人，亦唔係壞心腸嘅人。咁但，股市大跌，咁一個正常人會點？梗係會驚。我都驚啦，邊會有人唔驚。咁，你不停同人討論，係只會更驚的。

27. 上次都寫過啦，10月嘅情況，跌到九彩，態仔都問我沽晒啲股票未。當然我冇因為佢咁問而走去沽，但你話係咪完全冇影響情緒？話冇係呃你嘅。

28. 而如果你嘅工作同金融有關，更加大鑊。所以其實想投資好，就真係唔好做金融（我講真的）。

29. 你想可以做到別人恐懼時你貪婪，或者至少別人恐懼時你唔打靶，唯一做法，就係唔好太易受人影響

30. 當然，仲有幾樣嘢幫到你嘅。首先，你唔應該借錢投資（買樓例外）。第二，你應該只拎你嘅閒錢去投資，而唔係年尾要交稅嘅錢，或者三年後你個仔讀大學要用嘅錢。

31. 當然仲有，睇少啲股票。我從來都冇叫你應該日日睇的，呢個圖都貼過幾次，唔爭在貼多次。即使強如美股嘅大牛市，你日日睇，都差不多一半機會見到自己輸錢。越睇得少，越少見到輸錢，心情越靚，越唔會做錯決定（當然，心情靚都會令人做錯決定，借錢高追嘛，但實務上，低位唔敢買或低位打靶嘅禍害，一般大過高位追嘅。遲下解你知點解）

睇少啲股票，自然多啲機會見到正回報，心情靚啲，做錯決定都少啲。

32. 你見無數咁多次，啲人都係在低位沽走啲股票的。你睇10月嗰浸，幾多人話將啲強積金換晒去做保本？咁咪即係低位打靶咯！而你錯過咗11月26%嘅升浪。你個強積金蒸發咗26%喎！只係因為係強積金，唔係你自己買個股，你先唔多覺。但無論你覺定唔覺，後果係一樣的。

33. 順手提埋你，你輸咗26%後，係要贏返35%！

10月時，一大班人將啲強積金轉晒去保本。結果就錯過11月26%回報

34. 而呢啲嘢，全部係可以避免的。真的，每一次股市大跌，開親seminar（包括剛剛10月嗰次，有埋片為證），都係好多人會問好唔好將啲強積金換晒佢，我每次都叫唔好。你睇下，今次，我幫你救返幾多錢？

35. 所以，真係唔使睇太多嘢。你見我成日睇Economist，就係貪佢唔貼市，一個星期先一次，甚至好多時佢提都唔會提市況。呢啲先係你要識嘅知識，而唔係「今個星期恒指升幾多」（自己Google咪知），「原因係乜」（narrative！），「專家認為下星期會點」（絶大多數係垃圾，包括我以前見報嗰啲。點解垃圾我都要講？老細鍾意，讀者鍾意。所以你又見到媒體嘅問題了）

喂，如果唔睇住，咪跌晒都唔知。都可能係，但，知咗又點？

36. 有人問，喂，如果唔睇住嘅話，咪跌晒都唔知。係，可能會係咁（雖然在香港呢個資訊咁發達嘅社會，我懷疑除非你屈埋在屋企唔上網唔開電視，否則你點會唔知股災？）。但我其實想問，畀你知道，你啲嘢跌咗三成，咁又點？跌三成之前知就有用啫！都跌咗，其實你知同唔知，有乜分別？我甚至話，你唔知好過知。知咗你又唔開心，或者亂做決定。唔知嘅，可能過一排升返，你都唔知中途發生乜事—先坐得穩

37. （德國股神科斯托蘭尼嘅比喻就係：拎晒啲錢買大藍籌，然後食安眠藥，訓返十年八年）

38. 真係諗下喎，畀你知道跌咗，你會點？唔跌都跌咗，知咗又點？好多人會叫你止蝕，咁你就會係10月低位打靶嘅人。

39. 另外，金句五提過，大跌之後，多數升，股市係有一定自我負相關嘅。

40. 篇幅關係，唔寫金句八住。我其實唔鍾意咁樣半篇插一句咁，係好想由頭到尾一次過寫十幾篇。但冇法，呢排比較多即市嘢講，日日繼續埋頭寫金句陣間又畀人鬧。雖然我都真係唔明白，係咪需要日日睇住升定跌，問點解。喂，通脹回落，好意外咩？我在呢度講咗幾個月了。