索羅斯狙擊到英倫銀行要退出ERM，咁港紙又會唔會？ERM同港紙聯匯，有乜相似，又有乜唔同？ (Patreon)

索羅斯狙擊到英倫銀行要退出ERM，咁港紙又會唔會？

ERM同港紙聯匯，有乜相似，又有乜唔同？

今日，或者1998年嘅香港，同當年英國，又有乜相似，有乜唔同？

鍾意嘅，仲有篇1萬字（！）聯匯文畀你重溫，嗰篇文出書都得

匯率制度如著衫，冇完美嘅，唔同人，唔同場合，唔同年代，有唔同需要

只能顯場補短。靚仔好身型，著乜都型。太醜嘅，著乜都唔會變男神

聯匯好似仲「實」過ERM

1972年，港紙已經開始掛美金，唔掛英鎊。嗰年乜事？

ERM係大家傾，港元聯匯係單方掛。所以陳茂波至少啱咗一半

掛美金咪掛美金，點解要「優化」聯匯，留返7.75-7.85嘅水位？

ERM 下英倫銀行有自己貨幣政策。但港元聯匯下香港冇呢回事

但最唔同嘅係：外匯儲備。到底係乜東東？有乜用？幾多先夠？

斯里蘭卡冇晒外匯儲備入唔到口，「但香港人好撚有錢」

另一用途，當然係干預匯率。日本會，瑞士會，英國都會。

咁香港，當然係不停要干預匯率。有乜問題？40年前你唔出嚟鬧？

但點解英倫銀行當年差不多冇晒外匯儲備，但依然冇影響入口？

香港「守唔守得住」聯匯？短答案：得。長答案：At what cost？

英國唔需要太多外匯儲備，但香港需要。

咁香港有幾多？點先算多？

不過，1998年，香港外匯儲備全球第3．而家第9。中間發生乜事？估下

香港4300億美金外匯儲備，算多定少？1998年係900億。

而家英國係2000億。「咁香港即係多定少？」。點度？

索羅斯狙擊到英倫銀行要退出ERM，咁港紙又會唔會？

1. 呢篇理論上係之前兩篇講「索羅斯狙擊英鎊」嘅後續（上篇，下篇），但其實關係唔係極大，你冇時間嘅，唔睇之前兩篇都OK。

2. 最主要你要知道，當年英國入咗ERM，變相係一個有啲區間浮動嘅聯繫匯率，鬆鬆地咁掛住西德/德國馬克。因為經濟狀況太唔同，後來德國因為兩德統一後有通脹要加息，英國就唔係好頂得住。想加息又唔敢，驚打擊經濟，同埋本身都高息。外匯儲備亦冇乜，干預唔到匯市。最後索性退出，英鎊大瀉。

ERM同港紙聯匯，有乜相似，又有乜唔同？

今日，或者1998年嘅香港，同當年英國，又有乜相似，有乜唔同？

3. 於是有人話，係咪同香港掛美金有啲似？呢篇講下香港嘅情況。ERM同港紙聯匯，有一樣，有唔同。香港情況同當年英國，亦有一樣，有唔同，一定要仔細睇。

鍾意嘅，仲有篇1萬字（！）聯匯文畀你重溫，嗰篇文出書都得

4. 大家可以搵返我以前嘅文，唔止一篇講過聯匯運作。只睇一篇，就係呢篇，好長的，成萬字（！！！）。但真係極詳細，拎去出書都得。至於講拆息銀行體系結餘嘅，成日都寫，例如呢篇都夠詳細。

匯率制度如著衫，冇完美嘅，唔同人，唔同場合，唔同年代，有唔同需要

5. 首先，之後會再講，但一個好重要嘅原則，聽落廢，但好啱：冇一種匯率制度係完美嘅。唔同國家有唔同需要，同一國家在唔同時間亦有唔同需要，實在冇可能one size fits all，亦都往往只係取捨pros and cons．仲要好難即時知道有乜好壞。呢點同你同你著衫一樣（今次唔講買bra啦，雖然我覺得真係好貼切）—唔同人有唔同需要，唔同人啱唔同衫。仲有，同一個人，唔同年紀，唔同場合，都係唔同嘅需要。問題係，匯率不能好似衫咁，日日換。

只能顯場補短。靚仔好身型，著乜都型。太醜嘅，著乜都唔會變男神

6. 另外，最後都係睇你自己嘅底子。亦即係，靚仔身型好，咪著乜都好睇。身型差又樣衰嘅，咁只能「放大優點轉移缺點」—但你唔會變咗男神的。你經濟好好嘅，用乜分別都不大。經濟好差嘅，換第種制度亦唔會忽然復活。當然，有啲貨幣危機，就似乎可以避免嘅，但正如上一段講，匯率不能好似衫咁日日換。你知有問題，但未必知道會忽然間出事。

聯匯好似仲「實」過ERM

7. 講到咁虛，香港掛美金嘅聯匯。諗真啲，好似有啲似ERM，好似仲「掛得實」過ERM—因為首先ERM都仲有6%浮動，聯匯近乎冇。以前係7.8，後來7.75弱方保證，再後來係而家你見到嘅7.75-7.85（唔係好耐咋下，2005年，我剛好做緊銀行炒房）。你見上落都只係1% 波幅，而成套嘢近乎咁多年冇郁過

8. 慎防後生讀者唔知，而家呢套嘢英殖年代1983年已成立，當然亦同香港前途談判有啲關係。而好多人都唔知嘅係：1983年之前，都已經係掛美金的（只係同而家嘅水平以及制度唔同），1972年已開始。再之前先係掛英鎊。點解1972年唔掛英鎊掛美金？又係同尼克遜廢除金本位有關，應該好多讀者識背我嘅金句（「自此法幣任印，美元霸權，匯率亂飛，人類進入最金融化嘅半世紀」）

1972年，港紙已經開始掛美金，唔掛英鎊。嗰年乜事？

9. 好啦，香港嘅聯匯，同ERM，表面相似，但都有唔少地方唔同。首先，ERM係一套大家坐低傾嘅機制，然後大家揀入。但香港聯匯呢？美國從來冇同英國，或港英政府「傾」過。你可以話，係英國/港英政府「單方面」決定嘅。

ERM係大家傾，港元聯匯係單方掛。所以陳茂波至少啱咗一半

10. 所以之前有一輪有人講「美國禁止香港用聯匯」。陳茂波定邊個提到，「唔使佢同意」，「當年用都冇經佢同意」—啱一半，至少後半係啱嘅。但，美國「默許」一回事，到佢真係要「禁」，你仲係咪用到呢，就挑戰大家想像力，本文就唔去猜測。「極端嘅，射個原子彈嚟香港咯，死晒，冇人用」（唔好笑，好多人都鍾意講最極端嘛）。

11. 極端情況，留待你搵原子彈專家討論。我地只討論，在「正常」情況下，例如而家，或過去幾十年咁，港元聯匯嘅情況。

掛美金咪掛美金，點解要「優化」聯匯，留返7.75-7.85嘅水位？

12. 頭先講咗，港元聯匯嘅區間，比起ERM窄好多，實在等於「照用美金」（又，聽聞當年之所以保留7.75-7.85呢個區間，係為咗啲交易員仲有飯開，有呢啲套戥活動，我都傾向信的，呢啲活動都養咗啲人，包括當年嘅我）

ERM 下英倫銀行有自己貨幣政策。但港元聯匯下香港冇呢回事

13. 另外，留意ERM之下，各國仲有自己嘅貨幣政策，但香港冇呢回事。點解？以前啲文寫過呢套7.75-7.85點運作，其中一個重點就係啲「套戥為行」，最後會慢慢推到港紙美金拆息差不多—但如果長期都係好唔同嘅，成套嘢就唔work了

14. 不過，最後仲要講一樣好重要嘅唔同：外匯儲備。

但最唔同嘅係：外匯儲備。到底係乜東東？有乜用？幾多先夠？

15. 甚麼是外匯儲備，外匯儲備有乜用，都有啲深，可能另外再講。但在呢幾篇文嘅context，外匯儲備，你就當係該國政府嘅「外幣資產」。有時包黃金，有時唔包，反正黃金正路地可以合理時間同價格轉成美金。

16. 外匯儲備有乜用？兩個主要用途。第一個應付入口，你見斯里蘭卡咪話冇外匯，嘢都買唔到。不過留意，一般民間亦有民間嘅外匯，係另一回事。

斯里蘭卡冇晒外匯儲備入唔到口，「但香港人好撚有錢」

17. 第二個，就係用嚟干預匯率。太弱時托高佢，太強時踩低佢。BTW，唔好信啲政治上身嘅人講，實情絶大多數國家，都干預外匯，「操縱貨幣」，只係程度上。美國都試過，但的確好少，但反正美金係全球霸權。況且，美國可以通過加息之類，已經直接谷得起美金，呢啲佢地唔當係「干預外匯」。但其他國家冇呢啲特權，包括歐元區，日本同英國，因為美元太重要。你做乜，佢都可以沖淡你。

另一用途，當然係干預匯率。日本會，瑞士會，英國都會。

18. 其他嘅？上篇文咪寫咗，英倫銀行當年，一樣干預外匯，托英鎊，不過失敗，原因正係因為外匯儲備太少。近嘅？日本央行就算係相當密，早排先干預完。瑞士央行亦比較多（呢段你可以記低，遲下有用）。

19. 中國當然就更多干預，因為成套制度都唔同，唔行自由浮動，亦都資本管制。但，台灣，韓國，俄羅斯，印度印尼等等都係。某程度上，只要你「唔畀佢跌」，就係干預外匯。做法好簡單，人地沽印尼盾，你央行用自己嘅美金買晒佢，頂住個價。當年英倫銀行都係咁做（但最近呢輪冇，佢地通過「干預債市」間接托英鎊，比較聰明，亦唔使畀人話「干預匯率」）

咁香港，當然係不停要干預匯率。有乜問題？40年前你唔出嚟鬧？

20. 講咗咁多，如果你用好嚴謹嘅定義，咁香港當然係不停干預匯市的。By definition 你行聯匯就會有呢樣嘢，所以冇乜好拗。但凡金管局接錢，接港紙又好，接美金又好，7.75又好 7.85又好，都係厈預匯率。

但點解英倫銀行當年差不多冇晒外匯儲備，但依然冇影響入口？

21. 講咗一輪，咁外匯儲備唔夠，會有乜後果？首先，斯里蘭卡嘅情況，咪會入唔到口，因為冇美金畀人地，而其他人唔會收你啲斯里蘭卡紙。但當年黑色星期三，英國差不多用盡外匯儲備，又會唔會入唔到口？唔會。因為英國唔係斯里蘭卡，英鎊在國際上都有一定嘅「認受性」，即使跌咗，人地都仲肯收。頂多可能折讓咁收。呢個大約係hard currency 嘅概念。Hard currency睇好多嘢，除咗經濟規模，仲要睇國際流通。人民幣固然唔多（但亦冇你想像中咁少），但即使韓圜甚至印度盧比，計”hardness”，甚至唔及丹麥克郎之類。而印度經濟體系已經大過英國啦喎。

22. 香港嘛，又唔同情況，照計唔多存在呢個問題。因為，香港有好多美金！你買外國貨，港紙固然未必有人肯收，但香港民間都有好多美金！以前寫過，香港嘅存款14萬億，差不多一半係美金。

23. 所以，外匯儲備，在香港嘅情況，戲肉都係「干預貨幣」，亦即係「守唔守得住聯匯」。會唔會好似英國咁「被迫」退出ERM。

香港「守唔守得住」聯匯？短答案：得。長答案：At what cost？

24. 短答案係：應該唔會。

25. 長答案係：都真係唔會，真係「會」棄守，都係自己選擇。要「守」係守到，問題係想唔想付嗰啲代價。

26. 上篇文講咗，當年英國嘅外匯儲備，相當少，240億美金—小心啲，點去判斷多定少？我呢度都大約只係「直覺」（嘩，咁化學？咁我叫”educated guess”係咪好聽啲）。真係嚴謹計嘅，你可以睇返當年英國嘅GDP，M2，銀行體系之類嚟比較。

英國唔需要太多外匯儲備，但香港需要。

咁香港有幾多？點先算多？

27. 舊文都有寫，英國一路唔多外匯儲備，原因好簡單：因為似乎唔需要。入口需要頭先講咗，英鎊都算夠hard．干預匯市方面，英鎊supposed係自由浮動，政府唔會亦唔需要干預匯市（但，ERM時，就應該有「預到」有一日要干預吧？定只係想靠加息托住？定根本諗住托唔住就退出？唔知）

28. 香港呢？香港嘅外匯儲備，在全球都排到好頭，一度排到頭三。我亦係冇好詳細嘅數（冇返工冇得用Bloomberg係咁架啦），但1998年8月底，外匯儲備係921億美金。當時係世界第三（大陸係第二，第一係……日本，估唔到吧）。

29. 另外留意，呢個數字，當時已經包括「被狙擊」嘅壓力，當時已經係亞州金融風暴尾聲。有機會我再慢慢搵嗰兩年嘅變化。

30. 大約比較下，92年英鎊被索羅斯狙擊時，只係230億美金，但英國經濟體系比香港大好多

不過，1998年，香港外匯儲備全球第3．而家第9。中間發生乜事？估下

31. 去到今日啦喎，香港嘅外匯儲備，全世界第九。係喎，「排名」下跌咗，但真係因為其他國家學精咗，人人都儲住。印度沙地阿拉伯俄羅斯瑞士之類，當年根本冇出現在十大。台灣韓國之類，見過鬼怕黑，亦更加攬住大舊外匯儲備

香港4300億美金外匯儲備，算多定少？1998年係900億。

而家英國係2000億。「咁香港即係多定少？」。點度？

32. 睇嘅係，香港外匯儲備，當年（1998）921億美金。而家係4300億美金。但當然，銀行體系，貨幣供應亦膨脹不少，不能就咁話「比當年更充足」

33. 你可以睇嘅係，呢個數字相對於香港流通貨幣嘅比率，或者M3嘅比較（M3係乜就自己睇）（呢個短啲）。咁你見，外匯儲備係香港流通貨幣嘅5倍幾，係M3嘅41%。你可以同當年比較下，或者同其他地方比較下。