［又係101文］索羅斯狙擊英鎊30周年，「歷史驚人的相似」—其實唔係。 (Patreon)

［又係101文］索羅斯狙擊英鎊30周年，「歷史驚人的相似」—其實唔係。

睇歷史案例，就知個世界同市場點運作

點解一狙擊就得手？點解唔狙擊第個？對沖基金沽就跌，點解咁多跑輸大市？

不停沽就會跌？咁點解不停買股票又唔會不停升？佢又點平倉？乜水接貨？

買錯胸圍戴錯bra：重點根本唔係索羅斯，索老係果唔係因，冇鬼唔死得人

The man who broke the Bank of England，英倫銀行輸咗30億，但咩回事？

英倫銀行trading loss只係9億，剩返 20億係乜損失？當時有幾多外匯儲備？

先講後續：當時馬卓安接手冇耐，之後精神崩潰，日日在衣櫃喊

你估唔到：打後幾年經濟幾好，但保守黨一樣大敗，13年後先上返台

到底乜嘢係ERM？英國最初點解唔加入？留意下當時邊個係首相？

ERM係一個半桶水嘅聯繫匯率，係歐元嘅 alpha版

點解英國最初唔加入ERM，之後又流口水，最後90年加入（兼摸頂）？

英國入ERM，之後三件事：戴卓爾夫人落台，兩德統一，丹麥否決馬城條約

英國通脹係西德3倍，利息亦高好多，生產力就低好多。你話有乜後果？

而唔好忘記，英國，係冇乜外匯儲備嘅，兩嘢就乾塘。但點解咁少？

英國獨有嘅問題：美金大跌。見到冇？美金升又係問題，跌又係問題

一係落閘行資本管制，一係加息，一係用外匯儲備—點都死

緊急加息，10厘加到上12厘，再話加到上15厘—但冇人信。係咪好熟面口？

下篇預告：ERM係咪先天缺憾？定英國問題？固定匯率定浮動好？

「歷史驚人的相似」。其實，最似嘅唔係今日嘅英鎊，係港紙！

之後講埋1998亞洲金融風暴1.0，同埋說好了的2.0

［又係101文］索羅斯狙擊英鎊30周年，「歷史驚人的相似」—其實唔係。

1. 幾日冇寫文，要消化嘅太多。但保證篇篇精彩。首先寫最簡單嘅，鑑古知今，索羅斯狙擊英鎊，會有上下篇。之後就可以寫返「亞洲金融風暴2.0」，過去同現在，然後再寫返英鎊而家嘅情況。打後可以寫下股市。但我仲係每個月買緊股票。

2. 今年係索羅斯成功狙擊英鎊30周年，仲要都係9月。不過，同近期嘅英鎊風波比，除咗都係「英鎊受壓」上頭條，兩件事近乎冇可比性，唔好睇啲太空泛嘅咩「歷史驚人的相似」。兩件事，完全唔似。

3. 今次呢篇文，一張圖都冇，反正冇必要。

睇歷史案例，就知個世界同市場點運作。

4. 但睇歷史案例，我地可以更加了解世界同金融市場點運作。好多嘢都係估估下，都係有前人做咗實驗（無論係索羅斯定係英倫銀行），大家先知會有乜後果。亦不保證下一次都一樣，但至少我地可以學到啲嘢。

5. 以前在medium略寫過呢件事，呢篇第一次詳細寫。解完後，我地又可以解埋其他嘢。例如下次，我會寫亞洲金融風暴，而家好多人都話似係1998年了（係相當似）。

6. 都係嗰句，有歷史事件睇就最好，有晒驗屍報告，知晒當時發生乜事—因為好多人連呢啲都唔會知。

點解一狙擊就得手？點解唔狙擊第個？對沖基金沽就跌，點解咁多跑輸大市？

不停沽就會跌？咁點解不停買股票又唔會不停升？佢又點平倉？邊個接貨？

7. 即使唔係金融人，怕且都聽過「索羅斯狙擊英鎊」呢件事，令佢名利雙收，賺咗10億美金（1992年嘅10億美金喎！）。自此成為「打爆英倫銀行的人」（the man who broke the Bank of England）。但對於來龍去脈，多數人就不甚了了。點解一狙擊就得手？點解佢唔狙擊第個？有啲人可能知多啲，佢不停沽英鎊，令到英倫銀行棄守，英鎊大貶，佢就贏咗。都大約啱，但點解佢可以迫到英倫銀行投降？對沖基金咁勁咩？咁點解仲有咁多對沖基金輸錢，或者跑輸指數幾條街？不停沽就會跌？咁點解不停買股票又唔會不停升？仲有，索羅斯點甩身？沽完點平倉？乜水接貨？以上種種，就好多人唔會理，或者有疑問，但唔知點解。呢篇文同你解呢樣嘢，雖然長，但應該幾淺。

買錯胸圍戴錯bra：重點根本唔係索羅斯，索老係果唔係因，冇鬼唔死得人

8. 畀定結論你：索羅斯唔係重點。重點係「物先腐而後蟲生」，「冇鬼唔死得人」。多數都係本身有問題，先會引致有人「乘虛而入」。在呢啲匯率危機嘅情況，多數就係「用咗唔啱嘅政策」（例如太高息或太低息），或者係「唔啱嘅匯率制度」。亦即係，個bra唔啱size夾硬戴，太大太細，都會有問題的（原諒我諗唔到更好嘅比喻）

＝＝＝＝＝＝

The man who broke the Bank of England，英倫銀行輸咗30億，但咩回事？

9. 首先快講件事，。1992年9月16日（抄低個日子，陣間有用），英國退出歐洲匯率機制（ERM，European Exchange Rate Mechanism），英鎊大幅貶值。索羅斯亦係一早睇死英國會退出，亦都推波助瀾，加快佢退出。因為一早狂沽英鎊，所以英鎊貶值佢就賺錢，10億美金。

10. 但講過，外匯市場，基本上係zero sum game，亦唔止索羅斯一個賺錢。咁咩人輸錢？除咗係睇好英鎊嘅人，仲有一個大輸家：英倫銀行。亦即係英國納稅人嘅錢，呢個先係非同小可。

11. 事後先計到，英倫銀行，大約輸咗33億英鎊。首先你見到，即係唔係全部索羅斯「拎」晒。另外，到底呢個數係乜？都有啲複雜。

英倫銀行trading loss只係9億，剩返 20幾億係乜損失？當時有幾多外匯儲備？

12. 簡單嚟講，英倫銀行嘅trading loss（一買一賣平倉，咁高買低賣咪輸錢，調轉亦係），只係8億鎊。剩返絶大多數嘅「損失」，係嚟自「外匯儲備帳面損失」。即係乜？原本英倫銀行有大約240億美金嘅外匯儲備（記住呢個數字），咁但，英國嘅外匯儲備用英鎊計價嘛，原本英鎊貶值後，咁呢啲外匯儲備，以英鎊計，咪多咗咯。問題係，在「悍衞匯率」之中，應該差不多用晒，最後都保唔住ERM。

先講後續：當時馬卓安接手冇耐，之後精神崩潰，日日在衣櫃喊

13. 唔講金融細節之前，先講後續。當時英國首相係馬卓安，接手冇耐（任期係90年尾至97），留意埋上手正係戴卓爾夫人（任期79至90年尾），抄低兩呢個任期，陣間有用。

14. 呢單嘢，係馬卓安以及保守黨嘅污點，據聞佢之後精神崩潰咁滯，日日縮在衣櫃喊（都算有良心）。留意任期5年，可以提早大選但唔可以遲，所以佢拖到最後一刻，97年先大選，但當然保守黨依然大敗。貝理雅上台，然後保守黨要去到13年後嘅2010年先重新上台。

你估唔到：打後幾年經濟幾好，但保守黨一樣大敗，13年後先上返台

15. 有少少吹脹嘅係，呢壇嘢後，英國經濟之後幾年不錯，但一切只係睇perception，英國選民視為國恥，輸晒佢地嘅錢，所以97大選保守黨依然大敗。

16. 之後我地講返成件事，金融上嘅來龍去脈

＝＝＝＝＝＝＝＝＝

到底乜嘢係ERM？英國最初點解唔加入？

17. 聽到「索羅斯狂沽英鎊，睇死英國會退出ERM，結果估中，英國棄守，英鎊大跌」—你應該問嘅問題係：乜嘢係ERM？點解英國會加入？點解又會被迫退出？點解索羅斯睇死英國一定會退出？

18. 留意，有ERM第二代的，唔係同一回事。我地當然講第一代嘅ERM。

ERM係一個半桶水嘅聯繫匯率，係歐元嘅 alpha版

19. 好快答你，ERM係一個有啲類似聯繫匯率嘅東西，但半桶水咁。而ERM嘅誕生同存在，同二戰後嘅「歐洲一體化」，以及歐元誕生，都好有關係。

20. 實際上，ERM就係避免歐洲各種貨幣（當年未有歐元）之間太過波動。咁點做？歐洲各國加入咗之後，個匯率就會有個上下限（6%，但一路有變），不能超過個區間。超過咗咁點？貴國就搞掂佢，一係干預市場，一係加息減息之類。

21. 留意，各國係繼續用自己貨幣，亦都繼續有自己央行，有自己貨幣政策。你諗真啲，係會有啲問題嘅。仲有，匯率係相對嘅，咁相對邊個？就係西德/德國馬克（90年10月兩德統一，亦可以抄低佢，關事的），大阿哥。

22. ERM 1979年誕生，最初英國係唔肯加入嘅。基於地理同歷史，英國向來有疑歐嘅傳統（後來亦唔用歐元，之前仲脫離埋歐盟）。而當時嘅首相，更加係出名疑歐嘅戴卓爾夫人，所以當然反對。

點解英國最初唔加入ERM，之後又流口水，最後90年加入（兼摸頂）？

23. 不過，在保守黨中，當年相當多閣員係親歐嘅。呢度又可以講歷史。主要原因係，見到歐洲一體化成形，深怕英國唔加入埋一份會被孤立。

24. 仲有，就係二戰後嘅西德經濟奇蹟，西德好快（再）成為歐洲大國。更重要係，在西德央行調控下，西德控制通脹好成功。呢個亦好可能同德國威瑪共和嘅超級通脹有關（兩次大戰中間，呢件事亦間接令希特拉上台），自此德國人對通脹極之敏感。

25. 同時間，熟英國嘅可能知，英國70年代就面對通脹，被稱為歐洲病夫。後來固然係戴卓爾夫人鐵腕政策（呢啲又係一篇新文）解決，但英國人當然羨慕兼拜服對面海嘅西德。

26. 在呢個背景下，就出現咗啲好好笑嘅嘢：英國冇加入ERM，但英鎊係「半官方」地緊盯住西德馬克—冇任何機制，但總之大約睇住你嚟郁。亦唔係好奇怪嘅事，人民幣有時都盯住美元，韓圜亦盯住日圓。又唔係官方政策，進可攻退可守，有個參考咁。

90年英國入ERM，之後三件事：戴卓爾夫人落台，兩德統一，丹麥否決馬城條約

27. 有啲搞笑嘅係，英國卒之90年10月加入ERM。事後睇，個Timing 差到不得了。留意下呢個時間，仲有兩件事發生。第一，東西德統一。第二，戴卓爾夫人離任—但留意，入ERM係戴卓爾夫人任內嘅事。當中好多嘅權鬥，就不一一講，戴卓爾夫人當時已經失民望，而入完ERM冇耐，就到同黨嘅馬卓安上台。相信唔係戴卓爾夫人畀蕉皮佢踩，而係佢黑仔又不學無術。

英國通脹係西德3倍，利息亦高好多，生產力就低好多。你話有乜後果？

28. 當時英國嘅經濟情況，都係唔多好。英國通脹係西德嘅3倍，利息亦都高好多，而英國勞工嘅生產力又低過德國。咁樣夾硬死盯住西德，得唔得？就係我最初講，你唔啱size，夾硬嚟，係會有啲後果的。索羅斯就係睇準呢點，你可以支持幾耐？最後都係要換。

29. 特別係：英國係冇乜外匯儲備嘅。當時冇乜，而家都唔多。原因又係另外寫篇文解，但一來英鎊算係hard currency，又自由浮動，根本唔多需要外匯儲備，因為唔需要干預匯率—但，在ERM下，就好似唔係咁喎。

而唔好忘記，英國，係冇乜外匯儲備嘅，兩嘢就乾塘。但點解咁少？

30. 90年10月，兩德統一，點睇都係喜事一宗，但真係蝴蝶效應，冇人估到會變成金融風暴導火線。咩回事？兩德統一後，西德「接收」東德，開支唔少，開始有通脹壓力，德國（統一了，唔係西德）央行要加息。咁就激起千重浪了。

31. 德國要加息，ERM內人人有壓力，其他國家經濟都唔算太好。重災區係英國同意大利，因為雙赤。對英國嚟講仲有個問題，因為好多出口用美元計價，然後當時美元大跌（見到冇？美金升又有問題，美金跌又有問題，幾時都係：我們的貨幣，你們的問題）

英國獨有嘅問題：美金大跌。見到冇？美金升又係問題，跌又係問題

32. 1992年仲發生咗一件事，就係馬城條約在丹麥公投受挫，成個「歐洲一體化」有壓力。成堆貨幣都有壓力。

33. 呢個，就係當時嘅背景，法國法郎，意大利里拉，英鎊齊齊受壓。好多人開始賭，會有人退出ERM，包括索羅斯，至於點解齊齊估英國，相信同上面講嘅原因（疑歐，通脹高）有關。

34. 事後睇，英國入ERM嘅時機差到不得了，入得太貴—但邊個估到兩德統一後嘅加息？英國本身經濟唔好，高通脹，息口高，點同德國用同一種貨幣政策？

一係落閘行資本管制，一係加息，一係用外匯儲備—點都死

35. 好啦，英鎊受壓，咁點守個ERM呢？其實不外乎兩三招，一係落閘行資本管制（但明顯ERM唔容許，亦唔合英國國情，「但馬來西亞試過」）。一係就加息，但已經好高息，經濟點頂？所以，就只能干預匯市。問題係，外匯儲備不多，好快就發現「大鱷」嘅沽盤一路有，點頂都頂唔住，底牌都畀人睇到晒了。

緊急加息，10厘加到上12厘，再話加到上15厘—但已冇人信。係咪好熟面口？

36. 最初就係托住下，但見到冇乜用，勢色不對，就緊急加息（係咪覺得好熟口面？英倫銀行下次都應該會大手加息）。10厘加到12厘，希望高息吸引人買英鎊，但依然托唔住，仲出口術話會加到15厘—但根本冇人信佢夠膽咁重（經濟仲唔死？），結果就係宣佈投降，退出ERM，後來嘅事，上面寫咗了。英鎊之後，半年大幅貶值咗30%

下篇預告：ERM係咪先天缺憾？定英國問題？

其實，最似嘅唔係今日嘅英鎊，係港紙！

37. 呢篇先係上半篇，畀你消化下。下篇講乜？下篇會睇返，ERM之後名存實亡，點解？ERM係咪有先天缺陷（應該係），英國加入ERM又係咪錯（似乎都係）。咁但，之後又點化成為歐元？仲有，咁其實係咪即係聯繋匯率唔好？或者唔應該盯住其他貨幣？到底乜嘢匯率機制先係最好？

38. 係喎，英國入ERM後被狙擊，被迫棄守—最相似嘅，唔係今日嘅英鎊。而係港紙。不過，相似不等於一樣，下篇講下有乜一樣，有乜唔同。港紙係咪唔應該掛美金？（1992年已經有人問啦）

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。