［回歸強文，必睇］10月港股大跌，11月升突。今年港股仲勁過美股。係好好嘅教材，你覺得有乜啟示？ (Patreon)

卒之出返文。11月文唔多，但篇篇精彩，唔信你去睇返。

11月我身家彈返15%，完全唔難。咁你去低位沽貨換強積金，係你問題啦

我10月尾去飲，義兄問我：你沽晒你啲股票未呀？

答案唔重要（好明顯啦），但點解佢會咁問？咁你諗下，10月發生咩事？

10月恒指跌咗15%，14年以嚟最差，咁你買科技股肯定唔止添。但跌乜？

真係要揀，咁應該14年低位買，定14年高位買？

應該連跌6個月買，定連升6個月買？

其實亦即係問，跌開繼續跌，定跌得多會升？有歷史數據可以睇的

又諗一個好簡單嘅問題：點解跌市時買股票，會畀人鬧？

講「趨勢」下話？咁我話美股長線係升嘅。「然後你就話過去唔代表將來」

有人覺得唔代表將來。不過上個月跌下個月就會跌，搞唔搞笑？

「試下你一個月輸15%，睇你仲係咪一股不沽丫」—我就係可以。

唔止，2020年一個月跌三成，我都企得住。只係呢點已經勁過好多人啦

美股10月就幾十年最強，但11月就大幅跑輸港股。

11月港股升26%，24年最勁，升突之前跌幅。你覺得有乜啟示？

10月好擔心嘅嘢，11月又唔擔心啦？胡錦濤又同習近平friend返啦？

港股今年已經跑贏美股，「點解」？

思考時間兼下篇預告：呢兩個月，或者今年發生嘅事，有乜啟示？

卒之出返文。11月文唔多，但篇篇精彩，唔信你去睇返。

1. 卒之出返文，最緊要開返個頭，之後就會寫返多啲。實情好一排，啲讀者話我知啲文多到睇唔晒。但到11月少咗出文，就有人直頭講粗口鬧。既然我之前係可以寫到你睇唔晒，咁我寫少咗當然有各種原因。不過呢個都係後話，最緊要出返文先，過兩日再解。

2. 但一定要講，11月雖然文唔多，但篇篇精彩。你而家睇返，可以睇下我有冇講錯，同埋啲文有冇用？之後我會一一再回顧。講明通脹見頂，放慢加息，美債債息回，環球股市會好返。咁都唔滿意，我唔知讀者要點先滿意。實情11月我嘅身家，反彈超過15%。

11月我身家彈返15%，完全唔難。咁你去低位沽貨換強積金，係你問題啦

3. 照計你身家嘅15%，一定夠你畀好多年嘅年費。而絶非馬後炮，我自己都身體力行。你手痕沽晒啲股票，換咗你啲強積金，肯定係因為你唔聽我講。

4. 仲有，如果有乜想我寫嘅，可以直接PM我話我知。我唔一定會寫，亦唔一定識寫。但會幾有建議性，好多好嘅文都係讀者提議我寫嘅。

我10月尾去飲，義兄問我：你沽晒你啲股票未呀？

5. 先講個故事（在我明報專欄都有提，attachment 有原文）。10月尾，朋友結婚。席間我義兄同枱（即係態仔，in case有人知邊個）。佢唔係做金融，亦唔見得拎好多錢買股票，但唔知點解講起股票，然後用佢一貫奸狡嘅笑容問我：「你沽晒你啲股票未呀？」

6. 我好肯定，佢係冇惡意嘅。但點解，一個唔係做金融亦唔係特別買得多股票嘅人，會有此一問？其實佢嘅問法，已經代表佢覺得，「你應該沽晒你啲股票」

答案唔重要（好明顯啦），但點解佢會咁問？咁你諗下，10月發生咩事？

7. 做乜佢會有此一問？

8. 好簡單，你睇返個日子，嗰時係10月尾。特別留意嘅係，只係個幾月之前咋下。你應該仲有記億。你諗返，發生咩事？當時你諗緊乜？心情如何？

9. 如果你唔記得咩事嘅，我話返畀你知。10月，港股非常之差。有幾差？10月恒指一個月就跌咗15%，係金融海嘯後最差。

10月恒指跌咗15%，14年以嚟最差，咁你買科技股肯定唔止添。但跌乜？

10. 仲有，因乜咁差？諗下10月時你諗緊乜，啲人講緊乜？不外乎係講二十大，甚至講外資對中國絶望呀（而家先絶望？），冇委任經濟官員呀，夾咗胡錦濤走呀，放鬆防疫措施無望呀（只有最後一點我勉強覺得係「跌市嘅理由」）

11. 咁事實，10月係跌咗15%喎！股災月添（係全無根據的，況且，如果係股災月，唔係更加應該買？）。咁你叫人買港股，一定畀人鬧啦，係咪？13年低位喎，連跌4個月喎。

真係要揀，咁應該14年低位買，定14年高位買？應該連跌6個月買，定連升6個月買？

12. 不過真係諗真啲，一定要二揀一，咁14年低位值得買，定14年高位值得買？連跌4個月應該買，定連升4個月應該買呢？

其實亦即係問，跌開繼續跌，定跌得多會升？有歷史數據可以睇的

13. 呢個，其實亦即係問，到底係momentum, trend，定係reversion to mean？又即係問，到底係serial/auto correlation，係正定負？術語講到好深，但人話講，到底「跌開繼續跌」，定「跌得多就升」？

14. 畀你估下？下篇文會解

又諗一個好簡單嘅問題：點解跌市時買股票，會畀人鬧？

15. 點解不停跌，叫人買股票，會畀人鬧？因為，人係短視嘅，佢地判斷將來嘅依據，就係最近發生嘅事。例如美金強，佢地覺得之後都會強。油價升，就一路都會升。甚至有啲人講「趨勢」

16. 但，呢啲只係任你講。到底係升開繼續升跌開繼續跌，定係升得多會跌，跌得多會升？你冇數字嘅，基本上係廢話。咁數字上係點？到底跌開繼續跌，定跌得多會升？之後我會講（有啲以前都討論過）

講「趨勢」下話？咁我話美股長線係升嘅。「然後你就話過去唔代表將來」

17. 不過，你要講「趨勢」嘅—其實呢個我貼過好多次嘅圖，已經可以叫所有睇淡嘅人收檔。美股長線係升嘅，講完（事實係咁，我亦極有信心將來都會係咁，因為背後有原因，大家睇圖睇數字，要諗埋背後嘅原因）。

有人覺得唔代表將來。不過上個月跌下個月就會跌，搞唔搞笑？

18. 你可以諗下，同你講momentum 講trend嘅人，會點回應呢個圖？會唔會答你「過去唔代表將來」？咁你仲好意思同我講trend？百幾年嘅trend，你覺得太陽聽朝會由西邊升起。但一個月嘅trend，你就覺得會一路持續落去，唔係好搞笑？你嗰啲到式係trend，定係noise？

「試下你一個月輸15%，睇你仲係咪一股不沽丫」—我就係可以。

19. 當然會有人回：一個月15% 都仲noise？好大幅度啦！試下你一個月輸15%身家丫！睇你仲係咪講得出唔怕，繼續買？

20. 但，我就係做得到（嚴格嚟講唔係，因為我唔金係買港股嘛，記住，分散）。

唔止，2020年一個月跌三成，我都企得住。只係呢點已經勁過好多人啦

21. 事實如此，義兄問我嘅問題，「你沽晒你啲股票未」。呢度嘅讀者當然知道答案，我當然係一股都冇沽過，仲個個月都買緊，港股美股其他股都係。有乜咁難？我就係做到咗。跌15%又點？「唔好睇佢」。仲有，因為我唔止買港股，所以港股跌15%，我身家冇一個月跌15%。

22. 唔止，2020年嗰時，美股一個月跌三成，我都受得住，冇沽過，先食到之後嘅升浪。只係呢一點，我有成功做過嘅經驗，已經勝過晒一大堆紙上談兵口講一套自己做一套嘅三流KOL啦，係咪？

23. 仲有一點，我其實少買中資科技股，所以即使我嘅港股倉，一個月都冇跌15%。咁好多人成手都係美團阿里巴巴嘅，就唔止輸15%—不過後來反彈又多啲，有辣有唔辣。但，你係咪有咁定力？十個有九個都冇，因為好多讀者係隻嘢跌10%已經問點算，話要「止蝕」

美股10月就幾十年最強，但11月就大幅跑輸港股。

24. 順手睇埋，美股呢？美股10月，就係相當好嘅，1976年以嚟最好嘅一個月。你見我呢幾個月都係講美股多，原因幾個。首先當然，如果你講長期（我指嘅長期係十幾甚至幾十年），我都好有信心美股強過港股。二來亦都講真，叫人買港股實畀人鬧，包括你地　—　但你記住，一個人真正相信嘅嘢，唔係講嘅嘢，係做嘅嘢。我都仲每個月有買港股有買美股，比例可能四六之分（仲有啲歐洲，新興市場走中國之類），咁你話我係咪睇淡港股呢？倉位唔呃人。

25. 好啦，然後11月發生咩事？應該大家都知（喂，上個月嘅事咋）。

11月港股升26%，24年最勁，升突之前跌幅。你覺得有乜啟示？

26. 11月，港股升26%，24年嚟最勁，滿意未？亦都完全收復10月嘅失地有突。即係你10月買，一定贏錢。但，我叫你買，你一定鬧。

27. 而你可以諗下，你低位打咗靶，或者懶聰明，「轉晒啲強積金做保本」，即係有乜後果？

10月好擔心嘅嘢，11月又唔擔心啦？胡錦濤又同習近平friend返啦？

28. 你亦可以諗下，11月港股升乜？（好多人鍾意問，但你見我唔多問，正如跌我都唔問跌乜，只係你地問我會答）。可以睇下大升嘅講法，順手諗下，點解10月時好擔心嘅嘢，11月就唔存在？胡錦濤忽然同習近平friend 返？西方國家忽然對中國好友好？

29. 順手你可以睇埋，11月嘅美股，都係升，但升幅遠不及港股。

港股今年已經跑贏美股，「點解」？

30. 唔止，今年港股已經跑贏美股！是真的！恒指今年跌16%，標指今年跌17%，我已經冇同你計你地最鍾意嘅納指。

31. 之不過，同時間，道指已經低位升返20%，又係咪「牛市」？

思考時間兼下篇預告：呢兩個月，或者今年發生嘅事，有乜啟示？

32. 好啦，戲肉嚟啦喎。

33. 首先，以下呢堆嘢係客觀事實，唔涉及任何narrative：

34. 港股10月大跌後，11月升返突。而港股11月大幅跑贏美股。而港股今年居然係跑贏美股。

35. 咁請你問一問自己，覺得有乜感想？

36. 如果你第一反映只係諗住解釋「點解」港股會跑贏美股，證明功力未夠。做乜要問點解？我問你感想，冇話叫你解釋。

37. 當然，你要知「點解」，容乜易？Google咪得，媒體一定話你知「點解」。但，呢啲普通傻仔都識嘅嘢，又點會有價值？

38. 記住，係你知道我講嘅嗰啲客觀事實後，有乜感想？

39. 畀多啲提示你。我即係問，你覺得有乜教訓？

40. 我下篇文會寫。一來費事太長（呢度又四千字了，以前我啲文邊有咁長？）。但二來，亦都畀你沉澱下。

41. 再問一次：10月港股大跌，11月升突。而港股11月大幅跑贏美股。唔止，根本今年都跑贏美股。不過話說回頭，道指早前低位又再升咗20%了，係咪又「牛市」？你覺得有乜教訓？

42. 下篇講，甚至係可以分兩篇講。呢兩個月嘅走勢，係好好嘅教材。唔好永遠只係識得問「之後升定跌」（但你一定要問嘅，我半年前已經話你知通脹見頂美股見底，你可以搵返舊文），「幾時買得」（呢個真係答你唔到，但，如果計港股最好嘅時機係10月，第二好係而家），「買乜好」（呢個下篇可以講下，但，唔知買乜嘅，2800 VOO QQQ，有幾複雜？）．

43. 問呢啲問題，你係好難進步嘅。你見我有冇走去問呢啲問題？明知冇答案嘅問題，問嚟做乜？你係為咗安心，定真係想改善自己生活？

44. 下篇文講，呢兩個月嘅走勢，有乜投資啟示。你唔去改變你想法嘅，升浪永遠冇你份，然後往往跌市摸晒頂

45. （不過都講明：即使你水平高咗嘅，都係冇可能低位撈到高位沽到的—但你嘅分配上會好啲，會在低位撈到啲，又唔會「全部」在高位買咁解）