每個月繼續買緊美股（同港股）。「我都有儲起啲錢架」。VOO QQQM 呢啲不用多講啦。「真係講都怕畀人鬧」。但就唔好貪心買3倍。「已發展國家」ETF，「咪仲廢過港股」！有乜啟示？「新興市場走中國」ETF—咪仲衰過你買中國！又有乜啟示？價值估ETF，繼續跑贏。「雖然輸一成好少人會當係好消息」。ETF派息使唔使收股息稅？你話呢？小型股ETF跑出，因為強美元！關乜事？你話呢？小型股指數今年有望跑贏大型股，2016年嚟首次。 台積電跌咗一半。好多壞消息。「即係買得」？留意下台積電而家嘅ADR溢價。業績依然好勁架，但點解跌一半？ (Patreon)

每個月繼續買緊美股（同港股）

「我都有儲起啲錢架」

VOO QQQM 呢啲不用多講啦。「真係講都怕畀人鬧」。但就唔好貪心買3倍

「已發展國家」ETF，「咪仲廢過港股」！有乜啟示？

「新興市場走中國」ETF—咪仲衰過你買中國！又有乜啟示？

價值估ETF，繼續跑贏。「雖然輸一成好少人會當係好消息」

ETF派息使唔使收股息稅？你話呢？

小型股ETF跑出，因為強美元！關乜事？你話呢？

小型股指數今年有望跑贏大型股，2016年嚟首次

台積電跌咗一半。好多壞消息。「即係買得」!

留意下台積電而家嘅ADR溢價

業績依然好勁架，但點解跌一半？

1. 同昨日嗰篇都有啲關係，可以睇返，但唔睇亦冇大問題。

2. 呀仲有，廣告時間。昨日貼咗啲日本股，你想買嘅，基本上一定係開個IB（Interactive Brokers）戶口。買歐洲股新加坡股印度股都係

3. 用我referral link吧，你入咗錢買埋股票佢會有回贈，送返佢啲股票，你可以沽咗佢。我都同時會有回贈的。而我自己都用，亦有唔少讀者開咗，都普遍正評

4. 陣間你都會見到，我啲美股好多都係用IB買，雖然介面有啲煩，但佣平。你見我買3萬蚊美股都係10蚊港紙佣（尾二行美金，最底港紙）

5. 仲有，做孖展都平（平過富途先）。之前有排我做手術，保險錢未返，但都keep住個個月買，都係用IB嘅融資。

6. 開戶link在此。

每個月繼續買緊美股（同港股）

7. 講到stay invested，不用多講，我本人親身示範。好似幾個月冇貼，但我有提過，每個月都仲係買緊嘢。咁有啲讀者唔知買緊乜。咁貼下出嚟，先講美股吧，港股唔多開胃（雖然我都仲有買）。

「我都有儲起啲錢架」

8. 順手講埋，以前就打格仔嘅，而家唔怕公開埋了，都冇乜好遮。反正大家大約知我Patreon一個月收到幾錢。咁你大約計到，買美股呢度，一個月5萬港紙左右（仲有VOO QQQM未貼），仲未計港股，仲未計有時手痕買啲個股（之前咪買過6823同埋Ally Financial），仲未計我供樓　—　所以你見，我都係「儲起」唔少錢的。

9. 當然舊文都講過，如果初出嚟做嘢，收入唔高，係難儲錢嘅。咁呢個都好難夾硬幫你，「睇多啲職場胃腩」。我自評唔係特別慳，但又唔係特別大洗。你見都有唔少人，搵到十皮八皮個月，都係冇錢剩的。

VOO QQQM 呢啲不用多講啦。「真係講都怕畀人鬧」。但就唔好貪心買3倍了

10. 仲有呢兩隻就富途買嘅（純粹未開IB前用落，咪繼續）。今年表現都係麻麻地。VOO就跟標普指數（你買SPY都一樣的），今年跌22%。QQQM（買QQQ亦得）咪跟納指，今年跌32%—你見拉勻，都跌27%—其實同恒指差不多咋！但你總覺得港股廢，可能都係片面印象。當然，之前嗰幾年美股升咗好多，港股唔係，「但再之前幾十年呢？」，唔知由邊計起。

11. 另外，好多人都相信，之後如果反彈，美股反彈會勁過港股，咁我都相信係，所以我都係買美股多—但，「如果錯呢？」。所以我亦唔係「只買」美股。

12. 不過，唔好貪心買2倍3倍。原因以前講過，不再呢度重覆，或者搵次開篇新文講。但好簡單，你睇下標指可能返返兩年前（例如你睇2020年9月11日），你買VOO SPY都係咁情況。但你買2倍3倍嘅，肯定係輸一截錢。只能炒一兩日，長線實出事。而我係長線的

「已發展國家」ETF，「咪仲廢過港股」！有乜啟示？

13. 再睇啦喎，先講IDEV，已發展市場走美國，即係歐洲日本。隻嘢今年一樣跌27%，衰過標指，同恒指差不多。點解？好簡單，歐元同日圓對美金跌唔少，計埋呢度你咪差過標指一大截。

「新興市場走中國」ETF—咪仲衰過你買中國！又有乜啟示？

14. 同樣地，舊年寫過隻EMXC，我都仲有月月買。當時好多人都好鍾意，呢隻新興市場走中國，實際上就係台灣韓國印度。當時好多讀者鍾意，因為人人唔鍾意中國（但，投資嘅嘢，唔使亦唔好帶太多感情）。

15. 好多人以為中國玩完啦，台積電點無敵（係丫），印度經濟點好（係丫）—但又係老問題，估值呢？經濟好又等唔等於股市好？公司好又等唔等於股價好？呢啲嘢好多人以為必然，但其實唔係

16. 台積電，今年跌咗一半！韓國股市亦跌廿幾巴仙—仲要韓圜跌兩成！印度好啲，股市企得硬，但盧比都要跌一成。但已經係幾個新興市場較好。否則隻EMXC仲死

17. 教訓？上面咪寫咗。估值，同埋匯率。估值大家知，但永遠都係估值最貴時大家想飛入去，估值平時（例如而家）冇人敢買。因為高估值時一定係「好消息」，低估值時一定係「壞消息」。不過，估值嘅嘢，一般長期發上發落，會返返上去。

18. 匯率？一樣。寫咗好多次，唔好諗乜「對沖」匯率風險，唔work的。但同樣道理，都係發上發落，周期嘢。而家你梗係以為美金不停強，但可以強幾耐？所謂美匯指數二十年高位　—而家先二十年高位？即係過去二十年原地踏步。但你睇美股升咗幾多？

19. 所以，係唔使點太擔心嘅。特別係你真係信台積電點無敵，印度點取代中國（我冇話唔信）。

20. 不過你真係見到，你買台積電，輸五成，衰過好多中資股或者港股。估值好重要。

21. EMXC呢個例子好值得你去思考。諗下自己最初「估」嘅嘢，有幾準？點解唔係按你估計咁發展？

價值估ETF，繼續跑贏。「雖然輸一成好少人會當係好消息」

22. 拿，你見到真係相對地stand out嘅係邊隻？就係呢隻IWD。價值股，自己睇入面渣住乜，銀行石油消費品（然後FB而家變咗「價值股」！）。今年都係價值股跑贏，好合理，債息去到4厘，啲太高估值甚至冇盈利嘅公司，要跌可以好驚人。雖然，其實IWD今年都仲要跌15%，係「好過」標指納指好多，但一般人都唔會覺得係「好消息」。不過如果你分段買，兼仲有啲息派，就照計唔使點輸錢嘅

ETF派息使唔使收股息稅？你話呢？

23. 順手上次有讀者問，呢啲ETF派息，使唔使收股息稅。我唔敢100%肯定，但應該係唔使嘅。因為例如SPY VOO，拎住標普指數嗰500間公司嘅股票，咁呢500隻股票派畀佢嗰時，已經被美國政府收咗一次稅。所以照計到SPY VOO派畀你時，唔會收多次的。

小型股ETF跑出，因為強美元！關乜事？你話呢？

24. 呢隻甚至值得開一篇文講。不過你想TLDR嘅，好簡單，強美元有利小型股。Wall Street Journal有成篇文講（訂戶先有）。

小型股指數今年有望跑贏大型股，2016年嚟首次

25. 所以你見到近期係小型股跑出的，雖然唔係極明顯，隻VB咪年初至今跌21%，勉強好過標指少少，好過納指咁咯。但，小型股指數，今年好可能跑贏大型股，係2016年以嚟第一次見到咁現象。

26. 點解強美元令小型股跑出？其實係相對，因為小型股業務就集中美國，冇乜海外收入，強美元冇乜影響。但大型股嘅，好多外國收入，強美金下，你啲外幣外入轉返做美元就走晒樣了。

27. 當然，小型股跑出仲可能係因為佢地嘅估值低啲。仲有，因為佢地業務集中在本土，而美國經濟相對於其他地方，都仲係比較好。

台積電跌咗一半。好多壞消息。「即係買得」？

28. 講EMXC時講開台積電，一路好多人問，好多人想買甚至買咗。我都有想買過，但冇買，「逃過一劫」。

29. 話買嘅，不外乎講技術點先進點巴閉。但，得你一個知咩？而又係忽略咗最重要嘅一樣嘢：估值。

30. 今年台積電，如果你睇台股，就跌36%，衰過好多大陸股同港股。而台股指數就跌28%，同廢柴港股差不多　—　但我仲未同你計台幣跌咗13%！

31. 不過，除非你係台灣人或住在台灣，否則你在香港買台股，極之難。我都未有台股戶口，IB亦冇得你買。咁好多人知，台積電有美股ADR，TSM。有美股戶口就買到。今年跌咗：一半

32. 但啱數的，台積電台股跌36%，台幣跌13%，咁你ADR差不多就係跌50%。合理。

留意下台積電而家嘅ADR溢價

33. 不過仲有一點，以前都講過，台積電ADR有樣嘢好煩：有溢價/折讓。你買好多公司，例如匯控，ASML，LVMH之類，唔會香港/法國一個價，美國一個價。但台積電就有呢個問題。原因當然係個「套戥」有啲難做。

34. 不過，寫咁多，唔係「唱衰」台積電。而係覺得，想買嘅，照計可以留意下。

35. 原因好簡單。首先，你話公司核心競爭力仲在唔在？當然在。另外，最新業績好唔好？相當好，按年升八成，仲高過預期。

業績依然好勁架，但點解跌一半？

36. 咁估值，就跌咗落嚟啦。答唔到你係咪「見底」，但似係正常返啲。至於你話台幣嘅問題，都講咗，呢啲冇得避，但美金總不可能一直咁升。

37. 仲有，個ADR溢價/折讓，早兩日差不多係平手（呢兩日跳返少少）。又係，好難答你會唔會變到大折讓。但嗰時溢價都仲好多人死追爛追，而家差不多平手，照計比較合理。個表應該好易計，唔使我解一次啦？

38. 仲有，網站你會見到有個「溢價折讓歷史圖」。但小心啲，佢係計股價，幾多蚊，相當笨。識計當然係計百份比，照計網上有，或者你自己搵歷史股價計都得。但我幾記得，有一輪係溢價成10%。

39. 當然會有人講，唔係喎，而家話晶片行業暗淡。公司都大減資本開資（capex，capital expenditure，你當即係買機起廠嘅嘢。而請人之類係叫opex，operating expenditure），係咪即係睇淡前景？

40. 答案：梗係前景麻麻！之前啲晶片股都香晒．記得早排仲有讀者話要買隻2倍定3倍 「費半指數ETF 」，希望佢冇買。睇錯唔緊要，但倍數ETF真係搵笨多，財不入急門。

41. 咁但，又係基本嘢，兩個重點。首先，扯，之前咪又個個話晶片荒，堆嘢大把世界？結果呢？所以真係唔好太信任何人，包括你自己，包括「行業專家」，包括我。永遠諗下，「如果唔係呢？」。仲有，就梗係因為前景唔好，先有得咁平畀你買。你點解唔諗下，如果前景變返好呢？相反，「前景好」嗰時買，你就係之前摸頂，買貴一倍嘅人。

42. 所以，聽落實畀人鬧，但真係的：梗係壞消息先買。

43. 如果我有閒錢，可能我都買。不過近期真係少買個股。一個好消息（或阿Q消息）就係：隻EMXC，十大持股之首，咪正係台積電。「所以今年咪唔多掂」。但希望在明天。