ivanliresearch

今個星期三篇大嘢：聯儲局加息路徑。美國通脹回顧展望。香港加prime。加息睇啲乜？加75定100？唔難估吧，當然「過去唔代表將來」「咁通脹幾時見頂？」—見咗頂啦，冇變喎。聯儲局今年仲會加幾多息？聯儲局又會加息加到咩水平先停？重申：長債債息升股市死（而唔一定係聯儲局加息）。換個角度問，有乜令聯儲局收手？睇股市？睇油價？睇失業率？聯儲局會「救市」嘅謬誤。救乜市先？通脹去到幾多，聯儲局先停加息？對上幾次停加息，發生乜事？咁停咗加息幾耐，先會減息？一樣有數計。講咗咁多都係聯儲局嘅息，咁歷來債息又幾時落？留意唔同步的。 (Patreon)

Published:

2022-09-19 16:53:59

Edited:

2022-09-20 00:27:46

Imported:

2022-09

Downloads

Content

今個星期三篇大嘢：聯儲局加息路徑。美國通脹回顧展望。香港加prime。

加息睇啲乜？

加75定100？唔難估吧，當然「過去唔代表將來」

「咁通脹幾時見頂？」—見咗頂啦，冇變喎

聯儲局今年仲會加幾多息？

聯儲局又會加息加到咩水平先停？

重申：長債債息升股市死（而唔一定係聯儲局加息）

換個角度問，有乜令聯儲局收手？睇股市？睇油價？睇失業率？

聯儲局會「救市」嘅謬誤。救乜市先？

通脹去到幾多，聯儲局先停加息？

對上幾次停加息，發生乜事？

咁停咗加息幾耐，先會減息？一樣有數計

講咗咁多都係聯儲局嘅息，咁歷來債息又幾時落？留意唔同步的

今個星期三篇大嘢：聯儲局加息路徑。美國通脹回顧展望。香港加prime。

1. 非常多嘢消化，非常多嘢寫，但盡力而為。保證呢幾篇你覺得有用。因為又到咗相當關鍵嘅時刻。

2. 三大樣嘢要寫，首先係今星期聯儲局議息，星期三晚有結果。第二，上星期咪出咗個好差嘅通脹數字，震散市場，話咗詳寫都仲未寫，但都係會寫，除咗回顧仲要展望。第三，星期四朝早，美國議息後，香港好可能會「加息」—加最優惠利率，亦同大家講下。

3. 唔肯定寫唔寫得晒，但應該得。理論上講儲息，就會同個通脹有關，所以應該先寫通脹。但慎防寫唔切，所以今篇寫議息先。另外香港加息都會星期四前寫到。真係冇時間，就可能再之後先寫通脹，因為最唔趕急，雖然應該夠時間，希望呢幾日唔好再有啲好大嘅事。

4. 另外，議息完，仲要寫一篇。所以呢個星期夠晒大堆頭。

5. 留意，呢幾篇嘅數字，都係上星期週末，出咗嗰個驚嚇CPI數字後嘅嘢了。

加息睇啲乜？

6. 話咁快9月下旬，今次議息又係一年四次嘅「大會」。又會出點陣點同經濟預測。循例嗰幾句，當然睇佢點引導通脹走勢，同利率走勢咁。但你話市升定跌，難估，雖然我估升，保持樂觀嘛，仲有其他原因，下篇講。

7. 上次（6月）嘅經濟預測，就在呢個圖，想自己睇成份嘢都得。留意聯儲局每次都會貼返上一次嘅預測數，但我而家畀定你，有個心理準備。

8. 呀仲有小心，今個月呢，聯儲局已經加快咗縮表嘅速度。咁呢個本身市場已經知，但真係慎防會唔會忽然間話加快（雖然照計唔會啩，但警告定你）

加75定100？唔難估吧，當然「過去唔代表將來」

9. 第一個最多人關心嘅問題，雖然未必係最重要嘅問題，就係：今次加幾多？答案：絶大多數機會係0.75厘，雖然冇包生仔。上星期個CPI數字後，市場講法，同埋期貨市場都有估加1厘，但似乎真係成唔到主流，聯儲局亦冇出嚟明示暗示。

10. 富國嘅策略師都估只會加0.75厘，亦相信鷹派立場和通脹已處頂峰，今次係最後一次加0.75，之後會0.5。（當然，任何觀點你都可以搵到人支持你，但我記得呢條友算比較「準」）

11. 而你睇最新CME Fed Watch（懶貼圖了），80%以上係加0.75。照計冇走雞，因為聯儲局好少咁樣忽然震憾你（當然，唔係冇可能）

12. 所以照計星期三加0.75冇乜懸念，點都係睇再之後，就比較有趣。好多問題可以問。

「咁通脹幾時見頂？」—見咗頂啦，冇變喎

13. 討論落去之前，冇法唔快講一講，100億美金嘅問題，通脹幾時見頂。下篇文會成篇講，但而家畀少少概念你。經濟師就大約係咁樣估—照計唔會爭太遠。正如我講，上星期個數字，不見得真係改變晒啲預期。留意個圖係PCE，唔係CPI。

14. 我用德銀嘅預測，唔係因為特別準，係因為陣間仲會有同一間行嘅利率預測，所以畀你大約有個概念。咁幾明顯係，通脹已見頂，已回落中，但落得有幾快，點先叫「夠低」，就你自己睇圖研究。

聯儲局今年仲會加幾多息？

15. 好啦，睇睇最新嘅利率期貨預測。首先，而家係預今年加多2厘息。之前估嘅75—50—25就只係估1.5厘。咁但，今年剩返3次議息，而今次應該係0.75，咁剩返兩次要1.25，即係一次0.75，一次0.5，「其實仲係會見到開始放慢」

聯儲局又會加息加到咩水位先停？

16. 另外，睇德銀嘅預測，就估會加到去5厘。留意下面都會用返類似嘅圖。

17. 但市場暫時共識呢，大約係加到4.5厘。留意，上星期出個CPI數字前，係估到加4厘，固然升溫。不過好得意嘅係，你見個時間表，係冇乜變的，都係預去到2023年5月左右見頂，只係而家預接下嚟呢半年加得更快手。咁加咗息幾時減？下面會解

重申：長債債息升股市死（而唔一定係聯儲局加息）

18. 即使在股市未大跌前，2020年尾（自己搵，我懶搵）我都寫過篇長文，股市同長債（10年美債）債息好有關係。10年債息受乜影響就好深，而家你會覺得係因為加息，但以前又未必係。但都唔係最重要，最重要你知道，10年債息而家差不多3.5%，股市當然冇運行，長期讀者應知

19. 再唔明嘅，你睇我今期經濟一週篇文，或者過兩日我都會在Facebook貼篇長版（attachment兩篇都有）

20. 咁呢度亦都見到，有個明顯嘅數字，見到如果債息升盈利又跌，股市就實唔掂（鬼唔知咩）

21. 其實都唔止股市死，係債市都死的。分分鐘可以輸得多過股市。

22. 所以問題係，10年債息幾時落？就研究下。而如果你認為今次債息升係因為聯儲局加息（我一半半），咁你亦即係會想問，聯儲局幾時停加息。或者幾時放慢？幾時減息？全部可以研究下。再強調，當然未必「準」。但大約有個概念。

換個角度問，有乜令聯儲局收手？睇股市？睇油價？睇失業率？

23. 呢個係另一個有趣嘅演繹，甚至比起你問「加到幾多厘停」「加到邊個月停」更有意思。因為聯儲局好大程度都係睇數字，所以你問乜嘢位停，邊日停，未必有意義。反而你問「去到發生乜事會停」，就比較有意思。

24. 咁你見到，去到咩位聯儲局會pivot（唔識點譯做中文，「轉軚」？「收手」？）？有乜出現佢先會咁做？答案係，主要都係睇PCE。一般認為PCE去到4%，就會見到pivot。

25. 另外有啲人估，到首次申領失業救濟人數升300%，就會停。至於油價，係冇人覺得聯儲局會關心（留意，呢度係指國際油價，同美國嘅幾多美金一加侖，係兩回事）．同樣地，亦冇人覺得聯儲局會睇GDP。記住啦喎

聯儲局會「救市」嘅謬誤。救乜市先？

26. 順手講埋，統計呢堆基金經理，好少人認為股市跌會令聯儲局出手，明顯同你街邊聽到啲友講「聯儲局會救股市」完全唔同。以前都寫過呢個謬誤。聯儲局向來都唔係救股市，只係因為往往金融系統有問題，股市就實死，聯儲局救前者就自動救埋後者咁解。但冇乜系統危機嘅跌市，例如而家咁，聯儲局根本唔care。又學到嘢啦。

27. 不過呢度當然有三個問題。第一，冇人話到你知PCE幾時見4%。但你可以大約睇啲友點估，我耐唔耐會update，聯儲局官方都有佢地嘅預計。第二，我唔肯定啲友指PCE，定係核心PCE（似乎係後者，而肯定唔係睇CPI）。當然仲有第三，其實我唔肯定啲人點理解Pivot，會唔會個個嘅理解都唔同？減息先算？定停加已經算？定唔加75加50已經算？定暗示會加50已經算？似乎呢，pivot係指最後一次加息

28. 所以，都係大約有個概念。係咁架啦，但冇問題，學會接受好多嘢就係未知，總好過自以為乜都識。