ivanliresearch

［101文］香港銀行體系全攻略（上）—今日加prime，可能17年加得最勁 (Patreon)

Published:

2022-09-21 19:51:23

Edited:

2022-09-22 00:44:17

Imported:

2022-09

Content

［101文］香港銀行體系全攻略（上）—今日加prime，可能17年加得最勁

新加息周期，但乜嘢叫香港「加息」？

美國嘅息：聯邦基金利率，美國債息，美金拆息。三者點互動？

「香港行聯匯要跟美國加息」—但冇見過下白泥聯儲同梅子林聯儲局長開會喎

目迷五息：香港嘅拆息，按息，prime同埋存款息，同美國又點互動？

港紙拆息：看似複雜但最易解，因為只受兩樣嘢影響

港紙拆息圖好圓滑，美金就更加滑。唔會一日抽上去。有得解

存款息（後生讀者知唔知咩係紅簿仔？），你估由乜決定？

法興瑞信都冇分行，邊有港紙買股票發輪？（定你以為佢同你賭白頭片？）

Prime幾時加得？答案係：幾時都加得！邊個話要跟美國？

Prime：咁銀行點決定加唔加？幾時加？加幾多？

按揭息：H按到晒封頂位，但銀行要守「合約精神」，咁可以點賺你多啲？

銀行唔係開善堂，H按按息到晒封頂位，咪即係蝕畀你，做乜仲唔加？

加封頂息，就只舔新客。加prime，就新客舊客一掃光，全部舔。明冇？

是真的：銀行係少數對舊客好過新客嘅行業！

而銀行又調高咗定期存款息喎，做乜益你？開善堂？

拆息又升，定存息又升，銀行成本升，加p根本好合理

你應該問嘅問題係：點解之前唔加 p，而家先加？下篇講（已出埋）

分兩篇，但一齊出，純粹畀你可以分開睇。呢篇基本嘢先，覺得太淺嘅可以快飛

新加息周期，但乜嘢叫香港「加息」？

1. 寫文時星期三晚半夜，聯儲局決定咗加息0.75厘，但呢個聽日先再講。反正市場都預咗，而且之前我都寫咗唔少。

2. 今篇係講「香港加息」，都一排冇寫香港嘅嘢。當然要寫，因為香港銀行好可能今日（星期四中午）就會「加息」，2018年第一次，亦代表一個新周期嘅開始。

美國嘅息：聯邦基金利率，美國債息，美金拆息。三者點互動？

3. 不過，咩叫香港「加息」？以前寫聯繫匯率嘅文好詳細寫過，今次快講。首先，美國嘅「息」，我地關心嘅三種。聯邦基金利率，美債債息，美元拆息（如果美國買樓會關心美國按揭息，但唔係呢度討論）。聯邦基金利率Fed Fund Rate，咪就係你聽聯儲局班友坐低決定嘅東西，剛剛加咗0.75嗰個東西。呢個聯邦基金利率係短息嚟的，但可以間接影響到拆息，拆息（USD Libor，留意其他貨幣都可以有LIBOR）就係銀行之間拆借嘅利息。債息Bond yield/Treasury Yield，你咪當係美國政府借錢要畀嘅息，短債會受聯邦基金利率影響，長債就冇咁大影響，主要都係市場供求，宏觀嘢，衰退通脹之類。

「香港行聯匯要跟美國加息」—但我冇見過下白泥聯儲同梅子林聯儲開會喎

4. 再講一次，香港行聯匯，冇自己貨幣政策，唔會下白泥聯儲同梅子林聯儲行長坐低開會舉手，香港冇「聯邦基金利率」同等嘅嘢。有人見到金管局有個貼現窗利率，另一回事，同你冇乜關，主要影響銀行應急要借錢，而嗰個主要就跟美國。香港當然都有「債息」，但冇乜人關心，不討論。

目迷五息：香港嘅拆息，按息，prime同埋存款息，同美國又點互動？

5. 香港我地關心嘅，四樣嘢。拆息（H，for HIBOR，以下講1個月，但其實由隔夜到12個月都有），按揭息（你供樓畀嘅息），最優惠利率（prime，簡稱P），存款息。四樣嘅關係，快手解。

港紙拆息：看似複雜但最易解，因為只受兩樣嘢影響

6. 先講拆息，好似複雜，但以前寫過好多文。同埋影響佢嘅因素都少，就只係兩樣嘢：美金嘅拆息，同埋銀行體系結餘（金管局日日有出，或者呢度都有）。因為香港行聯匯，只要啲友覺得唔會郁，咁理論上兩個地方嘅拆息會接近。但靠乜調節？就係市場機制，啲銀行會套利嘅供求，兩樣邊樣平咪借邊樣，然後轉咗另一樣，拎高啲嘅息。只要個聯匯唔郁，就冇風險賺錢。然後通過呢個過程，會壓到兩種拆息差不多水平。

7. 例如而家1個月美金拆息3.1厘（有得睇的，留意呢個係過去一年嘅圖），H（都係1個月，亦有得睇）2.6厘．咁港紙就會受壓，亦係你成日聽到嘅所謂「走資」（根本唔係），金管局要接錢。一路接，銀行體系結餘一路跌，港紙少咗，H就係「港紙」嘅價錢，自然貴咗，最後拉到兩個息口差不多。

港紙拆息圖好圓滑，美金就更加滑。唔會一日抽上去。有得解

8. 順手一提，上面個美金拆息，條線好圓滑（港紙都係，但冇咁滑的，因為市場細啲），唔會在聯儲局加息嗰晚一嘢抽上去的，因為係1個月拆借嘅錢，而之前每日都有人去估係咪加息，唔會今日先忽然發現。

存款息（後生讀者知唔知咩係紅簿仔？），你估由乜決定？

9. 溫完書，我地講存款息，咪你做定期存款同紅簿仔（有冇讀者唔知係乜？一舨指啲極低息，近乎冇息嘅活期存款，你隨時拎得走嗰啲）嘅息。有冇諗過由乜決定？答你：任銀行定。但當然銀行有競爭（唔好以為老奉，我入行時仲係行利率協議的），所以大家會爭。大銀行網絡好，又好似安全啲，啲姐姐又靚啲，自然畀低啲息。細銀行等錢用，咪畀高啲息吸定存。

法興瑞信都冇分行，邊有港紙買股票發輪？（定你以為佢同你賭白頭片？）

10. 仲有，銀行可以唔靠存款。香港好多銀行得一間分行，唔開街舖。點拎存款？除咗企業客（意大利公司存返意大利銀行咁），就係問同業借。當然貴啲，但自己計數啫，可能開分開仲貴，街坊又唔知你間嘢乜水。

11. 實務上，香港啲大銀行，匯豐中銀，就係拆（你啲存款）出街，畀啲外國嘅古靈精怪銀行，例如法興瑞信之類。發輪要錢，要港紙買港股做對沖，輪商錢邊度嚟？咪同業拆返嚟。

Prime幾時加得？答案係：幾時都加得！邊個話要跟美國？

12. 然後係P，P係點決定？答案：同上，任銀行定。P主要同供樓有關，但其他借款都會有關，好可能包括你啲港股孖展息，因為你間券商都係問銀行借，銀行加佢，佢咪加你。

13. 所以唔好念口簧咁，聽到人講「行聯匯港息要跟美息」，就以為美國加息P要郁。既然係銀行決定，咁好簡單，根本唔使等美國開會，銀行鍾意幾時加減都得，一個星期改五次都得。美國加，香港銀行減都得—當然呢個好極端，冇見過。事實我亦冇見過銀行忽然在非議息日做嘢。

14. 但，美國加咗息香港唔加P，或者美國減息P唔減，就見過好多次。畀個圖你，陣間再解點解會咁。

Prime：咁銀行點決定加唔加？幾時加？加幾多？

15. 咁銀行點決定？好簡單，又係競爭。而實際上係細銀行睇幾間大銀行（其實就係匯豐同中銀）頭，因為佢地最多存款。仲有，唔同嘅銀行可以有唔同嘅p，唔係次次一齊行，所以你會聽到有兩個p，大p細p，有一期試過3個。而家細p 5%，大p 5.25%。匯豐恒生中銀（唔肯定，自己去佢地網站睇）就細p．以本傷人，其他大p

16. 因為銀行各有盤算，所以唔同銀行唔同決定。亦因為咁，銀行亦會唔跟美國決定。你美國加息，美金拆息升，H又升（呢度都可以唔同步，或者跟唔込），某啲細銀行成本高咗。但大銀行唔加，你冇得加，你咪硬食。至於大銀行，H升佢可能受惠，唔加p都得。機制可以幾個因素，但原理就係咁。

按揭息：H按到晒封頂位，但銀行要守「合約精神」，咁可以點賺你多啲？

17. 好啦，到講按揭息。我老母供樓嘅年代，就係p加幾多。後來，就係p減幾多。然後十幾年前，開始引入咗H按，絶大多數呢十幾年買樓嘅人都用緊，包括我。就係你供樓嘅息，同H掛勾，H+ XX%。但啲客會驚，第時H狂升我咪好大件事？所以銀行會同時有個封頂位，同P有關，P減YY咁。即使H狂升，供樓嘅都係最多畀呢個P-YY嘅封頂息（但，理論上銀行可以忽然加p加到10厘，但實際上唔會啦）

18. 仲有留意，有「合約精神」。你簽嗰時，係呢個H+XX 而 P-YY封頂，就一路都係咁。XX同YY嘅數字，定咗就係定咗，銀行不可能下個月走去郁我呢個數字。H會變，但真係市場機制，而且由美金拆息再影響，匯豐中銀都好難「操控」。