投資金句系列（一）：在股市，大多數人都係錯嘅。否則人人發達啦，但你有冇見過？別人恐懼時我貪婪。老套，又廢廢地，但依然值得講 (Patreon)

說在前面：未來不可知，越短越難估

我唔知聽日會點。但我知今日同昨日發生乜。

咁就夠。因為多數人連呢樣都唔知。

具體啲講，即係，點解總係講「如果沙士買樓就好」？點解當時冇買？

10月港股14年最差，11月就24年最勁。今年跑贏美股。有乜啟示？

金句一：在股市，大多數人都係錯嘅。否則人人發達啦，但你有冇見過？

金句二：別人恐懼時我貪婪。老套，又廢廢地，但依然值得講

1. 都係唔好講咁多，寫咗文先，遲下再「解」早排甩稿。By the way，我過兩日去日本，但今次應該真係keep 到出文，至少都會拍片（卒之學識點簡單地搞）。Keep唔到你先再鬧吧。而講真，而家仲睇緊嘅，都係相當好嘅讀者。

2. 上篇文同你講返10月同11月嘅市況，我覺得好有啟示，好值得拎嚟做教材。今次呢一系列文，我會係「金句」或「法則」形式，講返一啲我一路信奉，亦都相信係真理嘅嘢。平時講係冇乜用的，有埋例子示範就好，仲要係剛剛嘅一兩個月，唔係拎啲你未出世嘅嘢做例子。

3. 我建議你可以copy咗上面個list先，因為我會在呢幾篇文入面不停咁refer返（我自己寫文時都copy起咗）

4. 今次呢個系列成萬字，你可以諗下我要用幾耐寫。但分幾日出。分開睇有分開睇嘅好，一氣呵成有一氣呵成嘅好。真係要揀，我會建議你一次過睇。可能兩三篇，頂多四五篇。唔睇又點知邊篇最後？好簡單，我會在標題話畀你知係最後一篇，未有嘅即係唔係。

說在前面：未來不可知，越短越難估

5. 好多人經常問未來，但未來肯定係不可知，只能「相當大約」咁有啲嘢估到。而市場方面，你要估幾年後嘅事，又易過你估一兩日後好多。例如呢個圖，貼咗無數次。好有智慧，但今次只係想話你知：短期，真係同估公字差不多，所以唔好問我下星期升定跌，我都係亂答你，你睇圖見到，強如美股，一年都有時大升，有時大跌。但睇長期啲，你見到個certainty係高好多，近乎冇得輸。（順帶一提，呢個就係「減低風險」嘅唯一方法：用時間拉低佢）。

6. 實情所有涉及運氣或不確定性嘅遊戲（投資都係），都會係咁，甚至做人都係咁。三流選手同一流嘅打乒乓波四分三，三流贏到絶對唔難。你同世界冠軍打一分過，可能你都一開波滴死佢。但打21分3局嘅，偷雞嘅可能近乎係零。投資亦係咁。同樣地，亦因為咁，你見世界盃我講話「好睇運氣」，但只係講一兩場。你去到七場過就當然係「十倍定律」，好難爆冷。你睇歐聯踢六場分組賽就更難。例如聯賽踢三十幾場更加難上加難。以上種種又在明報嘅文有寫，Attachment 有。

7. 做人亦係咁，遇一兩間公司有問題，一兩個男朋友係賤人嘅，可能唔好彩。但你總見到有啲人，去到間間公司都話同事衰，每一次拍拖對方都係人渣—咁你知道問題係在邊的。

我唔知聽日會點。但我知道今日同昨日發生乜事。咁就夠。因為多數人連呢樣都唔知。

8. 所以，當然你會繼續問未來，人性嚟的，我都會預測，我都會答。但更重要嘅係：好多人連今日，或者昨日發生乜都唔知。所以你根本唔使知將來，你知道今日同昨日發生乜事，已經好夠。（正係德國股神科斯托蘭尼嘅名句，佢嘅書唔深，值得睇下，我好受佢影響）

9. 我經常有呢個慨歎，因為往往都係啲股票升咗後，讀者先嚟話我知之前冇買。好多時我都會講：之前叫又唔見你買？有啲讀者以為我發晦氣。

10. 但呢個問題真係值得你諗。點解值得買嗰時你又唔敢買？每次嘅嘢你都冇跟，之後先問我，有冇啲未升嘅？一定要克服呢種弱點

具體啲講，即係，點解總係講「如果沙士買樓就好」？點解當時冇買？

11. 具體啲講，點解總係事後先諗，「如果沙士買樓就好」。

12. 咁點解沙士唔敢買？固然好多讀者可能好細個，或者嗰時都未有錢。但肯定好多好多有錢又買得起嘅人都冇買啦，係咪？咁點解？因為「壞消息多」，「氣氛差」—而我寫過數千次，當然係呢啲時間先應該買。但要實行唔容易，所以唯有不停咁畀例子你。

13. 例如上一篇文

10月港股14年最差，11月就24年最勁。今年跑贏美股。有乜啟示？

14. 講返上篇文，相當重要，最好睇返。你冇睇嘅，呢度好快話你知我寫咗乜：10月港股好差，單月跌15%，14年最差，連跌四個月，14年低位，氣氛又極差，又話二十大權鬥，又話放寬防疫無望。全部都係事實，係咪？所有人都係咁諗，但去到11月，港股升26%，24年最勁。唔止，11月港股仲要跑贏美股，今年港股都係跑贏美股（一般計標指）！不過，如果計道指，又已經低位升返20%，係咪又「牛市」？

15. 到底發生乜事？有乜啟示？開個咁長嘅系列講，因為實在十分重要。正如2020年3月大跌後，升到你唔信，嗰時我都叫大家一定要思考。如果你有嘅，照計之後嘅投資回報會好啲，唔會係去到尾水先追入去。

16. 教訓，真係好多。其實同我平時講嘅嘢差不多，但今次有活生生嘅例子畀你。嚟啦喎，十大金句（唔止十句，十大勁歌金曲都唔止十首，而我寫到呢度時係未知有幾多句的）

金句一：在股市，大多數人都係錯嘅。否則人人發達啦，但你有冇見過？

17. 呢個真係我核心信念。在投資市場，絶大多數人，特別係你身邊嘅人，你媒體上睇到嘅人，「認為」嘅嘢，多數係廢話。唔廢嘅，就多數都錯。讀者send啲新聞嚟同我講，「邊個邊個認為會點點點」，一般得啖笑。多數我都係回：咁佢瞓身買咗未？未嘅，咁有幾相信？

18. 事實，好多你聽到人，根本佢地都唔信自己講嘅嘢。呢個問題我講過多次，把口梗係話納指跌到1000點，你唔見佢全副身家去沽空？但我講話睇升，就全副身家買咁滯。咁你話邊個可信？換言之，你見佢地講嘅嘢，係咪真係佢地心諗嘅嘢？如果唔係，而你走去信，係咪畀人搵笨？

19. 但即使講真心相信都好，大多數人相信嘅嘢，一般都係錯。但呢個好可能只係短期。因為人會不停咁修正自己，令自己好似「冇錯」（所以，你要寫trade log，會有一節講呢樣嘢）

20. 證據？好簡單，你見個個事後解釋，都頭頭是道。「沙士後大陸人嚟買樓喎，咪升」「放鬆防疫措拖喎，咪升」—但，你估嗰一刻佢地又係咪信？信嘅，點解冇買？佢當然係唔信，呢樣冇問題—問題係，隔得一排，佢就將自己曾經「唔信」掩飾咗。正如2020年爆疫，當然個個都覺得世界就此玩完啦。（順帶一提，亦係我成日講嘅，事後搵解釋，narrative之嘛）

21. 股市雖然係創造財富，但一般真係贏錢嘅人係少數，原因正係因為「大多數人」係錯嘅—佢地唔會不停錯，之後會修正，但永遠係慢贏家一截。

22. 更何況，你「啱」係冇用嘅，呢個真係好多人都唔明白，因為唔係咁易理解。我知道間公司會好掂，咁咪會賺大錢，唔係咩？答案：唔係，除非得你一個知。NetFlix都好掂，但幾多人輸錢？（冇錯，同估值有關，會有一段金句講）

23. 以前引過一句名句：Successful investing is having everyone agree with you………..later　—記住，人人都知嘅嘢，冇用。或者話，人人都知嘅好消息，唔會再升，人人都知嘅壞消息，唔會再跌。雖然實際上點判斷「人人都知」唔易，但原理係咁。

24. 結果到11月，個個「以為」唔會發生嘅嘢（任你填，可能係人民幣反彈，可能係美金回落，可能係防疫措拖放鬆）就發生，就有一個好大嘅升幅。記住，正係因為啲人完全唔信。

25. 啲友估大陸唔會放鬆防疫措拖，錯晒。啲人估外資一路唔會買中資股，錯晒。啲人估香港經濟唔掂，「所以」港股冇可能跑贏美股，錯晒。港股跌咗咁多個月，有排跌，冇起色，錯晒。邊個話你知股市睇呢啲呢？但放心，到呢啲事情發生咗，佢地又會用另一啲（多數繼續係錯）嘅嘢去解釋。

26. 明白呢點，你就唔需要理身邊啲人講嘅嘢。況且，就算佢地啱又點？你睇多次上面幾段？邊個話估啱就有用？世界唔係咁運作的。（一個比喻：我知巴西好波過南韓，係咪贏到錢？相反，如果我知摩洛哥好波過西班牙就有用，因為冇乜人知！）

金句二：別人恐懼時我貪婪。老套，又廢廢地，但依然值得講

27. 由第一點，多數人短期都係錯，可以引申到第二點：別人恐懼時我貪婪。真係必定要同「主流」對著幹。所以成功投資者多數都孤獨，而且未必開心。你見我差不多每日都畀人鬧，因為我認為多數人係錯，而當然冇人願意諗下自己係咪錯。

28. 但我講過多次，即使原理大家都知，人人樂觀時啲嘢實貴，人人悲觀時先係平嘢（沙士買淘大，金融海嘯買股，2020疫情，每一次都係）。但真係寫故事就易，你當時好難準確判斷。

29. 成日舉嘅兩個例子。例子一，金融海嘯，2008年3月，投行貝爾斯登Bear Stearns 爆煲，基本上已經係聯儲局救。喂，當時已經覺得好大鑊。但你點知好戲在後頭，雷曼在中秋節爆煲先係高潮？你2008年3月去貪婪，一樣好大鑊。仲有，如果你講港股，去到2009年匯豐供股，先真係見底。而家事後睇圖梗易，但身處其中，100個有99個都嚇死（如何避免嚇死？之後嘅金句會講）

30. 例子二？當然係今年嘅港股。3月時已經以為夠恐懼啦，咁之後真係反彈喎。但你點知10月先跌鑊勁嘅？（呢個例子之後我會再用）

31. 但，原理真係不變。你諗下，今次10月嗰時，係咪跌到懷疑人生？你同人講你買港股一定畀人覺得你精神有問題—然後11月發生乜事？

32. 最後補充，我講去飲同態仔同枱嘅故事，唔係抽佢水（我同佢係朋友）—而係佢正係代表好多人，錯亦冇乜咁奇。亦唔只係「行外人」，根本你睇啲「專家」都係咁，KOL個個都萬七話萬六，萬六或萬五，死路一條，港股玩撚完　—　但你明知唔會係咁，垃圾都有個價。但你在咁嘅氣氛下，點能夠唔受影響？

33. 其實原理好多人都知，但真係好難實行，原因上面講過。

34. 所以我教你退而求其次嘅方法：人地好驚時，唔代表你一定要買股票，太難啦。但如果你真係想買，就唔應該因為「其他人好驚」而你唔買。相反，正係因為「其他人驚」，你更加應該買。

35. 又或者，都係嗰句：唔買，都唔好亂沽。

36. 係喎，四千幾字先得頭兩句金句。有十幾句的，但呢篇大半篇開場白嘛，之後冇。預計會有四五篇。之後我會再寫其他嘢

37. 但再講一次，10月同11月嘅港股市況，好值得你去反思。