ivanliresearch

過幾日先寫「貨幣戰爭」結局篇（英鎊，歐元，加紙，港紙，人民幣）。發霉港股都彈600點，估你唔到。「一人買房全家幫」嘅嘢。大陸輸出通縮，咪好咯。美股之前反彈近20%，但蒸發一半升幅，而家升四日，又追返一半。月尾鐵定加0.75%，債息又3厘幾高位，聯儲局主席又強硬。點解仲升？今晚，就肯定見到通脹回落！與此同時，見到3年通脹預期跌到低過3%，兩年低位。係通脹見頂，但冇話好快回落，亦冇話話會停加息喎。但同樣地，冇話繼續加息唔可以升喎。仲有幾多次加？計計數，今年剩返兩次，又點玩法？加到4厘？而家都3厘啦！ (Patreon)

Published:

2022-09-13 03:47:47

Edited:

2022-09-13 05:03:04

Imported:

2022-09

Content

過幾日先寫「貨幣戰爭」結局篇（英鎊，歐元，加紙，港紙，人民幣）

發霉港股都彈600點，估你唔到

「一人買房全家幫」嘅嘢

大陸輸出通縮，咪好咯

美股之前反彈近20%，但蒸發一半升幅，而家升四日，又追返一半

月尾鐵定加0.75%，債息又3厘幾高位，聯儲局主席又強硬。點解仲升？

今晚，就肯定見到通脹回落！

與此同時，見到3年通脹預期跌到低過3%，兩年低位

係通脹見頂，但冇話好快回落，亦冇話話會停加息喎

但同樣地，冇話繼續加息唔可以升喎。仲有幾多次加？

計計數，今年剩返兩次，又點玩法？

加到4厘？而家都3厘啦！

過幾日先寫「貨幣戰爭」結局篇（英鎊，歐元，加紙，港紙，人民幣）

1. 寫咗兩篇「貨幣戰爭」，（呢度，同呢度），相當費神，中秋休息咗幾日。不過結局最後兩篇（講英鎊歐元加紙港紙人民幣等等），過幾日先寫，寫返少少市況先。因為又開始值得寫。

發霉港股都彈600點，估你唔到

2. 首先係發霉嘅港股，中秋節前居然彈返500幾點，估你唔到。啲「理由」係有點牽強嘅，但，都話只係narrative．係咪夠殘？都怕且係，但港股一路跑輸，當然有啲結構性嘅原因，以前寫過。

3. 港股強嘅理由，除咗跟美股，就係大陸一啲似乎「支持房地產」嘅政策，話「一人買房全家幫」，即係父幹，個仔買樓老豆供，仲可以用埋老豆公積金。實情並唔係咩好新鮮嘅嘢。

「一人買房全家幫」嘅嘢

4. 另外，比較真係正面啲嘅，就係大陸嘅CPI一路都低，低過預期。固然部份係因為經濟唔好，但亦真係有助拉低全球通脹（特別係香港）。另外，人民幣亦都反彈，其實係因為美匯指數去到兩星期低位，一般亦對股市好。

大陸輸出通縮，咪好咯

5. 不過，重點始終係美股。美股7月低位反彈近20%，好大程度係估通脹見頂，加息減慢，但到8月開始有啲燶味，到月尾聯儲局主席鮑威爾在Jackson Hole講話後，講明「不到目的不罷休」，美股就將7月嘅升幅蒸發一半，由7月高位差不多跌10%。但到近日，又再收復返一半，低位差不多彈返5%

美股之前反彈近20%，但蒸發一半升幅，而家升四日，又追返一半

6. 事實美股上星期三大指數升咗3-4%，終止咗之前連跌三個星期。近期亦都連升四日（留意蘋果好強勢，除咗新iPhone外，留意將來嘅廣告收入，遲下詳細講）。特別留意嘅係，美國10年債息而家都位於近期嘅高位，而鮑威爾近期嘅言論都仲係繼續強硬。

7. 至於你講今個月尾嘅加息，照計塵埃落定，肯定係加0.75%，自己睇CME Fed Watch，我都懶貼圖。留意，今晚會出個CPI數字，下面講，但照計無論個數字點靚都好，都唔會影響聯儲局今個月加0.75%嘅決定（但可能影響之後幾次）

月尾鐵定加0.75%，債息又3厘幾高位，聯儲局主席又強硬。點解仲升？

8. 點解加息預期高，債息又高，聯儲局主席講嘢又強硬，但美股照四連升？冇乜點解，理由好多時係事後搵。而幾肯定嘅係，市場不可能成個月都驚同一樣嘢，總係會消化咗。例如月尾會加0.75%，應該真係消化晒。

9. 美股升乜？又係嗰味，又估通脹回落，又估停加息。我嘅睇法都同之前兩個月差不多：通脹，就相當肯定見咗頂，亦都會回落，但未必係好快。至於停加息，應該冇咁快，但可能會減慢加息

今晚，就肯定見到通脹回落！

10. 今晚出嘅CPI數字，又係相當關鍵。睇Trading Economics（TE）嘅數。CPI上次係按年升8.5%，今次街估按年升8.1%，顯著回落。更重要嘅係，唔止係舊年嘅基數效應，睇按月比，上次係按月持平，街估按月跌0.1%（摩根士丹利亦係咁估，有興趣嘅睇上面嘅圖），TE甚至係估按月跌0.2%。

11. 回落嘅原因好多，例如大家都知嘅油價高位跌咗三四成。另外，食品價亦顯著回落。

12. 另外，之前一度急升嘅二手車價，已經回落不少。

13. 當然強美元亦令入口價格冇急升

與此同時，見到3年通脹預期跌到低過3%，兩年低位

14. 與此同時，見到紐約聯儲局個調查報告，受訪者嘅通脹預期繼續跌。一年期嘅，之前係預6.2%，而家預5.7%，連跌幾個月。三年期嘅，之前3.2%，而家2.8%，差不多兩年最高了。當然呢啲數字隨時可以變，但都講過通脹好有「預期自我實現」嘅特性，似乎聯儲局成功扭轉咗啲友嘅預期。

係通脹見頂，但冇話好快回落，亦冇話話會停加息喎

15. 不過留意，核心（扣除食品同能源）CPI，情況就冇咁靚仔。上次係按年升5.9%，TE估今次都一樣，但街估係6.1%，數字又高返。另外，如果睇按月嘅變化，街估按月核心CPI升0.3%，同上個月一樣。

16. 即係，核心物價繼續升喎，聽落當然唔多好。

17. 事實見到，啲經濟師紛紛上調下年嘅核心PCE（唔係CPI）預測。

18. 即係點？即係同之前講嘅差不多，通脹明顯見頂，但冇咁快回落，可能會在高位繼續維持一陣。而聯儲局亦會繼續加息。

但同樣地，冇話繼續加息唔可以升喎。仲有幾多次加？

19. 但記住，冇話繼續加息，就冇得升。市場一路會估幾時減息，甚至只係估放慢加息，已經足以令股市反彈。近排亦似乎係咁情況

20. 絶對要留意，今個月尾加0.75%，已經反映晒。而我亦相信即使今晚出嘅CPI數字好靚，都唔會影響呢個決定。合理嘅，冇理由稍為見到一兩個月回落就即時放軟手腳。

計計數，今年剩返兩次，又點玩法？

21. 關鍵係，之後嗰幾次又點（今年仲有兩次會，一次11月頭，一次12月中）？幾時開始放慢，幾時開始停，幾時減？呢幾個月都係不停憧憬呢啲嘢，係唔止一次落空，但又會再期待過，總有一日會成真！

22. 呢度特別留意，近期唔止一個聯儲局官員，都講加息要加到4厘。聽落好似好多，但計下數，由0-0.25起步，今年加咗次0.25，一次0.5，兩次0.75，月尾嚟多次0.75，已經3-3.25。咁其實，加多0.75，就上限已經夠數。好可能今年剩低兩次，會真係減慢，可能一次0.5，一次0.25咁。你亦可以睇CME Fed Watch（可以睇埋未來幾次的），都係預示咁上下情況。

23. 即係，加埋今次0.75就夠皮，下次就變0.5，再下次變0.25。冇話實升，但要升的話，呢個係個好好嘅 narrative