世紀巨著：「上岸」舊錢，點搞出嚟？（唔係計「要幾多」，呢個舊文講咗） (Patreon)

世紀巨著：「上岸」舊錢，點搞出嚟？（唔係計「要幾多」，呢個舊文講咗）

送埋隻Excel畀你，自己玩一次是很重要的

你自己整隻Excel都得，但我幫你慳時間。你時薪都唔止100蚊啦

多閱讀嘅重要

Base case，有乜啟示？

幾錢人工？一年加幾多？儲到幾多？拎到幾多投資？碌幾耐？一年回報幾多？

唔知用乜數字先啱？放心，下篇文詳解

成個系列嘅文，就係睇下呢堆嘢點影響你「埋單」嘅數

梗係每年拎到100萬買股票，年年50%回報，由清朝開始碌最好啦！

咁但，都真係可以睇下邊個要素「重要啲」，至少睇到sensitivity

首先用Base case，解你知啲數係乜，點計出嚟

下篇先解，點解我用呢啲數字，你唔鍾意可以點改。用乜先比較合理

人工扣唔扣稅？扣唔扣MPF？儲蓄率會變，咁點？投資同儲蓄有乜分別？

一年拎3萬投資，每年多3%，而回報10%。玩30年，埋單幾錢？

「幾錢先夠退休」？舊文提過，4% rule，呢度略解

多數人掉轉計，見「埋單數」唔對路，就想ABCDE谷盡啲

儲唔到又點？又唔會死嘅。好多人都係咁。

食嚟食去都係面嗰漏，係咪有必要咁保守呢？不如Die Broke算數？

教你點玩個Excel，條數點計出嚟，睇下有乜啟示

最後「埋單」嘅錢，80%嚟自「錢滾錢」。即係1蚊變5蚊。好差咩？

如果唔係30年，係10年，又有乜後果？所以，Time is your friend

後記：覺得好睇嘅，記住叫朋友訂

世紀巨著：「上岸」舊錢，點搞出嚟？（唔係計「要幾多」，呢個舊文講咗）

1. 呢篇長長地，但唔分兩篇了，一氣呵成。不過在Facebook Page嘅導讀我會分兩日出，吸多啲讀者。

2. 寫咗一輪「宏觀嘢」，又加息又通脹，又貨幣戰爭，又英國，又港紙聯匯。轉下口味。雖然未寫「亞洲金融風暴」，將會寫，但真係轉下口味。

3. 股市繼續唔掂，市況冇乜好講。雖然我好肯定而家係應該繼續買股票，而我亦照舊個個月買股票，但亦唔想不停重覆。同意或明嘅就會明，唔同意唔會照做嘅，再講都未必好有用。咁所以，或者換個方法？

送埋隻Excel畀你，自己玩一次是很重要的

4. 今日呢篇（仲會有續集或第三四集），我唔敢講話係寫得最好，或者最多嘢學。但好可能係其中一篇最有意義嘅文。務必剪存。

5. 呢篇文隻Excel亦十分重要，Attachment有，請剪存，平時唔玩嘅都要玩下。唔係好難嘅嘢，你搵你嘅理財顧問（即係賣基金賣保險畀你嘅友），甚至上網，都不難搵到類似嘅東西，甚至你可能已經見過（係咪好似啲保險表咁呢！）。但，原創係好重要嘅，因為你可以自己玩。仲有，呢個東西我整出嚟，我每一步都好清楚，而唔係解一啲人地整出嚟嘅嘢。

你自己整隻Excel都得，但我幫你慳時間。你時薪都唔止100蚊啦

6. 你自己整，都係整到的，甚至整得「靚」過我。問題係，你整點都要一粒鐘啦？你嘅時間唔值錢咩？咁呢個Excel，都至少值返一兩個月嘅月費！仲有，只有呢隻嘢Excel唔夠，冇我嘅解說，一樣得物無所用。

多閱讀嘅重要

7. 言歸正傳，係睇咗信報畢老林嘅文，先有呢篇文。重點就係呢個表，你save低佢，可以試下理解，唔明亦冇所謂，我之後會好詳細咁解。你有訂信報可以睇原文，我費事copy上嚟—但其實冇乜必要睇原文。首先，我會解返晒畀你聽。第二，唔敢話我寫得好過佢，但我肯定會寫得更廣泛更深入。第三，我有埋隻Excel．第四，「佢都係參考英文post啫」。話埋畀你聽，原本應該係呢篇。

8. 呢度插播幾樣嘢。第一，佢成日都quote呢個blog，A Wealth of Common Sense，十分好睇，雖然我都冇時間成日睇。第二，個作者出咗本同名嘅書。唔止，佢仲有本書叫Everything You Need To Know About Saving For Retirement，仲有中文版，畢老林嘅例子亦出自呢本書。我冇睇過呢兩本書，但相信相當好睇

9. 仲有，明白大家都忙，但話你知，多閱讀有好處。至於睇乜？上一段已經介紹咗兩本書一個Blog（你鍾意睇畢老林都得，整體都幾好）。更重要嘅係，你有冇諗過，點解我會搵得返佢篇文出自英文Blog邊篇post？佢冇提過，你可以試下自己查，都唔係咁易，因為佢仲要特登改咗個主角嘅名！「但難逃我法眼」，而一早亦有台灣媒體寫過。

10. 故事嘅教訓係乜？佢睇得多嘢，自然可以寫到高質啲嘅文。而又因為我一樣睇得多嘢，我唔止可以build on 佢篇文去寫多幾篇，我甚至連原文都搵得返。呢啲嘢在我本書有寫過，你睇得夠多，往往對你職場有幫助。你對家，你老細講嘅新奇嘢由邊度睇到，你會知。欠而久之，佢擺尾你就知佢想點了。

Base case，有乜啟示？

11. 好啦，講返正題。首先，呢隻Excel，我測試過一次，完全可以複製返佢個表—你可以double check 下。啲數字爭少少，但主要係年頭年尾嘅問題，我唔會再搞，你有心機可以幫我搞。反正實際數字唔太重要。

12. 言歸正傳，你見到呢張圖，呢個Excel嘅Default，就係我講嘅「Base Case」，以後都會refer呢個 base case。陣間我會重貼又重貼，方便你。

13. 呢張圖講嘅嘢，如果關心自己財富嘅，唔會太陌生。亦唔太難解。好可能係好多人嘅寫照（至少我係）—唔係講啲數字，係講個過程。

幾錢人工？一年加幾多？儲到幾多？拎到幾多投資？碌幾耐？一年回報幾多？

14. 即係，睇下你幾錢人工，可以儲到幾多錢去投資，你個投資碌幾耐，仲有你每年投資嘅錢可以升幾多（如果你嘅儲蓄率不變，咁亦即係你每年加幾多人工），最後最重要而最多人亂嚟嘅：你投資回報有幾多%一年？

唔知用乜數字先啱？放心，下篇文詳解

15. 唔知應該用乜數字？放心，之後嘅文我會逐粒數同你啄，成個系列嘅文，就係睇下呢堆嘢（ABCDE），點影響你最後「埋單」（唔係死咗，係退休或上岸）嘅錢，即係XXX個數。

成個系列嘅文，就係睇下呢堆嘢點影響你「埋單」嘅數

梗係每年拎到100萬買股票，年年50%回報，由清朝開始碌最好啦！

16. 你唔玩Excel都知，「全部嘢梗係越大越好啦」，最好幾百萬年薪，每年加50%，然後不吃不喝可以100%買晒落去，投資回報就100%一年。咁其實都唔使由清朝開始碌，唔使有幾百歲，你好快就有錢過Elon Musk（而你鍾意可以在呢個Excel玩！除咗清朝嗰部份，「因為我設定最多只係40年」，遲下講點解）

咁但，都真係可以睇下邊個要素「重要啲」，至少睇到sensitivity

17. 咁但，其實我地係要睇，呢堆因素，邊個「重要」啲？睇開我嘅文，應該知呢個問題就咁答一個字母，冇乜意思，但我地可以睇下，到底個「埋單數」XXX，對呢啲ABCDE嘅sensitivity係點？我好搏命，一年人工加到10%，而唔係base case嘅3%，咁會點？咁梗係爽。但有幾爽？同樣地，我投資回報有15%（先唔好問點嚟），而唔係base case嘅10%，咁肯定爽，但有幾爽？同之前嗰句，「人工加多啲」嘅情況，又邊個爽啲？

18. 你見信報個表，都係講呢樣嘢。佢講儲蓄率，同埋起步遲。但我會更加全方位，全部講晒！！！不過，會係之後嘅文。

首先用Base case，解你知啲數係乜，點計出嚟

19. 呢篇回歸基本，教你睇咗個base case先，教埋你睇隻Excel，

20. 首先講下啲ABCDE Input，各自代表乜，同埋有乜要注意。篇幅關係，下一篇我先解，點解我用呢啲數字做base case，而你唔同意嘅，想多啲少啲嘅，我都會大約畀個range你，話畀你知乜嘢數字先唔脫離現實．「即係你唔好投資回報嗰格填50%，OK？」

下篇先解，點解我用呢啲數字，你唔鍾意可以點改。用乜先比較合理

21. 由B講起先，就係你一年嘅人工。幾時嘅人工？係你「開始投資」時嘅人工，並不一定係你初入職嘅人工（所以唔係假設你一開頭有30萬一年，當然有嘅更好）。因為我見呢度嘅讀者，冇乜剛畢業嘅（有嘅恭喜你，因為你有最大嘅優勢：青春）。況且，亦好多人剛出嚟做嘢時唔會點儲錢，甚至根本儲唔到錢。或者想享受下先，正常嘅。又，理論上，呢度填嘅人工唔使扣強積金—因為強積金都會放去投資！仲有，使唔使扣稅？答案係：隨你，下面C格調整返就得

22. 然後到C，大約就係你嘅「儲蓄率」，即係人工可以儲幾多%嚟投資。記住，在我嘅理念，開支以外嘅嘢就係投資，所以投資同儲蓄係同一回事。但呢度冇計買樓，因為好難計。

人工扣唔扣稅？扣唔扣MPF？儲蓄率會變，咁點？投資同儲蓄有乜分別？

23. 實務上，人生唔同階段，儲蓄率實會變，一般人工越高，儲蓄率就高（萬五蚊人工點儲錢？），但亦可能隨住你結婚生仔會變，自己大約畀個長期平均啦。我呢度用10%，係相當低嘅。下篇詳細講

24. 總之，B同C夾埋，就會變到下面黃色嗰格，就係你每年可以拎去投資嘅錢。所以你上面唔使爭拗個收入計唔計稅，總之黃色嗰格嘅數字決定一切。你100萬人工但交10萬稅最後剩返20萬投資嘅，你鍾意100萬 X 20%又得，90萬X22%亦得，總之最後黃色格嘅數字，係你可以自由拎去投資嘅錢。

25. D，就係你每年你投入去投資嘅金額，銀碼可以增長幾多。由於假設咗個「儲蓄率」不變，所以呢個應該就係你每年平均加人工嘅幅度。又係自己衡量下，我用3%．「照計呢度啲讀者唔止」

26. 最後，最關鍵嘅係E，每年投資回報。記住，係平均喎。勁嘅年份，你一年三四成唔係問題，甚至一個開都得。但，平均喎！應該填乜數，下篇文解。但你見我用10%，好似都幾保守（其實未必）。

一年拎3萬投資，每年多3%，而回報10%。玩30年，埋單幾錢？

27. 總之，一年30萬人工（一個月2萬5），儲10%，開頭每年拎到3萬投資，之後每年人工加3%（所以投資金額都每年多3%），然後一年10%回報。玩佢30年，會變幾錢？

28. 照計你睇其他書或文，或者網上計算機都會計到。就係644萬。「麻麻地咋喎」，但呢個都未係重點

「幾錢先夠退休」？舊文提過，4% rule，呢度略解

29. 重點幾樣嘢。首先，very sad，呢個644萬，「係30年後」，未計通脹！死未。

30. 而另外，多數人，係work backwards，先估自己「埋單」要幾錢（即係，幾錢先夠退休）。見到計條數唔多對路，就希望ABCDE之類調高啲（例如博命啲工作，加多啲人工，又或者儲多啲錢）。

多數人掉轉計，見「埋單數」唔對路，就想ABCDE谷盡啲

31. 咁呢個數要幾多？十分粗略地，你可以睇返舊文寫財務自由（Financial Independence, Retire Early，又叫FIRE）。入面提過4% rule。呢個法則應該OK，大約話你知，你舊「埋單錢」，每年拎4%出嚟洗，就應該可以永續用到死，仲應該可以keep up with 通脹。4% rule，又可以理解做「食嚟食去面嗰浸」，你靠啲投資回報（或收息）就生存到，舊「埋單錢」唔使點郁。

32. 掉轉講亦即係，你舊「埋單錢」嘅4%，應該要夠你開支。又即係話，25倍！你要儲你開支25倍嘅錢，就應該幾穩陣。都唔會太易。咁你話，儲唔到點？咁又唔會死人嘅，可能都夠洗，但未必咁「穩陣」咯。永續唔到，慢慢要食個老本，而唔係永遠「面嗰浸」—咁未必咁灰，好多人都係咁，又唔係個個瞓街好淒涼。

儲唔到又點？又唔會死嘅。好多人都係咁。

食嚟食去都係面嗰漏，係咪有必要咁保守呢？不如Die Broke算數？

33. 甚至有啲人（主要鬼佬）認為，你食嚟食去面嗰浸，即係死嗰時仲有一大舊錢，係「失敗」，「浪費」。特別係冇小朋友嘅，留低啲錢做乜？最perfect嘅，當然係Die Broke—死前用晒啲錢，一個仙都唔剩。但實際上當然好難，因為你唔知自己幾時死。況且，有仔女有老公老婆嘅，又可能想留啲錢，呢啲就更複雜了。

最後，教你點玩個Excel，條數點計出嚟，睇下有乜啟示

34. 最後，你可以大約睇下條數點計出嚟。其實可以一條式過，「我假假地都讀精算」，但大家知我作風，唔會賣弄啲深嘅嘢。我就用最原始嘅方法，拆晒畀你睇，每年嘅數係點，因為咁你先會明白晒成個過程。

35. 例如睇base case，我綠色嗰行。故事主角第三年嘅故事。最初年薪30萬，每年加3%人工，去到第三年，佢年薪係30萬 X 1.03 X 1.03，即係31萬8。佢儲到10%，即係嗰年拎咗3.18萬投資。因為投資年期30年（可能佢做30年嘢，或者做40年嘢但頭10年唔儲錢），咁呢舊錢，去到「埋單」日，仲有27年。好啦，因為10%回報，所以27年後，呢3.18萬，滾到變42萬（嘩！係呀，複利的威力，但唔好忘記，27年後嘅42萬冇今日咁值錢，所以更加要投資）。

36. 如是者，計晒每一年，有幾多錢碌落去，啲錢滾到「埋單」係滾幾耐，會變幾錢。加埋晒佢，就係條「大數」（如果好聰明嘅讀者，會估到我之後就講畢菲特嘅「滾雪球」）

最後「埋單」嘅錢，80%嚟自「錢滾錢」。即係1蚊變5蚊。好差咩？

37. 你仲可以留意下右上角。在呢個情況，你見到最後埋單嘅644萬，大約得20%嚟自「投入」嘅錢，有80%係嚟自「投資回報」，即係錢滾錢。十分不負責魋咁講，其實，即係放1蚊落去，最後收5蚊—又好似唔係咁差咋？

如果唔係30年，係10年，又有乜後果？所以，Time is your friend

38. 有趣嘅係，你可以睇埋啲ABCDE，會點影響FG嘅比例。照計唔玩Excel都估到。如果你個年期得10年，其他嘢不變都好，首先「埋單」舊錢就細好多。只得54萬（base case係644萬！你得返一成都冇）。因為兩個原因，首先，你投入嘅錢少好多（年期短，仲要人工未加到高，雙重影響），第二，因為年期短，你嚟自「錢滾錢」嘅效應，都低好多

39. 另外，唔睇大銀碼都好，唔使玩Excel都估到，同base case比，肯定嚟自「錢滾錢」嘅比例都低好多—事實上，嗰54萬，得三份一嚟自「錢滾錢」，三份二係嚟自你本身「儲」

40. 我諗呢個好簡單嘅例子畀你見到，點解Time is your friend。但今個系列嘅文，當然唔止講咁少嘢。其實之後幾篇先正題。

後記：覺得好睇嘅，記住叫朋友訂

41. 最後補充，Excel個年期最多就40年。咁你鍾意20歲開始投資到80歲嘅，自己拉多20行。仲有，當你填A嘅年期唔夠40年，例如base case嘅情況（30年），咁30年以後嘅數會變晒零，嗰啲計數好似加咗嘅人工你亦唔會拎到，因為你已退休埋單。見唔見到31 32年所有嘢都變零了？

42. 冇法唔講句，呢隻Excel真係堅，呢篇文真係堅。你同意嘅，真係叫你朋友訂吧。因為呢幾篇應該人人合用：你未必會自己買股票，但你總會供強積金！

43. 除咗揀公司，問幾時見底，會唔會股災。其實呢個系列嘅嘢，圥係好多人忽略咗。你問我下年會點，唔知。會唔會衰足10年？唔知。但總唔會全世界所有股市衰足30年—即使會，其實你「分段投資」，都係有正回報嘅。

44. 不過呢個係另一個課題了。唔信嘅，你咪拎返美股「迷失十年」（2000-2010）嚟玩，雖然指數十年原地踏步，但當你每年買SPY，埋單都仲有啲回報嘅，因為「平均成本法」，平嗰時你買得多嘛。同樣地，過去好多年恒指原地踏步，但你月供盈富基金，都有些少回報嘅—跑輸美股好多，甚至跑輸通脹，另一回事，但真係唔係零回報咯（仲要有息收）。

45. 寫完呢篇，應該又抖返一兩日，因為呢篇長度等於平時兩三篇了。