ivanliresearch

［寫在議息前］寫於議息前：議息前，市場期望緊乜？好似有啲燶味。「聯儲局線人」忽然轉軚，搞乜？加息「長痛」好，定「短痛」好？議息前估緊嘅加息路線，係咪太老定？唔講期望，講啲而家見到嘅：通脹見頂，但就業依然強勁。咁會點？租金壓力回落緊，供應鏈壓力都舒緩緊。但聯儲局會唔會真係「確認」通脹落咗先放慢加息？都好有可能。「壞消息」：點解衰退遠超預期，負資產宗數又大升，但港股兩日彈千幾點？都唔呃你，原來真係有啲讀者係100%港股的。但點解咁睇唔開？因為「升咗好多」，因為「時差」，因為「唔熟」。我幫你一一拆解呢啲謬誤。 (Patreon)

Published:

2022-11-02 16:59:58

Imported:

2023-04

Content

寫於議息前：議息前，市場期望緊乜？好似有啲燶味

「聯儲局線人」忽然轉軚，搞乜？

加息「長痛」好，定「短痛」好？

議息前估緊嘅加息路線，係咪太老定？

唔講期望，講啲而家見到嘅：通脹見頂，但就業依然強勁。咁會點？

租金壓力回落緊，供應鏈壓力都舒緩緊

但聯儲局會唔會真係「確認」通脹落咗先放慢加息？都好有可能

「壞消息」：點解衰退遠超預期，負資產宗數又大升，但港股兩日彈千幾點？

都唔呃你，原來真係有啲讀者係100%港股的

但點解咁睇唔開？因為「升咗好多」，因為「時差」，因為「唔熟」

我幫你一一拆解呢啲謬誤

寫於議息前：議息前，市場期望緊乜？好似有啲燶味

1. 呢篇係星期三晚寫，未出議息結果，但到你睇到時應該出咗。都講過，加0.75就完全冇懸念，問題係呢排不停估「放慢加息」，到底係咪會出現？而家先睇咗未出議息聲明之前嘅情況。

「聯儲局線人」忽然轉軚，搞乜？

2. 快手可以講下嘅係，我覺得似乎係有啲燶味。首先係個「聯儲局線人」，忽然放鷹。留意呢輪嘅升浪，唔多唔少係由10月22日，呢位仁兄提到今次會議可能會討論12月開始放慢加息。

3. 但，最新近話佢放鷹，但係咪真係轉咗軚？我就覺得不能咁簡單理解。你睇真啲最新佢嘅講法，其實冇否定之前講「放慢加息」嘅嘢，只係話「關於加息速度的爭論，可能會掩蓋了一個更重要的問題，就是利率最終會上調至什麼水平」　—即係話，可能會放慢，但最後加到上去嘅位（terminal rate），未必會變。只係好快咁加到上去，定放慢少少咁加。

加息「長痛」好，定「短痛」好？

4. 但，對市場嚟講，「只係減慢但最終目標不變」，呢個未必係太壞嘅消息—因為真係放慢咗。而我估市場係寧願「長痛」，唔係「短痛」—加得太急，似乎令人擔心。當然「長痛」定「短痛」好，真係有得拗，我都係估估下。

議息前估緊嘅加息路線，係咪太老定？

5. 幾肯定嘅係，市場對於terminal rate嘅估計，冇乜點再升，估加到5厘點都收工。仲有留意，2023年四五月，就估會減息。

6. 而亦都開始有人又再估，以前都提過嘅75-50-25。今次0.75，12月0.50，2月0.25。

唔講期望，講啲而家見到嘅：通脹見頂，但就業依然強勁。咁會點？

7. 如果唔講期望，只講而家見到嘅嘢。暫時都仲有幾樣嘢，會係幾肯定嘅。首先，剛剛出嘅就業數字都仲係好強勁。呢個亦令聯儲局未必真係咁快會覺得「取得成功」

8. 另外，都講過幾次，通脹好大機會見頂。之前話畀啲證據你，一路都未得閒寫，貼住幾張圖先。

9. 首先最重要嘅係，見到供應鏈嘅影響，已經一路消退

10. 另外，你睇一啲嘅領先指標，亦會見到經濟放慢咗，加價嘅趨勢慢落嚟

租金壓力回落緊，供應鏈壓力都舒緩緊

11. 當然，之前寫CPI數字都講過，租金係核心CPI都仲幾硬淨嘅原因—但似乎都係跌緊。

12. 不過，出面好多人講，「通脹仲係好高」，的確係。雖然經濟師普遍都估會回落。但，「之前都成日估錯」

但聯儲局會唔會真係「確認」通脹落咗先放慢加息？都好有可能

13. 咁所以，正路地，聯儲局係真係會「見到」通脹慢落嚟，先真係放心，而唔係倚靠經濟師，甚至係局方內部嘅預測。咁你話，會唔會又係落後於形勢？到見到通脹回先開始放慢，或者停加息，或者減息，會唔會太遲？

14. 答案係：有咁嘅可能。但而家聯儲局嘅取態，點都係驚太早放軟手腳，而唔係過度收緊。

15. 不過，亦唔使太擔心，幾時都話市場炒預期。就算聯儲局未停減息，市場都會一早估定。

16. 再講一次，以上種種，全部係未有今次議息結果，亦未睇到議息結果後美股反應而寫嘅。之後又睇下發生咩事

「壞消息」：點解衰退遠超預期，負資產宗數又大升，但港股兩日彈千幾點？

17. 另外，好耐都冇講港股，原因當然係你懂的。照計睇完呢兩個圖，你應該好明白真係地理上要分散。

18. 固然有啲人係100%美股，我並不太同意，但唔係咁易說服到你（但今年美股不見得特別好，除非你買舊經濟或價值股）。亦即係話，如果有人而家買晒美股，我叫佢買啲其他股，佢未必聽得入耳。但掉轉，如果佢係買晒港股，今年都輸得幾慘烈，咁我叫佢買啲美股，唔係應該好容易？

都唔呃你，原來真係有啲讀者係100%港股的

19. 但原來都真係唔係。

20. 首先，唔係呃你，原來都有唔少人係完全集中晒港股的。呢點係我好唔明白，唔係因為跌咗先咁講，而係原來呢種home bias都仲係幾常見。

但點解咁睇唔開？因為「升咗好多」，因為「時差」，因為「唔熟」

21. 到底係乜心理，令到啲人只係買港股？我同啲人傾過，不外乎幾種。

22. 首先，早幾年可能理由係「美股升咗好多」—咁呢個並唔係一個好嘅理由，而況且去到今年，美股都回返唔少。

23. 但更常見嘅理由係：唔熟悉美股。呢個就真係要討論下。首先而家資訊流通，唔係三十年前，買賣亦都簡單。另外我仲要講一個好重要嘅問題：呢種「唔熟悉美股」，係假象嚟的。你話美股唔熟，但港股其實你又有幾熟？只係一啲虛假嘅安全感。天地良心，你理解美股麥當勞蘋果微軟，點都易過你理解藥明生物或者新奧能源。

24. 而仲有最後一點：邊個話要「熟」？呢個又係一個盲點。我買指數ETF嘅，甚至根本唔使理佢背後啲股票係點，總之勁嘅入嚟唔掂嘅踢走。又或者係我Facebook 成日都講嘅一個比喻：啲毒撚個個炒科技股發晒未？我使唔使做過殯儀先可以買SCI？

我幫你一一拆解呢啲謬誤

25. 最後一個講法，亦係好奇怪嘅。就係話：時差問題，冇時間睇住。呢個亦係一個迷思，我從來唔認為股票需要「睇住」，實情睇得越多越傷心（例如上面嘅圖），睇得越多越易見到衰嘢，越易做錯決定。我向來又港股又買美股，咁唔通我全日唔使瞓？而再早排，我成日都係食埋早餐瞓，瞓到下午四五點醒，完全冇「睇」港股的。同樣地，而家我多數夜晚十一二點瞓，六七點起身（回復正常生活了），亦唔使點「睇」美股。

26. 你真係要「睇」嘅，冬令美股十點半開市，夏令九點半，實情都夠晒時間你去買賣了。

27. 話說回頭，呢兩日嘅港股相當有趣，反彈1140點，都多多地（因為而家恒指15000點咋）。但最特別係乜？最特別係，近乎係冇「好消息」。

28. 固然你睇一般媒體嘅講法，係「炒通關」，是真是假不重要，亦無從驗證，反正官方亦冇任何消息。