美股連升三星期，暫時70%嘅業績都好過預期。呢期又話炒放慢加息，不過6月都食咗一次詐糊，今次呢？聯儲局官員講嘢，係咪媒體斷章取義？「聯儲局線人」嘅嘢，可唔可信？11月加0.75，冇懸念。但12月呢？2月呢？不過，種種跡象見到，通脹回落緊，經濟放慢緊。市場反應：美股連升幾日，10年債息即跌，美匯即跌。2月會加息加到幾多？加息加到幾多停？應該低過金融海嘯前嗰浸。美股業績：Microsoft Google。可口可樂業績好勁，調高全年預測。成本升？咪加價咯。強美元？冇事喎．有人話講下港股，有乜好講？唔好睇點數，睇估值。唔通蘋果過去20年升咗N倍，又貴咗N倍咩！但，同其他市場比，港股係咪跌得特別多？又好似唔係喎。台灣股歐洲股韓股一樣跌三成幾。 (Patreon)

美股連升三星期，暫時70%嘅業績都好過預期

呢期又話炒放慢加息，不過6月都食咗一次詐糊，今次呢？

聯儲局官員講嘢，係咪媒體斷章取義？

「聯儲局線人」嘅嘢，可唔可信？

11月加0.75，冇懸念。但12月呢？2月呢？

不過，種種跡象見到，通脹回落緊，經濟放慢緊

市場反應：美股連升幾日，10年債息即跌，美匯即跌

2月會加息加到幾多？

加息加到幾多停？應該低過金融海嘯前嗰浸

美股業績：Microsoft Google

可口可樂業績好勁，調高全年預測。成本升？咪加價咯。強美元？冇事喎

有人話講下港股，有乜好講？

唔好睇點數，睇估值。唔通蘋果過去20年升咗N倍，又貴咗N倍咩！

但，同其他市場比，港股係咪跌得特別多？又好似唔係喎

台灣股歐洲股韓股一樣跌三成幾

美股連升三星期，暫時70%嘅業績都好過預期

1. 又可以講返多啲市況，寫文時星期二晚，美股剛開市，仲有得升。實情靜俏俏地連升咗三個星期，分分鐘可以升足四個星期　—　但就要睇埋呢個星期堆業績了（下面會講）

2. 留意暫時，似乎大約70%嘅業績都係好過預期嘅。並唔算特別高，但至少冇特別低。

呢期又話炒放慢加息，不過6月都食咗一次詐糊，今次呢？

3. 不過，真係要回帶講返上星期五晚，美股單日升咗750點。固然又係炒「通脹見頂」，又係炒放慢加息。都話耐唔耐會炒一次，冇錯6月嗰時就炒9月停，結果當然落空，錯晒，所以6月嗰浸反彈亦蒸發晒 —但，不停咁會有人炒呢樣嘢，總有一次成真。而今次似乎比較「扎實」。

4. 因為，上次就真係交易員或基金經理估，加埋有啲經濟師分析師估，但今次「含金量」高啲。

聯儲局官員講嘢，係咪媒體斷章取義？

5. 首先係三藩市聯儲銀行總裁戴利（Mary Daly），提到聯儲局接近考慮放慢加息嘅步伐。甚至有人認為佢忽然變咗鴿派。不過，亦有詳細啲嘅分析，話傳媒只係斷章取義，將其中一小部份嘅嘢無限放大。

「聯儲局線人」嘅嘢，可唔可信？

6. 不過更加震憾嘅，應該係華爾街日報呢篇文（訂戶先睇到，你可以睇中文版嘅報導，呢個，或者呢個）

7. 特別值得留意嘅原因，因為嗰位記者德高望重，所謂嘅「聯儲局線人」。但的確以往佢嘅料都夠堅，好可能根本係聯儲局借佢去放料。所以夠權威，並唔係佢自己閉門造車。

8. 11月嘅議息會議（其實下個星期就係），鐵定會加0.75，呢個應該全無懸念了。但佢嘅報導話，11月嘅會議，仲會討論12月會唔會放慢。

11月加0.75，冇懸念。但12月呢？2月呢？

9. 當然市場視為好消息，但你可以睇下明報嘅詳細報導，就唔係咁簡單。首先，只係話11月可能會討論12月減慢—冇話真係一定會減慢。似乎聯儲局亦要諗下，點樣去交代件事，以免忽然間經濟又過熱。

10. 所以，其實都係一半半，但都足夠令大市反彈。

不過，種種跡象見到，通脹回落緊，經濟放慢緊

11. 仲有留意，近排嘅種種跡象見到兩樣嘢：第一，就係通脹應該真係見頂（我都寫咗幾個月），而且落緊，可能過兩日再詳細寫。第二，亦見到經濟活動真係放慢不少（雖然就業依然強勁）。呢啲都係可以支持聯儲局放慢減息嘅理由

12. 大方向就係冇變嘅，似乎就只係「幾時放慢加息」，去到咩位先「有信心真係通脹開始受控」，經濟放慢到咩位先覺得「真係夠皮」

13. 所以，冇人包保今次呢個炒作唔會表錯情，唔會好似6月嗰浸咁又落空。但衰咗都好，一兩個月後又會再咁炒過　—　直到有一次成真。

市場反應：美股連升幾日，10年債息即跌，美匯即跌

14. 睇睇市場反應，都真係傾向「信」呢個報導，雖然未算信到十足。除咗睇美股彈750點外，當然睇埋其他嘢。

15. 例如最簡單，睇到10年債息，都係由高位回落返唔少。

16. 而你睇美匯指數，亦係高位回落。留意雖然一路講加息，亦都真係會一路繼續加（至少11月同12月都近乎100%肯定），但美匯指數9月尾嘅高位，已經冇再掂到。

17. 咁而當然你知道，要市場嘅風險胃納重臨，最好就債息同美匯指數都回落。亦係暫時呢幾日見到嘅嘢

2月會加息加到幾多？

18. 當然仲有，睇CME Fed Watch．唔使睇11月，必然加0.75。反而睇12月。留意而家係3-3.25，咁即係11月嗰次後，就去到3.75-4。

19. 而家見到，12月加0.5或者0.75嘅機會，都只係一半一半　—　所以下星期議息後可能會多啲訊息，大家會再明確啲咁估開邊一樣。

20. 但肯定嘅係，你留意下面嘅數字，一個星期前，講緊係六成幾機會加0.75（明報話星期四一度去到七成半），而家變到得返一半左右，明顯市場嘅預期開始降溫。

21. 另一個角度睇，如果12月加0.5，就係去到4.25-4.5，如果12月係加0.75，就係去到4.5-4.75。咁你甚至可以睇埋2月（但去到咁耐，參考價值就低啲）。見到乜？無論12月開邊瓣都好，見到市場預期2月加到5-5.25嘅機會，已經相當細。

22. 呢個水平相等於2月嗰次加0.5或0.75（視乎12月開乜），而機會都已經細，即係加0.75嘅機會極細。亦即係，就算12月唔減慢，2月都減慢了—雖然呢啲預期可以好快轉

加息加到幾多停？應該低過金融海嘯前嗰浸

23. 咁另外亦都見到，市場預期嘅「Terminal rate」（即係今輪加息嘅頂位），開始回落。（呢啲圖其實都係用利率期貨嘅價格整出嚟，同CME Fed Watch堆嘢嘅原理一樣，但比較難搵）

美股業績：Microsoft Google

24. 留意返，今個星期嘅美股重點，就係業績期去到尾聲，又係大科企出業績嘅時間。星期二晚Microsoft 同Google（仲有VISA），星期三晚Facebook，星期四晚蘋果同Amazon（仲有Mastercard 同麥當勞）

25. 呢堆嘢業績會得唔得，十分難估。首先，都係睇預期。但有時業績好過預期都會大插，業績差過預期都會升—呢啲現象往往同估值有關。甚至你可以掉轉頭睇，如果出啲業績唔掂都唔跌，甚至升，就應該證明已經「夠平」

26. 另外，呢幾間公司，佔咗標普同納指兩三成嘅比重，所以亦會好影響大市走勢。再加上，照計佢地受通脹影響較細（但會受強美元影響），所以如果呢啲公司業績都唔得，就點都會打擊到市場氣氛。

可口可樂業績好勁，調高全年預測。成本升？咪加價咯。強美元？冇事喎

27. 講開業績，可口可樂開市前就出咗業績。留意收入同盈利都勝預期，而公司仲要上調全年嘅預測，明顯地加價抵消咗原材料嘅成本上升，而消費者係照買嘅。早兩星期公布嘅百事，亦係咁嘅情況。呢兩間公司，看似悶，飽和，冇乜增長空間，但今年股價就表現好好，兩間都大幅跑贏大市，百事仲要有得升，可樂亦只係跌2%

28. 股價同樣強勁嘅，係麥當勞！星期四先出業績。

29. 有趣嘅係，似乎隻價值股ETF（IWD），十大持股都係冇呢三間公司嘅。也不出奇，你睇三間啲市盈率，廿幾三十倍，唔算低的。

30. 啟示？咪又係成日重覆嗰幾句，要分散，唔好一大堆科技股。

有人話講下港股，有乜好講？

31. 有人話叫我講下港股，「實則有乜好講？」。有人問撈唔撈得，「梗得架，不過可能會輸錢之嘛」（實情買任何股票都係可能輸錢的）。有人問幾時買得，「聽朝開市咪買得」。

32. 聽落好廢，但未來就係不可知。而港股係咪特別「平」？都唔係咁易答。係咪而家低過十幾年前嘅水平，就代表而家「平」啲？唔一定喎。估值，唔係只係睇點數嘛。唔通蘋果過去N年升咗幾百倍，就係「貴」咗幾百倍？唔係咁計嘛。

唔好睇點數，睇估值。唔通蘋果過去20年升咗N倍，又貴咗N倍咩！

33. 咁肯定有啲股票係相當平，但成個指數呢？就要計下數。問題係近年好多重磅成份股，盈利增長都欠缺動力（內銀），甚至乎會倒退，甚至有啲蝕錢（中資科技股）。盈利唔配合，呢個先係問題。不過要遲啲搵到數字先可以講多啲

但，同其他市場比，港股係咪跌得特別多？又好似唔係喎

34. 另外，星期一嘅大跌，唔多唔少啲人都覺得同二十大有關。可能都係。但港股今年係咪跌得特別多？睇你點睇。恒指今年跌咗35%—但其實能人所不能，點超高技術嘅台灣股市，今年跌幅都係差不多　—　而，仲未計台幣對美金（或港紙）跌咗13%喎！

台灣股歐洲股韓股一樣跌三成幾

35. 台灣股市亦唔係個別例子，你睇日本，韓國，甚至歐洲股市，計及匯率後，都係三成幾。

36. 亦唔好忘記嘅係，人民幣對美金都跌咗15%，呢個亦係港股受壓嘅原因之一—好多公司背後嘅資產係人民幣嘛。