［財不入急門］點解我唔買TQQQ（及任何槓杆ETF） (Patreon)

雖然話氣氛差，但唔少讀者想撈底，好事

蠢蠢欲動想入市冇問題，但唔係買TQQQ

點解我從來唔買TQQQ，亦唔會叫你買

原因好簡單，搵笨。升時跟唔足，跌就跌突。唔上唔落都要輸錢

最大問題唔係杆槓，而係佢只係極短期—咁你不如做孖展算啦

點解受歡迎？因為人人都貪心，又冇耐性。就係利用你呢啲嘢

買大賠大，想搏盡啲，輸咗心甘命抵，有乜唔啱？

叫你stay invested，係講100%，唔係叫你借錢。但TQQQ仲衰過借錢

買得大，但係咪賠得夠大？輸3倍你認命，但如果再輸多啲呢？

唔夠錢又想買多啲咁點？搵多啲錢咯。否則人人發達，唔會富者越富

Fact：過去一個月，QQQ平手，TQQQ輸3.5%．放大幾多倍？

Fact：今年QQQ跌31%，TQQQ跌76%，「有人話輸就唔足3倍」，好著數

問題係，呹咗31%嘅嘢，要升返46%。跌76%呢？要升返317%！幾多倍？

肯定你借孖展買QQQ，都係著數過咁樣買TQQQ

Fact：如果升市呢？五年QQQ升82%，TQQQ 呢？93%。幾多倍？

點解會有咁嘅問題？簡單數學啫。

放大咗個損失，你個本金好易縮得好勁　—　要上返去就極難

跌市又死，上落市亦死。除非日日升。但如果日日升直頭借盡孖展啦

兩年前10月2日到而家：QQQ 平手，TQQQ輸35%

兩年前嘅5月29日到而家：TQQQ平手，QQQ升咗18%

如果月供呢兩隻又如何？計埋畀你睇

都未同你計心理：跌到3倍，你仲唔「止蝕」打靶？

雖然話氣氛差，但唔少讀者想撈底，好事

1. 雖然美股星期五反彈，甚至已經連升3星期，但我目測投資氣氛仲係好差—留意呢個唔係壞事，係好事。氣氛好時你買落去先易中伏。我只係指出氣氛差，冇話氣氛差「所以」會再跌，或者「所以」你唔應該買。唔好聽一半唔聽一半，唔好想當然。

2. 更有趣係，近排唔止一個讀者，又嚟問我TQQQ。可能見個市跌得多，有啲讀者又開始蠢蠢欲動想入市，有人話覺得買TQQQ好吸引。蠢蠢欲動想入市絶對冇問題，我唔會話而家係「最好嘅時間」（事實點會知？甚至可能根本冇「最好嘅時間」），但而家買當然絶冇問題。

3. 另外雖然你聽啲人講好似好灰，但一樣大把人係想買甚至買緊貨。亦都唔出奇，好多人冇留意一個好簡單嘅常識—任何買賣，都要有買有賣，跌30%都好，都係有人同你接貨，否則就唔止跌30%啦。而接貨嘅人當然係睇好先會買。所以幾時都係有人睇好有人睇淡，有幾多賣家就有幾多買家，只係雙方有幾進取咁解，亦只係雙方係用乜嘢價格買賣。你睇機構投資者嘅，價格夠吸引咪賣家都變買家。

蠢蠢欲動想入市冇問題，但唔係買TQQQ

4. 不過，想入市，點解要買TQQQ？我係從不主張嘅。

5. 我剛剛篇文寫過，入面我就咁寫話「唔好貪心買3倍」，就有讀者唔多明，其實我係指啲2倍或3倍槓杆嘅ETF，最多人問最多人講就係TQQQ，但以下寫嘅嘢，對所有槓杆ETF都適用，港股美股，任何指數都係。

點解我從來唔買TQQQ，亦唔會叫你買

6. 再加上之前耐唔耐就有讀者問，好唔好月供TQQQ（當然唔好）。所以呢度一次答，點解我從來都唔會買TQQQ

7. 實情呢個課題以前都寫過至少兩次（呢度，呢度），但唔算太詳細。既然不停仲係有讀者問，今篇就詳細解。有理論有實證有圖有數字有Excel玩

原因好簡單，搵笨。升時跟唔足，跌就跌突。唔上唔落都要輸錢

8. 原因都好簡單。搵笨。升嗰時升唔足，跌時就跌得多，而唔升唔跌時都要輸錢。都真係幾搵笨嘅嘢。唯一你應該買，就係炒Day Trade，但我係唔會嘅。

9. 講落去之前，可以講呢啲槓杆嘢本質嘅問題—最大嘅問題唔係槓杆，而係佢地專係畀短期用（你連呢點都唔知嘅，就更加唔應該買。發行商實會警告你的，費事你返去鬧）。偏偏時間先係大家最大優勢，你一買呢啲嘢，就蝕咗呢個優勢。

最大問題唔係杆槓，而係佢只係極短期—咁你不如做孖展算啦

10. 但點解咁受歡迎？好簡單，因為啲友都係貪心嘅。咁人地就利用你呢啲貪念搵錢了。

點解受歡迎？因為人人都貪心，又冇耐性。就係利用你呢啲嘢

11. 記住，一般越多花臣，聽落越神奇嘅嘢，多數都係有啲伏嘅。

買大賠大，想搏盡啲，輸咗心甘命抵，有乜唔啱？

12. 不過好多人都仲係唔明，喂，埃汾話stay invested嘛。早排篇文先話要買得大嘛。買得大賠得大有乜問題？

13. 當然係要stay invested，但只係叫你100%，你有嘅錢買落去，但唔係叫你做槓杆（TQQQ就已經槓咗杆，你唔知啫）。

叫你stay invested，係講100%，唔係叫你借錢。但TQQQ仲衰過借錢

14. 仲有，買得大賠得大啫，但賠得係咪「夠大」？而當你輸嗰時，又點計？仲有，唔上唔落嗰時呢？

買得大，但係咪賠得夠大？輸3倍你認命，但如果再輸多啲呢？

15. 好多人以為就係好似賭場咁，我買大10倍咪賠多10倍，當然輸多10倍，「但心甘命抵」。「打咪咪打和」　—　但TQQQ之類，根本唔係咁回事。

16. 退一萬步講，真係想買大啲嘅，你去做孖展，去借錢，點都仲好過買呢啲東西。陣間計畀你睇—但我唔係叫你做孖展或借錢買股票，只係話你知，買TQQQ係更加差。

唔夠錢又想買多啲咁點？搵多啲錢咯。否則人人發達，唔會富者越富

17. 唔夠錢點算？冇得點算。你可以提高你嘅收入，但冇可能話我買得細過人但又想總回報勁啲，冇免費午餐的。

Fact：過去一個月，QQQ平手，TQQQ輸3.5%．放大幾多倍？

18. 理論講完一大輪，睇實際數字。

19. 首先，QQQ費用係0.2%，TQQQ係0.95%—但呢個唔係最大嘅問題—同TQQQ最大嘅問題畀，呢個只係好細嘅問題

20. 另外，慎防有人唔知，QQQ其實係追蹤納指100，唔係納指（幾千隻成份股）。你睇幾日冇乜分別，但睇長啲會見到納指100同納指都有啲分別。冇話邊個「好啲」。但呢度講明，因為會影響計數。

21. 而同樣地，TQQQ都係複製納指100嘅每日3倍回報。特別留意係「每日」，因為拉長就走樣

22. 咁首先留意，隻QQQ，跟Nasdaq 100，係跟得好足嘅，唔使拗。你見兩條線差不多一樣，5年回報亦差不多一樣

23. 然後我地睇QQQ同TQQQ比

24. 一日，十分好，QQQ 2.4%．TQQQ 7.1%，差不多3倍的—亦係TQQQ嘅目標，咁都達唔到就死得

25. 到五日啦喎，QQQ 3.3%，TQQQ 9.4%。唔係好夠3倍，但還好

26. 好啦，一個月，開始走樣．QQQ近乎原地踏步，TQQQ要輸3.5%，放大咗幾多倍？

Fact：今年QQQ跌31%，TQQQ跌76%，「有人話輸就唔足3倍喎」，好著數

27. 六個月，輸16% 同52%嘅分別喎，唔止輸3倍的。你唔好以為16 *3 即係48，咁都唔係爭好多。魔鬼在細節。你輸16%，升返20%就回家。但你輸咗52%，你要贏返109%　—　呢度你要「追返」嘅嘢，邊止3 倍？5倍幾

28. 年頭到而家呢（一年唔講了，反正差不多）？QQQ跌31.4%，TQQQ跌76%—會唔會有人以為，「76% 冇31.4% 嘅3倍喎。咁咪即係損失冇放大3倍？」「又唔係跌咗94.2%」

問題係，呹咗31%嘅嘢，要升返46%。跌76%呢？要升返317%！幾多倍？

29. 你用上面講六個月嘅計法就知。輸咗31.4%嘅嘢，你要升返46%先回家。但輸76%嘅嘢，你要升返317%！！

肯定你借孖展買QQQ，都係著數過咁樣買TQQQ

30. 呢度插播，真係咁爛賭嘅，寧願你借孖展。而家孖展富途好似4.8%，IB都差不多（IB呢排跟美聯儲加息而加咗，但富途冇加）。私人貸款就一度度，可能都係咁上下，點都10厘息有找。

31. 我費事慢慢計，但如果你堅持要做大幾倍exposure，咁就算計埋貸款嘅利息都好，借錢去買QQQ，都係好過你買TQQQ—但再講一次，唔係鼓勵你咁做。只係話你知買TQQQ有幾衰

32. 於是梗會有人反駁，你上面啲例子都係跌市喎（其實唔係，五日咪升，仲有一個月都只係原地），但如果升呢？

Fact：如果升市呢？五年QQQ升82%，TQQQ 呢？93%。幾多倍？

33. 所以，留返五年，最尾先講。呢個先最堪玩味

34. 五年你見，QQQ升82%。TQQQ呢？93%咋！何來有三倍？只係多少少。但輸錢嗰時，你輸多好多，往往唔止三倍（上面嘅「回家計法」咪示範咗）。

點解會有咁嘅問題？簡單數學啫。

35. 點解會咁？上面一路講咗，人地講明你知，TQQQ嘅「三倍」，係指每日嘅回報三倍。一拖長，實走樣　—都唔使好長，上面例子，一個月已出晒事。實情要嘅，五日都可以走一大截。

36. 點解會咁？送個Excel畀你玩就明。有埋圖你睇，我費事解好詳細。你鍾意可以自己作啲數字落去感受下

37. 先睇呢一個表，如果連跌三日，2% 4% 6%嘅，QQQ就輸11.6%，TQQQ輸32.2%，「唔足三倍呀可？」。但上面咪解咗幾次，你睇下回家路？QQQ要升返13%，TQQQ要升返47%—難度唔止3倍

38. 咁你話，如果連升三日呢？亦係最多人講嘅例子。

39. 呢個，亦係唯一一個TQQQ有著數嘅情況，因為你個本金倍大得快咗。連升三日，2% 4% 6%嘅，QQQ回報12.4%，TQQQ 40.6% —係多過三倍喎。如果你啲數再大啲仲勁

40. 問題係，有幾多咁嘅情況？你睇上面講五年嘅例子就知。總係上上落落。

41. 如果又升又跌呢？咁就死得。呢個例子，QQQ差不多唔使輸錢。但TQQQ要輸1%—如果拉得長，可以爭好遠。甚至都唔使好長，上面講「一個月」嘅真實例子你咪見到。

42. 而個波幅更大嘅，個分野就更多明顯

放大咗個損失，你個本金好易縮得好勁　—　要上返去就極難

43. 一切都係因為，當你個負回報放大3倍時，你個本金就縮咗好多，就極難追返上去。

跌市又死，上落市亦死。除非日日升。但有幾可？如果日日升直頭借盡孖展啦

44. 亦即係話，除非日日升，否則呢，跌市TQQQ固然死，但上落市都係死。除非你持有嗰排日日升，但有幾多咁嘅機會？

兩年前10月2日到而家：QQQ 平手，TQQQ輸35%

45. 仲唔信嘅，又睇多兩個例子，真實嘅數字

46. 第一個例子，睇下兩年前嘅10月2日到而家。點解呢個日子？因為兩年前10月2日，納指100就同而家差不多水平。咁你見QQQ都係差不多一樣價格

47. 但TQQQ呢？輸35%！係冇輸錢，同輸35%嘅分別。而唔係買得大賠得大

兩年前嘅5月29日到而家：TQQQ平手，QQQ升咗18%

48. 第二個例子，有啲相似，唔同角度。今次睇兩年前嘅5月29日。

49. 點解揀呢日？TQQQ由嗰日到而家，差不多就係一樣價

50. 但同一時間，QQQ升咗18%—而TQQQ嘅回報，唔係放大咗佢三倍，而係零。

51. 點解會咁？好簡單。因為現實中，啲升市唔會好似上面做嗰個Excel咁，日日不停升。總係有啲pull back，上上落落。女要你唔係日日係咁升，你中途少少調整，就會令隻TQQQ走樣—而邊有升市係一條直線咁升？

如果月供呢兩隻又如何？計埋畀你睇

52. 最後，有人講月供。我又幫你計埋。數字你可以上Yahoo Finance搵。幾好的

53. 個Excel不多解釋，你可以拎去用，其他股票都得，好易計。我就只計2年同5年

54. 先睇2年，供足2年QQQ，你發現要輸18%。TQQQ呢？輸54%。今次真係接近3成喎。個原因，因為你係每個月咁買，相對地近期買嗰啲，個「時間侵蝕效應」冇咁明顯（都話時間一長TQQQ就走樣）。另外，亦因為低位你都有買啲TQQQ

55. 不過，又係嗰句，到你睇返要追幾多時，就係21%同117%嘅分別了

56. 然後睇5年，更加簡單。一句講完：月供QQQ就賺18%，月供TQQQ就輸8%。你話大唔大分別？有冇真係「倍大」你回購?

都未同你計心理：跌到3倍，你仲唔「止蝕」打靶？

57. 最後，以上只係計死數，都仲未同你講個心理嘅影響。跌18%，有啲人可以冇乜嘢，我都冇乜嘢。但到你隻嘢跌54%，一定影響你心情，仲好可能令你堅持唔到，會「止蝕」打靶

58. 所以我完全唔明，點解啲人咁鍾意買。因為冇錢？咁都冇計架喎。唔會有啲咁嘅神奇方法，令你唔使付出，而可以得到你心中嗰個「如果我有錢」嘅金錢回報。否則，仲有人窮？每個月儲得100蚊嗰個一樣想有你咁嘅金錢回報，咁佢又買隻10倍100倍槓杆就得？咁仲有窮人？

59. 另一樣，當然係因為貪心，同埋急。想好短時間升好多。但財不入急門，係冇咁著數嘅嘢。你想高回報，就要坐得耐

60. 同埋，買得大．但做法係你將啲錢放晒去投資　—而唔係有50萬然後拎10萬出嚟買TQQQ—明顯地你50萬買晒QQQ會好得多