因為跌咗4%，你先覺得個通脹數好大件事啫。如果唔跌你又點反應？大跌後三件事：今年美股唔止一日跌4%，以前只有衰退先會咁情況。99%股票都跌，「之後實反彈」。分析員已經冇再下調盈利預測。不過下年第一季盈利低過今年第四季，係咪倒退？美匯指數，應該差不多見頂了，周期嘢。 美匯指數好強？20年高位。但美股升咗幾多？太古城升咗幾多？50年間，美匯最低85，最高亦只係135，冇得大單邊 (Patreon)

因為跌咗4%，你先覺得個通脹數好大件事啫。如果唔跌你又點反應？

大跌後三件事：今年美股唔止一日跌4%，以前只有衰退先會咁情況

大跌後三件事：99%股票都跌，「之後實反彈」

大跌後三件事：分析員已經冇再下調盈利預測

不過下年第一季盈利低過今年第四季，係咪倒退？

美匯指數，應該差不多見頂了，周期嘢

美匯指數好強？20年高位。但美股升咗幾多？太古城升咗幾多？

50年間，美匯最低85，最高亦只係135，冇得大單邊

十分矛盾，呢排陸續睇返多啲嘢，但結果更加忙，更加多嘢要消化。有時未必日日有文。不過我估大家寧願我寫深度啲，好過只係寫太短期嘅市況

星期三嘅大跌市，美股單日跌4%，2020年6月以嚟最勁，的確值得講下。呢篇先講股市，下篇先講返通脹數字（係呀，有排講）同埋加息嘅前景。

因為跌咗4%，你先覺得個通脹數好大件事啫。如果唔跌你又點反應？

1. 因為標普指數跌咗4%，所以大家就非常擔心。固然個通脹數字係差，但係咪忽然間形勢大變？似乎唔係。我依然相信通脹見頂，之後會慢慢回落。呢個大勢應該冇乜變。不過呢個留返下篇講。

2. 一切，都係因為跌咗4%你先忽然擔心啫。如果出完個數字冇大跌，你又會覺得問題。但好正常，人都係會畀市場反應影響返自己嘅判斷，人人都會，只係程度上。你實係會覺得「無緣無故點會咁跌」。雖然好多時股市都係無緣無故咁升，又無緣無故咁跌，事後找理由。咁而今次嘅理由，幾明顯因為之前大家太坐定粒六。所以數字稍為走樣，反應就好大。但又見之後兩日（星期三同四），冇再點大跌。

3. 當然人嘅預期好奇怪，同你睇市況好定差咁，一般人都只係睇最近發生嘅嘢，或者佢地聽到嘅嘢。2020年3月後嘅，見日日升，咪覺得每一日都會升。見日圓120嘅，就會估130，140—但總會有個位轉向。雖然就係極難捉

4. 在股市嘅情況，長期讀者都聽過，好大程度因為估值會在平貴之間發嚟發去。匯率就可能受嗰啲悶嘢（息差，通脹，印咗幾多錢）影響。但通脹唔係可以「交易」嘅嘢，又係另一種機制

5. 下篇先講返通脹數字同息口前景

大跌後三件事：今年美股唔止一日跌4%，以前只有衰退先會咁情況

講到大跌，可以講三樣嘢。

6. 首先，今年10月未到，標指試過2日跌多過4%。以往見到，差不多實係衰退嘅年份先會有呢啲嘢。咁呢個絶對不足為奇，雖然你見美國啲就業數據勁，都真係好多人唔知到底經濟得定唔得，但我一路都傾向覺得係會衰退（但當然唔太肯定）。對，一個職位增長強勁嘅衰退，好少見。但可能係咁

7. 記唔記得之前已經出咗連續兩季GDP負增長？只係拜登耶倫等等講「連續兩季負增長不一定係衰退」。理論上啱，但實際上過去十次，連續兩季GDP負增長，都見到衰退。對上一次冇一齊出現，係1947年了

8. 而家似乎更加明顯，反正唔衰退都好可能加息加到退衰。你見World Bank都寫全世界接近衰退（都應該唔止接近了），Barclays 都係咁估。

9. 當然每種意見都總會有人講，所以只供參考，同埋重點係背後嘅論述，唔係結果。呢點亦係教你思考，唔好只睇人地講升定跌，準唔準，你要睇係背後嘅理據，同埋人地點思考。實情唔只金融，好多嘢都係，唔好只睇立場同結果。

10. 咁都講過，衰退咪衰退咯。衰退股市跌？係喎，跌咗啦。唔係講笑，真係到衰退時，就反彈了。2009同2020都係咁，雖然歷史未必次次一樣。

大跌後三件事：99%股票都跌，「之後實反彈」

11. 第二樣嘢，星期三嘅大跌，非常「全面」，99%股票都跌。咁以往都見到，以往出現呢啲情況，之後嘅回報，往往不錯。呢類「跌完會升」嘅東西都提過唔少次。不過今次留意兩樣嘢：首先，今次睇嘅再短期啲，一兩日至一個月。

12. 另外，正如多次提過，「美股多數都係升嘅」，往往你conditioned on 任何嘢都會咁結果。用人話講，即係你去研究「咁咁咁現象之後，多數都升」，你個「咁咁咁」係好多嘢都得。所以重點唔係睇「咁咁咁」之後係咪升（多數都係），而仲要睇個升幅係埋多過平均。咁呢個情況，見到都應該係嘅。

13. 當然老問題了，首先「過去唔等於將來」，幾時啱用幾時唔啱，睇經驗同埋智慧，都幾主觀。另外當然，平均正數不等於次次正數。仲有最重要係，因為你見呢個統計嘅時間短，所以升幅唔會大，唔似之前做一年三年嗰啲。咁你話一個月後平均升幾個%，係「轉勢」定「熊市反彈」，就真係拗天光都冇結果。因為首先你要定義咩叫熊市，咩叫熊市反彈。

14. 不過，呢類東西，唔多唔少有啲cherry picking 或data mining，事後搵規律，實搵到的。所以真係要留意埋背後個理據（呢個情況我覺得係OK嘅）。同埋，至少可以用嚟反駁，跌開繼續跌嘅講法。

大跌後三件事：分析員已經冇再下調盈利預測

15. 仲有個對股市比較好嘅現象：建議你集中睇下半截。唔同顏色嘅線，你見到係嚟緊唔同季度，分析員估標普指數成份股嘅每股盈利。例如藍色線係今年第三季，紅色虛線係今年第四季咁。打橫嘅係時間，即係代表呢啲數字，過去一兩年點樣演化。咁你見到，每一條線都，早兩個月係不停向下嘅，即係分析員調低啲盈利預測。但到近排，似乎已經夠皮，冇再調低，好可能因為第二季嘅業績企得硬。當然有可能會再調，但暫時似乎係好事。

不過下年第一季盈利低過今年第四季，係咪倒退？

16. 可能有人奇怪，淺錄色線（下年第一季）低過紅色虛線（今年第四季），係咪盈利倒退？短答案係。不過留意美股嘅季度盈利好有季節性，特別啲消費股（你可以睇下蘋果啲盈利，每季爭好遠，因為年尾過節）。所以按季比較有時唔太好。啲友反而係會睇個按年增速：即係今年第四季同舊年第四季比升幾多，然後睇下今年第三季同舊年第三季比升幾多，兩者去比較。

17. 另外，其實拎住呢啲數字，你已經計到標普指數嘅市盈率。咪將未來四季加埋佢。但當然平時你要搵呢啲數字有啲難。最好公司有Bloomberg 之類。上網搵都得，但比較花時間。

美匯指數，應該差不多見頂了，周期嘢

 18. 最後同大家分享兩個圖。有些少常識嘅，應該睇到兩個圖嘅分別。我遮住個標題你都知邊個圖打邊個。一個係德銀整理嘅美匯指數，一個係美股（加埋美金購買力）

19. 又，德銀個圖擺明話你知，美匯指數應該差不多見頂。始終係周期嘢，cyclical，但股票唔可以咁樣計平均，因為係secular，長期趨勢，美股唔會返返50年前嘅水平。

20. 類似嘅嘢，在明報嘅文之前講過（attachment有），不再長篇大論。但好快話你知，外匯唔係投資，因為匯率呢啲嘢係相對。你睇今年，美匯大單邊。但你睇長少少，真係長期只係發上發落。

美匯指數好強？20年高位。但美股升咗幾多？太古城升咗幾多？

21. 原因以前都講過，匯率係相對嘅，你加息人地都會加。況且會有一個negative feedback 機制（你當好似冷氣機恒溫咁，又或者聯繫匯咁），太強自然會吸引到啲嘢整返弱佢（例如會打擊出口），主流貨幣嘅，冇乜可能十幾廿年大單邊。

50年間，美匯最低85，最高亦只係135，冇得大單邊

22. 相反，股價＝每股盈利X市盈率（或者市值＝純利X市盈率）。市盈率就發上發落，似足匯價。盈利呢？都係發上發落，但長期向上—特別你講全個股市的話。標普指數盈利可能返返5年前，10年前，但總冇可能返返100年前。因為通脹，同埋經濟增長，科技進步。

23. 所以你去擔心匯率，冇乜意思。上面圖冇實數，但呢度嘅圖話你知（留意夠長，但冇咗最近兩三年，而家110左右），最近廿幾三十年美匯指數最低不過85，最高亦只係115，35%嘅range—股票一年高低位都唔止。即使你計埋70年代歷史新高，亦只係130，但你睇美股升咗幾多倍？所以美匯指數，擺明只係cylical，而股票先係secular

24. 識得兩者分別，非常重要。我今期在信報月刊寫嘅文都係寫呢樣。Attachment 有。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。