議息之後，其實發生乜事？到底係咪真係「轉鷹」？ (Patreon)

議息之後，其實發生乜事？到底係咪真係「轉鷹」？

但美股星期五升，港股更加係大升。又點計？

好多人都係急住只係要「一句講完」，但邊有咁簡單？

如果堅持要「好快好簡單咁明」，咁我寧願你選擇「唔明」

議息聲明出，美股大升。到聯儲局主席講嘢，就大跌。即係點？

議息聲明鴿　主席講話鷹？其實係「短期鴿　長期鷹」

議息前篇文講咗，「聯儲局線人」，真係冇點你

會加到5厘樓上，但幾時停？幾時減息？

但除咗有「長鷹」，亦真係有「短鴿」

市場估放慢加息，有冇食詐糊？未必

喂，6月又係炒放慢加息，升一輪，然後嘔突。今次又會唔會咁？

11月估唔中又話12月，12月估唔到又話2月，好屈機喎。等到幾時？

睇下今次議息後嘅美股走勢？美債呢？

而星期五美金單日跌2%，跌幅係7年最大！

最後睇下啲就業數字，似乎強勁，但有疲態了。

1. 今次遲咗少少講，但慢工出細貨。留意早排因為市況不景，講埋啲貨幣嘢。呢排就似乎開始轉勢，所以你見講聯儲局，通脹，加息之類講咗好耐—亦因為呢啲真係影響晒全世界嘅嘢。之後可能講返多啲市況同個股。

2. 更新下你嘅記憶，上次篇文係星期三晚，美國議息之前。你可以睇返篇文，唔睇亦冇好大相干。

議息之後，其實發生乜事？到底係咪真係「轉鷹」？

3. 議息打後，發生咩事？考下你記性。實情係眾說紛紜，有人話聯儲局「轉鷹」（一半半，陣間解）。

但美股星期五升，港股更加係大升。又點計？

4. 但，市況唔會呃你—點演繹係你嘅事，有啲人升幾千點都仲話係「熊市反彈」，不過我地客觀睇到兩樣嘢：第一，美股在議息後跌，但唔算好誇張，之後回穩。第二，港股大升。

5. 今次人呢篇先講美股，下篇可能快講下港股。

好多人都係急住只係要「一句講完」，但邊有咁簡單？

6. 記住，大家普遍唔係全職投資者或炒家，甚至好多讀者唔係做金融，所以平時你唔熟啲嘢，好合理。好多時你只能靠媒體，好合理。甚至你根本冇時間慢慢諗，全部都好合理。

7. 但我嘅建議：在不停追求「懶人包，兩句講完」，同埋「唔去深究」之間—我係寧願你去揀「唔去深究」。工作上，當然要認叻，唔識都話識（順帶一提，呢啲係帶動你收入嘅方法。舊文講過嘅ABCDE）。

8. 但投資上，承認自己「唔知」，絶對唔可恥—唔好唔識扮識，好多嘢就係大家都唔知，包括我（又你留意到，打工同投資係要用完全唔同嘅心態的）。過去幾十年長買美股，你根本唔使去「明」好多嘢。

如果堅持要「好快好簡單咁明」，咁我寧願你選擇「唔明」

9. 另外，冇時間慢慢諗，真係好合理，「所以你先要訂呢度嘛」。但人好得意，又總係想知「點解」，所以你好想搵一啲「好簡單」嘅解釋。在呢一度，我都係建議你睇返傳統嘅媒體。外國嘅更好，但好多都收錢（CNBC就係免費嘢中相當好嘅），亦唔係人人英文都夠好（冇人話要英文夠好先可以投資，不過照計學好啲英文長期對你打工同投資都有好處）．中文嘢嘅，都係傳統，明報信報—就真係切戒睇啲KOL，好多本身不學無術，好多仲窮過你同我，亦有各種嘅利益衝突。

議息聲明出，美股大升。到聯儲局主席講嘢，就大跌。即係點？

10. 講遠咗，講返美國議息。加0.75全無意外，全城期待都係議息紀錄，同埋鮑威爾會講乜。

11. 上面係當時嘅即市圖，同時搵返啲舊嘅即時新聞畀你。當時嘅情況，就係一出議息聲明，美股即時彈升，差不多升300點。但，冇耐之後就急跌，最後倒跌500點收市。呢個應該算係一個「中度」嘅即市逆轉—唔算股災，但都有啲誇張。

12. 固然我成日講，大多數市況評論都只係事後fit 故事，narrative．但今次值得睇下。大路嘅講法，係講最初議息聲明見到「會某個時間放慢加息速度」。但去到鮑威爾出嚟講嘢，佢就好明確咁講，「會加到高過之前預計嘅水平」。

議息聲明鴿　主席講話鷹？其實係「短期鴿　長期鷹」

13. 咁即係點？鷹定鴿？定議息聲明就鴿，主席講嘢就鷹？

14. 我好鍾意朋友馮宏遠（阿米）寫嘅「短鴿長鷹」（訂戶先睇到，但我只係想講佢個題，唔係篇文嘅內容），夠簡潔，四隻字講完。正是如此

議息前篇文講咗，「聯儲局線人」，真係冇點你

15. 於是乎，我地可以睇返之前篇文。我提到「聯儲局線人」放風，有人覺得係忽然轉軚。而你睇下，最後鮑威爾講嘅嘢，正係「線人」講嘅。所以見到呢個「線人」係有公信力嘅，根本極可能就係聯儲局借佢講！以後可以留意（留意聯儲局官員一般在議息前一星期就會「封口」，所以往往臨到最尾幾日就要有「線人」講嘢—唔方便公開講嘛）

16. 線人（同埋鮑威爾講話）講嘅嘢，咪就係長鷹—鮑威爾話個利率高峰會高過預期嘛，打埋開口牌了。市場嘅預期Terminal rate 當然又再升多啲。

會加到5厘樓上，但幾時停？幾時減息？

17. 留意下個圖，應該係估7月減息。

18. Terminal rate，就越估越高。「估減息」嘅時間，就一路又推遲，點收科？陣間會再討論。

但除咗有「長鷹」，亦真係有「短鴿」

19. 但，「短鴿」方面，亦都冇變到，不能話錯。所以，真係「短鴿長鷹」共存！

20. 之前市場估嘅，係「聯儲局減慢加息」。直接啲講，就係估11月加0.75（已實現），亦係最後一次加0.75，然後12月會加0.5。而家係咪食詐糊？似乎唔係。因為首先，你見市場嘅預期（又係睇CME Fed Watch），暫時估12月加0.5同0.75嘅機會都一半半（早幾日係六四，0.5六）

市場估放慢加息，有冇食詐糊？未必

21. 你睇聯儲局官員嘅講話，都似乎冇特別想去「打擊」呢個估12月加0.5嘅想法。留意呢度係里士滿，波士頓，同埋芝加哥聯儲嘅講法。全部係議息之後嘅講話。

22. 你問我？答案係唔知，真係一半半，到有多啲數字咪會知。但，「放慢加息」呢樣嘢，未完全死晒，甚至即使12月再加0.75，一樣會大把人估係最後一次，去到2月就放慢。

23. 總括嚟講，真係「短鴿長鷹」—其實就係上次講「聯儲局線人」篇文所提嘅：會放慢加息是真的，不過會再加耐啲。兩者根本係共存。所以點解成日講，唔好乜都只係想「一句講完」。「轉鴿」同「轉鷹」，係可以共存嘅。

喂，6月又係炒放慢加息，升一輪，然後嘔突。今次又會唔會咁？

24. 講咗輪虛無嘅嘢，講大市反映最實際。應該好多人會諗，喂大佬，6月尾嗰次炒9月減息，大反彈，但最後落空晒，美股就跌穿埋之前低位（睇圖）。

25. 咁今次又好似似乎落空，會唔會又穿底？另外，11月估唔中又話12月，12月估唔到又話2月，好屈機喎，咁一路遙遙無期，等到幾時？

11月估唔中又話12月，12月估唔到又話2月，好屈機喎。等到幾時？

26. 先答後半截個問題。答案，係真係幾屈機，但Facebook 都耐唔耐有提，係不停會狼來了，而總有一次成真。點睇，個加息都應該真係去到下半場尾段。而市場差不多一定提早升定（呢個亦係我睇好2023年嘅原因）

27. 至於前半截嘅問題，會唔會再穿底？答你唔到，但我傾向樂觀啲。首先係上一段所講嘅，「應該真係差不多」。仲有，其實6月嗰浸升浪後來嘅「穿底」，都係2%多啲（如圖），好快又彈返上嚟。

睇下今次議息後嘅美股走勢？美債呢？

28. 最重要係，你睇下今次議息後嘅美股走勢（又睇圖）。星期三議息，即時升轉跌，難睇。星期四都係跌，但收市跌幅收窄。到星期五，直頭反彈。

29. 當然，不能保證唔會「穿底」，但你問我，機會應該不大。況且，你諗真啲，就算「穿底」又如何？之前「穿底」，但10月咪又升足4個星期。

而星期五美金單日跌2%，跌幅係7年最大！

30. 最後，你仲可以睇下兩樣好關鍵嘅嘢：美國10年債息，同埋美匯。

31. 你見走勢都係差不多：議息嗰日，美匯升，債息升。但之後都叫做回軟返。美匯明顯啲，美債冇咁明顯。留意美匯星期五個跌幅好誇張，一日跌近2%，單日跌幅七年最大。

最後睇下啲就業數字，似乎強勁，但有疲態了。

32. 最最最後，都講返經濟。「通脹見頂」呢個睇法，我都講咗就快半年，你亦見到係咁。但的確不等於好快回落，甚至不等於唔會再反彈（亦因為咁，聯儲局先咁小心）

33. 供應鏈壓力，就一路紓緩。大宗商品（包括油價）嘅壓力，亦都細咗。甚至租金，都應該回落（加息對樓市都有影響）。

34. 不過一個幾核心嘅問題就係：就業市場依然好強勁。呢個亦係議息前你見到美股都差差地嘅原因。

35. 你見其實個JOLTS職位空缺，同埋「非農」職位增幅，都係高過預期嘅。

36. 不過，並唔係一面倒咁「強」，似乎已經係見到啲頹勢。睇仔細啲，你會見到個非農職位升幅，係2020年12月以來最低。另外，亦見到個失業率高過預期，亦都升緊。

37. 最後，留意埋個時薪升幅，雖然高過預期少少，但係今年第一次回落到5%以下（其實即係因為高基數效應）。呢啲都會係對通脹回落有幫助嘅。

38. 留意非農就業數字係星期五晚出，呢個亦可能係美股星期五晚升，而債息回落啲，美匯又回落嘅原因。