黑色星期三30周年—索羅斯狙擊英鎊嘅教訓，同後續影響（主要講歐元，同埋少少英國，下篇講埋香港） (Patreon)

黑色星期三30周年—索羅斯狙擊英鎊嘅教訓，同後續影響

美股大升，可惜唔記得買

版務一則：搵義工

ERM 有問題，定英國有問題？Why not both？

退出ERM冇後果。只係龍門再搬過，掛低啲，浮動濶啲—咁有乜公信力？

大家各自有自己貨幣，自己央行，自己貨幣政策，同床異夢，邊經得起考驗？

後來歐元，就冇自己貨幣，亦冇自己央行。雖然仲有各自嘅財政政策

唔同主權，用同一種貨幣，有乜後果？咪「希臘危機」同「歐債危機」

歐元係咪即係「富國」「勤力」津貼啲「窮國」「懶人」？都某程度係

「歐洲一體化」，就唔止講錢嘅。況且，邊個蝕底，都唔係咁易計。

以前意大利西班牙可以貶值增加競爭力，而家點同德國爭？

講到歐元咁差，咁做乜冇人退出？反而人人爭住入？有難時個個攬住？

歐元20年低位就代表失敗？英鎊230年低位添！

英國入ERM，時機好錯。但，冇咁大個頭，真係唔好笠咁大戴帽

當年英鎊大瀉，後來幫咗經濟。但而家又唔係咁簡單了，你睇日本？

黑色星期三，亦種下之後英國唔用歐元，甚至脫歐嘅種子

風水輪流轉：之前英國對西德流口水，後來就到德國成為「歐洲病夫」

節目預告：ERM聽落好似聯繫匯率，咁港紙又會唔會畀人狙擊脫勾？

節目預告：港元聯繫匯率，同ERM又有乜異同？

黑色星期三30周年—索羅斯狙擊英鎊嘅後續影響

美股大升，可惜唔記得買

1. 重陽節，香港放假，寫篇短啲嘅。就只係講上次嗰篇「索羅斯狙擊英鎊」嘅後續。結果變相，呢篇文講歐元，同埋少少英國

2. 另外，已經寫好兩篇長文，會講香港。既然ERM係某程度上嘅「聯繫匯率」，最後因為被「狙擊」而脫鈎，自此英鎊再自由浮動。咁港紙，又會唔會？可能性有幾大？如果會，有乜後果？如果唔會，點解唔會？（而聰明嘅應該問：唔會，又有乜後果？記住上篇文講過，冇完美嘅匯率機制，守有代價，唔守亦有代價）

3. 已經寫完，會分兩篇。呢兩日送埋畀你。

4. BTW，美股大升，原本我應該係月頭即買。結果因為寫文，唔記得咗買，寫完都收市。「我唔會叫讀者賠返700點畀我」，而係話你知，我真係每個月有錢就買晒股票。驚都冇驚過，但亦唔好做槓杆。閒錢不妨買，但真係閒錢先好

＝＝＝＝＝＝＝＝＝＝＝＝＝

版務一則：搵義工

5. 首先，錄音嘅拍檔外遊，所以錄音版呢幾日會稍為延遲，應該下星期回復正常。係呀，佢外遊都幫我錄，畀啲掌聲佢。

6. 另外，有個請求，睇下邊位讀者夠忠心又得閒，想搵個義工。暫時要做嘅嘢只得一樣：幫我update個Patreon Index。照計簡單，用嘅時間唔多，就係每日幫我貼返篇文嘅link上去，你去望一望就明。上手義工事忙，咁因為係義工我亦冇理由push佢。

7. 壞消息係，上手義工冇搞後，我都冇再搞—因為寫完文已經太累。不過好消息係，佢都幫我搞到今年6月頭，所以你都只係要搵返6月至而家嘅文，加埋以後嘅文幫我整咁咯

8. 有興趣嘅PM，留個Whatsapp畀我（因為平時要聯絡你）。造福所有讀者的。如果冇人搞嘅，咁我第時唯有refer返「大約幾月幾日」嗰篇，你自己去搵（新版Patreon可以跟月份filter嘅）。我自己有紀錄，所以會知道大約日期，同你見到嘅日期，可能前後可能爭幾日咁咯。

＝＝＝＝＝＝＝＝＝＝＝＝＝

ERM 有問題，定英國有問題？Why not both？

9. 正題，未睇上次嗰篇嘅，強烈建議你睇。快睇都可以，若有唔明嘅，今次呢篇會解。上次講完故事，今次呢篇就講理論嘢多啲—到底「索羅斯狙擊英鎊」一役，有乜教訓？

10. 即使上篇唔係完全明，照計都大約明白：問題就係英國選用咗個「錯」嘅匯率政策。咁但到底係ERM本身有問題？定英國本身嘅問題？你大約估到，答案當然係：兩樣都有啲。

退出ERM冇後果。只係龍門再搬過，掛低啲，浮動濶啲—咁有乜公信力？

11. 英國退出ERM後，之後其實意大利都失守，退出埋ERM，只係冇乜人關心。但退出咗有乜後果？又好似冇乜後果。後來嘅ERM，搬咗龍門，原本大家入ERM時鎖定嘅價（例如英國90年入嗰時嘅價），又再搬低啲，個band又拉濶啲，原來真係太難了，咁將就下。

12. 至此，你已經見到，ERM已經名存實亡，超過咗個band原來又可以再搬過，仲邊有公信力？甚至可以話，一開頭設計已經有啲失敗。大家各自用自己貨幣，又有自己貨幣政策，點得？

大家各自有自己貨幣，又有自己貨幣政策，同床異夢，邊經得起考驗？

13. ERM本身最大嘅缺憾，就係人人有自己貨幣，又有自己央行。不一定完全各懷鬼胎，但始終大家有自己嘅政治考慮。德國通脹，當然考慮咗自己問題先，係知道會影響其他成員，「但自己搞掂啦，嗰時你地答應咗架嘛」（你亦可以話，德國嘅實力未惡到好似美國咁）。況且，嗰時「歐洲一體化」仲係好初步。（但呢個係雞先蛋先嘅問題，歐洲正係想有咗ERM先再單一市場成熟）

後來歐元，就冇自己貨幣，亦冇自己央行。雖然仲有各自嘅財政政策

14. 你可以話汲收咗呢個教訓，後來歐元，就大家冇晒自己貨幣，亦冇晒自己嘅央行，冇埋貨幣政策（加息減息甚至印錢呢啲就係貨幣政策），統一係歐洲央行ECB嘅政策，當然唔係完美，但冇咗上面嘅問題。

15. 非本文嘅重點，但你見而家歐元同其他貨幣相比，仲有一個好大嘅分別：即使資本同人嘅流通都自由，但大家依然係唔同主權國家。依然大家有自己考慮，大家冇各自貨幣政策，但依然可以行唔同嘅財政政策（減稅，派錢之類）—固然歐央行有「限制」，但同ERM一樣，有幾嚴格執行？往往德國自己都做唔到。你後來見到爆發嘅「希臘危機」「歐豬危機」，就係因為呢啲東西引起。

唔同主權，用同一種貨幣，有乜後果？咪「希臘危機」同「歐債危機」

16. 唔同政權，用「共同貨幣」到底可唔可行？拗咗好耐，只有實驗先知。答案：唔知。但客觀講，歐元經過之前嘅危機，依然健在，亦真係冇咩「解體」危機。仲有一個好大嘅證據：你見希臘佬又好，意大利佬又好，搞到好大鑊都好，要債務重組，從來冇認真打算「脫離歐元」—因為明知後果仲嚴重。正係攬住歐元，希臘意大利之類先叫做安然渡過。相反，冰島就搞到「破產」。你見而家，一路都冇人話要脫離歐元區，只有大把人想加入（但當然，另外有個問題係：其實歐元區好似冇一個「離開」嘅機制）

歐元係咪即係「富國」「勤力」津貼啲「窮國」「懶人」？都某程度係

17. 又，聰明嘅讀者會諗，咁其實係咪即係啲「慳儉」「富有」嘅成員，德國荷蘭奧地利法國芬蘭之類，補貼啲窮又大洗嘅兄弟？雖然歐元區嚴禁「共同債務」，唔會一齊發債—所以你見一齊用歐元，但德國有德國嘅國債，意大利有意大利嘅國債。咁但，某程度上，都係某啲國家sort of「補貼」其他「歐豬」

18. 不過，條數真係好難計。首先，「歐洲一體化」呢個夢，你可以話超越咗講錢。特別明白歐洲打完兩次世界大戰（都唔好計之前幾百年狂打），人人都輸，只見美國日本（同後來中國印度東盟）堀起。

「歐洲一體化」，就唔止講錢嘅。況且，邊個蝕底，都唔係咁易計。

以前意大利西班牙可以貶值增加競爭力，而家點同德國爭？

19. 另外，你可以話係補貼啲窮親戚。但，意大利之類，以前可以用貶值減息之類去競爭，而家冇埋。你將最叻嘅學生同最差嘅放埋一齊，最差嘅更加難「翻身」，更加只能倚賴呢個機制。換句話講，德國法國之類嘅領導地位，只係加深咗。「即係你幫咗老公還債咁，佢以後在你面前都好難有乜聲出，買部電話都要問過你先」

講到歐元咁差，咁做乜冇人退出？反而人人爭住入？有難時個個攬住？

20. 況且，亦係「做大個餅」，共同貨幣就帶嚟共同市場，亦都冇晒匯率嘅問題，呢度嘅影響不容忽視。

歐元20年低位就代表失敗？英鎊230年低位添！

21. 所以，不能因為歐元跌到20年低位，就話係牧敗。扯，英鎊跌到200年低位添。不能咁計的。

＝＝＝＝＝＝＝＝＝

英國入ERM，時機好錯。但，冇咁大個頭，真係唔好笠咁大戴帽

22. 至於講返英國本身，固然可能馬卓安辦事不力，又黑仔（但，點預到兩德統一後嘅加息？況且，係戴卓爾夫人任內加入ERM的，雖然佢應該係半「被迫」）。亦可能係時機錯。總括嚟講，似乎英國入ERM，都係一個錯誤

23. 原因同上篇文講嘅一樣：通脹太高，利息又太高。英鎊不能貶值，令英國出口不能同德國競爭。當年英國人，戲稱ERM係Eternal Recession Mechanism。但諷刺嘅係，正係退出ERM，英鎊大瀉後，就回復競爭力，之後幾年都幾好。但選民一於少理，都係怪罪於保守黨，「輸咗納稅人幾十億鎊」太難接受，所以保守黨依然慘敗。

當年英鎊大瀉，後來幫咗經濟。但而家又唔係咁簡單了，你睇日本？

24. 不過真係留意，而家嘅世界，又唔係當年咁簡單嘅「貶值有利出口」了，呢個講過無數次。原因實在好多，主要因為啲供應鏈真係全球化，你貶值嘅，入口咪一樣貴一大截（可以睇下日本嘅情況，而家個個月都貿易赤字）。而在英國嘅情況，雖然仲有啲製造業出口（車，藥），但亦同1990年好大分別了（當然，中國改革開放亦令好多呢啲製造業收晒工）

＝＝＝＝＝＝＝＝

黑色星期三，亦種下之後英國唔用歐元，甚至脫歐嘅種子

25. 仲有兩個後續要講，英國退出ERM呢件事，影響深遠。除咗之前講嘅保守黨失勢，1997年大選崩潰，2010年先重新上台後。亦都令英國更加「疑歐」。唔多唔少，英國之後決定唔用歐元，亦同呢件事有關。同時間，相當有趣的，英國人最初「羨慕」嘅德國，在兩德統一後，都低迷多年，成為新嘅「Sick man of Europe」，反而英國受惠於金融業發達，經濟就好。所以更加冇打算用歐羅了（當然仲有好多歷史同文化原因）

風水輪流轉：之前英國對西德流口水，後來就到德國成為「歐洲病夫」

26. 另外，正如我講，ERM基本上係失敗嘅。打從有人達唔到達標，但又唔使點罰，龍門搬低啲，外間就好有戒心—點知你下次會唔會又係咁？雖然「一次不忠　百次不用」有啲老套，但在呢度匯率機制上，往住就係咁。有得一次，就好難要人信第二次。在ERM嘅情況，後來就真係去到完全唔同嘅「歐元區」（廢除所有國家央行，再冇自己貨幣政策），先有人信。

節目預告：ERM聽落好似聯繫匯率，咁港紙又會唔會畀人狙擊脫勾？

節目預告：港元聯繫匯率，同ERM又有乜異同？

27. 呢個，可以拉到去香港。任志剛講過嘅「御林軍」（冇錯係英國嘅火柴頭御林軍）。咩回事？就係講，聯匯呢個東西，由1983年開始計，而家近40年歷史，中途從來冇郁過。唔好話de-peg，就連re-peg，一次過掛高或掛低啲都冇。原因正係佢提過，等於啲人想「捉」御林軍眨眼咁，你眨得一次，就會不停有人嚟睇你眨第二次。唔多唔少，香港嘅聯匯，冇ERM咁化學，出面亦絶大多數人相信唔會點轉，除咗Kyle Bass 之類拎人地嘅錢去輸嘅人（之前又話8月乾塘喎，11月都嚟緊了，但大把人信）

28. 相當奇怪，我搵唔返呢個故事。但照計我冇理由無中生有，可能唔係任志剛？或者唔係御林軍？有人搵到話我知。

29. 咁至於香港能唔能夠「守住」聯匯，會唔會好似英倫銀行1992年咁，就係之後兩篇文嘅話題。今次唔使等，已經寫完，呢兩日會出埋。