［101文］點解股票大上大落？ (Patreon)

讀者問，點解通脹回落，加息預期減慢，但都唔係不停咁升？

點解高通脹會拖低股市？加息會拖跌股市？因為盈利？錯！係因為估值

股價：短期睇估值，長期睇盈利。慢慢解你知

人類歷史就係不停通脹，但股市長升長有

公司股價跌六七成，通脹對盈利嘅打擊，邊會有咁大？

估值比盈利更重要，因為大家都係短視

股價就係　估值Ｘ某啲嘢

但凡啲人話「傳統估值過時」，就離爆煲不遠

盈利同估值，都係「上上落落」，但兩者「上落」嘅形態唔同

盈利係secular，估值係cyclical

睇指數，就最清楚，盈利係長期向上嘅

盈利可以升幾十倍，但估值只會係上上落落

股價＝盈利Ｘ估值，但兩樣嘢多數齊上齊落。咁股價會點？

但盈利受乜影響？估值又受乜影響？

1. Facebook Page有寫，法國火車罷工，行程受影響，變咗寫文都受影響，因為只係某個時間先有車。畀你見到，我唔在香港，寫文係受影響嘅。

2. 再之前一篇回顧過2022年嘅慘況，就係高通脹引起，有講埋中間嘅過程。剛剛呢篇，就有講返之前（11月10號）出嘅CPI數字，明顯見到通脹回落。所以港股美股都反彈一輪（近幾日又差啲，下篇再解）

讀者問，點解通脹回落，加息預期減慢，但都唔係不停咁升？

3. 整圖要嘅時間較多，咁啱呢排有讀者問，係喎，通脹回落，加息減慢。但點解只係升得一下？好似之後冇乜力。係咪又要驚衰退？或者估值都唔係太平？

4. 短答案：兩者都係。但長答案：幾時都有嘢驚，因為股市就係上上落落，而跌嗰時實有人搵「理由」。到不停升，冇嘢驚嗰時，先係最危襝。

5. 我可以用另一個角度睇返2022嘅市況，然後又展望下2023年。2022年，大家都識講啦，高通脹，加息，拖冧股市。我絶對同意，但，有冇人諗，「點解高通脹股價就會跌」「點解加息就會跌」？

點解高通脹會拖低股市？點解加息會拖跌股市？因為盈利？錯。係因為估值

6. 正路嘅講法，可能大家聽過，通脹會拉高企業成本啦，人工貴咗原材料貴咗啦（但，加價又唔計？）。加息嘅，公司融資成本高咗啦，還利息都多咗。以上種種，都部份係啱嘅。

7. 亦有人索性好阿伯咁講，扯，一加息就乜都死—你未必估到，反而呢個答案比較接近現實

股價：短期睇估值，長期睇盈利。慢慢解你知

8. 亦即係呢篇文想講嘅主題；股價，短期睇估值，長期先睇盈利。咁而加息，就影響估值。呢個影響係大過對盈利嘅影響好多。不過長遠，就係盈利影響大過估值。真係要記得呢句呀下

人類歷史就係不停通脹，但股市長升長有

9. 用另一個好Big Picture嘅講法：你睇人類咁多年歷史，都係一路通脹，你買個漢堡包唔會變返1蚊個。但，股市係長升升有，即使港股都唔會跌返去100點。你可以話，企業盈利，有一部份係嚟自通脹，亦即係股價有一部份係嚟自通脹（但當然唔係全部，因為你見股價係跑贏通脹的）

公司股價跌六七成，通脹對盈利嘅打擊，邊會有咁大？

10. 呢度可以留意一樣好重要嘅嘢：同好多人嘅講法唔同，「高通脹」對企業盈利嘅影響，冇你想像中咁大。好多公司或多或少可以加價。冇錯，一般總體嚟講，盈利係受咗打擊嘅。但你好易見到，好多公司盈利只係跌少少，甚至只係「升慢咗」。但股價由高位跌咗一半，甚至六七成（冇盈利嗰啲就唔好講）。

估值比盈利更重要，因為大家都係短視

11. 點解？當然係因為估值。以前都有寫過，估值當然十分重要，甚至好多時比盈利「更重要」。一如以往，只係拗邊樣重要啲，係浪費時間口水戰。但我會講深入啲：你睇短期嚟講（即係，兩三年！冇錯，兩三年都係短期），股價係主要受估值影響嘅。但你睇長期（五年十年），就會受盈利影響。

12. 所以你會見到啲公司，明明仲賺多咗錢，但股價一年跌一半。相反地，有時公司盈利倒退，反而仲有得升。更甚嘅係市場亢奮嗰時，你啲公司增長只係平平，但股價可以升一倍　—呢啲情況，大家在2020-2022呢個大上大落，見得好清楚。

13. 留意，以上呢啲，係講啲比較「好」嘅公司。你咪當大牌子，唔會死嗰啲，頂多賺多賺少。可能蘋果，微軟，麥當勞咁。

股價就係　估值Ｘ某啲嘢

14. 呢個東西都講過唔止一次，今次又用另一樣嘢示範下。好簡單，用好簡化嘅講法，股價就係　估值Ｘ某啲嘢，差不多全部如此。一般就係每股盈利Ｘ市盈率。

15. 有一排啲友覺得科技公司改變世界，開頭梗係冇盈利，但唔會係價值。Fine，其實係透支咗將來好多年嘅盈利，例如可能你十幾廿年前，已經「知道」NetFlix Tesla今日會相當賺錢（留意當時蝕，而且好多人唔睇好），咁條數就講得掂，事實亦見到係咁。不過副作用係，呢啲情況下，啲股價往往升過籠，因為啲人多數係有太高期望。

16. 咁對啲冇盈利嘅公司，啲友就用「收入Ｘ市銷率」，冇話唔得，但你見個大原則同上面一樣，都係「一啲嘢」Ｘ倍數。總係「有啲嘢」。咁有啲連收入都冇嘅公司，居然都有得炒，冇問題的，例如2000年時，啲人計eyeball，計reach，一個click 值幾錢。

但凡啲人話「傳統估值過時」，就離爆煲不遠

17. 順帶一提，你見到，真係廿年甚至百年都不變，當啲友認為「傳統估值過時」，要不停咁用啲新嘅嘢去justify，就往往係爆煲之時。當然你可以講反例，例如Tesla Netflix，但，最後仲有一大堆最終根本都係冇盈利嘅公司。

18. 所以重覆講十次：盈利好重要

盈利同估值，都係「上上落落」，但兩者「上落」嘅方法唔同

19. 亦再講一次，股價—盈利Ｘ市盈率。

20. 留意，盈利同市盈率，都係會上上落落。但佢地「上落」嘅型態唔同。呢啲真係好多外行人，懶用腦，唔去分。上上落落，周期，都有唔同的。

21. 術語講，盈利係既有cyclical（周期），又有secular（長期走勢）。但市盈率，係唔存在secular嘅，點都係鐘擺。

盈利係secular，估值係cyclical

22. 用極淺易嘅例子講，一間成功嘅公司，今年賺1億，10年後10億，30年後100億，盈利升100倍，絶對可以丫，係咪？你見有無數咁多例子。咁可能你會反駁，你今日睇返轉頭，睇蘋果睇微軟，梗係得。但潮起潮落，你點知10年後佢唔會消失，變柯達諾基亞？

23. 的確如此，但所以，睇指數！指數就係汰弱留強，掂嘅入嚟，唔掂嘅走。咁但，當然指數，例如標普指數嘅盈利，就唔會30年升100倍了（某啲新興市場可能得嘅），但原則不變，可以整體向上。

睇指數，就最清楚，盈利係長期向上嘅

24. 固然中途會有起落，可能今年1億，下年2億，第三年5000萬咁，但，你睇指數，個盈利係大約向上的。應該唔使點拗（你可以用log scale，或者年份縮短啲，個圖就冇咁難睇）。

25. 之但係估值呢？就係另一樣嘢了。你睇呢個圖，明顯見到同上面個圖（盈利嗰個）係另一回事，係咪？

盈利可以升幾十倍，但估值只會係上上落落

26. 標普指數嘅市盈率，過去成百年，應該九成以上嘅時間，就係在7/8倍，去到30倍咁上下。幾時高幾時低，可以再解，但你見真係同上面嘅圖完全唔同。

27. 另一講法，可能今年市盈率5倍，下年勁啲，15倍，之後再勁啲，30倍好未？但你唔會無止境咁一路上的。特別你講到去成個指數嘅層面，實係咁。

股價＝盈利Ｘ估值，但兩樣嘢多數齊上齊落。咁股價會點？

28. 於是你大約諗下，既然股價＝盈利Ｘ估值。盈利就係有周期但長線向上，估值就係一直都係周期嘢。兩樣乘埋出嚟，會係點？

29. 真係讀金融數學嘅，咁盈利同估值，你都可以用啲數學式做model，亦都睇得到乘出嚟嘅嘢係乜。咁呢度我就咁用文字講：就係大約見到股價，都係同盈利個圖差不多，secular X cyclical，最後都係secular，只係你見到，股價嘅波動，會比盈利更大咁解。

30. 好啦，盈利受乜影響？亦即係公司賺到幾錢，受乜影響？應該好多人都識答。首先既係因為大環境，但主要都係因為自己啲生意做得好唔好，當然仲有行業競爭，消費者口味之類。判斷公司會唔會長期賺錢，就係睇「護城河」，以前寫過，呢度唔重覆

但盈利受乜影響？估值又受乜影響？

31. 估值呢？就得意了。受乜影響？好大程度係情緒。另外，當然亦受經濟周期影響，亦都好受利息高低影響—主要係長債債息，咪話我買美債都有5厘嘅，你啲股票一定要更殘先有人肯買。相反買美債一厘息唔夠嘅，股票比較貴都有人買。

32. 然後你會發現，股價＝盈利Ｘ估值嘛，呢兩樣嘢呢，多數係同升同跌的。亦即係投資者跟紅頂白，見到盈好時，就畀貴一貴估值買。你盈利一唔掂，就個估值都縮埋。

33. 於是，我地可以好快睇下數字嘅例子。例如好景時，原本盈利1億，下年2億。原本啲友用10倍市盈率買，即係10億市值。但之後見好景，貴一貴都肯買，用到20倍，所以之後變咗40億市值，升4倍（留意盈利升咗一個開，「唔係用100倍已經好克制」）（呢個盈利升幾多就值幾多倍市盈率係錯嘅，最尾解）

34. 不過，縮嗰時呢？由2億盈利，忽然倒退到5000萬，啲友嚇死晒，覺得公司玩完，只肯畀5倍市盈率。所以你市值，又由40億，變咗得返2.5億！股價跌咗九成幾！

35. 你可能以為呢個例子有啲誇張，但你睇今年啲科技股（例如Facebook），就係咁上下。往往盈利升時估值升，盈利跌時估值又跌，所以個股價既然係兩者乘埋，自然大起大落。

36. 記住，盈利係secular（雖然有周期），估值就完全cyclical．所以最後乘出嚟，長期嚟講，都係（一路向上）嘅盈利帶動股價，反正你估值都係在個區間上上落落。

37. 但短期呢？就掉轉，普普通通日子，盈利唔會好大上大落，但股價一樣大上大落，就係由估值推動。

38. 所以，咪話短線睇估值，長線睇盈利。

39. 記住剪存呢篇，應該短期內會再refer返。之後仲會有啲補充，但接下嚟應該寫返大市嘢先