投資金句系列（四）（兼講最近市況）：打疫苗同投資，有乜關係？美股做乜大幅跑輸港股？ (Patreon)

照寫市況，雖然我有時唔係好明，做乜你要每日知道點解升定跌

我有時甚至唔明，點解你覺得有人知道每日點解升定跌

過去一個月，港股升24%，美股仲要跌。搞乜？

港股強，又係因為「放寬放疫措拖」。但真係咁難預計咩？

有讀者問，唔好低位沽貨，咁但如果等錢用點算？遲下答你

美股11月已經麻麻，12月更差。又話驚通脹。之後會點？

「跌得多就升」「估值好重要」呢兩句好重，但未必最迫切，點解？

人做嘅決定，唔只旁人難理解，甚至佢自己都未必講得出點解

疫苗嘅例子，同金融有乜關係？點解啲人唔打疫苗？

我都信疫苗，但我2月先打第一針，點解？

去問決定背後嘅原因，多數多餘。因為人會講大話，甚至佢自己都唔知。

金句一：在股市，大多數人都係錯嘅。否則人人發達啦，但你有冇見過？

金句二：別人恐懼時我貪婪。老套，又廢廢地，但依然值得講

金句三：睇少啲垃圾。點分垃圾？其實唔難

金句四：人就係短視，睇未來係，睇過往都係。呢個係人性，但要自覺

金句五：股市大跌後，多數係會大升嘅。就係咁簡單

金句六：估值好重要，好重要，好重要，甚至比一切重要

1. 上唔到網，遲咗出，不過之前幾篇都係半夜三四點，相信分別都不太大。又，週末就未必有文了。但至少你見而家已經維持返正常嘅出文頻率，仲要係篇篇都長嘅。

2. 話說都有讀者反映，都想睇返多啲來年展望，或者講下買乜股好，或者有啲近期嘅現象想解下。放心，都會之後寫，但寫完呢個系列先，總不能寫一半停咗。

3. 再講一次，十分重要，雖然好多人都未必明白有幾重要。但我已經用埋最新近嘅例子，get到幾多，第時點應用，就睇各人造化了

照寫市況，雖然我有時唔係好明，做乜你要每日知道點解升定跌

4. 至於市況，又真係要寫下嘅。你見我呢幾篇都一路有插播，今次都不例外。雖然我有時都唔係好明，點解大家需要每日望住市況，你真係覺得睇得密啲對你好啲？我認為係相反的。嚟緊嘅金句都會講。

我有時甚至唔明，點解你覺得有人知道每日點解升定跌

 5. 但，特別係嗰啲見輸咗錢就驚，或者唔開心，或者嚇到亂咁沽嘅。咁以上呢個圖都貼過多次，應該幫到你。

過去一個月，港股升24%，美股仲要跌。搞乜？

6. 睇返近期市況，基本上見到好明顯嘅一個趨勢：港股強，美股弱。實情11月都見到，12月更明顯。你睇一個月嘅，恒指升咗24%！標指只係原地踏步。近期，直頭係恒指升，美股跌。

7. （留意，即時講「短期」，都可能係要睇一個月先見到「趨勢」，幾日嗰啲，往往完全解釋唔到）

8. 點解？當然可以事後搵原因。但不如問下自己，或者出面你睇嘅人，10月嗰時講到港股必定玩完嘅嗰啲理由，而家又如何？你可以重溫下金句一至六。

9. 咁港股強嘅，咪又係講「放寬放疫措拖」咯。但，我都一早提過會有呢一日。亦唔係我特別叻，你諗下，係咪咁難預料？大家都知會發生架喎，只係人冇耐性之嘛。或者諗住「確認」先買。

港股強，又係因為「放寬放疫措拖」。但真係咁難預計咩？

10. 事實你見到，港股兩個星期已經升2300點（13%），如果計低位，大約15000點升到而家20000點，33%。經常問回報點嚟，就係咁嚟。但，15000點時重注落去，近乎不可能，買到都只係好彩。不過都話：至少你可以做到，唔好在嗰度位沽。又或者，至少可以做到，分段，在嗰啲位都照買。

有讀者問，唔好低位沽貨，咁但如果等錢用點算？遲下答你

11. （另外，有讀者問，我成日講唔好亂沽貨。但如果急要用錢點算？呢個以前都寫過，但真係一個極好嘅問題，應該寫完呢個系列會講。但簡單嚟講：你係唔應該沽股票去應付你嘅開支。突發開支呢？所以你應該買保險，事實我做三次手術都冇沽過一股股票。咁例如買樓呢？買樓就冇計了。不過你亦可以留意，買樓唔係「開支」，咁其實你只係一種投資轉去另一種投資啫）

美股11月已經麻麻，12月更差。又話驚通脹。之後會點？

12. 至於美股，11月開始已經麻麻地，12月更弱—唔係跌得多，但明顯見到跑輸其他市場。固然其中一個原因係估值，咁但你可以質疑，咁之前幾個月都貴架啦。都係，但真係見到，到有「好消息」時，港股嘅反應大好多。

13. 咁你睇媒體嘅講法（我唔會話全錯），就話擔心美國通脹。又嚟過。咁當然有值得擔心嘅地方，最新嘅PPI數字反彈，亦高過預期。咁當然會驚之後嘅CPI數字（下星期出）。

14. 實情，但凡有乜強勁嘅經濟數字出，都會有呢種擔心。亦唔係無根據，你見美國啲就業數字仲係相當強（但真係開始降溫了），人工壓力一路都仲在。

15. 但，數字好又驚通脹，數字差又話驚衰退，咁幾時先買得？唔係咁樣睇的。

 16. 咁，正路地呢個「通脹見頂回落」應該仲係好大機會嘅事件，不過就真係未必好快回落到低嘅水平。於是乎，「放慢加息」都係一個極大機會嘅事件（下星期應該只係加0.5，四次0.75後第一次放慢，但呢啲市場已經預期咗），但可能又只係「每次加少啲但加耐啲」。又或者係「一路放慢甚至停，但會在高位停留一段時間」

17. 不過呢啲東西，照計唔係一個好大問題。今年加息對股市債市嘅傷害咁大，主要因為加得急。放慢少少，已經夠晒。況且，市場炒預期，而家點都係去到下半場。

18. 所以，當然係留意住下星期嘅CPI數字，下星期嘅議息（決定不重要，會後講乜，同埋啲經濟預測仲要啲），以及睇債息，睇美匯。咁你見暫時都唔係咩好大轉向。其實美股話跌連多日，跌幅都唔係大。

「跌得多就升」「估值好重要」呢兩句好重，但未必最迫切，點解？

19. 結果又係寫市況都講得幾長（不過可能係好事，有讀者又嫌齋寫金句太悶）。重溫返，呢個金句系列，第零篇（前言），第一篇（金句一二），第二篇（金句三四），第三篇（金句五六）。另外，啲舊金句我已經放埋在呢度，方便你同我refer返

20. 今日呢篇，唔寫新金句住，放心，陸續有嚟。上一篇提過，金句五（跌得多就升）同金句六（估值好重要，甚至係比一切重要），應該係最重要嘅兩句。

21. 留意，呢兩句嘅本質，同其他有啲唔同，呢兩句係相當hard嘅knowledge。Hard唔係難，而係指硬數字，絶對可以量化，亦都見到好明顯嘅結論，唯獨你可以拗「過去唔代表將來」（舊文已經反駁過）

22. 但我有話過，呢兩句我覺得最重要，但對好多人嚟講，未必係最迫切，點解？呢度就開始解。

人做嘅決定，唔只旁人難理解，甚至佢自己都未必講得出點解

23. 如果你講「金融知識」或個「知識水平」，我會覺得金句五同六係最高。不過有時好奇怪，人做嘅決定，往往唔係你想像咁「理性」，佢唔會話你知，甚至佢自己都唔知。

疫苗嘅例子，同金融有乜關係？點解啲人唔打疫苗？

24. 用一個好簡單嘅例子，疫苗（in general，唔一定係肺炎）。你唔使同意我嘅立場，我亦唔係想討論呢件事，只係我認為呢個例子好好。多數人（除咗太過反科學嘅，咁好難討論）應該都真係知，疫苗係「利多於弊」。

25. 當然係「有風險」，打咗可能過敏，甚至死。但唔打嘅，後果更嚴重　—　你唔信都唔緊要，但至少個故事係咁講，係咪？再講一次，你唔信冇所謂，但，你可以諗下啲信嘅人，又點去做決定？係咪咁簡單？

26. 好啦，唔少人都知以上講嘅道理。但依然好多人唔打，點解？背後有好多原因，你可以話不合作，拖低政府，但唔好乜都只係諗香港。全世界都有好多人，明明相信上面嘅嘢，但都唔打，原因係乜？

我都信疫苗，但我2月先打第一針，點解？

27. 至少我睇到兩種例子。第一種，正係我。我而家當然打晒三針（否則點去日本？）。但，好多人都知，我去到好遲（今年2月，夠遲未？）先打第一針。點解？我唔信上面啲嘢咩？唔係喎。咁我做乜唔打？

28. 好簡單：打咗有乜著數？冇。你又唔係打咗即時畀我去日本，係嘅我即打。掉轉，唔扛有乜後果？又係冇乜。我又唔使返工。打針係好低風險，咁但萬一，我真係咁黑仔呢，打完死咗呢？最重要係，唔打又冇後果，打咗又冇著數！

29. 然後，到2月你見到政府開始強硬，唔打冇得堂食—咁我咪打咯！咁所以，我嘅取向，已經代表咗一種人。信，但唔打冇後果，打咗冇著數，做乜打？你話，喂，唔打中招喎。係架，計數唔多理性的，但人就係咁架啦。唔係立法嘅，好多人開車都唔肯戴安全帶添（當然呢個亦關乎舒適度嘅問題）

30. 咁所以，同push factor 同pull factor都有關

31. 仲有第二種情況：有啲父母。呢個先係我想講嘅。佢地都好多知道以上嘅道理。但一路都話，數係咁計，但人腦唔係咁運作。

32. 係呀，可能唔打針，個小朋友1%風險會染病死。但，真係中咗嘅，父母會覺得係天意。之但係，我當打針，冇乜風險，0.01%機會會死。但，如果我推個小朋友打針，佢死咗，父母一定覺得係「害咗佢」

33. 見唔見到，個思考係雙重標準？但人就係咁的！呢個即係active risk同passive risk嘅分別。唔好話疫苗，好多人有重病，要做手術之類，都會面對呢個問題。明明醫生同你講，唔醫嘅，你好大機會死的，但你會信有神蹟，信氣功，都係唔好醫就條命整定。開刀嘅，可能10%機會有事，已經嚇到你唔會開—即使90%機會會解決咗個問題

34. 唔知點解講呢啲，但呢類事情畀我地見到至少兩樣嘢：第一，人嘅行為背後，有好複雜嘅嘢，你不能好簡單咁以為，打嗰啲人就係信，唔打就係唔信。第二，人係好多相當唔「理性」嘅行為，即使講到投資呢啲咁講數字嘅嘢（你開心同唔開心贏嘅100萬都係一樣的），好多嘢，都唔係由數字主導。

35. 所以我懷疑，金句五同六，雖然在「理性上」最重要，但在影響上，可能你睇金句三，「睇少啲垃圾」，自然一切藥到病除。可能係你嘅世界觀，你嘅價值觀，重要過呢啲數字嘢。

36. 你諗下，金句五六嘅數字，可能有啲讀者唔知—但其實好多人都知的。但點解佢地都仲係唔會理呢啲嘢？背後當然有原因，係因為一啲更深層嘅心理因素。可能係受人影響，可能係貪心，可能係人鍾意聽故事。見到冇？

去問決定背後嘅原因，多數多餘。因為人會講大話，甚至佢自己都唔知。

37. 補多一句：好多時你去問人地，因乜做某啲行為，往往都幾多餘。首先，人係十分虛偽嘅，你點解覺得佢會如實答你？即使係最親嘅人都未必會。第二，就係上面講嘅嘢，佢表面嘅原因，同心中真係嘅原因，又未必一樣（啲人可能把口話唔信科學，但心中係害怕active risk）．當然仲有第三：有啲人根本都唔知自己點解做呢啲決定，有啲行為不自覺，甚至有啲係自己都呃埋。

38. 對，寫得太長，未有金句七同八，下篇寫。但預告定。第七，係講唔好咁易畀人影響到你（同一二三有啲關）。第八，就講世界往往唔似你預期咁差（同二三四有啲關，但應該係唔同嘅嘢）。