ivanliresearch

2022年回顧：點解跌咁多？只係因為加息？ (Patreon)

Published:

2022-11-15 08:25:49

Imported:

2023-04

Content

版務一個：本人外遊，但依然會照寫Patreon

大師冇點你：都話今次真係狼來了，通脹回落，放慢加息

錯過反彈浪，後果相當嚴重

一般唔鍾意解市況，但今年值得解

年尾流流，解下今年市況做乜咁差，點解乜都死

上星期四五嘅反彈，正係「500舖一遇」嘅奇蹟日

你知我知「因為加息」，但以前美股加息都冇事，點解今次咁大鑊？

之前咪又係加到5厘息，點解債息冇乜勁升？

明顯係Risk Off 之年，所以你啲公司點勁都冇用

以前賺10億，下年15億。但以前我肯用30倍買，而家10倍。咁會點？

美匯指數同20年前一樣，但標普指數盈利冇可能返到去20年前

做乜加息加得咁快？通脹咯。但點解通脹咁勁？

你話通脹因為「印錢」，我同意，但點解之前2008又冇事？日本又冇事？

有人話因為疫情下供應鏈受阻，有人話因為俄烏戰爭，似乎都錯重點。

我話你知點解

版務一個：本人外遊，但依然會照寫Patreon

1. 小版務一個：唔好意思，呢幾日非常忙，結果原本想在呢度講先，都講唔切。大家睇Facebook Page都知我去咗瑞士，做嘢幾日，之後自己留低，12月頭先返香港。咁但，Patreon都係會照寫嘅，例如而家就係瑞士時間朝早六點，我寫埋呢篇先出發

2. 呢個Patreon開始係2020年8月，已經冇得飛。雖然後來我去過台北搞居留證，但主要都係留在酒店隔離，所以照寫文。今次就唔同啲，不過我都會繼續出文，只係可能短少少，同埋可能唔貼圖唔貼link—實情寫文用嘅時間唔多，用得最多時間永遠係搞啲圖同埋link．

3. 不過今篇依然會好多圖。

大師冇點你：都話今次真係狼來了，通脹回落，放慢加息

4. 上篇文係上星期四，出美國CPI前，講個美國CPI數據可能令市場轉向，結果中到應。留意我係特登趕在個數之前出埋篇文，你見我唔係個個月都咁。除咗話「有信心」外，都仲真係有啲「直覺」—投資嘅嘢其實主要係藝術，並唔真係好似一般科學咁。

5. 我篇文仲有寫美國大選，但你見兩日已經冇人講。又可以畀你反思下啲咩「乜都係政治」，其實係咪真？邊個話投資者最關心政治？（當然你可以夾硬講到加息，通脹都係政治嘅）

6. 通脹預期低啦，放慢加息啦，美股港股大升（兩地都一日1200點，但計百份比當然港股勁），咁你又會問，之後點？

7. 但我決定由頭講起，因為知道之前乜事先係最重要。未來大家都估估下

錯過反彈浪，後果相當嚴重

8. 2023年我當然都睇好，甚至係相當睇好。不過你更加要問自己一個問題：上星期呢個1200點之前，你有冇買足夠嘅股票？唔係買好多係人之常情，但你諗下，咁你就錯失咗一個幾好嘅反彈。而錯失反彈係可以好大影響嘅，下面呢一個圖，我成日都貼。

9. 美股之前長升長有，個個月買一千蚊，幾廿年後好富貴，大家都聽過。但有趣嘅係，20年入面，5000日，你錯過最嘅10日（即係500日走漏1日），回報已經腰斬一半。即係500日你有1日走開咗，就可以爭咁遠。所以你仲會唔會試去捉market？何況，你捉時機嘅，邊敢買得大？

上星期四五嘅反彈，正係「500舖一遇」嘅奇蹟日

10. 而上星期四五嘅美股反彈，雖然好似唔算好誇張（港股就誇），但亦都已經係2年入面最大單日升幅。呀，就係差不多500日！

一般唔鍾意解市況，但今年值得解

11. 一般我唔係太鍾意去「解釋」股市點解升點解跌，但今次會寫。兩個原因：首先，你解一兩日就真係冇乜意思，好多時係夾硬搵理由（但上星期四五嘅情況我信服一般人嘅解釋），但解全年比較有得著。第二，今年嘅市況，係比較「易解」

年尾流流，解下今年市況做乜咁差，點解乜都死

12. 心法講完，講市況。雖然美股年尾例旺，但我估今年都冇乜可能收復失地。今年你買乜都香，港股美股台灣歐洲日本，買債買加密幣買樓一樣死。

你知我知「因為加息」，但以前美股加息都冇事，點解今次咁大鑊？

13. 呢種乜都死嘅現象，歷史上真係少見。點解會咁？就真係嚟自加息。

14. 但，未加過息咩？以前見到加息周期未必會影響美股，呢個亦係之前好多人唔太擔心美股嘅原因（包括我）．

15. 你睇幅度，今次可能加到上5厘左右，畀到盡6厘？差不多吧。咁當然多過上次（2017嗰浸），但其實2004年嗰次周期咪差不多，當時都唔見啲嘢咁跌法，點解今次會咁誇張？

16. 因為，2004嗰轉，都係加到5厘，但用嘅時間耐好多。今年呢？就極速咁加，連續四次0.75

17. 咁畀你見到，除咗睇幅度，仲要睇速度。

之前咪又係加到5厘息，點解債息冇乜勁升？

18. 於是帶到另一個問題：債息。

19. 2014年嗰浸，因為加得冇咁快，你見啲債息都升得慢。但今次唔同，咁加法，美債債息，年頭1.5厘，早兩星期去到4.5厘咁滯，一年內嘅事，幾誇張。

20. 咁搞法，個股市當然實散。我呢度不再詳細講，但記住，10年債息對於股市估值嘅影響好大：以前我買乜都零息，只能焗買股票。而家我買債都有4厘嘅，就要啲股票相當平我先會肯買。

21. 加上，之前都講過，美股啲估值超貴（而家都不見得好平，但美股好似幾十年都冇真係「好平」過）。咁就當然死人。

22. 事實即使你睇到幾十年，都好少見到債息好似今次升得咁急。

明顯係Risk Off 之年，所以你啲公司點勁都冇用

23. 加息本身會影響經濟活動，拖低企業盈利。但故事冇咁簡單，你見有啲公司業績硬淨，一樣大跌。

24. 因為上面提到，急急加息拉高咗債息，就影響埋估值，呢個先最重要。

25. 另一個副產品就係大家都聽過嘅，美金強勁。咁就全世界嘅估值都受壓（今次包括美國自己，以前有時唔包）。

26. 美匯指數（美金）亦係一個「風險胃納」嘅指標，你見今年美金勁升，風險胃納係收縮晒。

以前賺10億，下年15億。但以前我肯用30倍市盈率買，而家10倍，會點？

27. 所以正如上面講，你公司再好（台積電？）點無敵都好，都係冇運行。好簡單，公司以前賺10億，我當你下年賺15億好未？但以前我肯用30倍市盈率買，而家只肯用10倍，咁你股價同市值會點？

28. 不過，以前都寫過，市盈率呢啲嘢，周期性，risk on risk off，上上落落，cyclical，鐘擺。其實美匯指數都係，因為風險胃納都係。

美匯指數同20年前一樣，但標普指數盈利冇可能返到去20年前

29. 呢個圖不妨一貼再貼，你講到咩美匯指數狂升，但亦只係「20年最高」，亦即係上次高位後，20年都突破唔到。你見股市就唔會咁（可能港股例外），盈利都唔會咁。標普指嘅盈利，不可能返返20年前

30. 所以你做嘅嘢，應該係咁：最高手嘅，當然係別人恐懼時我貪婪，啲人最驚，估值最殘嗰時買，但你都知談何容易，極難做到，我都做唔到。中等人嘅，類似我咁，定期投資，唔使理氣氛，反正總係有時好有時壞。但你可以避免到只係最好氣氛時（亦即係最貴最危險時）買落去，亦應該總有機會在啲好驚嘅位買到啲嘢。下等嘅，就當然係升又唔敢買，跌又唔敢買，輸晒畀通脹，股市升咗幾倍，然後去到一個位先忍無可忍去買—然後摸晒頂

做乜加息加得咁快？通脹咯。但點解通脹咁勁？

31. 好啦，講咁多，今次真係可以好似坊間媒體咁summary: 點解乜都跌？因為加息打擊經濟之餘，仲要風險胃納收縮，殺晒估值。點解殺晒估值？因為美債債息升得好急，美匯指數升得好急。咁但點解升得咁急？因為聯儲局加息加得好急。

咁點解聯儲局加息加得咁急？大家都知，因為通脹。

32. 咁通脹又點嚟？都好多會講，因為「印錢」。的確係主要原因，以前寫過，疫情後一度一秒鐘印100萬美金，你今日見到嘅美金，有超過一半，係疫情後出現嘅。

33. 問題係，咁規模嘅印錢，都唔係未試過，2008年後都係咁上下。咁點解當時冇通脹？有人話伯南克金融海嘯下印錢，去到而家先見到禍害，我絶對唔同意，隔咁多年都可以入佢數？

另外，點解日本一樣咁做，但又冇呢個問題？

你話通脹因為「印錢」，我同意，但點解之前2008又冇事？日本又冇事？

34. 點解以前印錢冇通脹，而家印就有，呢個唔止可以寫幾個專題。你做得好嘅，真係諾貝爾獎都有得拎。

有人話因為疫情下供應鏈受阻，有人話因為俄烏戰爭，似乎都錯重點。

35. 但我會提供幾個猜想

36. 首先第一樣，大家都知，疫情下供應鏈受阻，唔多唔少加劇咗通脹。俄烏戰爭亦都係。但呢啲都係好短期嘅嘢，不過你見即使呢啲嘢緩解，個通脹壓力都仲在。仲有，唔好忘記，未打仗前，已經見到通脹升。

37. 仲有，今次除咗有貨幣政策上嘅嘢（聯儲局印錢），仲有政府做嘅財政政策—派錢呀，免學生貸款呀，救濟呀，擔保呀之類。