［突發專題］點解匯豐加prime 0.125%，又加紅簿仔息口0.125%。但會對淨利息收入不利？ (Patreon)

［你也可以做分析員］show兩道板斧畀你睇下，等你知大約係點玩。好似人地四流NBA球員示範下咁。人地高盛嗰啲咪All Star球星，我咪四流大後備，但，都仲係勁過啲網友好多好多倍

呢篇文原本貼公海，但因為覺得幾有意義，就貼咗Patreon先。另外啲Excel同link，係呢度先有的

TLDR：點解匯豐加prime又加紅簿仔息，兩樣都加0.125%，反而蝕章？原因嘛，因為太少按揭，太多紅簿仔。亦因為太少貸款，太多存款。但，銀行邊有死錯人？做乜計數好似蝕章，都要做？咁梗係有方法賺返你啦

1. 見到匯控昨日跌得幾勁下，4%。固然美股跌，港股跌，但佢跌得多過大市，甚至跌得多過唔少中資科技股。另外，你見亦跌得多過行家，渣打恒生中銀香港咁。一日股價唔代表乜，亦未必真係有原因，但即管解釋下。似乎有得解。

2. 因為，佢地今次咁樣加prime加埋紅簿仔，會打擊佢嘅淨利息收入。亦即係，影響盈利。之前高盛有寫過，但我當然自己整一次。

3. 你心諗，唔係喎，明明話加息有利銀行股。係丫，如果你知呢樣，都有啲水平。咁但，初級班教呢啲嘢。我地中級班高級班唔止呢啲。

＝＝＝＝＝

4. 首先講，銀行嘅核心兼傳統業務（英文叫bread and butter），就係存貸loans and deposits，就係一個問人拎錢，再畀錢其他人嘅遊戲。拎錢，可以係個人或企業存戶，定期存款，紅簿仔。亦可以係同業。仲可以發債，發存款證，係呢幾味啦。放出街嘅，可以係借畀企業，或者借畀個人，仲有拆畀同業，或者拎啲錢去投資（但普通銀行唔炒股票，只會拎去買美債，或冰島債）。不過留意，只有借畀公司同個人，先真係叫「貸款」，拆畀同業咪叫拆畀同業，買美債或斯里蘭卡債就叫投資。同樣地，拎個人或公司嘅錢先叫存款，問同業拎唔算，發債發存款證亦唔算。全部有規矩，有明文指引

5. 咁，如果我只加prime，唔加存款息，咪肥仔水咯！又或者，prime加多多，紅簿仔加少少。咁咪爽！冇錯係！呢個係我原本估嘅嘢。但結果冇出現，幾間銀行，都係又加prime，又加紅簿仔息，一齊加0.125%（定期早就加咗）。

6. 咁但，呢個「對稱加息」，點解會對銀行不利？就可以解了。

＝＝＝＝＝

7. 首先解咗，多數情況下（但唔係全部），對稱加息係對銀行有利嘅。最主要嘅原因係：銀行係一個借短錢，放長錢嘅遊戲。你啲存款，活期，或者一個月，你唔會做十年定期。但銀行放出街，供層樓，廿幾三十年。

8. 咁一般情況下，長息係高過短息嘅。經濟嘢，呢個可以寫幾篇文解。但，而家就「息口倒掛」，另一個故事。

9. 另外，因為之前減息，銀行可能兩邊一齊減，但好快去到一個位，存款已經零息，冇得再減，但貸款息仲要一路減，所以銀行唔鍾意低息環境。

10. 此外，咪話銀行投資會買債，咁債息高，對銀行投資都係有利嘅

11. 咁講返，點解prime又加0.125，紅簿仔又加0.125．對匯控不利？你夠叻嘅，可能估到。「因為太少按揭，太多紅簿仔」—真相都大約係咁！

12. 但，口講無憑，睇實數。睇Balance Sheet，年報有。

＝＝＝＝＝＝＝

13. 不過，首先有一個大嘅問題。HSBC，環球金融，好多唔關香港事。點拆出嚟？

14. 幸好，有一間嘢，叫做「香港上海匯豐銀行」（可以拎銀包出嚟睇下），Hongkong and Shanghai Banking Corporation，俗稱嘅Hong Kong Bank．你可以當呢間就係「匯豐銀行」，HSBC係匯控。而幸而呢間嘢，係另外有年報出嘅。

15. 不過，有冇話你知，呢間「Hong Kong Bank」，都有好多唔係Hong Kong嘅嘢？詳情自己睇，但我記得，大陸交通銀行都係在呢度（不過係聯營公司，唔會食埋啲存款入總數，以前Patreon解過）。仲有，好似越南菲律賓坡國啲嘢都在入面。

16. 你真係想知嘅，Hong Kong Bank，60%左右貸款係香港，70%左右嘅存款在香港。

17. 咁但，因為我只係想畀你睇個現象，所以唔分咁細了。因為我都唔知入面「按揭」有幾多係香港。所以睇成間算。實際上，我啲數肯定高估，因為唔係全部係香港。

＝＝＝＝＝＝

18. 戲肉，計數。Hong Kong Bank，貸款39000億（港紙，下同）。客戶存款呢？61000億（記住，兩樣都係六七成在香港）。

19. 你留意到，存款多過貸款咁多？係！術語睇貸存比率，LDR，Loan to deposit ratio，Excel有。Patreon有得Download

20. 咁，收咗你啲存款，又唔借畀人，去咗邊？答案：咪買美債，或菲律賓債。呢個64%嘅LDR，係比較低嘅，中銀香港66%（都低），恒生去到80%。咁有啲銀行去到超過100都得（自己諗點解可以）

21. 另外，睇下39000億貸款，有幾多係個人貸款，有幾多按揭？估都大約估到，因為間間銀行都係咁上下比例，唔會側埋晒一邊的（分散風險呀，學你啲網友咁all in刀仔鋸大樹咩，人地食大茶飯，唔係賭仔心態）。你見，個人貸款15400億，大約總數40%．而呢度入面，絶大多數係按揭，佔12000億左右，亦即係按揭佔總貸款30%。係略高嘅，恒生講緊29%，中銀，你估唔到，係24%。本身冇話好定唔好，大家各自取向。另外，有人問，非個人貸款嗰啲係乜？咪企業貸款，仲有啲貿易融資（Trade Finance，開下LC咁）。至於問，個人貸款除咗按揭仲有乜？咪信用卡，同埋私人貨款。留意遲下啲文我都會用返（我唔教書真係嘥晒）

22. 然後再睇，61000億存款，有幾多係紅簿仔—即係活期或往來，唔係定期存款嗰啲。誰不知，好似冇寫！似乎因為匯控係歐洲銀行，跟嗰邊啲格式，香港銀行就多數有的。

23. 但，學嘢啦，做分析員嘅。搵唔到咁點呀？估咯！唔通漏空佢？點估呀？Educated guess．佢冇寫幾多紅簿仔，但有寫幾多係一個月之內到期—咁當晒嗰啲係啦（實情有啲唔係），見到大約90%，都係呢啲一個月到期嘅，我當係紅薄仔。呢個比率，似乎都高嘅，恒生80%，中銀係60%

24. 咁正面睇，Hong Kong Bank成堆咁嘅平價存款，近乎冇息，funding cost低到不得了，唔使點用高息定期存款搶客。

25. 但到而家，加紅簿仔息，就唔係太好了。

＝＝＝＝＝＝＝＝

26. 表幫你計晒，如果加0.125% prime，按揭當然全部收多啲息，一年收多15億（12000億 X 0.125%）。但，我紅簿仔嗰度，55000億，一樣畀多0.125%！嗰度畀多70億！蝕章！所以，個問題就真係，「太少按揭，太多紅簿仔」

27. 實務上，有幾個問題。首先，最煩嘅係，「在香港嘅存款貸款，不等於係港紙」。但太煩，冇心機研究，大約啦下。正如上面呢啲數字，肯定高估，因為得六七成貸款存款在香港之嘛。但，「加埋唔夠輸」，就應該冇錯。況且，佢地美金存款都加息，但照計美金嘅按揭就好少。

28. 問題二，堆紅簿仔，唔係全部要加0.125%。入面有啲往來戶口啦，有啲係好少錢嘅戶口啦，呢啲戶口係冇息嘅），不過應唔爭好遠。

29. 問題三，加prime，唔止影響按揭，亦有其他貸款係跟prime．最簡單，你去券商借孖展嘅息，多數都跟prime—因為銀行收券商都係跟prime，佢咪左手交右手畀你（又，賺spread呀，之前講過啦）。咁所以，我有個計法，係計到所有貨款都會收多0.125%—但你見，都係唔夠輸錢！

30. 因為，個貸存比率LDR太低嘛！

31. 但你不能話呢樣嘢係衰，有辣有唔辣啦，LDR低，一般亦即係銀行比較保守。況且，LDR咁低，咁存款啲錢去咗邊？去咗買債，或者拆畀同業—嗰度嘅息一早升咗啦。

32. 但，如果只講加0.125%呢樣嘢嘅marginal effect，就真係似乎冇so

=====

33. 你夠叻嘅，又會問個問題：咁銀行做乜咁低能，自己倒自己米？其他銀行就二仔底死跟，但Hong Kong Bank第一間飛出嚟做喎。自殺？

34. 短答案：我都唔知。中答案：咁銀行主動咁做，實冇死錯人。

35. 長答案：首先，有人話驚加prime唔加紅簿仔會畀人鬧，但我就唔多信，「你咪鬧」，唔加紅簿仔，慳返好多錢，拎晒去不停收買KOL都得啦。

36. Patreon上篇文都有寫，好可能係因為競爭，唔想啲存戶走。但，咪話個LDR低咯，仲保住咁多存款做乜？

37. 我估，一樣嘢，cross selling。再俗啲講句，「紅簿仔你收得我幾多息？」「我賣到一隻基金畀你，已經賺返晒你啦」。我估係咁，留客，就可以賣到其他非bread and butter嘅嘢，所以凡事不能咁表面啦。

＝＝＝＝

38. 順帶一提，見到有人講，話按揭呢啲雞肋嘢，又唔係佔銀行好多。寫嗰個就識嘢嘅，但我都係不敢九筒。首先，一樣業務佔30% loan book，點會唔重要？另外，存在即合理，你見銀行都好落力谷，點會死錯人？

39. 你睇按揭息率好似唔高。而家加按息，先話3%—喂，我借畀企業，10%都閒事啦。

40. 係喎，不如借去孟加拉丫，仲高息。不如開財仔丫。但有冇諗過壞帳風險先？香港嘅按揭點解咁平息？因為競爭大。點解銀行咁平息都做？因為，香港人死都唔會斷供，壞帳率低到嚇死你—就算你斷供，銀行都仲有你層樓在手，而家首期要求又高，銀行好少要損手。明冇？

＝＝＝＝＝＝＝＝＝

41. 呢個Excel表呢，投行啲才俊，就真係咁做。但，「人地唔會解咁長，兩句講完」，因為啲讀者都係基金經理，甚至講CASA已經明—我估你都唔知咩係CASA，唔係屋仔，唔係CASABLANCA，而係current account savings account，卡沙ratio，咪你有幾多存款係呢啲cheap funding．

42. 咁但，行家就術語啫。你地係素人嘛（最緊要唔好以為自己好叻），我就萬世師表，101教起。

43. 我要sound so smart好易，兩句講完。因為匯豐CASA ratio高，LDR低，而Mortgage as total loan book未夠大。但你唔明嘅，有乜意思？

44. 當然，更加多KOL，根本自己都唔識。咪求其話你知，「匯豐不嬲都唔掂架啦」。唔用腦，幾咁好。

45. Attachment 個Excel，仲有埋恒生同中銀，你會見到，佢地嘅負面影響冇咁大。當然，「恒生入面又有恒生中國」，計晒入去的，同Hong Kong Bank唔同（Hong Kong Bank唔計交通，但有自己在大陸直營）。至於中銀香港，同HSBC有啲似，入面有埋泰國柬埔寨之類，我又冇再分出嚟啦。

===

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。