「熊市反彈」嘅嘢．銀行股呢排夠晒勁，差不多全部業績都勝預期。又話通脹壓力大？NetFlix業績速評．熊市見底時形態各有不同，所以冇腳影捉。只能stay invested ．仲有，建議你睇多啲傳統媒體，而唔係上Facebook 或 IG．「增持現金」嘅危險．「保留現金」好少少，但長線都係必輸．買債又如何？60-40喎。「今年債券跌得仲多過股票」．日本股：Donki 今年升六成，我是股東。「輸埋匯水都仲係贏一大截」．Uniqlo一樣受惠於日圓貶值，「不過冇買」．全日空直頭出埋盈喜，三年第一次賺錢．不過最勁都係百貨公司，三越伊勢丹，同埋高島屋．留意下，黑田東彥玩多半年就任期滿。之後會點？ (Patreon)

「熊市反彈」嘅嘢

銀行股呢排夠晒勁，差不多全部業績都勝預期。又話通脹壓力大？

NetFlix業績速評

熊市見底時形態各有不同，所以冇腳影捉。只能stay invested

仲有，建議你睇多啲傳統媒體，而唔係上Facebook 或 IG

「增持現金」嘅危險

「保留現金」好少少，但長線都係必輸

買債又如何？60-40喎。「今年債券跌得仲多過股票」

日本股：Donki 今年升六成，我是股東。「輸埋匯水都仲係贏一大截」

Uniqlo一樣受惠於日圓貶值，「不過冇買」

全日空直頭出埋盈喜，三年第一次賺錢

不過最勁都係百貨公司，三越伊勢丹，同埋高島屋

留意下，黑田東彥玩多半年就任期滿。之後會點？

「熊市反彈」嘅嘢

1. 又會講返多啲市況。果然一講就升，希望keep得到

2. 介紹返，上星期四出咗個點講都係差嘅CPI通脹數據（要開篇新文講），美股先跌500倒升800。星期五跌返400點出嚟，又有人覺得只係「夾淡倉」「熊市反彈」—也可能係，但執著呢啲東西全無意義。星期一再彈多600點。

銀行股呢排夠晒勁，差不多全部業績都勝預期。又話通脹壓力大？

3. 寫呢篇文時係係星期二晚收市後，美股高開500點，最後收市升幅收窄啲。暫時最重要嘅消息，都仲係業績。星期一晚美國銀行一樣夠勁，而星期二晚嘅高盛亦係高過預期。銀行股就呢排最強了。上面個圖，左邊係星期一晚，右邊係星期二晚

4. 科技股亦都強，一樣，左邊星期一，右邊星期二。

5. 有關質疑「熊市反彈」嘅虛妄，寫過多次，唔想不停重覆。我在Facebook Page都有寫。的確，7月嗰浸，納指直頭升咗兩成幾（係咪「牛市」？），最後都係嘔返晒出嚟。

6. 但，總會有一次係真嘅。係咪今次？唔知。但總會有一次。而正常你根本冇可能事前判斷到。

NetFlix業績速評

7. 仲有，星期二收市後嘅 Netflix 業績，一樣好勁。盤後暫時升11%。上客人數遠超預期，聽日先詳細寫。

8. 但，真係要講，同好多人想像唔到，呢間公司係賺錢嘅！仲係越嚟越賺錢。只不過盈利增長開始放慢，同埋見上客量放慢，支持唔到咁高估值。

9. 事實上，公司股價低位彈返近50%—但今年仲係跌緊六成。當然有排都未回家，但低位打靶嘅更加慘。而你又見到，正係之前好多「壞消息」嗰時買，就已經執五成　—　當然實務上係唔可能捉到咁正嘅。但真係唔使怕咩「壞消息」。無數咁多例子畀你睇到，「壞消息」買股票出事嘅機會，肯定少過「好消息」時買。聽日我就會講隻台積電，一個好好嘅例子。

熊市見底時形態各有不同，所以冇腳影捉。只能stay invested

10. 星期二信報畢老林篇文寫得好好。我破例地呢度attach埋，就唔該低調啲了，始終訂戶先睇到就唔應該咁分享嘅，我亦唔會成日咁做，費事人地警告我（事實侵權係唔啱的）。

11. 內容，都係話你知，根本捉唔到幾時「見底」，每次熊市底時，形態都好唔同。你睇時間，高位跌幾多，債息，通脹，市盈率，全部都唔多同。唔好嘥心機，不如stay invested．

仲有，建議你睇多啲傳統媒體，而唔係上Facebook 或 IG

12. 又，提埋你，明顯地「同我意見一樣」我就覺得好，呢種confirmation bias人人有，都記得戒。應該好多人知我日日買三份報紙睇—你唔一定要學我咁古老，但都建議你睇「傳統媒體」嘅網站，而唔係佢地嘅Facebook Page 或IG，更加唔係就咁碌Facebook IG，或者永遠係由啲朋友Whatsapp send嘢畀你．大家都知，Facebook IG都有「演算法」，必定係回音谷，圍爐，垃圾最多人睇，不停咁feed啲你「鍾意睇」嘅嘢畀你 —但投資同成長就係要避免咁偏食。多睇啲自己未睇過嘅嘢，甚至唔同意嘅嘢。傳統媒體會幫到你。

「增持現金」嘅危險

13. 另外Facebook Page個Post提咗個點，我想再三強調，就係「增持現金」—聽落so smart，但，何來可以增持現金？好多人聽咗之後，就會去「低位打靶」。冇錯，增持現金，實情就係「低位打靶」，只係講嗰個包裝得好啲，第時啲股票彈你都好似不能怪佢咁。但，唔沽貨，點「增持現金」？

14. 而我從來唔會叫你「增持現金」。你年半前沽貨都仲話叻，而家跌晒先沽，邊有咁笨？實冇仇報。我亦唔會叫人「止蝕」，呢點以前討論過多次。

「保留現金」好少少，但長線都係必輸

15. 頂多你可以話，「保留現金」。即係例如你個個月出嘅糧，咁可能唔買股票住啦，留啲錢旁身，甚至做定期都有三四厘息（在香港真係暫時跑贏通脹）。或者你話，之前有舊大錢，諗住買股票，冇買，避過咗個跌浪，咁而家更加唔敢買。

16. 以上咁樣，相對地「正常」啲。但亦唔係太可取。原因亦以前講過，你明知長遠股票點都跑贏現金。咁你話你「好肯定」有排跌，OK，但你「保留現金」，只能短期，可能幾個月（或者拎啲錢去旅行）。但你總不能幾年　—　否則又會陷入之前我成日講，有啲讀者面對嘅困境：拎住一大舊鐖，但見啲股票升晒，咁你到時先買，往往就摸頂！一大舊錢摸晒頂，好痛苦的。

17. 況且，都提過，咁樣去time the market，好易成為唔好嘅習慣。肯定嘅係，今年你一路唔買，積到今日先買，咁其實「成本」平啲　—　但大多數人，都係開始唔買，就一路都唔會買。趺嘅，覺得再跌。升返嘅，「都升咗，等回下先」，搞搞下，就係睇住啲股票不停升。最後就梗係去到人人都買股票時，自己忍唔住飛入去。

18. 所以都真係冇乜特別，借錢投資幾時都唔好。想去旅行嘅當然去咗先。但開支以外，剩返嘅錢，應該係每個月拎晒去投資嘅。

19. 至少我一路都係咁做。

買債又如何？60-40喎。「今年債券跌得仲多過股票」

20. 最後，快講一下，如果年紀大啲嘅（五十歲以上啦），的確就應該減低啲股票嘅比重（唔係叫你唔買！係減低啲）。可能都聽過60-40。而家你買美債，4厘息，真係算OK的。不過，你冇留意嘅係—根本你年頭買美債，而家都要輸20%甚至更多（債升息咪債價跌），不見得比股票「安全」。既然係咁，不如買股票算了。

21. 但公平講句，只係今年市況太反常。以前絶大多數時間，股票唔得嘅年份（例如2008），債券就會得。「今年就全部都唔得」，係好少見嘅

22. 有機會會講下啲債券ETF，最簡單，入場費低。但記住，只係配角。只係比你乜都唔做放銀行好啲。50歲以下嘅，應該都係100%股票，因為你仲有時間。

日本股：Donki 今年升六成，我是股東。「輸埋匯水都仲係贏一大截」

23. 順手仲講埋日本股。就梗係見日本開關，個個香港人仆到去，大把商機。其實而家買可能都少少遲，幾時都話炒預期（你見國泰都係之前不停升，到真係0+7 0+3就回了）

24. 你睇日本股，指數企得好硬淨，今年日經或者TOPIX，都只係跌6-7%。但大家都知，蝕匯水蝕死你，今年日圓跌咗30%。而家圓匯150都嚟緊頭。

25. 不過，仲有啲好啲嘅東西，之前我都有推，有啲有買過。

26. 最明顯嘅，當然係Donki（間公司叫Pan Pacific），今年升六成，夠晒你蝕匯水。但到底係海外帶動定本土，就冇研究了。呢間我係有買的，之前都寫過。

Uniqlo一樣受惠於日圓貶值，「不過冇買」

27. 唔好忘記，因為日本公司，日圓跌，在日本公司嘅角度，即係外幣升，轉返做日圓，業績當然勁。你見迅銷Fast Retail（即係Uniqlo同GU）都係咁，業績很勁，就係因為日圓跌。日本股價今年升三成，「扣埋匯水得個桔」。咁所以，你見香港股價就係原地踏步。

全日空直頭出埋盈喜，三年第一次賺錢

28. 我有買嘅，就係兩間航空公司，全日空同埋日航。全日空仲要之前出埋盈喜，3年第一次有錢賺。兩間股價今年都有得升，但扣埋匯水，就要輸錢嘅。

不過最勁都係百貨公司，三越伊勢丹，同埋高島屋

29. 真正勁嘅？仲有百貨公司。例如三越伊勢丹，今年又係升六成。高島屋仲勁，今年升七成。可惜冇買。

留意下，黑田東彥玩多半年就任期滿。之後會點？

30. 照計都仲有唔少機會嘅，最重要係，照計日圓不可能無止境咁回落。雖然好難答你咩位見底。有興趣嘅，可以留意下央行行長黑田東彥，下年4月就任期滿。做咗十年，到新人事，就可能新作風。不過，到底日本央行有幾「獨立」？定其實都係聽命於首相？到時你可以睇下。我相信，日本央行獨立性係唔高嘅。