投資金句系列（二）（兼講最近市況）：睇少啲垃圾。點分垃圾？其實唔難。人就係短視，睇未來係，睇過往都係。呢個係人性，但要自覺 (Patreon)

快手講下市況：美股5連跌，搞乜？又驚加息啦？定驚通脹？驚衰退？

點解加咗4次息，加足3厘—但美匯返返6月時水平？

之前又話未「確認」，點解一「確認」放鬆放疫措拖，港股就大插1000？

金句三：睇少啲垃圾。點分垃圾？其實唔難

我唔使好波過美斯先可以講波，但至少我要知乜嘢係越位先可以講波

金句四：人就係短視，睇未來係，睇過往都係。呢個係人性，但要自覺

「我打算XXX有幾多回報」「我想XXX」—唔好意思，市場上，邊個care？

而人判斷未來，就係用最近嗰幾日見到嘅嘢。所以以為跌開，咪繼續跌

問題係：到底股票係跌開繼續跌，定跌得多就會升？有得驗證。下篇解

金句一：在股市，大多數人都係錯嘅。否則人人發達啦，但你有冇見過？

金句二：別人恐懼時我貪婪。老套，又廢廢地，但依然值得講

1. 回顧返，呢個系列講10月同11月嘅市況（特別係港股），市況絶對係教材級，一定要拎嚟講。我會用投資法則或金句嘅形式。第零篇（你當係序言），呢度。上一篇講咗兩個金句，呢度。

2. 照舊，你可以抄低啲金句先，因為我會refer，甚至你見樓上我都有貼返呢兩句，費事你唔記得。

快手講下市況：美股5連跌，搞乜？又驚加息啦？定驚通脹？驚衰退？

3. 另外，如果我係你，我會一次過先睇晒咁多篇（去到最尾我會寫明最終回）。不過一次睇兩萬幾字，唔係個個頂得住。雖然我覺得真係一次過好啲，因為一啲你一路睇金句一二嘅問題，可能我會在金句十一十二答咗。

4. 今日正題之前，都快手講下近日市況。以免啲讀者覺得我太離地，個市係咁跌你仲講之前嘅事（但，今日金句就會叫你，唔好睇得太近！呢幾日跌，同我講嘅金句，有何抵觸？你以為股市係一年升足250日？）。

5. 首先講美股，見到11月跑輸港股，整體表現亦普通，近期再差啲，連跌四五日。原因？又係narrative，但都可以講，一般講法兩三個。第一個，驚衰退。第二個，驚會再加息。第三個，通脹似乎又死灰復燃。都係嗰幾味啦，合埋眼都識講

6. 留意「二」係語焉不詳嘅，係指而家未加夠仲會加（肯定），定「二」係因為「三」，通脹可能再升所以要再加多啲？兩樣嘢有啲唔同（所以記住思考深入啲）

7. 先講第一，對我嚟講係廢話。唔係話唔會衰退，呢個可能唔低。但，經濟好又驚加息，經濟差又驚衰退，咁你永世唔使買股票。無數咁多例子證明，衰退時買股票，係相當好嘅（其實即係金句一同二，好多時啲金句各有關連，但又唔係一樣）。2009係咁，2020年頭亦係咁。而且，衰退呢樣嘢，都唔少人有預備—未必全部，但至少部份反映咗在價格。仲有，可以幾肯定嘅係，個衰退都只會係短而淺嘅衰退。（留意呢個亦係上篇文講嘅嘢：你知嘅嘢，冇人知咩？）

8. 第二個，如果你指嘅係，「而家只係放慢加息唔係停，仲係上緊去」。咁呢個亦係幾廢。同上，今日先知仲會加息？一早知。市場唔使等停加息先升，道指低位都升咗兩成啦。

9. 不過如果你講第三，我覺得真係似係「因為」有啲擔心通脹未熄晒。你話見咗頂未，我都係好有信心答你見咗頂。但會唔會好快回落？會唔會有機會中途高位徘徊一輪，甚至反彈？可能性唔係冇。

點解加咗4次息，加足3厘—但債息返返6月時水平？

10. 最主要係，你見個勞動市場仲係相當強勁（順帶一提，呢個係環球現象。香港經濟講到玩完，但失業率係4%，十分好笑。英國經濟都衰退邊緣，但失業率一樣低。點解會咁？遲下寫文解）

11. 咁但，我係唔會太擔心嘅。因為你可以睇最關鍵嘅嘢：即使講通脹有機會未熄火，勞動市場仲係好強勁都好，10年債息，近期冇乜點上。甚至而家返返去加幾次0.75之前嘅位（第一次加0.75係六月中，圖入面mark住。又，呢個圖，好值得你去思考！點解加咗4次0.75，債息返返原位？）

12. 美匯嘅情況亦差不多。只要呢兩個東西唔大變，暫時仲係好放心。

13. 不過一個關鍵係：美股嘅估值，其實唔平，而家都唔係平。到遲下講2023部署我會講多啲，但我肯定唔會叫你只買美股

點解加咗4次息，加足3厘—但美匯返返6月時水平？

14. 咁照舊，又係可以留意今個月嘅CPI數字，同埋今個月議息。CPI 13號出。計按年嘅，無論core定headline，都應該係放慢。但當然仲要睇係咪好似預期咁回落，況且CPI數字成日有意外。

15. 議息呢？就係緊接住，14號，夠刺激，仲係一年四次嘅大會，出埋經濟預測，一樣會寫文講。不過剛剛嗰日上機，可能慢少少，講明先，費事又有人講粗口鬧

之前又話未「確認」，點解一「確認」放鬆放疫措拖，港股就大插1000？

16. 至於港股？仲好笑。但又係一個好好嘅示範。好啦，卒之話放鬆防疫啦。但，即日大跌600點。仲要係升300變跌600，而真係一出個消息就勁插，死未。

17. 咩原因？都真係未必答到你。但好多人會講sell on fact，都有一定道理。股票就當然係炒預期。

18. 我自己傾向覺得，呢個唔係一個轉勢，好可能只係一日有啲友獲利急急離場咁解，但當然短期嘅走勢，根本冇得估。

19. 但可以好肯定嘅係：想像下你好「貼市」，之前一路唔敢買，「因為未肯定會放鬆」（而港股低位升咗25%）。好啦，今日（星期三）見到卒之卒之嚟料，個市仲升緊300點，仲唔衝入去？咁你諗下會點？

20. 好簡單嘅故事，畀你見到股市係點運作。絶對唔係好似好多人咁諗：有好消息，之後升。永遠係掉轉，升咗，咪有好消息。仲有，當然係炒預期。

21. 見到冇？講市況又講咗千幾字。講返個金句系列，只能講兩句金句（所以可能會拖到六七篇）

金句三：睇少啲垃圾。點分垃圾？其實唔難

22. 由上次嘅兩個金句（最頂有，唔重覆了），你睇到真係多數人，特別係短期，都係錯嘅，而佢地話你唔應該買時，就往往最應該買。於是帶到第三點：我經常講，睇少啲垃圾。

23. 不過頭兩個金句，幾多先叫「大多數人覺得」（佢地講嘅嘢唔等於真係覺得！），幾時先叫「夠恐懼」，兩樣都係相當難判斷。

24. 好消息係，今次呢個，何謂垃圾，就易判斷。話時話，亦唔只投資，好多嘢都係，呢個年代資訊爆炸，但點解一樣係好多人咁廢？因為佢地睇嘅嘢太垃圾。點去分邊啲嘢值得睇，係呢個時代最重要嘅能力。而唔係你「識幾多嘢」（畢菲特使唔使識整晶片？）

25. 我會教你分。

26. 基本上，Facebook IG嘅，就最多垃圾，呢個同平台設計有關，一定要吸收視，而垃圾一定最吸收視。唔識分咩係垃圾嘅，好簡單，唔好睇KOL，睇傳統媒體。一般鬼媒又好過華文媒體，而月刊又好過周刊，紙媒又好過網媒　—　記住，越慢嘅嘢，越好。你日日睇嘅，唔驚都變驚。下一個金句會講

27. 仲有，一般嚟講，貴嘢好，免費嘢小心啲（冇錯，包括我在Facebook寫嘅嘢）。Economist Financial Times如果唔係寫得好，憑乜收咁貴？啲讀者傻的？做乜唔睇你啲傻仔網友指點江山？我個個月畀錢訂，你估我錢多？拎去打邊爐唔好？當然係好嘢先值錢。正如你訂我，都係因為覺得我講過啲免費垃圾啦

28. 但只係一般而言，當然有例外。你見我講Charlie Bilello 嘅Twitter或者佢嘅Blog，長期免費，但寫得好好。但華文免費嘢就真係垃圾多。

29. 仲有，上面講Economist 講Financial Times，仲可以留意：睇嗰啲係咩人？世界就係咁簡單，高水平嘅人睇嘅嘢，同低水平睇嘅，就係唔同。正如大家睇我嘅文，都同出面啲友唔同水平啦。所以唔識判斷嘅，你大約可以留意下，睇嗰啲友，係咩人？

30. 舉個例，我都睇波，但你見好多足球Page（唔好開名啦，雖然你PM我我會開名），垃圾之極。係架，好多Page Like，但又如何？嗰啲係咩友？

31. 我自high又同你一齊high講句，我FB Page兩萬幾人，加埋呢度兩千人，但啲人係高質的。

32. 你見我平時睇乜，就大約知我覺得邊啲嘢好睇。但實際上當然你未必有時間，或者睇唔明—唔使覺得唔好意思。根本好正常，邊個話你要睇得明任何嘢？我做咗金融廿年，做到都幾大粒嘅位。好多嘢我睇得明，你唔明，正常過唔正常，如果唔係咁就到我要反省下。等於你做廚嘅，好多你覺得係常識嘅嘢，我都唔會識。但亦正係因為咁，我先有價值。

33. 最後一個提點：你可以睇埋，寫嘅係乜人。雖然有時都有啲難判斷，但正如我以前寫聯匯（嚟緊又可以寫下）：喂，一大班，銀行都未做過嘅，成套嘢都唔知點運作，出嚟指手劃腳。你唔覺得好笑？

我唔使好波過美斯先可以講波，但至少我要知乜嘢係越位先可以講波

34. 我唔使好波過美斯先可以講波，但，至少我要識得球賽規則，我要知咩叫越位，先可以去講波下話？

35. 但點解嗰啲完全唔識嘅人講嘢，一樣大把人信？好簡單，因為好多人立場行先，只係想聽佢想聽嘅嘢，那怕背後幾咁垃圾。錯晒佢都唔介意的。

36. 我甚至唔係講10月港股唔掂，個個話到實死，但11月番生呢啲例子。市況本來就極難估，我話你知10月我覺得11月會升，都係呃你。

37. 但例如乜？例如你又望下（所以，做trade log做journal好緊要），嗰時講乜呀？又話走資嘛，又Kyle Bass嘛，嗰時成日7.85嘛，又話日日走資8月銀行體系結餘變零嘛

38. 咁而家咩情況？12月啦喎。銀行體系結餘，成1000億。

39. 咁即係，當時照單全收嗰啲人，你可以諗下，係乜嘢水平。仲要，唔止錯一次啦喎。呢個亦係一個幾好嘅測試。

金句四：人就係短視，睇未來固然係，但睇過往都係。呢個係人性，但要自覺

40. 溫下書，第一點講，短期啲友多數都錯。第二點講，你應該contrarian，別人恐懼時你唔好驚埋一份。第三點，睇少啲垃圾，因為嗰啲人就會令你更加恐懼，亦會令你在唔啱嘅時機買啲唔啱嘅嘢。三點互相有關係

41. 呢度又可以帶到去第四點：唔好睇嘢睇得太短—而偏偏你側邊嘅人，全部都係短視。不一定因為佢地水皮，呢個係人性，我都會，只係程度上。亦可能因為佢地睇得垃圾多，唔多唔少都會傳染咗。

42. 你可以睇下，社交媒體上，或者而家呢個社會嘅環境，係令人更加短視嘅。一單新聞講兩日，你寫完話睇好股票，第二日跌1000點，即時大把人串你燈神。但，一日係乜？Nothing．而你睇，短視嘅人，有幾可會發達？投資又好，做實業又好，個個都係睇長遠啲—正因為呢種能力可貴，先值錢。

43. 我每次講座，同人講長線係十年八年，已經冇人想聽。個個都只係想下個星期贏三倍。我都想，但用你常識諗下，有冇咁嘅事？有嘅，你仲唔係股神？點會畢菲特係股神？

44. 好多人聽過個故事，Amazon嘅Jeff Bezos，問畢菲特：你嗰套嘢，講到咁簡單，點解唔係個個都變咗你？畢菲特答：好簡單，因為nobody want to get rich slow

「我打算XXX有幾多回報」「我想XXX」—唔好意思，市場上，邊個care？

45. 個個都想快，我明。但，你「想」就得？會唔會自大咗少少？會唔會應該照下鏡？

而人判斷未來，就係用最近嗰幾日見到嘅嘢。所以以為跌開，咪繼續跌

46. 仲有一個好大嘅問題：人嘅短視，唔止係講「睇將來」。即使睇「過往」亦係咁。

47. 即係點？即係，人判斷未來，就係跟據佢最近遇到嘅事：呢啲事，往往只係幾個月，

48. 港股跌開四個月，多數人會覺得繼續跌，「因為仲有壞消息」。美金升，你會覺得一路升，「因為仲加緊息」。但你睇數字，明明見到唔係咁（所以，唔好睇KOL）。不停跌，啲人就當繼續跌，因為氣氛差。

問題係：到底股票係跌開繼續跌，定跌得多就會升？有得驗證。下篇解

49. 不過呢點好有趣：因為，係可以驗證嘅。在序言嗰篇我都有叫你諗過一個問題：股票係跌開繼續跌多，定係跌得多會升？你話呢？呢個係可以驗證的。下篇文講。

50. 呢篇文再次係五千字，根本我拆咗兩篇都仲得，絶對對得住讀者。