回報高一倍，不如投入多一倍 (Patreon)

回報高一倍，不如投入多一倍

ABCDE：投資年期，人工，儲蓄率，人工加幅，投資回報率

咁但，到底邊樣重要啲？都好難答。因為仲要諗你控唔控制到

儲蓄率（C）同投資回報（E）比較。邊樣重要啲？

「才俊」回報高一個開，但「呆子」儲錢多一個開，邊個贏？

20年後，「才俊」身家仲係少過「呆子」—之後就過頭，但邊個有20年？

我同你地講投資睇10年，已經當我超離地。咁你話邊樣重要？

鬼唔知本多忠勝儲蓄重要咩，但，知唔知真係爭咁遠？

其實，時間先係最重要，回報率高都好，都要十幾廿年先拉開

但，人生苦短嘛，儲埋啲錢六七十歲行唔郁，把托咩

死慳死抵，人生有乜樂趣？「才俊」肯定爽過「呆子」好多喎

講我自己嘅例子，我都唔係好慳嘅人。30歲前一個仙都冇儲到

投資都係綿花糖實驗，今日食少餐米芝蓮，第時舊錢變十幾廿萬

但忽然死咗，咪乜都蝕晒？況且，有啲錢不能慳

所以我唔係批判啲人消費—至少你爽咗—最笪係有錢剩又唔投資嘅！

回報高一倍，不如投入多一倍

1. 上次嗰篇大作，又係嘔心瀝血，但唔想幾日都冇文。寫篇短少少嘅。都係同上次篇大作有關。但冇乜心機睇嘅，照玩個Excel都得，呢篇文都有Attach。今篇用嘅呢個表可以在20221013嗰個tab找到

2. 言歸正傳，結論好簡單，就係標題呢句。如果計一般打工仔嘅方法，每月或每年儲啲錢去放入股市，就係個Excel計出嚟嘅嘢。

3. 上次嘅Base case，30萬年薪開始會投資（唔過份），儲到10%（唔過份，特別如果你計埋MPF），每年加3%人工（其實未必得），碌30年（記住持之以恒）。上次計過，會變到644萬。當然唔多夠，仲要未計通脹。但條數咁計

ABCDE：投資年期，人工，儲蓄率，人工加幅，投資回報率

4. 咁你唔睇Excel都估到，5個因素構成。ABCDE。A投資年期，B你嘅人工幾多，C儲蓄率，D每年加人工幾多，E投資回報率。咁都話，理論上5樣越大越好。有長生不老藥，清朝開始投資，每年200萬人工，不吃不喝儲到90%，年年加50%人工，每年50%回報，好快變宇宙大王。應該唔使丟到1949（視乎你係努爾哈赤年代開始定溥儀年代開始）

咁但，到底邊樣重要啲？都好難答。因為仲要諗你控唔控制到

5. 但，實際啲，咁邊樣「重要啲」？好tricky嘅問題。但我會換一換你嘅問題，會同你諗下，到底邊樣易控制啲。例如可能某啲嘢，運動玩音樂，天份最重要—但天份你控制唔到。所以你控制到嘅只係努力，訓練嘅方法，同埋搵好嘅人教你。

6. 講返投資，例如年期，一定有個譜的，最叻咪20歲開始儲到60歲？仲有，會同你睇下，到底每個因素你想提升，背後涉及乜。最後，就係列啲數字你睇，易過齋吹水。

7. 今次呢篇，就係一個好簡單嘅例子：儲蓄率（C）同投資回報（E）比較下。基本上ABCDE你可以任搵兩個出嚟玩，即係我可以寫10篇文（AB AC AD AE BC BD BE CD CE DE）

儲蓄率（C）同投資回報（E）比較。邊樣重要啲？

8. 而結論畀咗你，投資回報高一倍，不如儲錢多一倍。但真係咩？點解會咁？

9. 我地先睇數字。留意年薪（B）同每年加人工幅度（D）我唔郁，就當返最原本咁，30萬年薪，每年加3%。照計貼近現實

10. 好啦，Row 3，Base case（留意同上篇文嘅base case唔同），自己睇到啦。30萬年薪，每年加3%，當佢儲10%，年回報得好低嘅6%，若干年期後，就係嗰堆數

11. 咁我想做好啲，要點？年薪（B）同每年加人工幅度（D）都定實咗唔郁。當你躺平年年等人自動加。

12. 我地睇下儲蓄率（C）同投資回報（E），郁邊樣好？

「才俊」回報高一個開，但「呆子」儲錢多一個開，邊個贏？

13. 先睇「呆子」嘅情況，Row 4，即係同Row 3 base case相比，佢一樣拎6%回報。咁如果對自己數學有信心，唔計都知，「咪就係base case多一倍錢」。Row 4就係 Row 3 一個開

14. 但有趣嘅係，睇Row 5，「才俊」。雖然呢個才俊人工並冇特別高，但可能投資有心得，佢嘅回報係12%，比起Base case同「呆子」多成倍！咁但，因為覺得自己勁嘛，唔使點儲錢，就同base case一樣係儲10%。回報係你一個開喎，實掂啦？

15. 咁你見到，同Base case相比，佢當然勁好多，因為儲嘅錢一樣，回報勁成倍。仲有你留意，係越拉越遠嘅。15年佢可能多過base case 50%（但，係咪冇你想像中拋離咁多？回報多一倍，10年身家先多50%）。但去到30年，就會係Base case 3倍。聽落幾好

20年後，「才俊」身家仲係少過「呆子」—之後就過頭，但邊個有20年？

16. 不過，不方便嘅真相係，你將「才俊」同「呆子」比下？你見，即使「才俊」回報勁倍都好，20年後，佢都仲係少錢過「呆子」！要去到25年後先多過佢少少，30年後先拉開。咁耐先拉得開嘅原因？因為佢儲得少錢。

我同你地講投資睇10年，已經當我超離地。咁你話邊樣重要？

17. 而唔好忘記最大嘅問題：我同你地講，投資10年，好多人已經啞晒，好多讀者以為長線係兩三年。但你見到，即使你係「才俊」，都要玩到20年後先開始好過「呆子」

18. 見到冇？回報高一倍，不如儲錢多一倍—反正我估冇乜邊個可以投資堅持25年。其實我都好似未得

＝＝＝＝＝＝＝＝＝＝＝＝＝＝＝＝＝＝＝＝＝＝＝＝

19. 故事同數字講完，當然講啟示。

20. 實際上，你當然可以將我啲數字改嚟改去。例如你回報25%嘅，「咁好快變宇宙大王」。或者你話15%嘅，隨你。但記住個精神。

21. 然後唔講冷冰數字，講啲實戰啲嘅嘢

鬼唔知本多忠勝儲蓄重要咩，但，知唔知真係爭咁遠？

22. 首先，我估好多人都知，「鬼唔知儲錢重要咩」。咁但，有幾個問題可以講多啲。第一，你可能知本多忠勝。但未必知道真係爭咁遠。你回報高一倍，都要20年先打得低儲錢高一倍嗰個。應該係幾震憾嘅事

其實，時間先係最重要，回報率高都好，都要十幾廿年先拉開

23. 第二，你見到更殘酷嘅一樣嘢：其實時間先係最緊要！複利的威力嘛。如果同等投入（一樣人工一樣儲蓄率），咁你回報略為高少少，拉開二三十年，就爭好遠—但真係要時間！呢個例你都見到，你回報係人地一個開，但儲錢少過人，就要廿年上先拉得開。

但，人生苦短嘛，儲埋啲錢六七十歲行唔郁，把托咩

24. 咁但，係真係有一個好緊要嘅問題：鬼唔知本大好。但，人生苦短嘛，後生仔，死慳死抵，人生有乜樂趣？難聽啲講句，儲埋一大舊錢，老來時想做乜都冇衝動冇體力，有多錢又有乜用？

25. 呢個例子之中，明顯地呀「才俊」嘅生活，會開心過「呆子」。儲少啲錢嘛，即係洗得多啲（雖然在呢個例子入面，只係每個月多2500蚊）

26. 絶對明白，亦真係事實！所以真係好難強求。我亦自問唔係一個好慳嘅人。而家收入高過以前，儲蓄率當然高。咁但，在我人工低嘅年代，我都唔係一個好慳嘅人。

死慳死抵，人生有乜樂趣？「才俊」肯定爽過「呆子」好多喎

27. 咁但平時睇我寫文嘅大約知，直到2006年（做耆英分析員前），我差不多零儲蓄。講緊係28啦歲喎（我1978年出世）。咁2006-2008嗰兩句好景又花紅好，但唔止一次講過，金融海嘯輸晒。所以，30歲前，我都近乎係冇錢嘅。而家嘅錢，全部都係30歲之後先儲返嚟（中間仲要有啲波折，畀人炒咗呀，要錢搞台灣移民呀，買樓要首期呀之類）。咁正常人打工，可能22歲開始，你見我都遲咗至少8年—所以我叫你填嘅年期（A），唔係22歲開始計到退休，係由你「開始投資」計　—　事後諗，當然我後悔當年做乜唔早啲開始。但嗰時唔會識諗呢啲啦，正常嘅，後生仔唔多聽呢啲。不過而家我又有責任提醒後生嘅你咯，雖然你可能都係過一段時間先明。

講我自己嘅例子，我都唔係好慳嘅人。30歲前一個仙都冇儲到

28. 所以，儲唔儲錢，儲幾多呢啲，真係人人不同，好難一概而論。我覺得都係中庸之道，你唔使癲到日日食生命麵包做午餐（以前做分析員都有啲咁嘅友！），但若果你話個個月少少錢都冇剩嘅，又真係有啲問題。剩得一千得一千啦。

投資都係綿花糖實驗，今日食少餐米芝蓮，第時舊錢變十幾廿萬

29. 所以，真係唔好誤會，雖然儲錢真係好重要—咁但，你用咗嘅錢，畢竟都係享受咗嘛。無論係去食米芝蓮，去旅行，買個靚手袋，乜都好，你係有快樂的。投資碌大舊錢，都係為快樂啫！固然投資都係delayed gratification，棉花糖實驗。今日食少餐米芝蓮，第時可能碌到變十幾廿萬（即係咁講）—咁但，咪話及時行樂，花開堪折直須折，莫待無花空折枝。萬一儲到45歲，忽然死咗，咪蝕晒（係喎）。

但忽然死咗，咪乜都蝕晒？況且，有啲錢不能慳

30. 況且，你有啲洗嘅錢，可能小往大來，到頭嚟幫到你。我唔係咁功利，咁但即係永遠得朋友請你食飯，冇你請人嘅，怕且你人脈都未必好，錢唔係咁慳。同樣地，例如我訂甚麼Financial Times Economist嘅錢，我都從來唔會慳—唔係話你一定要訂（對剛出嚟做嘢嘅人係幾貴的），而係個道理。「即係我個Patreon都係要訂的」

31. 所以真係的，儲錢重要，但我唔會批判人地洗錢，點洗錢呢啲真係另一課題，而且真係好個人。

所以我唔係批判啲人消費—至少你爽咗—最笪係有錢剩又唔投資嘅！

32. 咁我打咁大段係想講乜？我係批判嗰啲，拎住舊錢，而唔投資嘅人！呢啲先最笨蝕章呀（不幸地有啲讀者都係咁）

33. 呢個Excel嘅例子，你會見到，持之以恒，同埋本金大好重要。咁你話人工低，真係冇計，「睇多啲職場胃腩」。你話你鍾意享樂（我都鍾意），冇錢剩，都冇法—但至少你都爽過。

34. 最奇怪就係嗰啲，唔係冇錢剩，但唔放落去投資嘅人！我唔知係做乜的。就咁拎住一大舊現金，做乜？

35. 當然佢地會話你知，等時機入市，但我見太多，都係等等等，等五年十年，你睇返個Excel，爭五年爭幾多？況且，舊錢碌得越大，最後往住係去到見周街啲人都贏錢，你先一鑊瞓晒落去　—然後就摸頂。例如可能你係儲埋啲錢，2021年先買晒落去。咁而家點算？冇得點算。但如果你係之前，2010-2021年，不停有買嘅，咁你早段嗰啲，都仲一路有贏緊錢丫。

36. 下篇會再寫，但話說回頭，回報率高一倍，你估咁易？我話你知，其實個「投資回報」（E），唔沚冇你想像中咁重要（睇多次呢篇文嘅題）。仲有，其實係好難控制嘅！你去邊度變高啲個回報？一定有代價的。否則買美債嗰啲人係傻仔？

37. 雖然，ABCDE，冇一樣嘢係容易。但相對地，ABCD，年期，人工，儲蓄率，加人工嘅幅度，係比「回報率」 容易自己控制到嘅.

38. 明明話寫短少少，結果又三千幾字。

39. 下篇再解