美國CPI preview，美國大選 (Patreon)

星期六下午有個講座，有實體有直播亦可以重溫。

今晚美國CPI，應該繼續回落啩？

一年大事回顧：環球股債樓大瀉，只係得一個原因。

今個月CPI點解值得睇？因為好可能會爆單邊，睇開邊瓣

如果CPI報告只睇一粒數，應該睇邊粒？

美國通脹，先後有唔同嘅元兇，一個搞掂另一個又上嚟

中期大選未有「官方結果」。但向來都唔使等「官方結果」出

說好了的紅潮呢？冇噃

拜登民望差　失晒兩院　變跛腳鴨　施唔到政　對股市唔好。真係？

其實，次次中期選舉，總統個黨都輸眾議院架啦

咁今次個結果？即係邊個大勝？你話呢？

大師冇點你：9月已經講共和黨拎眾議院，民主黨保住參議院

「Economist都好信？之前夠估希拉莉啦」—幾時都話你啲網友最醒

講咁多政治，咁後市呢？就當然係睇好

所謂「共和黨利好股市」嘅urban legend，點嚟的？

星期六下午有個講座，有實體有直播亦可以重溫。

1. 唔好意思，事忙又有啲小意外，幾日冇出文。但今篇緊要，星期三黃昏寫，未出CPI數字。

2. 另外，星期六下午會有一個home blogger嘅seminar。會講2023年嘅展望。上次MPF講座免費，所以你見我成條片放埋上嚟益你地。但今次就收費，就不能之後貼上嚟了。但個好處係除咗有實體（佐敦），亦可以網上睇直播（海外讀者都應該得），甚至係可以之後重溫嘅。

今晚美國CPI，應該繼續回落啩？

3. 正題，只講兩樣嘢，但兩樣大嘢，等於兩篇文一齊打孖上。上星期美股港股都好勁，今個星期回軟啲。但唔講市住，講兩樣最重要嘅嘢。首先係今晚嘅美國CPI數字（應該你睇到篇文時就出咗，但我寫時完全未）。第二，係美國中期選舉。

4. 短期走勢唔知，但我的確有信心，2023年嘅股票會好，部份原因之前寫過，部份下面解，亦都部份會星期六嘅講座解。睇好股市，指嘅係in general，咁你知我作風，唔會叫你買死一個市場，但我都係睇好美股多啲，但唔好全部買晒。咪美國，新興市場走中國，歐日，中港，四寶飯每樣有啲。咁你話4321或4231咁都得嘅。

一年大事回顧：環球股債樓大瀉，只係得一個原因。

5. 以前細個好鍾意年尾睇電視嘅一年大事回顧，大個咗可能睇報紙。而呢一年（甚至係過去一年半），環球資產價格嘅震蕩，我認為差不多90%係同美國加息，美國債息勁升，同埋美金強勢有關。俄烏戰爭甚至中美關係嗰啲根本唔係重點。而當然大家都知，加息加得咁快嘅原因，係因為通脹。所以一切都係因為通脹

6. 而通脹嘅原因呢？除咗係疫情嘅印錢，亦有因為美國嘅財政政策。當然疫情令供應鏈受阻亦係一個原因（但明顯舒緩緊）。至於俄烏戰爭，只係初段可能有啲影響—你見而家油價糧價都跌晒落嚟

7. 所以冇辦法，CPI呢啲真係不停講。「通脹見頂但未必好快回落」講咗N次，咁今個月又有乜新意？

今個月CPI點解值得睇？因為好可能會爆單邊，睇開邊瓣

8. 今個月比較值得睇，因為暫時呢刻，市場估12月加息嘅機會係0.5同0.75，差不多50-50，都真係相當少見咬得咁緊。咁好大機會，今晚出埋個數，就會知道開邊瓣（但留意開邊瓣係指市場預期，聯儲局如果見唔對路，就會之後出口術）。

9. 咁正路嚟講，如果見到通脹低，市場信加0.5，聯儲局冇出嚟潑冷水嘅，咁就應該對股市幾利好。相反嘅，又可能有一輪震蕩（但無論如何，2023都係幾睇好）

如果CPI報告只睇一粒數，應該睇邊粒？

10. 睇睇街邊預期：headline CPI，上次8.2%，今次街估8%，TE估8.1%。繼續回落，連續3個月，但當然仲係相當高，係要啲時間的（基數效應）

11. 但核心CPI，上次6.6%，今次街估6.5%，TE估6.7%—就睇下回落定反彈了。

12. 另外，如果只睇一個數，可能可以睇下按月嘅核心CPI，街係估升0.5%。都係叫做放慢咗嘅。

13. 正路地，我估都係會放慢。戴定頭盔，即使稍為高過預期，都應該之後會放慢。都真係嗰幾樣嘢見到，亦之前講過下，就叫做同你一路睇住趨勢有冇變，結果係冇乜變。

美國通脹，先後有唔同嘅元兇，一個搞掂另一個又上嚟

14. 首先，不用講嘅係，供應鏈緊張一路舒緩緊。呢個怕且唔會再反彈。全世界都復常了（除咗大陸，所以有可能仲有啲問題，但搞笑在大陸因為咁經濟差，又拖低咗啲商品價格甚至出口價格）

15. 至於有一排係通脹元兇嘅二手車價，當然亦都散晒，呢啲都照計唔會點回頭。

16. 回想返，最初係因為商品價格高，拉高通脹。後來商品價格散晒（當然去到零售層面未必跟得晒）。再之後，就係供應鏈同二手車之類，係通脹依然難睇嘅原因，咁呢幾個月都見到回落，但唔夠快。

17. 係喎，見到啲嘢輪流升咁，新嘅元兇係乜？之前啲文有寫過，租金—升幅唔算好誇張，但呢舊開支在CPI嘅比重佔得極大（估都估到，租金當然佔收入相當高嘅部份）。但亦係好明顯見到回落緊

18. 只係差在要幾耐先慢慢反映在CPI。另外，有機會再寫，但美國啲樓價（其實全世界都係）都回得幾快，因為不停加息，而家美國供樓，要7厘息，對樓價影響都幾大。咁呢種情況下，啲租金應該好難加上去。

19. 不過講一個最大嘅元兇，由頭到尾都幾得幾硬嘅，就真係人工。萬惡之源。近排人工升幅回落緊，但之前嘅文都寫過，就業市場仲係好強勁下，所以你見啲人工升幅仲係幾高—慢返啲，但仲係幾高企。亦係因為咁，所以通脹都唔係回得咁快。

20. 正路玩法，都係通脹回落，放慢加息，下年股市好。但幾肯定聯儲局唔會想太早放軟手腳，應該係寧願過度收緊甚至搞到衰退，都要保證通脹受控。不過，衰退咪衰退咯，未見過咩？（但話說回頭，原來總統任期第三年，真係冇試過衰退，咁多年都冇見過）

中期大選未有「官方結果」。但向來都唔使等「官方結果」出

21. 首先，「結果」其實都未係真係有嘅，可以話膠著，有啲席位分分鐘搞到12月先知。

22. 但介紹大家，與其睇啲KOL亂講，你可以上呢個網站（2020大選我都貼過）睇。呢個唔係官方結果，唔係民調，唔係預測—而係賠率。留意一路更新，咁其實你就會見到「結果」—個比喻係，德國對巴西，如果我88分鐘見到個賠率係巴西勝1.01，咁我唔使睇場波都知巴西應該領先緊幾球。

23. 我目測，香港啲小朋友，網上啲KOL，絶大多數都係反民主黨，認為佢地「左膠」。唔少甚至係「侵粉」，認為佢「夠反華」喎。上次大選（2020）真係奇觀，陰謀論四起，好多人話造假，後來引發國會騷亂。

24. 想講嘅係，你支持邊個都唔係好關我事，我又唔係美國人。但留意你網上睇到好多嘅嘢，係啲友自己一廂情願嘅想法。可能以為拜登民望低（係事實），通脹天怒人怨（都係，但就業仲好勁）等等。

說好了的紅潮呢？冇噃

25. 於是，好多人以為，拿民主黨今次實玩完，中期大選大敗，會「紅海」red ripple，民主黨失去參眾兩院，然後拜登施政唔到，股市更加差。

拜登民望差呀　失晒兩院呀　變跛腳鴨呀　施唔到政呀　對股市唔好呀。真係？

26. 好啦，留意同好多平時嘅narrative一樣，上面呢啲因為咁，然後咁，就會咁，結果咁嘅推論，往往每一步都好多變數。係咪真？我會同你每樣睇下。

其實，次次中期選舉，總統個黨都輸眾議院架啦

27. 首先第一樣嘢，大選前，民主黨控制晒參眾兩院。而事前嘅估計（視乎你睇乜媒體，但其實唔會爭太遠）：共和黨會拎返眾議院（House of Representatives），但參議院（Senate）就會咬得緊。

28. 留意嘅係，歷屆中期選舉，無論邊個黨做總統，執政黨差不多必然會在眾議院失去一大堆議席（好似話平均24席），亦絶大多數會冇埋控制權，差不多次次都易手。原因？可能咪隔離飯香，邊個上都係睇唔順眼，不如換一個黨。

29. 而家睇「結果」（即係賠率）

咁今次個結果？即係邊個大勝？你話呢？

30. 所以，今次共和黨拎返眾議院，根本係意料中事。唔好當呢啲係咩「大勝」，相反，眾議院都拎唔到，就係共和黨大敗。咁而家應該都冇乜問題，但你睇賠率，都未係完全十拿九穩（75%）。甚至可以話，冇預期中咁輕鬆，雖然應該都冇乜問題

31. 有趣嘅係參議院方面，似乎民主黨極大機會保得住。但當然，呢啲只係賠率，大把變數。即係補時入多球咁，又唔同玩法。

32. 順帶一提，費事有啲讀者以為呢個網站又係針對共和黨之類—你可以望埋右邊，暫時2024年總統賠率，頭兩位都係共和黨人。

大師冇點你：9月已經講共和黨拎眾議院，民主黨保住參議院

33. 實情呢，以上種種，我地九月已經講過！Economist嘅預測，咪講到明共和黨會拿下眾議院（基本上冇人有異議），但民主黨可以保住參議院。

「Economist都好信？之前夠估希拉莉啦」—幾時都話你啲網友最醒

34. 再講一次，唔好睇啲一廂情願嘅人講嘅嘢，佢地將自己嘅願望同真實撈亂咗，會誤導埋你。你見啲友好好笑的，佢會話你知，「Economist都好信？上次夠話希拉莉贏啦」—係，嗰次差不多所有民調都炒車。但，呢個同佢「之後可唔可信」，有乜必然關係？上次貼拜登夠中啦，但啲友只會記住錯嗰次。咁但，即使上場巴西對沙地阿拉伯，找估錯咗，以為巴西實贏，結果爆大冷—咁到下一場，英格蘭對列支敦士登，咁我話英格蘭會贏，難道你又去同人講，「超，上次佢都估錯啦，呢啲友都好信？」，然後你覺得係列支敦士登贏？—見到個問題冇？

講咁多政治，咁後市呢？就當然係睇好

35. 好啦，政治廢話一大輪，講返對後市影響。實情呢，「都真係唔使點睇」，差不多一定利好後市。

36. 固然我講過，由於美股之前長升長有，所以你差不多condition on 任何嘢都好，都會見到係升。單數年雙數年，邊個政黨執政，十二生肖咩咩份，全部都見到升，只係升多定少。

37. 咁但，睇啦喎。

38. 首先，其實一個「split government」，係相當有利股市嘅。你見到只要係參眾兩院一黨一個，反而對股市係最好。原因唔知，但有個講法，正係因為政府施政難，就冇能力搞咁多嘢限制企業。

39. 咁另外，你睇返，中期大選年嘅股市走勢，都真係同今年有啲似。平均都見到去到年尾就會升。實情美股一向有年尾升嘅趨勢，但在中期大選年更加明顯。

40. 呢個圖講類似嘅嘢，但有少少唔同。一來用嘅時間有少少唔同，二來，你見左右邊嘅刻度係唔同嘅，夾硬將今年拼到好似往年咁（今年跌幅大好多），大家唔好學。

41. 不過最重要嘅係，真係睇到中期大選後嗰12個月，升幅係相當明顯嘅

42. 事實上，總統任期第3年（即係下年），美股嘅表現亦明顯係最好。

43. 咁所以，呢兩日跌乜？我都唔知。可能係同啲加密幣又爆災有關，又或者只係少少獲利回吐，又或者有啲人話「因為共和黨冇預期咁大勝」—但我係唔多信呢個講法嘅。上面咪睇到，明明係split government 對股市最好，除非你話驚共和黨連眾議院都拎唔到，但又似乎唔會。

所謂「共和黨利好股市」嘅urban legend，點嚟的？

44. 順帶一提，有個唔知邊度出嚟嘅講法，話共和黨對商界較友好，所以對股市好啲。呢個我可以話你知，必定係錯。任你點計，都差不多見到，民主黨任內，股市表現子過共和黨。但當然好多人嘅記憶，就只係呢兩屆。