ivanliresearch

101文：加息做乜震散股市？今年加幾多？下年呢？加到幾時？咩位？ (Patreon)

Published:

2022-09-25 19:52:29

Edited:

2022-09-26 09:59:49

Imported:

2022-09

Content

101文：加息做乜震散股市？今年加幾多？下年呢？加到幾時？咩位？

逐樣嚟：壓力測試，香港樓市，美國通脹，英國通脹，英鎊，日圓

香港加按息寫咗，呢篇講美聯儲局息

話時話，早排個個講香港走資港紙爆煲聯匯守唔住，結果根本唔係重點

我少咗講股市，但係怕你冇心機聽咋，我自己依然一路買

明明預咗加0.75，做乜美股大跌？可以睇返舊文了解市場預期

小技術問題：做乜聯儲局預下年息口係4.6%？唔係一個range咩？

又係教你睇點陣圖，同經濟預測

大幅調低增長預測。又，唔會以為2% GDP增長8%通脹即係負增長架可？

都話「通脹見頂」，但唔會好快回落

去到2024 核心PCE都仲係高過2%，但冇話唔可以減息，亦冇話唔可以升

戲肉：今年加幾多息？下年又加幾多？加到幾時先停？加到咩位停？

2022年尾咩息口？今次比6月嗰次，估高咗1%喎！

但，真係應該加多一次0.75，就會放慢，仲唔係好消息？

下年就收工啦喎，好差咩？

Terminal rate 幾多？仲係低過2004周期喎

暫時聯儲局都仲可以一路帶住市場

市場估嘅terminal rate冇大變。估「停加息/減息」嘅時間，亦冇乜點大變

6-8月時，市場估2023年上半年減息，即時大反彈。好快又坃過

聯儲局啲預測，都幾個月就大變。你又有幾叻？

最後留意星期五晚嘅PCE數據

逐樣嚟：壓力測試，美國通脹，英國通脹，英鎊，日圓

1. 好，多事之秋，股市唔算特別十分特別非常誇張，但匯市就真係多事，加埋仲有美國加息同香港加息，所以逐樣嚟。

香港加按息寫咗，呢篇講美聯儲局息

2. 暫定要寫嘅，除咗呢篇講聯儲局議息，仲要講美國通脹（因為影響對息口嘅判斷，但照計見咗頂），英國嘅通脹同埋英鎊，日圓（會唔會再干預？我估好快又會跌穿之前低位）。以及香港銀行加按息，但同時又放寬咗壓力測試，咁仲要講埋樓價（短線跌，但若果唔係移民，自住嘅都係應該買）

3. 今日寫咗呢篇聯儲局先，仲要求神拜佛希望今個星期唔好再有啲大件事（星期五美國會出PCE數字）

話時話，早兩個月個個講咩香港走資港紙爆煲聯匯守唔住，結果根本唔係重點

4. 仲有兩樣嘢。首先，我估呢度啲長期讀者唔會咁無知。但記得早排，個個講咩聯匯失守呀，港紙爆煲呀，資金外流呀，銀行體系結餘歸零呀呢啲。而家見到冇？全部係捉錯用神，呢排一大堆金融新聞，就係唔見港紙爆煲資金外流，甚至7.85都冇乜掂（聯儲局議息嗰晚掂過一次，但結果唔使金管局入市。又，照計好快會再掂，息差嘛，之前兩篇解過）

我少咗講股市，但係怕你冇心機聽咋，我自己依然一路買

5. 仲有，你見呢排都少講股市，首先就好多其他嘢，留意呢排嘅跌市，不見得只係因為聯儲局加息，仲有英鎊日圓等等嘅波動都有關（當然你可以話呢啲都係美國加息引起）

6. 而股市亦十分難睇，講你都未必有心機聽（雖然我都會再講）。我當然幾時都樂觀，但而家同你講都冇乜意思，信既會信，唔信嘅好可能已經低位沽走或者有錢唔敢入市，亦迫唔到你，反正我又唔係100%啱。

7. 不過可以話你知，10月頭，我一樣會將啲錢照樣買晒落股票度，身體力行。你當然未必要跟。但即使你睇得好淡都好，亦可以借呢啲時間，睇呢排呢啲講貨幣講匯率嘅文，當增長下知識。我見坊間一係真係唔識，亂寫一通。而識嘅人，又往往未必解得好。自己叻唔等於識教人嘛。

明明預咗加0.75，做乜美股大跌？

8. 言歸正傳，上星期聯儲局議息，做乜大跌？如果你好有心機，可以睇返加息之前我寫嘅嗰篇，了解返之前嘅市場預期。

9. 冇錯，聯儲局係加息0.75，而市場亦一早有咁嘅預期。如果你睇返當晚走勢，美股在議息公佈後升300點，但之後先倒跌500。原因嘛，好可能係啲「經濟數據」同「點陣圖」出事。講過了，今次係一年四次嘅「大會」，會出呢啲嘢，原稿在呢度。

小技術問題：做乜聯儲局預下年息口係4.6%？唔係一個range咩？

10. 講落去之前，仲有個小問題要解咗先。而家聯邦基金利率（以下講嘅息口都係呢一個），係3-3.25，你可以抄低（加之前係2.75-3）。我一路都冇細解，係一個range。而以前唔係咁的！幾時開始？正係2008金融海嘯減到零息嗰時。

11. 呢啲其實小問題，但你陣間會在媒體上見到，聯儲局指引2023或2024嘅息口，係一個單一數字，其實就係個range嘅中間點。例如而家係3-3.25，在聯儲局嘅講法，就係3.1（即係，3.125）

又係教你睇點陣圖，同經濟預測

12. 好啦，睇表，呢個最原汁原味，留意呢啲係指年尾嘅數字。實情亦唔算難明，一般你只睇最左邊嘅median（中位數）已經得。2025同long run都暫時可以不理。趕時間嘅，失業率同PCE都唔使睇—就只係3樣嘢，利率走勢，核心PCE（呢個係聯儲局睇嘅通脹），同埋GDP（經濟增長）

13. 當然亦有其他圖會幫你易啲理解，最重要係睇6月同而家嘅改變。

大幅調低GDP增長預測。又，你唔會以為2% GDP增長 8%通脹即係負增長架可？

14. 我地由淺入深，先睇最簡單嘅GDP。今年嘅GDP增長，調低到0.2%，上次係估1.7%。呢個大幅調低，好可能己經夠震散市場。2023同2024增長，亦調低去到1.2%同1.7%，上次係估1.7%同1.9%—不過，你亦可以理解做似乎都仲係「軟著陸」。

15. 順手一講，慎防有人唔知，差不多所有呢啲GDP增長，邊一國都好，都係講real growth，已扣除通脹，千其唔好以為「GDP增長2%但通脹5%即係大倒退」。

16. 之但係，雖然顯著調低經濟增長嘅預測，但聯儲局依然調升咗利率指引。可以理解為「不惜犧牲經濟增長都要加息」，市場反應其實幾合理。

通脹預期呢？都上調左

17. 陣間講重頭戲嘅利率，而家先講埋通脹。Headline PCE嘅，自己睇返上面圖吧，費事重覆打太多字。但見到明顯係上調咗，甚至2023 2024都上調，即係個通脹冇咁快消退

18. 但重點當然睇核心PCE。今年預測略為調高到4.5%，上次係4.3%。2023就調高得幾勁，今次估3.1%，上次係估2.7%。不過2024就冇變，維持2.3%。

都話「通脹見頂」，但唔會好快回落

19. 啟示都幾明顯，首先，通脹就真係見咗頂，同我之前講嘅一樣。但回落嘅速度似乎會比較慢。仲有，你見到去到2024，都仲係2.3%，仲係高過聯儲局嘅2%目標。

去到2024 核心PCE都仲係高過2%，但冇話唔可以減息，亦冇話唔可以升

20. 雖然冇話未到2%唔可以停減息，或者唔可以停加息，而亦冇話要減息市先會升返。況且，呢啲數字話變就變（你睇今次同上次都爭好多）。但無論如何，上面呢啲數字，當然市場反應相當負面，因為亦代表個息口會加得再多啲，以及停加息或減息嘅時間再推後。

戲肉：今年加幾多息？下年又加幾多？加到幾時先停？加到咩位停？

21. 然後就去到戲肉啦，睇利率指引。除咗睇上面嗰個圖（貼多次），仲有堆點陣圖，雖然好多人都話好難明，都係嘅。總之一粒豆豉就代表一個官員，不記名投票（但其實要估邊個打邊個都不難）

2022年尾咩息口？今次比6月嗰次，估高咗1%喎！

22. 戲肉啦喎，講加息同減息路徑，再提你一次，而家嘅息口係3-3.25。

23. 好，首先睇返局方嘅指引。今年，係會估加到4.25—4.5（即係表中嘅4.4，其實即係4.375）。而上次，局方只係估加到3.25-3.5，爭成 1厘！亦反映咗呢幾個月嘅通脹數字居高不下。

24. 另外，上面兩段夾埋，亦即係話，今年再加多1.25！而你見之前市場，只係預呢兩次加多1甚至0.75。雖然其實去到議息前夕，都估要加多1.91（舊文有寫），留意呢1.91未計剛剛加嘅0.75。

25. 咁既然得返兩次議息，聯儲局又寫明加多1.25，亦即係一次0.75，一次0.5，而正路地都一定係先重後輕，11月0.75，12月0.5，睇利率期貨都見到

但，真係應該加多一次0.75，就會放慢，仲唔係好消息？

26. 咁其實係咪真係咁灰？雖然之前有人估9月呢次係最後一次加0.75，呢個期望就落空。但，若果照以上劇本，12月時已經係加0.50，放慢咗，要當「好消息」一樣可以。當然，即使係聯儲局嘅1.25，亦可以再改（留意12月嗰次又係「大會」），所以睇住呢幾個月嘅PCE。

下年就收工啦喎，好差咩？

27. 仲有，睇埋下年嘅數字。而家局方估下年係4.5-4.75，而 6月時係估3.75—4，咁既然今年年底係4.25—4.5，咁即係，下年再加多0.25咯。好差咩？其實兩睇。

28. 亦留意，可以話加到4.25—4.5就收工，仲有1.25（不過呢個講法唔係100%準，下面詳解，因為聯儲局可能係下年先加後減，雖然機會似乎唔大）。呢個就係局方暫時指引嘅terminal rate（加到呢個位就停），留意仲係低過之前嘅周期。講到加息點大件事，又係咪未見過？

Terminal rate 幾多？仲係低過2004周期喎

29. 換句話講，亦即係嚟緊係75-50-25收工，11月加0.75，12月加0.5，下年加多次0.25停手（不一定要2月嗰次）。固然你可以話2024年先會減息（留意表入面2024年係3.75-4了，仲低過今年尾），但再講一次，呢個75-50-25劇本，要當係好消息一樣得

暫時聯儲局都仲可以一路帶住市場

30. 最後可以睇下利率市場嘅反應，都好簡單地，就係聯儲局改，大家咪跟住改，大約都仲係覺得聯儲局有「公信力」。大家都知佢有機會再改，但至少係一個「你咁講我咁信」嘅態度。至少唔會聯儲局引導話加到4-4.25，但市場估加到6厘，或者3厘咁，大約都近磅的，亦因為聯儲局會不停出口術引導市場，呢個機制以前解過

31. 例如話聯儲局指引加1.25，市場而家就估115（不一定真係好多人唔信1.25，仲有好多技術原因）

32. 而terminal rate，市場估到4.6%左右，略為高過聯儲局嘅指引添，但留意，亦唔係同一個星期前爭好多。所以你話市場係咪完全冇預聯儲局調高未來嘅加息路徑？我都有啲懷疑。

市場估嘅terminal rate 冇大變。估「停加息/減息」嘅時間，亦冇乜點大變

33. 留意個「停加息」甚至「減息」嘅時間，都冇乜變，甚至好似比局方指引早啲，呢度又睇下會點演化。

6-8月時，市場估2023年上半年減息，即時大反彈。好快又坃過

34. 另外呢個圖有趣，市場估下年頭6個月，會加0.37—喂，聯儲局先話下年0.25咋喎。呢度就有好多原因，除咗有人估「唔止0.25」外，亦有可能係—先在年頭加兩次0.25，年尾就減一次0.25，一樣做到嗰個效果。所以上面講4.25—4.5見頂，未必完全啱。仲有留意，6-8月，利率市場係估2023年上半年會減息，記得嗰股市場就有個反彈　—　睇下幾時又嚟多次。

35. 至於你點知呢啲利率期貨？如果公司冇機嘅，咁你可以留意我Patreon講，又或者自己上CME Fed Watch日日睇都得，你咪睇晒咁多個會議日期，邊日見到開始啲友係估減息多過估加息，遲下細講