CPI數字靚仔，通脹肯定回落了，而12月減慢加息亦冇走雞 (Patreon)

外遊較忙又累，但都仲係會寫Patreon！

最好就股災時買，第二好就好灰時買，第三好就而家。最差就人買你又買

上篇講返，點解2022咁差。之前夠加過息啦，點解今次咁大鑊？

點解之前印錢又冇事？點解今次印錢通脹升得咁快？

2023年，就通脹回落，加息放慢，Risk on

可能通脹反彈，可能未必落得好快，可能加息再耐啲。但大劇本不變。

上次個CPI，靚仔到不得了，核心通脹按月升幅，遠低過預期

通脹固然回落，核心通脹都回落，按月升幅亦減慢，當然好消息

核心通脹走租金，就直頭負數啦！

係喎，租金CPI仲係高，但租金回緊啦！

租金回落，就當然係因為加息。所以加息點會冇用？

供樓7厘息？樓價會點。又，「小心次按」

樓價就唔影響CPI，但租金會影響CPI，而樓價影響租金，至少美國係

下次睇埋加息預期，同埋下年情況。但12月放慢加息，冇乜走雞

外遊較忙又累，但都仲係會寫Patreon！

1. 都十分唔好意思，外遊比較累，寫少咗。舊讀者知道，但新讀者未必知，所以都都寫返，免得太耐冇文出。12月會好返啲。

2. 不過講真你見我有時啲文寫到極長，要夾硬拆三四篇都得，所以又唔好只係執著於有幾多篇。數字遊戲啫

最好就股災時買，第二好就好灰時買，第三好就而家。最差就人買你又買

3. 話說回頭呢排市況比較靜啲，亦係好事。幾時都認為最好嘅時機係大災難之時（但好難捉，亦好難說服自己），第二好就係大家好灰嘅時間，第三好就係悶悶地嘅時間。最差當然係人人好興奮嗰時。而家應該係第二同第三之間。

上篇講返，點解2022咁差。之前夠加過息啦，點解今次咁大鑊？

4. 講返又係啲大環境嘅嘢，上篇其實十分重要，回顧返2022年點解乜都死晒。固然大家知因為加息，美金強，高水平啲嘅知道係債息升。但以前都試過加息，點解債息冇升得咁快？因為今次加息加得好急。點解加得咁急？因為通脹升得好快。點解升得咁快？有人話因為「印錢」，都大約啱，但點解之前「印錢」又冇事，今次會高通脹？

點解之前印錢又冇事？點解今次印錢通脹升得咁快？

5. 千古謎團，但我上篇文嘗試畀咗個我嘅猜想：關鍵係啲錢去咗乜人手上。以前往往係益咗大公司，銀行家，富豪，而呢啲人係唔多消費嘅。好多人唔明呢點，你再諗真啲？10億畀個富豪，佢用得幾多？記住佢去買股票買樓買公司都唔係「消費」（中間啲佣金就算係嘅）。掉轉，我將10億分畀1億人，呢10億必然係用晒咁滯的。

2023年，就通脹回落，加息放慢，Risk on

6. 於是今篇話畀你知，我認為2023年呢啲嘢都會逆轉。原因好簡單，通脹開始回落，加息會開始放慢，近期你都見到。但又唔係不停咁升，當然因為啲人仲有疑慮，咁係正常，亦係好事，個個都信就冇得升啦。

7. 不過小小頭盔，通脹見晒頂，但真係有機會反彈（未必太大），亦有好大機會唔會回得好快（呢個應該係）。所以加息只係會放慢，仲會加，甚至不排除可能比市場而家預期再要加高啲，或者耐啲先停　—　咁呢啲東西出現嗰時，可能你見市場又會回調（大約係呢一個星期出現嘅嘢）。

係，中途可能通脹反彈，可能未必落得好快，可能加息再耐啲。但大劇本不變。

8. 就唔使太擔心嘅，可能慢啲，可能中途會有啲轉折，但通脹開始受控，加息會放慢，債息會跌，美金唔會再咁強，呢個大劇本應該就好大機會嘅。

9. 即係，2022年Risk off，2023年Risk on。唔敢包實升，但照計唔會差得過今年。（話時話，美股暫時2022年下半年係升嘅）

10. 最重要嘅關鍵，當然係之前嘅美國CPI數字，一出港股美股都升1200點。其實只係十日八日前嘅事。

上次個CPI，靚仔到不得了，核心通脹按月升幅，遠低過預期

11. 好啦，再之前嘅一篇文寫過，只睇一個數嘅，睇個CPI按月走勢，同預期相比。咁見到了，街估按月升0.5%，結果只係按月升0.3%，遠低過預期。

12. 亦因為咁，你見到嘅headline CPI，跌到1月以嚟最低，按年去到7.7%（上次係8.2%，連跌4個月了）。核心通脹呢？6.3%，上次係6.6%（留意上次核心通脹係年內高位）

通脹固然回落，核心通脹都回落，按月升幅亦減慢，當然好消息

13. 見到通脹有明顯嘅回落，按月物價走勢升幅又放緩，連上次彈到高位嘅核心通脹都回返，市場當然開心。

14. 留意下呢個圖，睇按月嘅核心通脹。黑色嘅係二手車，之前啲文唔只講咗一次回落緊，而家已經係負數（跌價）。灰色嘅係租車酒店同機票（出行嘅嘢），之前啲人回復周圍去，又未請得切人，升過一輪，而家已定咗。

15. 你見到呢幾個月，最大嘅元兇都係租金。呢個搞掂一個，另一個又嚟嘅現象，之前篇文亦寫過。藍色係租金，出行同二手車以外嘅「其他」，見唔見回落得好快？

16. 所以而家通脹仲未回得好快，關鍵就係租金。之前都有寫過。呢個圖係「核心通張走租金」（按月的）。見唔見到，走咗租金嘅核心通脹，直頭已經係負數？個通脹回落得好明顯啦！除咗租金。

核心通脹走租金，就直頭負數啦！

17. 咁但，租金就暫時都好堅挺嘅。睇圖見到，仲要係近幾個月越嚟越勁—呢個亦係通脹回落得唔夠快嘅原因，唔係啲租，就回得更快

係喎，租金CPI仲係高，但租金回緊啦！

18. 好消息係，睇到最新嘅租金走勢，亦都向下調了。照計好快會反映在CPI上。除非有咩好特別嘅嘢，否則短期你都會見到啲通脹回落（但有冇「預期」咁快係另一回事）

租金回落，就當然係因為加息。所以加息點會冇用？

19. 順手講埋，租金回落嘅原因，唔多唔少都同聯儲局加息有關。美國供樓，去到7厘息（早排回返少少）。

供樓7厘息？樓價會點。又，「小心次按」

20. 供樓咁貴下，當然打擊咗買樓意慾，甚至有啲人會供唔起。7厘喎！所以你見美國嘅樓價開始跌了（順帶一提，唔多唔少會有人諗起次按風暴，所以聯儲局去到呢啲位應該會開始小心啲—唔係唔加，但真係放慢啲睇定啲）

樓價就唔影響CPI，但租金會影響CPI，而樓價影響租金，至少美國係

21. 有人問：樓價唔會影響CPI啫，的確係唔會。買樓係投資活動，同消費無關，而CPI係消費物價指數。但樓價跌，你見都拖低咗租金。（不過留意呢個亦唔係必然嘅關係，你見香港樓價跌，但租金冇乜跌。但美國就真係見到兩樣都跌緊）

22. 最後一提，之前都有提過，除咗租金，醫療保健開支都係拉高通脹嘅元兇，而家回落晒了

好多人都唔明：物價仲升緊，通脹都可以回落的！

23. 最後畀埋呢個圖你，睇乜？留意下一個普通常識，但好多人搞錯咗：即使物價繼續升，「通脹」都會回落。你再諗下，最新見到咪就係咁！核心CPI按月仲升0.3%嘛，但核心通脹回落緊啦。因為「基數效應」，舊年嘅基數低，但啲高基數慢慢開始走入嚟。

24. 所以你見到，即係啲物價，繼續每個月零點幾個%咁升，都唔會令通脹大反彈。呢樣嘢改變。以前都講過，主要同啲數學有關，亦點都係要啲時間先見到效應，所以投資一定要有耐性。

25. 事實你見到，只要按月物價唔再升，只係持平都好。核心通脹都會2023年中跌到2%以下—但當然，呢個「物價唔再升」嘅假設極不可能發生。我只係用呢個例子畀你睇，啲友以為「物價仲升緊，通脹未見頂」，係全錯嘅

26. 最後你可以用呢個表去check下，之後可以睇下個事態發展係點。By the way，呢啲表其實好易整，數學遊戲啫。我地成日講嘅CPI，好多時係指「按年升幅」（有時講按月），但嚴格嚟講CPI係一個數字，一籃子嘅價格，鍾意嘅可以睇呢度。最新298，你可以計返晒啲按年同按月出嚟的，上面呢啲表都係咁整出嚟。

下次睇埋加息預期，同埋下年情況。但12月放慢加息，冇乜走雞

27. 好啦，今次寫短些少，下一篇會同你講返，咁通脹回落，個加息預期亦真係大幅回落。呢啲東西不停會變，但暫時我地都仲見到市場預期，12月加0.5嘅預期，係8成。加0.75嘅預期，只係得兩成。呢個數字同剛出CPI數字後差不多，亦唔見聯儲局官員有好大力咁出嚟打碎呢希望

28. 所以，就真係會放慢加息了。留意係13同14號—而13號美國又會出CPI數字