番外篇：今晚美國通脹數據 (Patreon)

番外篇：今晚美國通脹數據

1. 雖然近排講市你都未必想聽，咁但講得太多宏觀嘢心法嘢歷史嘢後，又講返啲貼啲嘅嘢。例如美國嘅通脹

2. 今晚（星期四）夜晚8點半左右會出。我覺得都有啲重要，費事殺你一個措手不及。

3. 可以留意下，近期美股對於啲經濟數字相當敏感。之前冇咁誇張。而又以對CPI最敏感。

4. 而又不幸地，今年嘅CPI數字，成日都高過預期（亦即係經濟師成日低估）。所以，自己小心

5. 首先，上次9月中出完個CPI數字，美股就大瀉。當時寫咗一篇，後來仲整咗一篇好長嘅東西，分析之後嘅通脹走勢，29張圖嗰篇。

6. 依然都係嗰句，通脹見咗頂，幾肯定。但似乎唔會好快回落，甚至有機會反彈（但不太可能高過之前嘅位）（6月 CPI 按年升幅係9.1%，7月8.5%，8月8.3%）

7. 另一方面，上面講嘅係headline inflation，極可能見咗頂，繼續回落。大約講過，大宗商品價跌（特別係油價，不過近期升返啲，無論係國際油價定美國嘅gasoline），供應鍊問題一路紓緩，照計點都會慢慢拉低通脹

8. 但核心CPI，就難講啲。住屋醫療之類，並冇好快咁回落。呢啲亦係拉高上一次CPI數字嘅嘢

9. 咁你可以睇下，嗰篇文，或者嗰堆圖入面講嘅嘢，係咪繼續。照計就係嘅，況且笠定頭盔，就算唔係，都不過係一個月。不過市場點反應就另一回事。

10. 咁然後，仲有兩單近期嘅東西。

11. 首先，9月尾出咗PCE嘅數字，唔係太靚仔。Headline PCE合預期，但核心PCE高過預期，又拖低咗美股（不過近期美股出乜消息都跌了）。但又留意返，呢一個PCE數字，亦都係8月嘅數字。咁既然8月嘅CPI數字震散咗個市（就係上面講嘅嘢），咁去到月尾出PCE，都預咗係咁情況

12. 亦即係話，雖然聯儲局係睇PCE—但個個月都係月中出上個月嘅CPI，月尾出PCE，所以一般股市反應最大都係個CPI。而PCE同CPI，度嘅嘢有啲唔同，數字水平都唔同，但趨勢好同步（29張圖嗰篇有講）。出完個CPI，PCE就唔會太大意外

13. 另一樣嘢，星期二晚出嘅上個月PPI數字，就一半半。Headline PPI就高逈預期，但依然連續三個月回落。核心PPI就低過預期。呢個PPI可以被視為「出廠」或「批發」嘅通脹，往往會傳導落CPI，但要一定時間

14. 好啦，講咁多，今晚又戲肉。到出9月嘅CPI數字。雖然實在好難估市場有乜反應。你話個數字靚咩？但聯儲局基本上都係維持返之前口徑，革命尚未成功。11月必定係加0.75，爭在12月你仲可以估下會唔會0.5。

15. 但你話數字差過預期咩？又不見得仲會再加大加息力度。因為都已經相當大了。

16. 無論如何，畀定數字你，出完再睇咩情況。但真係記住，一切睇預期，不過就算「好過」預期未必實升，「差過」預期未必實跌。唔好夾硬用市場反應演繹返數字。

17. 講咁多，如果照市場嘅預期呢，你就會見到：通脹回落。但核心通脹反彈。好定唔好就唔敢講，但聽落都似唔太好嘅趨勢。

18. 首先講headline CPI，上個月按年升8.3%．今次街估8.1%，TE估8.2%，都係估回落。「都話通脹見咗頂」

19. 但到core CPI，上個月升6.3%，今次街估升6.5%，TE估升6.4%，都係估反彈。正如上面講，聽落都唔係太好。

20. 以上係野村估嘅情況，留意佢係睇core CPI按月嘅升幅。不過重點係，留意主要都係由租金（粉紅色）帶動。而即使係按月升0.4%，都係比之前回落嘅。

21. 最後幾個圖，睇下一啲最新嘅趨勢。

22. 首先係NFIB嘅小企業調查，似乎啲小企業，加人工，或者提價嘅意慾，都係低咗嘅。呢個對通脹應該係好事

23. 仲有，上面講咗，供應鍊嘅緊張，係紓緩緊嘅

24. 又睇下出個咩數字