ivanliresearch

［又嚟101文］29張圖！美國通脹全攻略。做乜之前一出股市匯市大震？之後又點 (Patreon)

Published:

2022-09-27 22:07:26

Edited:

2022-09-28 00:30:25

Imported:

2022-10

Content

重點：通脹見咗頂。照計幾有信心

點解重要？因為呢期通脹影響加息，而加息預期又影響股市。

「通脹見頂」，不等於好快回落喎。

冇話通脹要跌到2%先可以減息，亦冇話減息個市先會升喎

股市當然走在聯儲局前，但聯儲局係咪走在通脹之前？

唔講咁多理論，大約睇下通脹去到咩位停加息

又睇下停加息前幾耐市升

回顧：上兩個星期震散市場嘅CPI數字，並唔係game changer

「通脹見頂」嘅劇本冇變到，冇因為1個月嘅數就大家覺得好快反彈

到底CPI由乜推動？

一堆「另類」嘅官方CPI量度：Sticky, median, trimmed mean

通脹見頂，某程度係數學現象，基數效應

唔同經濟學者同大行預測，同你睇下邊個比較「好」（但不一定最準）

點解經濟學者大行一致都估通脹回落？除咗數學現象，都仲有其他原因。

除咗出完CPI數字嘅反應，近排又有乜新發展？

而家嘅通脹周期，同以前嘅比，又係咪好唔同？

最後小心，市場預期好分化，提下有咩東西有機會出事

重點：通脹見咗頂。照計幾有信心

1. 近排啲文，篇篇都專題咁滯，用嘅時間多咗好多，亦所以未必日日出。不過相信大家理解嘅。到市況穩定啲，冇咁多新聞時，可能回復返以前日日一篇，多啲講市況。但呢排都仲有太多嘢要講

2. 呢篇已經盡量多圖少字。但好快話你知重點：通脹，應該見咗頂，至少呢刻應該係（但可能出完星期五嘅PCE數字我又會轉口風，但機會應該低）。

點解重要？因為呢期通脹影響加息，而加息預期又影響股市。

3. 點解重要，因為似乎通脹會影響加息（當然仲有衰退，但遲下講，而反正而家聯儲局重視壓通脹多過保經濟）。然後，加息路徑似乎會影響股市債市。

4. 另外建議你睇埋剛剛寫聯儲局議息嗰篇文。未必要由頭到尾睇晒，但可以開住參考，今次呢篇都會提到入面嘅嘢。

「通脹見頂」，不等於好快回落喎。

5. 我講一句「通脹見頂」相當易，我亦真心相信，亦都有信心，仲有唔少證據（下面貼）。但至怕你聽完一句就無限推展，所以我會講詳細啲。

6. 正如之前講，通脹見頂，不代表好快會回落，係咪？可能高位徘徊，可能有排都未落到2%，係咪？

7. 呢啲本身係經濟數字，趨勢未必太難估（雖然你見之前大家都估錯晒）。但問題係，呢啲嘢本身一回事，市場走勢又係另一回事。

8. 睇淡嘅，咁你可以通脹跌到去2.5%，都話未夠低，未到目標。甚至話驚通脹會反彈。但我幾肯定去到呢啲位市場點都反彈，如果冇其他大件事發生（a big if）．

冇話通脹要跌到2%先可以減息，亦冇話減息個市先會升喎

9. 同樣地，從來冇話要通脹去到2%先會停加息，亦都冇話要去到2%先可以減息。甚至乎，根本冇人話要去到減息先升。

10. 呢啲係股市債市嘅基本原理，炒預期嘛。用一個好單嘅例子，2020年4月後，股市己經狂升，但你見呢排先叫做「疫情完結，復常」。同樣地，今年年頭股市己經見頂，但你見通脹惡化狂加息呢啲，後來先出現。

11. 所以，股市走在事件前。在呢度嘅討論，你可以話股市走在聯儲局轉向前，係咪？年頭聞到加息味，已經開始跌（實情有啲股票舊年第三四季已跌）。

股市當然走在聯儲局前，但聯儲局係咪走在通脹之前？

12. 而另一方面，聯儲局同通脹呢？就比較複雜。理論上，聯儲局應該有前瞻性。但實證你見到，今次加息，明顯落後於形勢。我大膽估計（你可以唔同意，我亦唔係極有信心），到減息，都有可能係落後通脹，即係佢真係要見到明顯回落，先會鬆手。

13. 大約即係話：市場會反彈會早過聯儲局行動，呢個我好有信心。甚至唔使等到減息，甚至唔使等到停加息，甚至可能係聞到差不多減慢加息已經反彈。

14. 不過聯儲局幾時先放慢，就真係大家估估下，亦都靠睇通脹。

唔講咁多理論，大約睇下通脹去到咩位停加息，又睇下停加息前幾耐市升

15. 唔好講太多理論。睇實戰。7月嗰浸嘅反彈，最後結果回吐返晒，穿埋底。但極具參考價值。你唔好只係用一句「熊市反彈」去抹殺佢—冇錯結果真係「熊市反彈」，但總會有一次變真。我不能擔保係下一次轉勢，但我幾有信心，下一次都係咁嘅形態。

16. 即係點？重貼返上篇文嘅圖。六七月開始，市場估聯儲局2023年上半年減息。最後估錯，但不重要，重要嘅係，留意個時間差—估2023年上半年減息，咁計中間數，當3月。亦即係，市場差不多在減息前9個月開始反彈！就真係唔會等到減息。

又睇下停加息前幾耐市升

17. 當然唔係每一次都係9個月，呢啲我之後再同你研究，但畀你有個印象，大約知係咁。

18. 你甚至可以推演，咁我點知幾時開始減息？再推一步，舊文寫過（所以記得要長期睇），以往你睇到聯儲局停加息之後幾耐減息。見到可能最後一次加息後幾個月，或者一年多啲就減—然後上面又話，剛剛嗰次係大約估減息（雖然落空）9個月前升。咁你計落，即係差不多最後一次加息前後，就會升。

19. 雖然你真係詳細計，會發現個時間可以好闊，可能係早一年幾，可能係早三個月。但都係嗰句，大約有個概念。就真係唔使到減息先升的。

20. 咁到底幾時減息或停加息？幸運地，呢個係比較易睇嘅，上次篇文固然有。但呢啲市場預期係動態嘅，一路變。所以我會耐唔耐update你，或者你亦可以上CME Fed Watch 日日睇（遲下教你睇幾時減息，但有心機嘅自己摸索下不難）

回顧：上兩個星期震散市場嘅CPI數字，並唔係game changer

21. 好，入正題。講兩樣嘢，首先回顧，之前出嘅CPI數字並唔真係「game changer」。另外展望，照計通脹見頂。

22. 回顧呢部份，quick take 你可以睇舊文。只係兩星期前，但因為之後股市大跌，然後仲有英鎊日圓等等嘅風暴，令你覺得好大件事。但我話個數字唔係真係game changer，唔係指股市匯市反應，而係指對通脹嘅預期本身。市場不見得因為上個月嘅數，就認為通脹會反彈，或者遲好多先回落。嗰個「通脹見頂」嘅劇本冇變。

23. 下面我先講返兩星期前嗰個數到底係點，然後同你睇展望。

24. 最後不厭其煩提你，聯儲局係睇PCE嘅（主要係核心PCE），不過以下主要講CPI，雖然兩者嘅幅度唔同，但見頂之類嘅走勢唔會爭太遠

「通脹見頂」嘅劇本冇變到，冇因為1個月嘅數就大家覺得好快反彈

25. 上篇文都有講，個CPI數字高過預期，主要嚟自食品，租金，醫療開支。食品只影響Headland CPI，但租金同醫療開支同時影響Headline 同核心CPI

到底CPI由乜推動？

26. 信報嘅呢個圖幾好，你可以睇到晒唔同類別嘅東西。下面仲會見到有啲細項，咩戶外設備，家居用品，嗰啲升幅都好勁。但呢啲在CPI個籃入面比重唔係太大。反而租金佔得重，所以升6.7%已對CPI好大影響

27. 而相當奇怪地，似乎多數係比重高嘅，就偏偏升得最勁。好事定壞事？兩睇。但亦可以理解做只要用行政手段針對某啲嘢就得。

28. 呢個同信報嘅圖差不多，不過係按月嘅

一堆「另類」嘅官方CPI量度：Sticky, median, trimmed mean

29. 以下係一堆除咗Headline 同核心CPI，仲有其他「另類」量度方法（但都係官方的，可見真係好多花臣，我會畀埋link你，鍾意可以自己睇即係乜）

30. 例如Sticky CPI 就係計啲價格調整得最慢嘅東西（同樣地亦有Flexible CPI）

31. Trimmed mean CPI就係斬頭斬尾，體操或跳水畀分咁，唔計最高8%同最低8%嘅項目

32. Median CPI咪計中位數，實情做法係排晒升幅，然後斬走最高25%同最低25%，再計中間嗰堆。

33. 呢個就唔係官方嘅，但計超過6%嘅項目有幾多，見到越嚟越多。

34. 又學到新嘢。咁你睇呢啲量度，都見啲通脹實在幾有黏性，唔係咁易回落。

通脹見頂，某程度係數學現象，基數效應

35. 不過，始終都係好大機會見咗頂。好大程度亦係數學現象，到之後嘅一年半載，之前（即係今年）基數大，咁你啲價格，甚至唔使跌得好快，只要平穩，甚至升慢少少，慢慢個CPI就會拉返低。因為CPI大家好多時都係睇按年（有時都睇按月嘅）。同樣道理，你見之前啲CPI開始上咗，就好難落，因為即使物價慢慢上，你對比返之前低基數都係會升好多。經濟日報呢篇分析幾好，物價唔會忽然間大跌，所以你個CPI真係要時間慢慢見頂回落，但照計已見咗頂