大市，美國銀行股業績，今星期美股業績看點。領展823。施政報告。香港地產股 (Patreon)

寫咗成個月「大環境」，又寫返下市況

港股就梗差，「但美股連升兩星期喎」，估唔到呢？

氣氛差，但指數唔太差。似乎啲估值開始正常。但都要睇美債債息

上個星期嘅銀行業績，全部倒退，「但點解升？」

點解四間銀行都逆市升？點解業績好？

今個星期嘅業績看點

講一講隻領展，擺明係最低工資受惠股

但，點解領展今年股價咁差？

領展5.9%股息率，算高定低？「睇你點睇」。試下計下數

醒埋隻Excel畀你，11月出咗中期業績再update

最後，就梗係講「減辣」，「引專才」，「托樓市」。堅定流？

「托樓市」？諗多咗啦你

咁但講到尾，「炒乜股先」？

寫咗成個月「大環境」，又寫返下市況

1. 寫咗成個月「大環境」文，又寫返少少市況個股之類。冇乜特別原因，就係有嘢想寫。而且寫「大環境」嘢用嘅時間精力較多，但仲會繼續寫，只係中途畀返篇短啲文你。仲有，嗰篇「Excel」文，我都仲會繼續跟進的。

港股就梗差，「但美股連升兩星期喎」，估唔到呢？

2. 市況方面，港股就真係極差（所以真係唔好買死一樣），但美股就冇你想像中咁差。上星期四晚出咗個幾差嘅通脹數據，我之後會極詳細咁講。

3. 但你見星期四晚先跌500點最後倒升800點，相當神奇—但總不能夾硬話個數字係「好消息」。你見段round up夾硬話「市場既憂慮利率續急升，同時又憧憬強勁通脹預示距見頂不遠」—就真係完全夾硬嚟了。Narrative 嘅嘢

4. 然後當然好多人會認為只係「夾淡倉」，咁果然去到星期五晚就跌返400點。不過，而家10月中，美股第一個星期係升嘅，第二個星期（剛過嗰個）呢？如果計道指都係升，標指納指就跌。

氣氛差，但指數唔太差。似乎啲估值開始正常。但都要睇美債債息

5. 氣氛好差，指數就唔係太差。亦可能係啲估值開始正常。但當然一樣好肯定嘅嘢：你計估值（都係睇市盈率大路啲），點都要考慮埋個10年債息，咁而家10年債息4厘，當然打擊啲估值（至於債息幾時落嘛？就遲下解，不過一般係加息去到尾段就落）

上個星期嘅銀行業績，全部倒退，「但點解升？」

6. 另一方面，當然係睇啲業績，睇下有冇走樣。走樣嘅，一來對市場氣氛差，二來啲盈利預測又會再下調（雖然唔走樣都可以下調，而家亦有下調）。

7. 上個星期出嘅，主要係5間大嘅銀行。花旗C，富國WFC，JP摩根JPM，US Bank Corp（USB）同埋摩根士丹利MS。見到齊齊都係跌，但呢個唔係重點，重點係乎唔乎合預期，同埋入面由乜拉動。

點解四間銀行都逆市升？點解業績好？

8. 個別銀行嘅情況，上面嘅link已經有。而你明顯見到嘅係，只係得摩根士丹利叫做「差過預期」，其他都好過預期。原因？主要就真係加息一般對銀行有利（而暫時又未見好多壞帳）。所以亦只係摩根士丹利一間跌（張圖冇），其他四間都升—而仲要係美股跌400點喎。暫時打頭陣嘅銀行，業績冇走樣。

今個星期嘅業績看點

9. 去到今個星期，都有唔少公司公佈業績。詳情睇返Zacks（十分好用）。星期一有美國銀行，星期二Johnson and Johnson（股價幾硬），洛竭馬丁Lockheed Martin（股價今年好強，升10%，世局不穩嘛，以前介推過），同Netflix。星期三有Tesla，P&G同 ASML。星期五有高盛同American Express。

講一講隻領展，擺明係最低工資受惠股

10. 另外，講一講隻領展823，在Facebook Page都引起啲迴響。故事就極簡單，照計最低工資會加到40蚊個鐘（又，你見到都叫做追到官方嘅通脹的），仲可能之後會一年檢討一次（而家係兩年一次）。咁公司就係「最低工資受惠股」，以前都講過。照計個邏輯好簡單，主要就係啲公屋嘅場，而住公屋嘅，因為租平，同差不多收入而唔住公屋嘅人（例如住劏房）相比，消費力當然強好多。佢地未必會去貴嘅商場消費，但樓下食飯就走唔甩。

11. 而實際上，真係拎最低工資嘅人，而家唔多，因為實在請唔到人的。但無論如何，都會水漲船高，基層嘅人工會多咗—不過不幸地，啲嘢亦會加價，最後亦代表領展會加到租。實在領展嗰啲場，減租壓力係冇乜嘅。

但，點解領展今年股價咁差？

12. 不過你見今年股價，認真麻麻。原因兩個。次要嘅一個，就係公司都有啲外國嘅收入，咁而因為美金獨強，亦即係港紙強，堆海外收入轉返做港紙，當然會少咗，英鎊又好澳洲紙又好。

13. 比較主要嘅問題，當然係美債債息。債息對所有股票都有影響，但對「收息股」嘅影響比較明顯。留意唔一定「比較大」，比較明顯係指好易解到。領展你睇T12（過去十二個月），大約係5.9厘息。但到底算高定低？就真係「相對」。一個關鍵當然係「機會成本」，以前可能美債1厘息，定期存款咁上下，咁4厘息嘅領展都好吸引。但而家我買美債做定期都4厘息嘅，得4厘就冇咁吸引啦　—　買股票仲要冒股價跌嘅風險，仲要冒你有機會減派息甚至派唔到息嘅風險（領展就唔會嘅），所以投資者「要求」高啲息係好合理嘅。

領展5.9%股息率，算高定低？「睇你點睇」。試下計下數

14. 金融術語呢啲就叫yield gap（個股息要高過美債幾多）。於是有人問，咁呢個gap幾多先合理？答案係：好難答。如果你好有心機，其實可以計，原理同計「市盈率」（記住調整埋美債息口）差不多。你咪計下以往咁多年，領展嘅股息率有幾多，然後睇下會高過美債幾多，再睇個平均。

15. 不過大家普通人，就未必要玩到咁深。反正呢啲「平均」，又好睇你拎5年定10年，而以前領展加租能力強，而家又弱啲，所以都不能完全一樣相比。

16. 肯定嘅係，佢比好多普通公用股好，照計派息都仲係有得加上去，若開返關亦會有啲正面影響（唔係直接，但會有間接影響）。咁而家去到52星期低位，就照計係OK的，亦係我個個月買嘅股票

醒埋隻Excel畀你，11月出咗中期業績再update

17. 仲有可以留意，公司3月年結，9月就半年結，11月頭出業績，日期都有埋，11月9日。咁以往都會請食飯，上次都有請我，今次又睇下有冇得食，同大家匯報下（但當然唔係因為公司請我食飯我先推介啦，我有咁cheap咩？雖然幾好食）

18. 最後留意，我都整過隻Excel，但好似好耐冇update，都Attach埋上嚟。你鍾意自己玩下，或者等11月我update

最後，就梗係講「減辣」，「引專才」，「托樓市」。堅定流？

19. 最後，星期三李家超發表施政報告，大家最關心，「當然係有乜股炒」。除咗上面講最低工資極有可能加到40蚊（兼好可能一年一檢）。另外吹得好衡嘅，就係講會放寬非居民嘅15%印花稅。

20. 對於呢個東西，我係半信半疑嘅，雖然咁樣吹晒風好少係流料，但亦唔排除係有心人「放風」，「製造既定事實」，「迫」呀特首去做。雖然我亦好懷疑到底有冇人可以咁樣迫到特首做嘢（除咗大陸上面）

「托樓市」？諗多咗啦你

21. 你見出面好多講法，會認為係「托市」。我就認為唔係。因為根本冇咁嘅需要。樓價固然跌咗唔少，但你見唔見有乜大問題？冇問題喎。係咪傳說中嘅「人人負資產燒炭銀行好大鑊？」，又唔係喎。原因一早講過：過去N年，在政府政策下，可以買到樓嘅，全部係啲高收入嘅人，或者有一大舊錢嘅人，或者有父幹嘅人。仲要好多都係放一大舊首期　—　政府就係要保證即使樓市逆轉（好似而家咁），你班友都仲係供到樓—就算你供唔到樓變銀主盤都好，都唔會點累到銀行。

22. 咁所以，樓價跌，係咪政府好擔心？我相信唔係，甚至相當樂意見到。因為係真係假都好，似乎唔少港官京官，相信「高樓價」係社會不穩嘅原因。難得樓價跌落嚟，又冇乜造成問題，分分鐘對政府嚟講係好事。

23. 所以你見個傳聞，都係只係針對「非居民」（但當然會包埋大陸人）嘅印花稅。本地人買多幾層收租呀，或者買完下年就沽走嗰啲，依然唔會豁免。亦似乎係正路嘅，因為撤銷針對「非居民」嘅嘢，就似乎唔係「托樓價」，亦可以包裝做「吸引專才」—事實而家吹風嘅講法，就話啲友先繳，但住滿一年可以退返。有冇吸引力呀，邊啲先叫「專才」呢啲，就等佢地慢慢玩了。

咁但講到尾，「炒乜股先」？

24. 有關以上種種，可以睇返我今日在明報寫嘅文。Attachment有。

25. 但，咁嘅情況，當然係睇地產股。好難答你邊隻最好，想穩陣大路咪新鴻基16，樣樣有啲。見早排英鎊拖累股價跌想想撈嘅，就睇長實1113（實情兩隻股價都好硬淨）。賭性極重嘅，當然係睇美聯1200

26. 肯定嘅係，地產股，特別係有商場嘅，點都係仲有得玩。正係一日未同大陸通關，一日都有得玩。固然係遙遙無期，但又係見到必定炒預期，到真係通晒，就冇得玩了。

27. 例子？你睇今年國泰。原本升咗3成咁滯。但就係開始0+7同之後0+3開始，就散水了。