［101文］香港銀行體系全攻略（下）—今日加prime，可能17年加得最勁 (Patreon)

［101文］香港銀行體系全攻略（下）—今日加prime，可能17年加得最勁

之前都冇跟足美國，人地加晒，香港先加少少。減落嚟亦都係。點解？

美國加咗3厘息，但香港銀行體系結餘仲有1200億！

而香港拆息仲要仲低過美金0.5厘，「證明香港真係好多錢」。走乜資？

2005嗰浸，美國加4.25厘，香港跟咗3厘。點解跟唔足？

彩蛋：2005年銀行體系結餘得10億多啲，清零未？

2015年嗰浸，美國加2.25厘，香港加…..0.125厘！「又話要跟？」

對比下，2018年第一次加prime，同而家嘅情況，有乜異同？

Rule of Thumb：P-H唔夠3厘，銀行就想做嘢。而家已經到咗

照計好大機會加prime，但星期四加幾多？會加到幾時？咩位見頂？

不過，又有人話，銀行要同時上調存款息，冇so喎

加prime又要加紅簿仔息，對銀行息差不利。但，係咪一定要加紅簿仔？

歷史上，就好少加prime唔加紅簿仔，「但過去唔代表將來」

最後你想問：加 prime，按息升，供樓負擔重咗，樓價會點？下篇答

樓價？跌緊啦。不過，邊個話你知樓價同按息有關？

上篇講左啲基本嘢，美國同香港各種息口，互相關係。仲解咗啲供樓plan係咩回。銀行之前調高按息封頂位，就只係可以新客賺多啲。銀行加prime，就可以新舊客賺晒。咁既然拆息又升咗，定存息又高咗，銀行成本高咗。點解之前一路都冇加prime？今篇會講埋，之前嘅加息周期

之前都冇跟足美國，人地加晒，香港先加少少。減落嚟亦都係。點解？

1. 呢度就睇少少歷史啦。其實之前都冇跟足美國，人地加晒，香港先加少少。減落嚟亦都係。

2. 呢度畀埋美國嘅周期你睇，自己對下時間。（但呢個圖2022年未最update）．睇數字亦可以。

3. 冇跟嘅美國郁嘅原因，好簡單，上篇咪講咗，冇話老奉要跟。大銀行資金成本夠平嘅，大可以硬食，令到啲細銀行更難搶生意，咁之嘛。

4. 實務上仲要睇一樣嘢，「市場」多唔多錢？亦即係，睇傳說中嘅「銀行體系結餘」，上面第一個圖都有。

美國加咗3厘息，但香港銀行體系結餘仲有1200億！

5. 金管局剛剛再接錢，但雖然講咗好耐咩走資，資金外流，港紙拆息低過美金，但你見而家都仲有1200億。都比我想像中跌得慢，亦因為咁，而家港紙拆息都仲低過美金0.5厘咁滯

而香港拆息仲要仲低過美金0.5厘，「證明香港真係好多錢」。走乜資？

6. BTW，金管局成個幾個月冇接過錢，港紙成個幾月冇見7.85—但你見呢個幾月，港股一樣跌到趴—亦話到你知，根本同7.85冇關。7.85時可以升（之前4月嗰浸），唔係7.85亦可以港股大跌。

2005嗰浸，美國加4.25厘，香港跟咗3厘

7. 我地可以對比下，未計今次，睇之前兩次嘅美國加息周期，即係2004-2006（美國加咗4.25厘息），同埋2015-2018（加咗2.25厘）。

彩蛋：2005年銀行體系結餘得10億多啲，清零未？

8. 你見2004-2006嗰浸，p加咗3厘（留意都冇跟足，而且慢過美國少少）。仲有留意，當時銀行體系結餘由50億跌到10億多啲，而1個月拆息係4厘幾

2015年嗰浸，美國加2.25厘，香港加…..0.125厘！「又話要跟？」

9. 但到2015-2019嗰浸呢？香港只係加咗一次p！2018年9月先加（美國結果12月加多次就停咗周期），仲只係加0.125！然後，話咁快就減返。

10. 點解咁大分別？因為去到2018年，個銀行體系結餘，750億了！

11. BTW，留意下，銀行體系結餘，2018年跌到750億，完全冇加息壓力添。甚至2005年嗰次，去到10億多啲，香港都未「爆煲」。固然同當年比，香港銀行體系都大咗好多，但原則一樣：個銀行體系結餘，可以跌到好低，而唔會出任何問題（除咗啲拆息會大升）

對比下，2018年第一次加prime，同而家嘅情況，有乜異同？

12. 於是乎，大家可以比較下，而家同2018年嘅情況。

Rule of Thumb：P-H唔夠3厘，銀行就想做嘢。而家已經到咗

13. 都講過，銀行當然想賺錢，但又要顧及競爭，同埋少少公眾形象（例如美國減香港加，又有啲傻仔會出嚟鬧）。咁其中一個「rule of thumb」，睇P同H嘅差距咯，一般去到3厘樓下，銀行就會想郁個P。（至於2005年嗰浸，H大約去到4厘的，美國都加到5厘。而香港prime都係5厘）

14. 但只係一個rule of thumb咋下。咁但你而家見到，H 2.5厘啦喎，銀行差不多應該做嘢。

15. 不過另一方面，頭先都講咗，而家個銀行體系結餘都仲似乎幾高，我都有啲奇怪。銀行又未必真係好急，難估。

照計好大機會加prime，但星期四加幾多？會加到幾時？咩位見頂？

16. 好啦，戲肉，銀行星期四會做乜？當然會加p（唔會唔加啩？）。但加幾多？甚至有人問，今次個p會加幾多？加到幾時？

17. 答咗尾嗰兩條先，因為難答，所以冇得答。你想知加到幾多，加到幾時。咁你首先要判斷美國加到幾時，加到幾多。上篇文講過，共識大約估加到4.5厘，大約加到下年5月。但呢啲嘢隨時可以變，仲要咪話p唔係跟得好足，又要睇銀行體系結餘，所以好難答。

18. 但好大約地估，可能係加四至六次？即係可能加1-1.5厘？好大約。但正路，係唔會跟晒美國加嘅（美國由0加到4.5喎！）。你見美國加咗近3厘息，香港銀行體系結餘都仲有成1200億。

19. 所以睇啲近啲嘅，星期四加幾多？幾個鐘後你就可以拆我招牌。

20. 我估，應該係0.25。

不過，又有人話，銀行要同時上調存款息，冇so喎

21. 其實有人估係加得更少，明報呢篇稿好好，畀個再專啲嘅角度你。唔想睇文嘅睇圖，圖都唔明嘅聽我解。

22. 冇錯，銀行加p，即時按揭（仲有其他貸款）收多啲息，何樂而不為？但，存款利率呢？紅薄仔呢？

23. 你睇唔少講法，包括明報引高盛嘅報告（肯定熟過我同你），都會講，加p要加埋紅薄仔息。咁銀行咪要計數咯，貸款收多咗，存款利息又要畀多啲喎！如果我好多紅薄仔咪蝕？而事實，香港而家就係好多紅薄仔，而當然係大銀行。大銀行，有冇好大誘因加p？

24. 亦都因為咁，甚至有人覺得，加p會對銀行淨息差不利，因為存款都要加息

加prime又要加紅簿仔息，對銀行息差不利。不過，係咪一定要加紅簿仔？

25. 不過突跛盲腸啦，到底加p，係咪一定要加紅薄仔利息？答案，又係埃汾最鍾意講嘅：yes and no．你睇歷史上，yes，多數一齊郁，除咗銀行唔想流失存款，亦係銀行怕畀人鬧。但，「過去唔等於將來」，銀行而家環境都差，「你咪鬧咯」。以我所知，銀行理論上可以只加p，唔加紅薄仔息，咁咪著數！

歷史上，就好少加prime唔加紅簿仔，「但過去唔代表將來」

26. 銀行會唔會咁狗？我估會。但亦可能兩邊都加。不過我估唔會兩邊都唔加。Sum up：p就必加，但紅薄仔，一半一半，未必加。亦有人估0.125，但我估加0.25

最後你想問：加 prime，按息升，供樓負擔重咗，樓價會點？下篇答

27. 好啦，最後你會想問，咁加咗p，按息升，對樓市有乜影響？呢個又係一個好長嘅問題，我會開篇新文講，但冇咁急。

28. 不過快答你：樓價短期（一兩年啦）當然睇跌，事實亦都跌緊，有眼睇。咁同樣地，根本H按嗰啲，個按息一早已經升咗唔少（但當然郁咗P仲有得升）啦。＼

樓價？跌緊啦。不過，邊個話你知樓價同按息有關？

29. 不過，我幾乎可以幾肯定話你知，按息，係唔多影響樓價嘅。你可以諗下，香港買得起樓嘅，都係幾富貴嘅人，仲要有埋壓力測試，唔會加息就供唔到。對於未買嘅人嚟講，我亦唔覺得佢地係考慮供多咗少少錢

30. 證據？你睇之前兩個按息升嘅周期，樓市一樣照升，關乜事？

31. 同樣地，呢期樓價跌，原因好多。除咗「真係太貴」外，封咗關冇大陸人嚟係一個原因，好多人移民賣樓係一個原因，有啲未移民都見跌樓又賣鎖定舊錢又係原因，少咗鬼佬亦係原因。但，就真係有排未數到按息。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。