美股大瀉點算好？仲有冇得跌？冇呃你，「通脹係見頂喎！」，不過個數字仲係好差嘅。 睇下CPI同核心CPI，到底由乜帶動，點解一地眼鏡碎。明明商品價格回落，但做乜CPI唔跌？「但明明商品價升又傳導晒畀客喎」。係喎，所以你要買股票。市場走勢係人嘅遊戲，所以難估。但通脹呢啲死數字，點解專家都錯晒？ 但你笑專家食屎，你又有幾準？唔好咁自大。而我唔覺得個通脹真係「轉勢」，只係回落得冇預期咁快。有人話會加1厘息，我估…..唔會啩。但我可能錯呢。加到衰退先停手？唔奇丫，「一向都係咁」。但邊個話衰退唔應該買股票？美股急瀉，因為事前太樂觀了。VIX先24。一出通脹數字就出事。不過又留意，中長線嚟講，機構投資者仲係好悲觀，滿手現金。仲有，中期選舉年，第四季多數有得升。 (Patreon)

美股大瀉點算好？仲有冇得跌？

冇呃你，「通脹係見頂喎！」，不過個數字仲係好差嘅

睇下CPI同核心CPI，到底由乜帶動，點解一地眼鏡碎

明明商品價格回落，但做乜CPI唔跌？

「但明明商品價升又傳導晒畀客喎」。係喎，所以你要買股票

市場走勢係人嘅遊戲，所以難估。但通脹呢啲死數字，點解專家都錯晒？

但你笑專家食屎，你又有幾準？唔好咁自大。

而我唔覺得個通脹真係「轉勢」，只係回落得冇預期咁快

有人話會加1厘息，我估…..唔會啩。但我可能錯呢

加到衰退先停手？唔奇丫，「一向都係咁」。但邊個話衰退唔應該買股票？

美股急瀉，因為事前太樂觀了。VIX先24。一出通脹數字就出事

不過又留意，中長線嚟講，機構投資者仲係好悲觀，滿手現金

仲有，中期選舉年，第四季多數有得升

你睇啲網友講，會以為民主黨中期選舉一定大敗。Really？

美股大瀉點算好？仲有冇得跌？

1. 星期二晚一出個CPI數字，美股大瀉（跌4-5%），先講個數字本身先，再講市。

冇呃你，「通脹係見頂喎！」，不過個數字仲係好差嘅

2. 首先講個Headline CPI，上次按年升8.5%，街估8.1%。結果出嚟嘅數係升8.3%，係呀睇數字係回落，但都幾明顯高過市場嘅預期，回落得唔夠快。又一示範，呢啲經濟數據或公司盈利，你講「升跌」「好壞」唔係重點，重點係同預期比。你不停死拗話「明明回落咗，點解股市跌」，就冇意思嘅。今次市場反應幾合理。

睇下CPI同核心CPI，到底由乜帶動，點解一地眼鏡碎

3. 另外睇按月升幅，上次係持平，街估按月跌0.1%或0.2%。結果？按月升0.1%，呢個更加難睇，明明預按月跌，點知按月升。

4. 另外，核心CPI方面，原本期望都冇預回落，點知出嚟更差。上次係按年升5.9%，街估5.9-6.1%，點知出嚟嘅6.3%，高過上次，相當難睇。

5. 如果睇按月嘅，核心CPI街估按月升0.3%，同上次一樣，結果出嚟嘅係升0.6%，爭成倍，都幾誇張。

6. 點解會爭咁多？等我睇多啲數字，下一篇文再講。但如果講Headline CPI，應該主要係因為食品價格升幅高過預期，而唔係汽油（相對地汽油價好透明，好易睇到）。

明明商品價格回落，但做乜CPI唔跌？

7. 亦證明啲大宗商品（小麥粟米大豆）價格回落，未必咁快傳導落去消費者度。但你話，升嗰時又好似即時傳導喎。似乎真係咁的，因為企業始終有相當嘅pricing power，減就唔益你，加就傳畀你。所以你見好多政府都用啲行政手段，最簡單咪針對啲能源企業，限加價，抽稅之類。但食品企業就難搞啲。

「但明明商品價升又傳導晒畀客喎」。係喎，所以你要買股票

8. 之前都有寫過呢個現象，大企業有加價能力，所以通脹往往對盈利打擊唔大。但對股市嘅打擊，嚟自影響投資情緒同估值。你睇而家10年美債3.5%，市盈率點都受影響。不過記住，估值始終係鐘擺，走嚟走去，但盈利係可以長升長有嘅。

市場走勢係人嘅遊戲，所以難估。但通脹呢啲死數字，點解專家都錯晒？

9. 至於點解核心（扣除咗能源食品啦下）CPI高過預期咁多？似乎係因為租金，同埋醫療開支。但只係初步觀察，下一篇文先詳細講。

10. 呢度真係要講，成套數字，令到一街都大跌眼鏡（包括我）。當然你口痕講「專家廢」就好容易，但到你估錯時你又側側膊唔多覺之嘛。試下你每次都寫低，睇下你錯得多定專家錯得多？

但你笑專家廢，你又有幾準？唔好咁自大。

11. 以前都講過，估市場走勢難估，因為係人嘅遊戲。但呢啲經濟數字應該冇咁難，因為只係死物，學者經濟師都有大量數據，亦有認真咁去做，唔係求其吹水。但都可以齊齊錯得幾勁。個教訓唔係「專家冇用」，而係專家咁多數字咁多經驗都有時會大錯，你更加唔好高估自己嘅能力。

而我唔覺得個通脹真係「轉勢」，只係回落得冇預期咁快

12. 不過我自己，唔覺得個CPI數字真係咁「差」—單月嚟睇當然係差，但唔係話去到忽然間見到通脹狂升。你睇Headline數字都係落緊，只係回得冇預期咁快，但應該點都見頂。當然在高位徘徊幾耐係另一問題，正如股市見咗底，又不等於即時升，升又不等於唔會回返，一路升又唔等於會好快破頂，全部係唔同嘅嘢。

13. 另外留意，即使係「原本」嘅估計，都唔係話太樂觀，都係估個核心CPI維持在高水平，係要啲時間的。而家可能再長啲，但似乎個勢頭係冇變嘅—都係通脹見咗頂，未必好快回落。但似乎息都係會繼續加。

有人話會加1厘息，我估…..唔會啩。但我可能錯呢

14. 然後呢度就要講加息。月尾加0.75%，早早冇懸念，而家有人開始擔心會加1%。你見升溫得好快，睇CME Fed Watch，已經近40%機會加1厘。我個人覺得應該唔會。

15. 但留意，即使聯儲局一路都只係想加0.75%都好，正路地聯儲局唔會呢兩個星期出嚟「降溫」—話畀你知0.75%事小，但至怕你自作多情認為聯儲局就快放鬆，所以正路佢地應該唔出聲。甚至將計就計。

16. 所以嘛……我係估只係加0.75%，但有機會錯的。

17. 另外之前都講過，主流意見就覺得，11月嗰次加0.5，12月嗰之加0.25，而家當然全部再計過數，你可以睇CME FedWatch，有埋之後兩次。問題係，因為9月尾呢次，係0.75定1都未知，六四之比有點尷尬。所以你睇之後兩次嘅數字，好難準確演繹，唯有遲下先再睇。肯定嘅係，啲預期都再升溫。

加到衰退先停手？唔奇丫，「一向都係咁」。但邊個話衰退唔應該買股票？

18. 有個講法話會加到衰退先停，亦都唔奇。遲下搵圖，但以往見到，就真係比較少情況，係唔衰退而可以令通脹降溫嘅（但唔係冇）。但又係嗰句，衰退又如何？未見過咩？2009同2020嘅衰退，正係買股票最好時機。當然邊個位先係「底」就好難答，但至少暫時美股都未穿今年嘅底。

美股急瀉，因為事前太樂觀了。VIX先24。一出通脹數字就出事

19. 講返市況，美股急跌，事後嘅解釋亦都合理。除咗明顯地因為個通脹數字高，亦因為之前積落好多樂觀嘅預期。美股之前已經連升4日，大路嘅估計都估個通脹數字唔會難睇，然後估9月0.75，11月0.5，12月0.25，幾美好。

20. 仲有可以留意，即使星期三嘅大跌後，VIX冇錯係單晚抽升11%（完全唔算多，一日升兩三成都見過），但亦只係去到27樓下—以前都講過一個30定律，唔係十分準（冇得完全準的），但以前大約見VIX上到30後買就往往中線一兩個月回報不錯。咁27，完全唔係高嘅水平。未抽上嚟前，即係24左右咋喎，明顯係十分「老定」，就會出事。

不過又留意，中長線嚟講，機構投資者仲係好悲觀，滿手現金

21. 中長線，可以睇返兩樣嘢。首先，見到機構投資者，本身已經相當悲觀。見到之前幾次，都係反彈嘅訊號（特別2008同2020）

22. 另外，持有現金嘅水平高，原理一樣。

23. 仲有，配置股票嘅比例，亦係相當低。

24. 呢啲往往係一個相反訊號，諗下都好合理，個個冇現金，人人買晒，咁仲邊有得上？亦有實證見到，上次7月嘅反彈浪之前，亦都見到咁嘅情況。有機會可以細講。（留意調查公佈係7月尾，即係啲數字係月頭咁上下）

仲有，中期選舉年，第四季多數有得升

25. 另外，呢個圖都貼過。雖然唔係極大參考價值。但的確以往見到，美股走勢往往係年頭好，年中停一停，去到年尾升。而在中期大選嘅年份，更加明顯。

你睇啲網友講，會以為民主黨中期選舉一定大敗。Really？

26. 有興趣嘅，講多兩句，你睇香港啲網友講，會以為民主黨大敗。留意而家眾議院（House of Representatives，簡稱叫House）同參議院（Senate）都係民主黨控制。而史上差不多每次中期選舉，總統嘅政黨都會輸眾議院。話你知Economist 嘅model（訂戶先睇到），都係咁估，但就估民主黨會保住參議院大多數，似乎已經係個幾好嘅結果。最後當然會有人問，準唔準？都OK準嘅，上次都係估拜登勝選，但當然希拉莉嗰次多數人都錯，選舉人票嘅制度令到預測相當難。

27. 聽日會再講多啲通脹數字。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。