美股2年最大單日升幅，但你有冇食到應？有冇大大舊錢放咗入去？ (Patreon)

10日前出個靚仔CPI，股市大升，但之後靜咗，又有人驚了

睇下出完CPI數字後嘅市場走勢，係咪可以持續？

最新加息預期又係點？

仲有，下月2月嗰次加息呢？

聯儲局官員最近又點「引導？」

仲有留意埋剛剛出嘅聯儲局議息紀錄

每次加少啲，但加耐啲，加高啲，係咪又係壞消息？

CPI數字一出，債息即時散晒，近期都冇再反彈。又話繼續加息？

同樣地，美匯指數又係大瀉，近廿年最大跌幅

明明一路加緊息，但美匯指數9月已經見咗頂，點解？

美股單日升幅，2年嚟最大。但你儲齊貨未？

5000日可以10000變60000，但，錯過10日，已經得返一半

係喎，如果避開最差嘅10日，仲勁添。但邊做得到？

最差同最好嘅日子多數好接近，所以你只能同時食—而一定好過同時唔食

10日前出個靚仔CPI，股市大升，但之後靜咗，又有人驚了

1. 好啦，剛剛寫咗篇101心法文，講股價點解大上大落。其實係有感而發，因為人實在太短視，只係10日前，出咗CPI數字相當好，加息預期明顯降，港股美股齊升1200點。但之後好似冇乜力，甚至跌返幾日，就自然好多人會「驚」，自己嚇自己，就質疑返通脹回落或者加息預期降呢樣嘢係咪真—變相係畀個市場帶住你走，而唔係行在佢之前。於是永遠就係佢跌跌跌，你就覺得繼續跌，唔敢買。佢升升升，你就覺得一路會升，仆到去買。但呢種操作就最出事

2. 遲下會寫多篇文講「恐懼」，但都係講返10日前出嘅CPI數字，因為實在太重要

3. 又回帶，早排同你分析返今年股市點解咁差，點解加息咁急，點解通脹咁勁。然後另一篇同你講，10日前個CPI數字後，就好明顯見到2022種種唔太好嘅嘢，通脹加息美金強等等，極大機會在2023逆轉。新讀者仲可以睇埋，出個CPI數字前，我都趕起篇文，個個數字靚。

睇下出完CPI數字後嘅市場走勢，係咪可以持續？

4. 然後又點？睇下係咪可以持續。睇下當時出完數字嘅市場反應，同埋最近又點。

5. 首先第一樣嘢，加息預期。介紹返，之前聯儲局連續4次加息0.75，今年仲有12月中嘅一次加息。未出CPI數字前，市場預期係一半半，估12月加0.5同0.75嘅機會，一半半。但到個CPI數字一出，即時開埋一邊，八成都估0.5

最新加息預期又係點？

6. 知唔知最重要係乜？最重要係，呢個預期，而家都係差不多。即係，應該12月鐵定會加0.5，鐵定會減慢加息。

7. 其實，呢個預期過去10日都冇乜大變，所以唔好只係因為股市回幾日就嚇到你又改變睇法。

仲有，下月2月嗰次加息呢？

8. 仲有，亦可以睇埋，下年2月。而家都係以估0.5係主流，但有趣嘅係，估0.25嘅機會仲大過估0.75。不過當然提提你，12月中嗰次議息後先會見真章，嗰次議息又係有埋經濟數據預測，同埋12月中嘅議息，剛好在CPI數字後

聯儲局官員最近又點「引導？」

9. 順帶一提，出完CPI數字，市場有晒下個月估減慢加息嘅期望。當時我最擔心嘅係乜？係擔心聯儲局官員會出嚟潑冷水。如果佢唔係想放慢，而全世界都咁估，佢就差不多係時間要降低下你期望—唔好忘記下次議息係12月中。

10. 所以最鼓舞係見到，聯儲局官員，都普遍放慢口風。一向相當鷹嘅戴利，都講話應該放慢步伐。洛根就直頭講見到通脹放緩開心，喬治亦講到明支持放慢加息—　留意呢啲全部都係出完CPI，市場估八成機會12月加0.5後，佢地出嚟講嘅，即係肯定咗市場嘅預期。

11. 咁，就梗係開心啦，已經過咗加得最快嘅一段了。

仲有留意埋剛剛出嘅聯儲局議息紀錄

12. 留意下，最新出咗聯儲局嘅議息會議紀錄（所以我等埋先寫文）。入面亦都有講多數官員認為應該放慢加息。己成定局了。呢個亦同鮑威爾11月頭議息前講嘅嘢差不多，當時我都有寫。（所以呢個月啲文篇篇都好重要）

13. 不過，講開11月頭嘅議息，如果心水清，會記得美股係大跌的，詳情我篇有寫。明明鮑威爾暗示會放慢加息，但點解股市都大跌？有人話佢忽然轉鷹，實情係「短鴿長鷹」—亦即係話，可能放慢每次加息嘅幅度，但可能會維持更長，加到更高。

14. 呢個亦唔多唔少係近排市場都冇大幅反彈嘅原因，留意最新份議息會議紀錄，都有提到「預計利率將在更高水平見頂」—即係上面一段講，每次加慢啲，但可能加更耐，去到更高嘅位。

15. 講返出CPI數字後，市場預期嘅「峰值」（Terminal rate）都下跌唔少，由估加到5厘樓上見頂，到估5厘樓下就見頂—我未得閒睇最新嘅數，但照計應該呢幾日個Terminal rate 嘅預測係高咗的，上一段咪講咗聯儲局嘅取態

每次加少啲，但加耐啲，加高啲，係咪又係壞消息？

16. 好啦，咁你話，雖然每次加少啲，但拖長嚟玩，加耐啲，甚至可能去到更高嘅位。係咪壞事？似乎唔一定。早兩日嘅文講過，2022年嘅最大問題，唔係加息加到去個好高嘅水平，而係加得太急。慢慢加，市場就一般唔係太大問題嘅。

CPI數字一出，債息即時散晒，近期都冇再反彈。又話繼續加息？

17. 好啦喎，當日CPI數字一出，債息即時大跌（圖係5年債息，但10年都差不多）

18. 你可以見到，個單日跌幅相當之急，十幾年冇見過。呢個當然係對股市好啦 

19. 更重要嘅係乜？就係，你見個債息急回之後，雖然之後好似有啲小反彈，但好快又落返嚟。個債息仲係遠低於出CPI數字之前。

同樣地，美匯指數又係大瀉，近廿年最大跌幅

20. 同樣地，你見美匯指數嘅走勢，亦都係差不多。

21. 近廿年最大嘅單日趺幅

22. 而最重要亦當然係，你見美匯指數大跌完後，嗰幾日有啲小反彈，又有啲人驚。但你見同債息一樣，彈小小就散晒了。

23. 好值得你諗下嘅係：美匯指數，似乎係在9月尾見頂。但明明10月都仲加咗0.75，12月都仲會加0.5。就唔係好多人想像中嘅：美金一路加息一路升。唔係咁的，去到某個位就唔會咁。

明明一路加緊息，但美匯指數9月已經見咗頂，點解？

24. 點解美匯指數9月見頂？兩個原因。第一個長期讀者一定會知，因為一定係炒預期，我唔使見到佢放慢加息甚至減息，美匯指數先會跌。第二個原因呢？就深啲，雖然都講過。匯率係相對嘅東西，美國開始加得慢，但其他貨幣較遲開始加息，但而家幅度可能大過美國，自然此消彼長。就唔係好似好多人以為，一直加息美匯指數會一直升。

美股單日升幅，2年嚟最大。但你儲齊貨未？

25. 咁當然唔使講，股市表現就相當好。美股單日嘅表現，係2020年疫情後最好了（個圖cut走咗日期，但好易睇到2020年時大上大落嘅時間）

26. 呢度亦帶到去，上面呢個我成日貼嘅圖。舊讀者一定睇過，新讀者可以睇下。

5000日可以10000變60000，但，錯過10日，已經得返一半

27. 數字比較舊，但原理不變。美股長升長有，咁10000蚊滾廿年可以變65000，好多人都聽過。

28. 順帶一提，呢度嘅美股回報，都係講緊大約10%一年。兩樣嘢：唔好有啲不必要嘅過高期望，你見美股都只係一年10%左右。但，通過時間，10%滾20年，就係6.5倍，所以時間好重要，滾大個雪球佢。

29. 但講返個圖，你會見到，錯過最好嘅10日，你嘅回報，就得返一半！由65000變到32000蚊。

30. 呢度亦可以留意兩樣嘢。首先，錯過10日，你嘅一年回報，由10%變到6%（好多人覺得呢個回報十分可恥）。但留意，講緊係20年入面，錯過10日咋下。亦即係5000個交易日，你錯過10日，就會咁

31. 亦即係，500日，你走漏一日，就會咁　—　500日正好係兩年。你錯過咗一個大反彈嘅日子，回報已經爭好遠。

32. 而你見到，可以畀你出錯嘅空間好細，500日走漏一日就出事

係喎，如果避開最差嘅10日，仲勁添。但邊做得到？

33. 咁但，之前都有人問過，如果我避得開最差嘅日子呢？咁當然回報更勁。問題係，我一路stay invested，一定易過你可以咁啱避開最差嘅日子，而又唔錯過最好嘅日子

最差同最好嘅日子多數好接近，所以你只能同時食—而一定好過同時唔食

34. 因為留意個圖仲有寫，最好嘅10個交易日，同最壞嘅10個交易日，好多時都係差不多時間發生。所以根本冇可能避開最差而可以唔錯過最好，你只能做到又食到最好但又要食埋最差。而咁樣最好最差都食晒，都係遠好過你冇stay invested，避晒所有嘢

35. 最後你見到，5000日入面走漏最好嘅40日，你嘅回報己經變負數。哪怕美股長升長有，你都輸錢—呢個就係好多人嘅寫照啦。