ivanliresearch

其他業績：麥當勞，Merck，Visa。ASML業績都遠勝預期呀，低位升返兩三成了。Big Tech就全部都跌，但係咪隻隻業績都唔得？蘋果收入同盈利都高過預期，收入史上新高添。微軟一樣係收入同盈利都高過預期。Google：YouTube收入直頭倒退添。 Amazon同Facebook 就唔好講了。Big Tech嘅三個問題。一樣係羅素1000，價值股ETF跌12%．增長股ETF跌28%。你話點解？我一早買咗價值股ETF。到底呢啲ETF入面渣乜？同你睇下。繼續加息，但美債債息跌到4厘樓下，美匯指數亦冇再升。下星期聯儲局會開邊瓣？就好可能影響今年最尾兩個月走勢。 (Patreon)

Published:

2022-10-28 07:44:42

Edited:

2022-10-28 08:20:19

Imported:

2022-10

Content

其他業績：麥當勞，Merck，Visa

ASML業績都遠勝預期呀，低位升返兩三成了

Big Tech就全部都跌，但係咪隻隻業績都唔得？

蘋果收入同盈利都高過預期，收入史上新高添。

微軟一樣係收入同盈利都高過預期

Google：YouTube收入直頭倒退添。

Amazon同Facebook 就唔好講了

Big Tech嘅三個問題

一樣係羅素1000，價值股ETF跌12%．增長股ETF跌28%。你話點解？我一早買咗價值股ETF。到底呢啲ETF入面渣乜？同你睇下

繼續加息，但美債債息跌到4厘樓下，美匯指數亦冇再升

下星期聯儲局會開邊瓣？就好可能影響今年最尾兩個月走勢

其他業績：麥當勞，Merck，Visa

1. 首先講講，美股嘅情況，大家都知，五大Big Tech科企FAAMG出完業績，除咗蘋果，全部都大跌。但，業績係咪全部都「差」呢？都唔係，可以陣間研究下。而且唔好忘記，非科技股嘅業績，好多都仲係幾好。

2. 之前講過成堆銀行，業績都好過預期。你講近幾日嘅，之前寫咗可口可樂同百事業績好，結果剛剛出嘅麥當勞，亦係得，當然就係加價對付成本上升。股價升3%。今年近乎冇跌過

3. 另外，你見藥廠Merck，業績亦都好，股價一樣升3%，今年升三成！調高埋全年指引。

4. 麥當勞同Merck我都冇，so sad．但我有VISA（留意呢隻唔係價值股，長期都幾貴），出嘅業績一樣得，嗰晚亦係升3%（咁啱隻隻都係3%），今年要跌，但大約8%，亦係跑贏大市的。主要受惠於跨境交易增加，亦好可能因為疫情結束，多咗人去旅行。

5. 最後講呢隻，ASML，一樣係「科技股」，估值亦一路係貴，好似都唔少讀者有買。但業績，係非常得嘅。咁晶片股加科技股，今年股價當然大跌，但近來己經好返好多。近兩個星期，低位已經升返兩成幾三成。唔係玩嘢，如果你睇美股，今年「只係」跌四成，真係唔算多—唔好忘記歐元對美金仲要跌咗一成幾。

6. 可見，Big Tech嘅業績差，似乎真係只係特例。

Big Tech就全部都跌，但係咪隻隻業績都唔得？

7. 講咗一輪，而家先睇返5間Big Tech嘅業績。股價就全部都績後大跌（蘋果應該唔算，但星期四晚收市後出，又睇星期五開市點），但都仲係有啲分別嘅。我會貼英文版同中文版嘅報導，當然係中文版易睇啲，但英文版會詳細啲。

蘋果收入同盈利都高過預期，收入史上新高添。

8. 首先，最好嘅應該點都係蘋果（中文呢度），今年亦係五間之中跌得最少。星期四晚收市出，股價盤後插咗一插，但好快己經回穩。收入同盈利都勝過預期，收入去到歷史新高了。不過個「含金量」好似唔係好高，因為係Mac機收入遠超預期帶動，反而iPhone同服務嘅收入低過預期。仲有，留意公司冇正式出指引（疫情後都冇再做），但有「暗示」個增長都會放慢，可能因為咁，所以股價插咗一下。仲有留意，Tim Cook特別提到強美元大大影響咗公司嘅業績。

微軟一樣係收入同盈利都高過預期

9. 之後，微軟亦都算係幾好嘅（中文呢度），今年股價亦係五間中跌得第二少。亦係收入同盈利都高過預期，但個雲計算收入就低過預期，全年指引亦都比較差。

Google：YouTube收入直頭倒退添。

10. 排中間嘅，會係Google（中文呢度），就真係差了，收入同盈利都低過預期。YouTube嘅收入直頭倒退，分析員預會有3%增長。另外，成間公司嘅收入增長只係6%，十年最慢（除咗疫情嗰一兩季）。難怪股價大跌，今年大約跌36%，唔算極誇張—同接下嚟兩間比。

Amazon同Facebook 就唔好講了

11. 尾二差嘅係Amazon，同蘋果一樣星期四晚收市先出，股價盤後跌20%，咁你都估到咩事（中文版呢度），當然係唔得。最主要係收入低過預期，AWS嘅收入亦都低過預期。今年股價跌咗三成幾—但未計盤後呢兩成。

12. 最差就當然係Facebook，相信大家都知了（中文版呢度），出完業績再跌25%—今年跌咗七成幾。其實收入係高過預期嘅，但甚麼Metaverse嗰邊嘅虧損大升。

Big Tech嘅三個問題

13. 好啦，總括嚟講，其實你會見到三個問題。首先，雖然話呢啲公司應該冇咁受通脹影響，但結果你見利潤都係相當受打擊。於是帶到第二點：你見佢地啲收入增長，不見得真係好過啲「舊經濟股」幾多。於是就去到第三點：如果收入增長都唔高，點支持咁高嘅估值？做乜要買你，唔係買麥當勞？

14. 不過，幾時都唔係一面倒咁悲觀。呢啲公司差不多全部仲賺緊錢，只係賺少啲，甚至只係增長慢啲。強美元幾明顯打擊咗呢啲公司嘅業績　—　因為佢地係最多海外收入嘅。至於估值方面，首先股價跌咗落嚟，另外，亦都係要睇債息。正路地，接下嚟一兩年，債息回落，美元都應該會落……啩？

一樣係羅素1000，價值股ETF跌12%．增長股ETF跌28%。你話點解？

15. 於是乎，又可以講多樣嘢。之前一路有講隻IWD，個個月買緊，今年跌12%，還好。呢隻係羅素1000指數（big cap指數嚟的）入面嘅價值股ETF，咁你可以睇返十大持股，巴郡，Johnson and Johnson，Exon Mobil，JP Morgan，United Health，P&G，雪佛龍石油，迪士尼，輝瑞藥廠—整體表現唔太差。全部都係「舊經濟股」。順帶一提，有個讀者買咗巴郡（！），但都仲成日好驚，好似話想沽。明明巴郡今年表現已經極好，差不多冇跌過，唔知佢沽咗仲可以買乜了。

16. 不過，第十大持股正係Facebook！「已經殘到變咗價值股」。幸好，IWD持股極分散，咁所謂第十大持股，都係佔1.5%—即係成間死晒都只係輸1.5%啫

我一早買咗價值股ETF。到底呢啲ETF入面渣乜？同你睇下

17. 同時間，可以比較下隻IWF，一樣係羅素1000指數（所以都係big cap），但呢隻係揀入面嘅「增長股」。望下十大持股，你見，就係五間Big Tech，而Google有A股C股，已經六隻，加埋Tesla，Nvidia，成堆都係今年揩晒嘢嘅（除咗蘋果）。就只係剩返United Health 同 Visa今年表現好啲。

18. 呢隻IWF，今年要跌三成。而隻IWD係跌12%。

19. 一樣都係美股，一樣都係Big Cap，分別在邊？咁你話估值重唔重要？

20. 下個周期時，記住呢樣嘢，唔好乜都買晒去啲所謂「增長股」

繼續加息，但美債債息跌到4厘樓下，美匯指數亦冇再升

21. 你見到幾有趣，雖然啲科企業績死晒，但其他公司業績OK。最神化係美股升得幾好，道指差不多連升4星期，樓上講咗點解道指跑贏晒納指（雖然債息在跌）